სამირ ნასრი: “ვარდი თაღლითია”

უეფას ჩემპიონთა ლიგის მერვედფინალურ ეტაპზე “ლესტერ სიტისა” და “სევილიას” შორის გამართული საპასუხო მატჩის 74-ე წუთზე ანდალუსიელთა ფრანგი ნახევარმცველი სამირ ნასრი მასპინძელთა ფორვარდ ჯეიმი ვარდის წაეკამათა და თავი თავში დაარტყა, რისთვისაც მეორე ყვითელი ბარათი მიიღო და მოედანი ნაადრევად დატოვა. ნასრი ინგლისელ თავდამსხმელს თაღლითობაში ადანაშაულებს.

“ვარდი თაღლითია. იგი ინგლისელი რომ არ ყოფილიყო, ინგლისური პრესა მას აუცილებლად უწოდებდა თაღლითს. ისინი ანგარიშით 2:0 იგებდნენ. გვიგებდნენ, მაგრამ ეს არ ნიშნავს, რომ ჩვენზე უკეთესები იყვნენ. როცა იგებ ანგარიშით 2:0 და გადიხარ მომდევნო ეტაპზე, უნდა გეყოს ღირსება და კაცურად ითამაშო.

ვარდი მეუხეშა, შემდეგ კი ხელი მკრა. მე ვკითხე: “რას აკეთებ?” ის კი პირისპირ დამიდგა და შემდეგ მოხდა ის, რაც მოხდა.

გულწრფელად გეტყვით, მაგრამ არამგონია, გამოაქვეყნოთ. მასთან დალაპარაკება მინდოდა, მაგრამ იქ საკმაოდ ბევრი ვიდეოკამერა იყო. მომდევნო სეზონზე ფიქრი მმართებს, ხანგრძლივი დისკვალიფიკაცია არაფერს მარგებს”, – ნასრის კომენტარი “ბიბისიმ” გამოაქვეყნა.

თავის მხრივ, ჯეიმი ვარდიმ მხოლოდ იმას ამბობს, რომ თავს თაღლითად არ მიიჩნევს.