ამერიკელთა ორ მესამედს მსოფლიოს ჩემპიონატი არ აინტერესებს

ამერიკის შეერთებული შტატების მაცხოვრებელთა უმეტესობას მსოფლიოს ჩემპიონატზე მათი ნაკრების გამოსვლა დიდად არ აინტერესებთ. „როიტერ/იპსოსის“ მიერ ჩატარებული გამოკითხვის თანახმად, ყოველი სამი ამერიკელიდან მხოლოდ ერთი აპირებს მუნდიალზე საკუთარი ნაკრების მატჩებისთვის თვალყურის მიდევნებას, გამოკითხულთა მხოლოდ 7 პროცენტი გეგმავს მსოფლიოს ჩემპიონატის შეხვედრების ცქერას.

გამოკითხულთა 86 პროცენტს საფეხბურთო მუნდიალის შესახებ ან არაფერი, ან ძალიან ცოტა რამ სმენია. გარდა ამისა, გამოკითხულთა ორ მესამედზე მეტმა ისიც არ იცოდა, რომ 2014 წლის მსოფლიოს ჩემპიონატს ბრაზილია მასპინძლობს.

გამოკითხვის თანახმად, აშშ-ის ესპანურენოვან მაცხოვრებელთა დაახლოებით 30 პროცენტი აპირებს მუნდიალისთვის თვალყურის მიდევნებას.

შეგახსენებთ, რომ მსოფლიოს ჩემპიონატის დაწყებამდე 58 დღე დარჩა.

იხილეთ: 2014 წლის მსოფლიოს ჩემპიონატის კალენდარი

ბექა დოგრაშვილი