მოდრიჩი: “ბაიერნს” პენალტი აჩუქეს, ავტოგოლი თამაშგარის შემდეგ გავუშვით, ვიდალი ადრე უნდა გაეძევებინათ”
მადრიდის “რეალის” ნახევარმცველი ლუკა მოდრიჩი თვლის, რომ მისმა გუნდმა სრულიად დამსახურებულად მოიპოვა ჩემპიონთა ლიგის ნახევარფინალურ ეტაპზე თამაშის უფლება. ხორვატი ფეხბურთელის თქმით, მსაჯები “რეალის” საწინააღმდეგოდაც არაერთხელ შეცდნენ.
“საწყენია, რომ “ბაიერნთან” ჩვენი გამარჯვების შემდეგ ზოგიერთს ეჭვები გაუჩნდა. ჩვენ სრულიად დამსახურებულად გავედით ნახევარფინალში. ორი მატჩის ჯამში “რეალმა” მეტოქეზე უკეთესად ითამაშა.
ვერ ვიგებ, რატომ აკრიტიკებს ყველა გაზეთი ჩვენ სასარგებლოდ დაშვებულ შეცდომას და რატომ ვერ ამჩნევს იმ შეცდომებს, რომლებმაც მეტოქე ახეირა.
“ბაიერნს” არარსებული პენალტი დაუდეს. სერხიო რამოსმა ავტოგოლი თამაშგარე მდგომარეობის შემდეგ გაიტანა. არტურო ვიდალი უფრო ადრე უნდა გაეძევებინათ მოედნიდან.
საკლუბო მსოფლიო ჩემპიონატის შემდეგ ვიდეოგამეორებების შემოღების წინააღმდეგი ვიყავი, რადგან ეს სისტემა ჩემთვის უჩვეულო იყო, მაგრამ საფრანგეთისა და გერმანიის ნაკრებებს შორის გამართული ამხანაგური მატჩის შემდეგ პოზიცია შევიცვალე. ვფიქრობ, რომ ეს სასარგებლო ტექნოლოგიაა”, – მოდრიჩის კომენტარი “ასმა” გამოაქვეყნა.
