მორატა: “პოლონეთთან მატჩის შემდეგ მემუქრებოდნენ და შვილების სიკვდილზე მწერდნენ”

Posted on by -

ესპანეთის ნაკრების თავდამსხმელმა, ალვარო მორატამ განაცხადა, რომ პოლონეთთან მატჩის შემდეგ მას და მის ოჯახს ემუქრებოდნენ.

“პოლონეთთან მატჩის შემდეგ, 9 საათის განმავლობაში ვერ ვიძინებდი. მივიღე მუქარები, შეურაცხყოფას აყენებდნენ ჩემს ოჯახს და მწერდნენ, რომ ჩემი შვილები მოკვდებოდნენ. შეიძლება, რამდენიმე წლის წინ ამას ჩემზე გავლენა ჰქონოდა, მაგრამ ახლა კარგად ვარ.

შესაძლოა, ჩემი საქმე ისე ვერ გავაკეთე, როგორც უნდა გამეკეთებინა. მესმის, რომ მაკრიტიკებენ, რადგან გოლი ვერ გავიტანე, მაგრამ ადამიანებმა თავი ჩემს ადგილას წარმოიდგინონ – მათ ემუქრებოდნენ და შვილების სიკვდილზე წერდნენ. ყოველ ჯერზე, როცა ოთახში შევდივარ, ტელეფონს სხვა მხარეს ვდებ. თუმცა, შემდეგ ჩემს მეუღლეს წერენ ჩემს შვილებზე”, – ციტირებს 28 წლის ფეხბურთელის სიტყვებს “მარკა”.

როგორც იცით, ესპანელი ქომაგები მორატას გამოუყენებელი საგოლე მომენტების გამო ხშირად აკრიტიკებენ. აღსანიშნავია ისიც, რომ პოლონეთთან შეხვედრაში (1:1) ესპანელთა მხრიდან ერთადერთი გოლი სწორედ მან გაიტანა.

რამდენი მილიონით აფინანსებენ კაზინოები ქართულ ფეხბურთს?

Posted on by ზურაბ თოიძე

ბათუმის “დინამოს” სტადიონის დარქმევის უფლება აუქციონის სახით გაიყიდა და მისი გამარჯვებული Adjarabet გახდა. უდიდესი ალბათობით, სახელწოდება შესაბამისიც – Adjarabet Arena იქნება. 5 წლის განმავლობაში კომპანია სახელის უფლებაში 8.7 მილიონს გადაიხდის.

გულშემატკივრის გარკვეულ ნაწილში ამ ინფორმაციამ უარყოფითი რეაქცია გამოიწვია, არადა ქართული ფეხბურთის უდიდესი დამფინანსებელი სახელმწიფოს შემდეგ კერძო ბიზნესიდან სწორედ კაზინოებია.

ქართული ფეხბურთი მუდმივად სახელმწიფოს დოტაციაზე ვერ იარსებებს და სასიცოცხლოდ აუცილებელია, ქართული ფეხბურთის მიმართ ინტერესი კერძო ბიზნესს გაუჩნდეს. მაგალითად, მხოლოდ ეროვნულ ლიგაში კაზინოები დაახლოებით 5 მილიონამდე სპონსორობას უწევენ გუნდებს წლის განმავლობაში. სხვა დანარჩენი ბიზნესის სფეროები უმეტესად ერთჯერადი სპონსორობით გამოირჩევიან. მაგალითად, “სამტრედიას” გასულ სეზონში ძალიან მაღალი წლიური ბიუჯეტი ჰქონდა ერთ-ერთი სამშენებლო კომპანიის მეშვეობით, წელს კი გუნდი შემცირებული ბიუჯეტის შედეგადად, ჩემპიონატში ბოლო ადგილზეა.

რამდენიმე წელიწადში ფეხბურთის განვითარების ფონდიდან დაფინანსებაც საბოლოოდ დასრულდება და კლუბები კერძო მფლობელისა და სპონსორების იმედად დარჩებიან. სახელმწიფო არ უნდა აფინანსებდეს ფეხბურთელთა ხელფასებებს, როგორც, სოციალურ პროექტს და კერძო ბიზნესის ჩართულობის გარეშე ფეხბურთი და ვერცერთი სპორტი ვერ განვითარდება.

და მაინც რა არის ცუდი იმაში, რომ კერძო კომპანია 5 წელიწადში თითქმის 9 მილიონს გადაიხდის, რომელიც გუნდს და აჭარას უნდა მოხმარდეს?

ფირმინოს ბრწყინვალე გადაცემა ნეიმარს – რა გააკეთა ნეიმარმა? (ვიდეო)

Posted on by ztsw2003

იხილეთ ვიდეო

როგორ მიულოცეს ლიონელ მესის დაბადების დღე თანაგუნდელებმა (ვიდეო)

Posted on by -

ლიონელ მესი დღეს 34 წლის გახდა. კატალონიის “ბარსელონას” კაპიტანი ამჟამად არგენტინის ნაკრებთან ერთად ბრაზილიაში, კოპა ამერიკის მოსაგებად იბრძვის.

მესის დაბადების დღე თანაგუნელებმა სასტუმროს ოთახში მიულოცეს.

View this post on Instagram

A post shared by Leo Messi (@leomessi)

უეფას პრეზიდენტმა სტუმრად გატანილი გოლის წესის გაუქმების გადაწყვეტილება განმარტა

Posted on by ბექა დოგრაშვილი

უეფამ საკუთარ ტურნირებზე სტუმრად გატანილი გოლის წესი გააუქმა. აღნიშნული გადაწყვეტილება ევროპული ფეხბურთის მმართველი ორგანოს პრეზიდენტმა ალექსანდერ ჩეფერინმა განმარტა.

“სტუმრად გატანილი გოლის წესი 1965 წელს ამოქმედდა და ის უეფას ტურნირების განუყოფელი ნაწილი იყო, თუმცა მისი გაუქმების საკითხს ბოლო რამდენიმე წლის განმავლობაში უეფას სხვადასხვა შეხვედრებზე განვიხილავდით. მიუხედავად იმისა, რომ ერთიანი პოზიცია არ იყო, ბევრმა მწვრთნელმა, გულშემატკივარმა თუ სხვა დაინტერესებულმა მხარემ ეჭვქვეშ დააყენა ამ წესის სამართლიანობა და მხარი დაუჭირა მის გაუქმებას.

აღნიშნული წესის გავლენა ეწინააღმდეგება მის თავდაპირველ დანიშნულებას, ვინაიდან მასპინძელი გუნდი, განსაკუთრებით ორმატჩიანი დაპირისპირების პირველ შეხვედრაში, შეტევაზე უარს ამბობს, რადგან გოლის მიღების ეშინია, რაც მეტოქეს გადამწყვეტ უპირატესობას აძლევს. ასევე გამოითქვა კრიტიკული მოსაზრება დამატებით დროში ამ წესის არსებობაზე, რადგან თუ სტუმრები გოლს გაიტანენ, მასპინძლებს ორი ბურთის გატანა მართებთ.

სამართლიანი იქნება, თუ ვიტყვით, რომ საკუთარი მინდვრის უპირატესობა დღეს აღარ არის იმდენად მნიშვნელოვანი. ევროპის მასშტაბით ერთიანი სათამაშო სტილისა და კიდევ სხვა მრავალი ფაქტორის გათვალისწინებით, რამაც გამოიწვია საშინაო მოედნის ფაქტორის შემცირება, უეფას აღმასრულებელმა კომიტეტმა მიიღო სწორი გადაწყვეტილება, რომლის თანახმადაც, სტუმრად გატანილი გოლი შინ გატანილზე ფასეული აღარ არის”, – ჩეფერინის კომენტარი უეფას ოფიციალურ ვებგვერდზე გამოქვეყნდა.

მომდევნო სეზონიდან უეფას ეგიდით გასამართ ტურნირებზე ორმატჩიან დაპირისპირებაში დაფიქსირებული საყაიმო შედეგის შემთხვევაში, დაინიშნება დამატებითი ტაიმები, ხოლო თუ გამარჯვებულის ბედი ამ დროშიც ვერ გაირკვევა, საქმე თერთმეტმეტრიანების სერიამდე მივა.

უეფამ სტუმრად გატანილი გოლის წესი გააუქმა

Posted on by ბექა დოგრაშვილი

მომდევნო სეზონიდან უეფას ეგიდით გასამართ ტურნირებზე სტუმრად გატანილი გოლის წესი აღარ იმოქმედებს.

აღნიშნული გადაწყვეტილება შეეხება, როგორც ევროთასების ფინალურ სტადიებს, ასევე საკვალიფიკაციო ეტაპებს, ახალგაზრდულ და ქალთა შეჯიბრებებს.

ამრიგად, ორმატჩიან დაპირისპირებაში დაფიქსირებული საყაიმო შედეგის შემთხვევაში, დაინიშნება დამატებითი ტაიმები, ხოლო თუ გამარჯვებულის ბედი ამ დროშიც ვერ გაირკვევა, საქმე თერთმეტმეტრიანების სერიამდე მივა.

გასვლაზე გატანილი გოლის წესი 1965 წლიდან მოქმედებდა. აღნიშნული წესის ძალით, ორმატჩიან დაპირისპირებაში დაფიქსირებული საყაიმო ანგარიშის შემთხვევაში, უპირატესობა ენიჭებოდა იმ გუნდს, რომელსაც სტუმრად ჩატარებულ შეხვედრაში მეტი ბურთი ჰქონდა გატანილი.

ლუსიენ ფავრი პრემიერ ლიგის გუნდს გაწვრთნის

Posted on by იაკობ კაპანაძე

“კრისტალ პალასის” ოფიციალური ვებ-გვერდი ადასტურებს ინფორმაციას, რომლის მიხედვითაც მომავალ სეზონში გუნდს ლუსიენ ფავრი გაწვრთნის.

რამდენადაც ჩვენთვის ცნობილი ხდება, 63 წლის შვეიცარიელმა სპეციალისტმა “კრისტალ პალასთან” სამწლიან ხელშეკრულებას მოაწერა ხელი.

შეგახსენებთ, რომ 2020/21 წლების სეზონში “არწივებს” როი ჰოჯსონი წვრთნიდა, რომლის ხელმძღვანელობითაც გუნდმა პრემიერ ლიგის სატურნირო ცხრილში მე-14 პოზიცია დაიკავა. ჰოჯსონმა კი სამწვრთნელო კარიერა დაასრულა.

რაც შეეხება უშუალოდ შვეიცარიელი მწვრთნელის კარიერას, ბოლოს ის დორტმუნდის “ბორუსიაში” მუშაობდა.

პაულინიო “ბარსელონას” საკუთარ თავს სთავაზობს

Posted on by იაკობ კაპანაძე

კატალონიური გამოცემა El Mundo Deportivo პაულინიოს “ბარსელონაში” დაბრუნების შესაძლებლობის შესახებ აქვეყნებს ინფორმაციას. შეგახსენებთ, რომ 32 წლის ბრაზილიელი “კამპ ნოუზე” 2017/18 წლების სეზონში თამაშობდა.

პაულინიო ბოლო ოთხი წლის მანძილზე ჩინური “გუანჟოუ ევერგრანდის” რიგებში ირიცხებოდა. ბოლო სეზონში მან 20 მატჩში მიიღო მონაწილეობად და თავი 12 გატანილ გოლთან ერთად ოთხი საგოლე გადაცემითაც გამოიჩინა.

ბრაზილიელი ნახევარმცველი პირველ ივლისს თავისუფალი გენტი ხდება და შესაბამისად ახალი კლუბის ძებნაც უკვე დაწყებული აქვს.

“ჩემთვის ფული ან კონტრაქტის ხანგრძლივობა პრობლემას არასდროს წარმოადგენდა. მითუმეტეს, თუ ისეთი კლუბია დაინტერესებული, როგორიც “ბარსელონაა”. ეს ერთხელ უკვე დავამტკიცე.

ჩემ კარიერაში ფული პირველ ადგილზე არასდროს ყოფილა. ამიტომაც იქ დაბრუნება ჩემთვის არანაირ სირთულეს არ წარმოადგენს. თანაც კლუბს ჩემ ტრანსფერზე ფულის დახარჯვა არ მოუწევს,” – აცხადებს პაულინიო.

მარკო არნაუტოვიჩი კარიერას იტალიაში გააგრძელებს

Posted on by იაკობ კაპანაძე

ავსტრიის საფეხბურთო ნაკრების შემტევი, მარკო არნაუტოვიჩი, კარიერას იტალიის ჩემპიონატში გააგრძელებს. ინფორმაციას გავლენიანი იტალიელი ჟურნალისტი ნიკოლო სკირა ადასტურებს.

რამდენადაც ჩვენთვის ცნობილი ხდება, 32 წლის ფეხბურთელმა, რომელიც აქამდე ჩინურ “შანხაი სიპგ”-ს ღირსებას იცავდა, “ბოლონიასთან” 3-წლიანი ხელშეკრულება გააფორმა.

ცნობილი ხდება ისიც, რომ არნაუტოვიჩი, რომელიც ამ დროისთვის ევროპის ჩემპიონატზე მონაწილეობს, ხელფასის სახით წელიწადში 2.7 მილიონ ევროს მიიღებს.

არნაუტოვიჩი ჩინეთში 2019 წლიდან ასპარეზობს. ამ დროის მანძილზე მან “შანხაის” რიგებში 39 მატჩი ჩაატარა, გაიტანა 20 გოლი და გააკეთა 4 საგოლე გადაცემა.

რა ბედი ელის ფილიპე კოუტინიოს კატალონიურ კარიერას?

Posted on by იაკობ კაპანაძე

კატალონიის “ბარსელონას” ბრაზილიელი ნახევარმცველი, ფილიპე კოუტინიო, წინასასეზონო მომზადების პერიოდს გუნდთან ერთად გაატარებს.

L’Esportiu-ს ცნობით, კატალონიურ გრანდს კოუტინიოს გაყიდვა სურს, თუმცა მისი ტრანსფერის თაობაზე ერთი წინადადებაც კი არ მიუღია. შესაბამისად, დიდია შანსი, რომ კოუტინიომ მომავალი სეზონი “კამპ ნოუზე” გაატაროს.

აღსანიშნავია, რომ “ლურჯ-ბროწეულისფრებს” “ლივერპულისთვის” ჯერ კიდევ არ გადუხდიათ კოუტინიოს ტრანსფერის 50 მილიონი. შეგახსენებთ, რომ 2018 წელს ბრაზილიელი ვარსკვლავი “ბარსელონამ” 120 მილიონ ევროდ დაიმატა (ბონუსების ჩათვლით ფასი, შესაძლოა, 160 მილიონამდე გაიზარდოს).

შესაბამისად, მოცემულობა ასეთია – ფინანსური კრიზისისა და ვალების ფონზე “ბლაუგრანას” კოუტინიოს 50 მილიონ ევროდ გაყიდვა სურს, თუმცა მსურველი ჯერ არ ჩანს. ყველაფერს ართულებს კოუტინიოს დიდი ხელფასი – ფეხბურთელი წელიწადში კლუბისგან 8.5 მილიონ ევროს იღებს.

ბენზემამ რონალდუსთან შეხვედრის დეტალებზე ისაუბრა

Posted on by იაკობ კაპანაძე

ევროპის 2020 წლის ჩემპიონატის ჯგუფური ეტაპის ბოლო მატჩში პორტუგალიისა და საფრანგეთის საფეხბურთო ნაკრებებმა გამარჯვებულის გამოვლენა ვერ მოახერხეს – მატჩი ფრედ, 2:2, დასრულდა.

აღსანიშნავია, რომ მატჩში დუბლი ორმა ფეხბურთელმა, კარიმ ბენზემამ და კრიშტიანუ რონალდუმ შეასრულეს. ზემოხსენებული ფეხბურთელები წლების მანძილზე თამაშობდნენ ერთად “რეალში” და განსაკუთრებული ურთიერთობა აკავშირებთ.

“რონალდუ ჩემი დიდი მეგობარია, ჩვენ “რეალში” ერთად ბევრი რამ გამოვიარეთ და ბევრი გოლიც გავიტანეთ. მასთან შეხვედრა ძალიან სასიამოვნო იყო ჩემთვის.

მატჩის შემდეგ ერთმანეთს შევხვდით, წარმატებები ვუსურვეთ როგორც ერთმანეთის ნაკრებებს, ასევე კლუბებს,” – აცხადებს ბენზემა.