მარკო როისი: „ჩემი ოცნება ერთ წამში დაიმსხვრა“

გერმანიის ნაკრების ნახევარმცველი მარკო როისი ბრაზილიაში გასამართ მსოფლიოს ჩემპიონატს გამოტოვებს.

25 წლის ფეხბურთელმა ტრავმა სომხეთის ნაკრების წინაარმდეგ გამართულ ამხანაგურ მატჩში (6:1) მიიღო.

„არ ვიცი, სიტყვებით როგორ აღვწერო ის, რასაც ახლა ვგრძნობ. ჩემი ოცნება ერთ წამში დაიმსხვრა. ახლა რეაბილიტაციის კურსი უნდა გავიარო. პროფესიონალი ვარ და მომავალზე უნდა ვიფიქრო“, – როისის სიტყვებს „ბილდი“ აქვეყნებს.

გერმანიის ბუნდესლიგის გასულ გათამაშებაში როისმა 30 მატჩში 16 გოლი გაიტანა და 13 საგოლე გადაცემა გააკეთა.

შეგახსენებთ, რომ მსოფლიოს ჩემპიონატის ჯგუფურ ეტაპზე გერმანიას მეტოქეებად პორტუგალიის, განისა და ამერიკის შეერთებული შტატების ნაკრებები ჰყავს. გერმანელები ტურნირის პირველ შეხვედრას 16 ივნისს პორტუგალიელების წინააღმდეგ ჩაატარებენ.

ბექა დოგრაშვილი