ზლატანი: “თუ მოვისურვებ, მსოფლიოს ჩემპიონატზე ვითამაშებ”

“ლოს ანჯელეს გალაქსის” თავდამსხმელი ზლატან იბრაჰიმოვიჩი შვედეთის ნაკრებში დაბრუნებას და 2018 წლის მსოფლიოს ჩემპიონატზე თამაშს არ გამორიცხავს. მანამდე შვედების თავკაცმა იანე ანდერსონმა განაცხადა, რომ თუ იბრაჰიმოვიჩი მუნდიალზე თამაშს მოისურვებს, მწვრთნელს უნდა დაუკავშირდეს.

“დაე, მათ თავად გადაწყვიტონ, უნდა ვითამაშო თუ არა მსოფლიოს ჩემპიონატზე. ისინი ამბობენ, რომ კარგი გუნდი ჰყავთ, მაგრამ რატომღაც ამ გუნდს არაფერი მოუგია, მე კი გამარჯვებების გემო ვიცი. ადრე ვთქვი და კიდევ გავიმეორებ: არავისთან არ მჭირდება დარეკვა. მსოფლიოს ჩემპიონატზე თამაშს თუ მოვისურვებ, ვინც რა არ უნდა თქვას, მე ტურნირზე ვიქნები”, – ციტირებს იბრაჰიმოვიჩის სიტყვებს AFP.