ბენზემა 2019 წელს გატანილი გოლების რაოდენობით მესის გაუთანაბრდა

გუშინ, ესპანეთის პრიმერადივიზიონის V ტურში მადრიდის “რეალმა” გასვლაზე “სევილია” ანგარიშით 1:0 დაამარცხა. ეს ერთადერთი გოლი კარიმ ბენზემამ მიითვალა, რომელიც 2019 წელს გატანილი ბურთების რაოდენობით “ბარსელონას” ლიდერ ლიონელ მესის გაუთანაბრდა. ფრანგსა და არგენტინელს მიმდინარე კალენდარულ წელიწადში უკვე 20-20 გოლი აქვთ მითვლილი, რითაც მეორე-მესამე პოზიციებს იყოფენ. გარდა ამისა, ბენზემა ხუთი გოლით პრიმერადივიზიონის მიმდინარე გათამაშების ბომბარდირთა დავას ლიდერობს. აქვე შეგახსენებთ იმასაც, რომ მესის ტრავმის გამო მიმდინარე სეზონის სტარტი გაუცდა.

2019 წელს გატანილი ბურთების რაოდენობით მიუნხენის “ბაიერნის” თავდამსხმელი რობერტ ლევანდოვსკი და “პარი სენ-ჟერმენის” ფორვარდი კილიან მბაპე ლიდერობენ, რომელთაც აქტივში 21-21 გოლი აქვთ.