“მანჩესტერ სიტი”–”რეალის” განმეორებითი მატჩი ჩაშლის პირასაა

უეფას ჩემპიონთა ლიგის მერვედფინალურ ეტაპზე “მანჩესტერ სიტისა” და მადრიდის “რეალს” შორის გასამართი საპასუხო მატჩი ჩაშლის პირასაა.

შეხვედრა, რომელიც 7 აგვისტოს არის ჩანიშნული, შესაძლოა, გაუქმდეს. მიზეზი გაერთიანებული სამეფოს მთავრობის გადაწყვეტილებაა, რომლის მიხედვითაც, 26 ივლისიდან ესპანეთიდან შემოსულ ნებისმიერ პირს 14-დღიანი საკარანტინო პერიოდის გავლა მოუწევს. აღნიშნული გადაწყვეტილება ესპანეთში კორონავირუსული ინფექციით დაინფიცირებულთა რაოდენობის ზრდას უკავშირდება.

ესპანური გამოცემა “ასი” წერს, რომ უეფა ამ სიტუაციაში ჩარევას არ აპირებს. ასე რომ, მატჩის ჩატარება-არჩატარება მთლიანად ბრიტანეთის მთავრობაზეა დამოკიდებული.

შეგახსენებთ, რომ წყვილის პირველი შეხვედრა “ქალაქელთა” გამარჯვებით, ანგარიშით 2:1 დასრულდა.