ბენზემა: “ზიდანი გუნდს დამაჯერებლობას, ახალ სათამაშო იდეებს სძენს”
უეფას ჩემპიონთა ლიგის მერვედფინალურ ეტაპზე მადრიდის “რეალს” მეტოქედ “რომა” ელის. “სამეფო კლუბის” თავდამსხმელმა კარიმ ბენზემამ მოახლოებული დაპირისპირების შესახებ ისაუბრა და ხაზი ზინედინ ზიდანის მუშაობასაც გაუსვა.
“რომა” გამარჯვებისთვის მთელ ენერგიას გაიღებს, ვინაიდან მეტოქე შინ ითამაშებს და ეს შეხვედრა მათთვის მეტად მნიშვნელოვანი იქნება. გამარჯვებისთვის ჩვენც ვიბრძოლებთ, რადგან გვესმის, რომ პირველი მატჩის შედეგი ძვირად ფასობს.
ზიდანი გუნდს დამაჯერებლობას, ახალ სათამაშო იდეებს სძენს. მე და ჩემი თანაგუნდელები მისგან ყოველდღიურად ვსწავლობთ. ვიცით, რომ იგი დიდებული ფეხბურთელი იყო და ფეხბურთზე ბევრის თქმა შეუძლია”, – ბენზემას კომენტარი უეფას ოფიციალურ ვებგვერდზე გამოქვეყნდა.
ცნობისთვის, მატჩი “რომასა” და “რეალს” შორის დამდეგ ოთხშაბათს შედგება და თბილისის დროით 23:45 საათზე დაიწყება.
