ჟურნალისტი მერაბ მეტრეველი აქტიურად აფასებს ქართული გუნდების და საქართველოს ნაკრების თამაშებს. ამჯერად, მან გიბრალტართან და ჩრდ.მაკედონიასთან მატჩები შეაფასა.

“გიბრალტართან თამაშშიც მხოლოდ ორი რამ იყო კარგი:
1) ანგარიში
და
2) კაპიტანმა გურამ კაშიამ, რომელმაც კარგ ფეხურთელობასთან ერთად კარგი ადამიანობაც და პრინციპულობაც გამოავლინა და ბნელ ჰომოფობებს თავი არ დაუხარა, ნაკრებში მე-100 თამაში ითამაშა.

დანარჩენზე რა გითხრათ? ლორია რომ არა, შეიძლება ვერც მოგვეგო. გასაგებია, რომ ხვიჩა ყოველთვის ხვიჩაა, მაგრამ გუშინდელი თამაშის მერე ზოგ გულშემატკივარს გაუჩნდა განცდა (და არცთუ უსამართლოდ), რომ ხვიჩას გარეშე ნაკრები ისეთივე ცუდი გუნდია, როგორიც ადრე იყო.
ორი თამაშის ჯამში კი ხელთ შეგვრჩა ცუდი თამაში, მაგრამ მოგება. ახლა ზოგი კითხულობს: სულ კარგ თამაშს და სულ წაგებას ცუდი თამაში და მოგება არ ჯობიაო?

კი ჯობია, მაგრამ თქვენც ხომ იცით, რომ ორივეს ჯობია კარგი თამაში და მოგება და მარტო „ჯობიაზეც“ არაა საქმე: რამდენ ხანს გაქაჩავ ცუდი თამაშით? ასეთი თამაში გვეყოფა ნახევარფინალის და მითუმეტეს ფინალის მოსაგებად?

თუმცა ერთა ლიგის ნახევარფინალი და ფინალი დროში ისე შორსაა (2024 წლის მარტში), მანამდე შეიძლება ყველაფერი მოხდეს. ასევე მანამდე ჩვეულიბრივი შესარჩევი ციკლი გვაქვს სათამაშო და იქ, როგორც აბანოში, გამოჩნდება თეთრი და შავი, რადგან ყველანაირი ძალის მეტოქე გვეყოლება. და ასევე გამოჩნდება სანიოლის გაქანება: არის ის ის მწვრთნელი, რომელსაც კიდევ შეუძლია გუნდს მოამატებინოს, თუ ეს მისი ჭერია და უფრო მაღალ დონეზე ასასვლელად სხვა მწვრთნელი დაგვჭირდება?

ეს მნიშვნელოვანი საკითხია და ნახევარფინალამდე უნდა გვქონდეს უკვე პასუხი.
ასევე მანამდე იქნება ახალგაზრდული ევროპის ჩემპიონატი, რომელსაც ნაწილობრივ ჩვენც ვმასპინძლობთ და სადაც ეროვნული ნაკრების დღევანდელი შემადგენლობის ნახევარს შეუძლია თამაში ხვიჩას თამადობით.
ასე რომ შევხედოთ მომავალს იმედიანად და ვეძებოთ კარგი საყრდენები!

p.s. მესამე კარგი რამეც მომხდარა გუშინდელ თამაშში: რეკორდი დავამყარეთ – 11 წაუგებელი თამაში გვაქვს. ამხელა წაუგებელი სერია ჯერ არ ქონია ჩვენს ნაკრებს.

ეს ცალსახად კარგია, მაგრამ ბევრს შეიძლება არც არაფერს ცვლიდეს, რადგან წინა რეკორდი (10 წაუგებელი თამაში) ქეცბაიას დროინდელ ნაკრებს ეკუთვნოდა, გუნდს, რომელიც ალბათ ყველაზე არაშემტევ ფეხბურთს თამაშობდა და ვერაფერსაც ვერ მიაღწია.

ვისურვოთ, რომ, ეს ახალი რეკორდი უკეთესი მომავლის საწინადარი იყოს” – დაწერა მეტრეველმა.

საქართველომ გიბრალტარი სტუმრად 1-2 დაამარცხა. გუნდს დამაჯერებელი გამარჯვება არ გამოუვიდა, მაგრამ ჯგუფი 16 ქულით პირველ ადგილზე დაასრულა და პლეი-ოფის ნახევარფინალში მეტოქეს სახლში მიიღებს.

ქართველი გულშემატკივრები ნაკრების თამაშს და ფეხბურთელებს აფასებენ.

“ჩვენები რასაც თამაშობდნენ, მაგას ფეხბურთი არ ქვია.ძალიან სამწუხაროა”

“კიდევ კარგი მსაჯმა უფრო მეტი არ დაამატა, თუ არა, იქნებოდა ჩვენი თავის მოჭრა. კვარაცხელიას გარეშე დარჩენილი გუნდი აირია და ყველა თავისთვის დაათრებდა ბურთს და ეგოისტურად ცდილობდნენ რამენაირად გოლის გატანას. რაღაცნაირად ხვიჩას კომპლექსი აქვთ ზოგიერთებს, ცდილობენ “გატოლებას”, მაგრამ ძალიან ცუდად და მაინც ვერ გამოსდით, ამით კი გუნდური თამაში ირღვევა და ვიღაცის ამბიციას გუნდის შედეგი გადაჰყვეს”

“ვერ ვიტყვით, რომ კარგი თამაში იყო. არადა დიდი ანგარიშით ველოდი მოგებას, მაგრამ მთავარია, რომ მოვიგეთ! გილოცავთ ყველას”

“ნახევარდაცვაში ძალიან გვიჭირს, ძლიერ გუნდთან გაგვიჭირდება…”

“გამარჯვებულებს არ ასამართლებენო, მარა უკეთაც შეგვიძლია გიბრალტარის ნაირ ნაკრებთან დამაჯერებელი ანგარიშით უნდა იგებდეს გუნდი”

“მადლობა მსაჯს, რომ 11-იანი არ დაგვიდო, როცა კაკაბაძეს ხელზე მოხვდა ბურთი, თორემ 2:2 დამთავრდებოდა თამაში!.. მომავალი წლის მარტის ბოლომდე ნახევარი წელია, ანუ ნაკრების ასაკოვანი წევრები 6 თვით “დაბერდებიან” და სისწრაფეს დაკარგავენ (ჯაბა კანკავამ ამიტომ დაასრულა სანაკრებო კარიერა, რაც პატივისცემას იმსახურებს)! ჰოდა, ნაკრებს აშკარად სჭირდება გაახალგაზრდავება, განსაკუთრებით დაცვაში და ნახევარდაცვის ცენტრში, თორემ თუ ასე “ვიარეთ” მოედანზე, გიბრალტარი კი არა, ნებისმიერი სამოყვარულო გუნდი მოგვიგებს!”

“დღეს ანტი ფეხბურთი იყო,მაგრამ მთავარია მოვიგეთ”

“ნაკრებს გამოაკელით კვარაცხელია და გიბრლტარიც გვიგებს”

“პირველ რიგში გილოცავთ მოგებას და ჯგუფში 16 ქულით დასრულებას, მაგრამ ძალიან ცუდი იყო, რომ სადღაც 55-ე წუთიდან მოდუნდა გუნდი და გაჩერდა. აღარც პრესინგს თამაშობდა და არაფერს. არ შეიძლება ასე არასერიოზული დამოკიდებულება, ვისაც არ უნდა ეთამაშებოდე. ამიტომ იყო, რომ ბოლო წუთებში დიდ გულზე იყვნენ. ლობჟანიძეს ძალიან ცუდი მატჩი ჰქონდა. ერთხელ არ მახსოვს ამ ბიჭს კარგად ეთამაშოს ნაკრებში. სისწრაფე და გახსნა კი აქვს, მაგრამ შემდეგ სწორად ვერ აგრძელებს შეტევას.
სხვა რა ვთქვა მადლობა ბიჭებს ბრძოლისთვის მაგრამ მაინც მეტს ველოდით გულშემატკივრები ამ თამაშიდან 3 ქულა კარგია და გილოცავთ კიდევ ერთხელ!”

საქართველოს ნაკრებმა ისტორიაში პირველად 11 მატჩიანი წაუგებელი სერია დადო – 9 მოგება და 2 ფრე.

საქართველოს ნაკრებმა ერთა ლიგის ჯგუფურ ეტაპზე ბოლო მატჩი გამართა და გიბრალტარი 1-2 დაამარცხა.

Sofascore-ს შეფასებით, ჩვენი ნაკრებიდან საუკეთესო შეფასება ხვიჩა კვარაცხელიამ და ნიკა კვეკვესკირმა მიიღეს – 7.7

წიტაიშვილი 7.5, ხოჭოლავა 7.4, მექვაბიშვილი 7.3 და კაშია 7.2.

გიბრალტარიდან ყველაზე მეტი ნახევრად პროფესიონალმა თავდამსხმელმა, ბრედლი ბანდამ (7.6) დაიმსახურა.

ლექტორმა თორნიკე შარაშენიძემ, რომელიც ფეხბურთზე საკმაოდ ხშირად წერს ხოლმე, საქართველო – ჩრდ.მაკედონიის მატჩი შეაფასა.

“მაკედონიას იმის ხარჯზე მოვუგეთ რომ გვყავს ორი მაღალი კლასის ფეხბურთელი, ერთს კი მაგრად წაუვიდა თამაში.

როცა გუნდი კარგად ვერ თამაშობს, მაგრამ მაინც იგებს, ამბობენ კლასის ხარჯზე მოიგოო. ალბათ სწორედ ეს მოხდა. კლასი კი ჩემი აზრით იმ ორმა განაპირობა. ერთმა მარცხენადან მარჯვენა ფლანგზე გადაინაცვლა და სანამ მეტოქე (რომელიც მარცხენა ფლანგზე მას განსაკუთრებულად მეურვეობდა) გონს მოვიდა, გოლი შექმნა. მეორე კი კარში მაგრად იდგა და მისი იმედით დაცვაც საკმაოდ მშვიდად თამაშობდა.

ერთი-ორი მაღალი კლასის ფეხბურთელიც რომ გვყავდეს მაშინ უეჭველი გავალთ ევროზე. ისინი უპირველესად შუახაზში გვჭირდება. ძლიერი შუახაზის გარეშე ვერცერთი გუნდი წავა შორს.
მაგრამ აი ზემოხსენებული ორიდან ერთიც რომ დაგვაკლდეს მაკედონიასაც კი ვერ მოვუგებთ“, – დაწერა შარაშენიძემ.

სხვადასხვა ვებ-გვერდმა გუშინ საუკეთესოდ გიორგი მამარდაშვილი დაასახელა.