ფაბრეგასი „ჩელსის“ უნდა

ლონდონის „ჩელსი“ „ბარსელონას“ ნახევარმცველ ფრანჩესკ ფაბრეგასისთვის ბრძოლაში ჩაერთო.

მანამდე გავრცელებული ინფორმაციის თანახმად, ესპანელი ფეხბურთელის მიმართ ინტერესს „არსენალი“, „მანჩესტერ იუნაიტედი“, „ლივერპული“ და „მანჩესტერ სიტი“ იჩენდნენ, თუმცა ესპანურ პრესაში წერენ, რომ ფაბრეგასისთვის ბრძოლაში ერთ-ერთ მთავარ პრეტენდენტად სწორედ „ჩელსი“ ითვლება.

კატალონიური გამოცემა „მუნდო დეპორტივო“ წერს, რომ „პენსიონერთა“ მთავარი მწვრთნელი ჟოზე მოურინიო პირადად არის დაინტერესებული ფაბრეგასის ტრანსფერის გაჩარხვით, რადგან ფეხბურთის პორტუგალიელი სპეციალისტი მას ფრენკ ლამპარდის შემცვლელად მოიაზრებს.

კონტრაქტის თანახმად, 27 წლის ფეხბურთელის გამოსასყიდი თანხა 30 მილიონ ფუნტ სტერლინგს ან 40 მილიონ ევროს შეადგენს.

ფაბრეგასმა გასულ სეზონში „ბარსელონას“ რიგებში 48 მატჩი ჩაატარა და 9 გოლი გაიტანა.

ბექა დოგრაშვილი