ჩემპიონთა ლიგა: მეთხედფინალური ეტაპის განმეორებითი მატჩების მსაჯები

უეფამ იმ მსაჯთა ვინაობა დაასახელა, რომლებიც ჩემპიონთა ლიგის მეოთხედფინალური ეტაპის განმეორებით მატჩებს მოემსახურებიან.

მიუნხენის „ბაიერნსა“ და „მანჩესტერ იუნაიტედს“ შორის გასამართ შეხვედრას იონას ერიქსონის თავკაცობით შვედ მსაჯთა ბრიგადა განსჯის. მატჩი 9 აპრილს შედგება. პირველი შეხვედრა ფრედ, ანგარიშით 1:1 დასრულდა.

ლონდონის „ჩელსისა“ და „პარი სენ-ჟერმენს“ შორის 8 აპრილს გასამართ მატჩს პედრო პროენსას ხელმძღვანელობით პორტუგალიელი არბიტრები მოემსახურებიან. პირველი შეხვედრა პარიზელებმა ანგარიშით 3:1 მოიგეს.

მადრიდის „ატლეტიკოსა“ და „ბარსელონას“ შორის 9 აპრილს გასამართ მატჩს გამოცდილი ინგლისელი არბიტრი ჰოვარდ უები მოემსახურება. როგორც მოგეხსენებათ, პირველი შეხვედრა ფრედ, ანგარიშით 1:1 დასრულდა.

დორტმუნდის „ბორუსიასა“ და მადრიდის „რეალს“ შორის 8 აპრილს გასამართ მატჩს სლოვენიელი არბიტრი დამირ სკომინა განსჯის. პირველი შეხვედრა მადრიდელებმა ანგარიშით 3:0 მოიგეს და თითქმის გაინაღდეს ტურნირის ნახევარფინალურ ეტაპზე თამაში, თუმცა გერმანელთა მთავარი მეგოლე რობერტ ლევანდოვსკი ამბობს, რომ „ბორუსიას“ ჯერ კიდევ აქვს შანსი.

ოთხივე შეხვედრა ჩვენი დროით 22:45 საათზე დაიწყება.

ბექა დოგრაშვილი