ბორის ჯონსონი: “კარგი იქნება, თუ ევრო-2028-ს უკრაინა უმასპინძლებს”
დიდი ბრიტანეთის პრემიერმინისტრი ბორის ჯონსონი უეფას 2028 წლის ევროპის ჩემპიონატის ჩატარებას უკრაინაში სთავაზობს. ჯონსონი თვლის, რომ ტურნირის მასპინძლობაზე რუსეთის მიერ განაცხადის გაკეთება არანორმალურია და უმჯობესი იქნება, თუ ჩემპიონატს უკრაინა მიიღებს.
“იმაზე ფიქრიც კი, რომ რუსეთს რაიმე სახის საფეხბურთო თუ კულტურული ღონისძიების მასპინძლობა სურს, სატირის ფორმას სცდება. არა მგონია, რომ მათი განაცხადი ვინმემ სერიოზულად განიხილოს. ჩემი აზრით, საუკეთესო ვარიანტი იქნება, თუ რუსული სამხედრო ძალები უკრაინას სასწრაფო წესით დატოვებენ და ევრო-2028-ის მასპინძლობის უფლება უკრაინას მიენიჭება”, – ციტირებს ჯონსონის სიტყვებს “გარდიანი”.
ევრო-2028-ის მასპინძლობაზე უეფაში სამი განაცხადია შეტანილი: დიდი ბრიტანეთი- ირლანდია, რუსეთი, თურქეთი. უეფა დაკმაყოფილებულ განაცხადებს 5 აპრილს გამოაცხადებს, ხოლო ტურნირის მასპინძელი 2023 წლის სექტემბერში გახდება ცნობილი.
