საქართველოს ფუტსალის ნაკრების კაპიტანმა ზვიად კუპატაძემ სოციალურ ქსელში ვიდეო გამოაქვეყნა და ჟურნალისტ მაგდა კლდიაშვილს მიმართა, რომელმაც რამდენიმე დღის წინ “მთავარი არხის” ეთერში კუპატაძეს რუსეთიდან წამოსვლაზე და რუსეთის უკრაინაში ომის შესახებ ჰკითხა.
“არ ვაპირებდი არაფრის ჩაწერას, გუშინ დედაჩემმა დამირეკა და მითხრა, რაღაც საიტზე, არამზადა და კლავიატურის ვირთხა მაგდა კლდიაშვილი და ვიღაცები, რაღაცებს წერენ ჩემზე, ჩემ ოჯახზე, ჩემი ოჯახი როგორ საუბრობს რუსულად თუ ქართულად, მე ქართველი ვარ თუ არა.”
“ჯერ რაღა საქმე გააკეთეთ კლავიატურის ვირთხებო, რომელთაც საქართველოსთვის და არავისთვის არაფერი გაგიკეთებიათ. მერე ისაუბრეთ ჩემზე, ჩემ ოჯახზე. მე რა გავაკეთე საქართველოსთვის. ეს ვირთხები, ვინც ჩემ ოჯახს შეურაცხყოფას აყენებთ, შეგინებით არ შევიგინები, თვითონ ქართველები მოგხედავენ შენ, მაგდა კლდიაშვილო, საზიზღარო ადამიანო და კლავიატურის ვირთხავ. მე ვარ ამაყი, რომ ვთამაშობ მსოფლიოს ერთ-ერთ საუკეთესო ლიგაში, ერთ-ერთ საუკეთესო გუნდში, რომელსაც აქვს მოგებული ჩემპიონთა ლიგა. მსოფლიოს საუკეთესო ფეხბურთელები ოცნებობენ ამ გუნდში თამაშზე. ეს არის სპორტი, მე ვარ სპორტსმენი. რუსეთ-უკრაინის ომის გამო ქართველს ემტერებით. ჩემი ჩამოსვლა იგივეა, ქვეყნებს, რომელთა ზღვა არ აქვთ, მეზღაურებს ეძახდნენ. რამდენი რამ ჩაიდო, რომ საქართველოსდან თავი დაეღწია სპორტსმენს და რაღაცისთვის მიეღწია. ხან, კვარაცხელიას აგინებთ და ერთმანეთს გაუფრთხილდით, სპორტსმენებს. აზრზე მოდით რეებს აკეთებთ და სამშობლოს სიყვარულზე ვის გალანძღავთ” – თქვა კუპატაძემ.
იხილეთ ვიდეო:
კვირას მთავარი არხის გადაცემა “სპორტი დიდ ქალაქში” წამყვან დავით ერაძეს ჟურნალისტები მაგდა კლდიაშვილი და ნანიკო ჩოკორაია ჰყავდა მიწვეული. სტუმრებმა ისაუბრებს ქართველი ფეხბურთელების რუსეთის ლიგაში თამაშზე, მათ შორის, ხვიჩაზე და ასევე, ნაკრების კაპიტან თორნიკე შენგელიაზე. შემდეგ გადაცემაში ზვიად კუპატაძე მოიწვიეს და კლდიაშვილმა ეს შეკითხვა დაუსვა.
“მე გულდაწყვეტილი ვარ, შენ ხარ ნაკრების კაპიტანი, გავიგე მიზეზები, რომ ოჯახი რუსეთში გყავს. მე ვუყურებ რუსი სპორტსმენების კომენტარებს, ისინი ნაკრებში ბავშვების ხოცვას დენაციფიკაციას ეძახიან. შენ თამაშობ “გაზრომ იურგაში”, უხერხულობის გრძნობა მაინც არ გიჩნდება იმ ხალხის გვერდით თამაშის დროს, რომლებიც ბავშვების ხოცვას დენაციფიკაციას ეძახიან. შენი პოზიცია როგორია, შენც ასე ფიქრობ, ეს მაინტერესებს, კი თუ არა. ხოცავს თუ არა რუსეთი უკრაინაში ხალხს ან რატომ არ გინდა დაბრუნდე ოჯახით სამშობლოში. რუსეთი არის სრულ იზოლაციაში და დიდი ხანი ვერ გაექცევა ამას. ჩვენ გვინდა რომ დაბრუნდე, შენ ხარ ნაკრების კაპიტანი და ბევრი მისია გაქვს. რატომ ხარ ჩუმად, ჩვენ მაინც გვითხარი, შენც ხომ არ ფიქრობ, რომ დენაციფიკაციაა ეს”.
კუპატაძის შეურაცხმყოფელი მიმართვის შემდეგ სპორტულ ჟურნალისტთა ასოციაციამ განცხადება გამოაქვეყნა, მხარდაჭერა გამოუცხადა კლდიაშვილს, დაგმო მეკარის მიმართვა და მას ჟურნალისტისა და საზოგადოების წინაშე ბოდიშის მოხდისკენ მოუწოდა.
“ძალიან სამწუხაროა, რომ ცალკეული სპორტსმენების მხრიდან ქართველი სპორტული ჟურნალისტების მისამართით შეურაცხყოფების ფრქვევას დასასრული არ აქვს. ამჯერად, ახალი შეურაცხყოფების ადრესატი ჟურნალისტი მაგდა კლდიაშვილი, ხოლო ავტორი – საქართველოს ფუტსალის ეროვნული ნაკრების კაპიტანი, ზვიად კუპატაძე გახდა. განსაკუთრებით გულსატკენია, რომ ლანძღვა გავიგეთ იმ სპორტსმენისგან, რომელმაც სულ მცირე ხნის წინ უკაპიტნა გუნდს, რომელმაც დაძლია ევროპის ჩემპიონატის ფინალური ეტაპის ჯგუფური ტურნირის ბარიერი და დაუვიწყარი ემოციები გვაჩუქა. დროა ვისწავლოთ სწორი ურთიერთობები და კომუნიკაცია მედიასთან. რაც კუპატაძემ გააკეთა, არ ჯდება არც კაცურ, არც ტრადიციულ, არც თანამედროვე და არც ცივილიზებულ აღქმაში. ჟურნალისტის, მეტადრე მანდილოსანი ჟურნალისტის მისამართით ასეთი მდაბალი და უინტელექტო შეტევა ქართველ სპორტსმენს, მით უმეტეს, ეროვნული ნაკრების კაპიტანს, არ შეშვენის. გვინდა გვჯეროდეს, რომ ზჳიადი მიხვდა თავისი არასწორი საქციელის სიმდაბლის მასშტაბებს, რომელიც, ვფიქრობთ, გაუაზრებლად და იმპულსური ემოციების ფონზე ჩაიდინა და ბოდიშს მოიხდის როგორც მაგდა კლდიაშვილის, ისე ზოგადად ქართველი სპორტული ჟურნალისტების და ქართული საზოგადოების წინაშე.
და კიდევ, ყველა სპორტსმენს, მწვრთნელს, სპორტის სფეროში მოღვაწე ადამიანს გვსურს შევახსენოთ და მკაფიოდ დავუფიქსიროთ: სპორტულ ჟურნალისტს აქვს უფლება, რომ დასვას ნებისმიერი შეკითხვა, რაოდენ უხერხულად და მიუღებლადაც არ უნდა მიგაჩნდეთ. თქვენ კი გაქვთ სრული უფლება და თავისუფლება, უპასუხოთ ან არ უპასუხოთ ამ შეკითხვას. მაგრამ არავის აქვს უფლება, შეკითხვის გამო, რაოდენ არაკომფორტულიც არ უნდა იყოს ის თქვენთვის, ჟურნალისტს შეურაცხყოფები მიაყენოს. საქართველოს სპორტულ ჟურნალისტთა ასოციაცია სოლიდარულია მაგდა კლდიაშვილის მიმართ და მოუწოდებს ზვიად კუპატაძეს, გააცნობიეროს თავის არასწორი საქციელი” – წერს ასოციაცის პრეზიდენტი მიხეილ აბაიშვილი.
საქართველოს ფეხბურთის ფედერაცია ან ფუტსალის ნაკრების მთავარი მწვრთნელი ავთო ასათიანი მომხდარს არ გამოხმაურებიან.
ნაკრების კაპიტანი ზვიად კუპატაძე წლებია რუსეთის “გაზპრომ იურგაში” თამაშობს.
