ოფიციალურად: ჩიჩარიტო “რეალში” ითამაშებს

“მანჩესტერ იუნაიტედის” თავდამსხმელი ხავიერ ერნანდესი კარიერას მადრიდის “რეალში” გააგრძელებს. კლუბებმა უკვე ოფიციალურად დაადასტურეს ტრანსფერი.

მექსიკელი ფეხბურთელი “სამეფო კლუბში” მთელი სეზონის განმავლობაში განათხოვრების წესით ითამაშებს. სეზონის ბოლოს “რეალს” ჩიჩარიტოს სრულად გამოსყიდვის უფლება მიეცემა. არაოფიციალური ინფორმაციის თანახმად, ხავიერ ერნანდესის იჯარისთვის მადრიდელებმა 2 მილიონი ევრო გაიღეს.

ჩიჩარიტომ “მანჩესტერ იუნაიტედის” ფორმით ინგლისის პრემიერლიგის 81 მატჩში მიიღო მონაწილეობა და გაიტანა 37 გოლი, თუმცა აღსანიშნავია, რომ მექსიკელი ფეხბურთელი “წითელი ეშმაკების” სასტარტო შემადგენლობაში მხოლოდ 43 შეხვედრაში დააყენეს.

ხავიერ ერნანდესი “რეალში” 14-ნომრიანი მაისურით ითამაშებს.