“რა თქმა უნდა, “რუბინის” დარი ხელფასი ვერ შევთავაზეთ, მაგრამ საქართველოს დონეზე მსგავსი ხელფასი სხვებისთვის უბრალოდ მიუღწეველია. ხვიჩას დიდ თანხას ვუხდით, მაგრამ მასზე მეტი ჯოვინოს აქვს” – ეს განცხადება ბათუმის “დინამოს” პრეზიდენტმა არჩილ ბერიძემ 1 კვირის წინ გააკეთა.
“საქართველოს მასშტაბით ბიძინაშვილს ძალიან კარგი შეთავაზება გავუკეთეთ, მაგრამ “დინამომ” 2-ჯერ მეტი შესთავაზა და ისიც დათანხმდა” – გორის “დილას” აღმასრულებელი დირექტორი გიორგი ჯოხაძე.
გავრცელებული ინფორმაციით, ყველაზე დიდი ხელფასები ფეხბურთელებს სწორედ ჩემპიონ გუნდში აქვთ და საშუალოდ 15-20 ათასი ლარია.
მიუხედავად წარუმატებელი სვლისა, საკმაოდ მაღალი ანაზღაურება ქუთაისის “ტორპედოს” ფეხბურთელებსაც აქვთ, რაც 10 ათასი 15 ათასამდე მერყეობს.
როგორც ჩანს, თბილისის “ლოკომოტივმა” ფინანსური მდგომარეობა გამოისწორა და კლუბში ჯერ ნოდარ იაშვილი, დღეს კი დავით უბილავა დაბრუნდა.
გავრცელებული ცნობით, “საბურთალოს” ფეხბურთელებს ხელფასის აღების პრობლემა 1.5 თვის განმავლობაში ჰქონდათ, თუმცა ახლა ეს პრობლემა მოგვარებულია. ანაზღაურების დაგვიანების ტენდეცია სხვა ქართულ კლუბებშიც შეინიშნება.
