სად ჩატარდება ევროთასების ფინალური მატჩები 2017 წელს
შვეიცარიის ქალაქ ნიონში უეფას აღმასრულებელი კომიტეტის სხდომა გაიმართა, რომელზეც 2016/17 წლების სეზონის ევროთასების ფინალური მატჩების მასპინძელი ქალაქები დაამტკიცეს.
ჩემპიონთა ლიგის ფინალი 2017 წელს კარდიფის “მილენიუმის” სტადიონზე ჩატარდება, რომელიც 74 500 მაყურებელს იტევს.
ევროპის ლიგის ფინალურ შეხვედრას სტოკჰოლმის “ფრენდეს არენა” უმასპინძლებს. სტადიონზე 50 ათასი გულშემატკივარი ეტევა.
2017 წლის უეფას სუპერთასი სკოპიეს “ფილიპ მეორის” სტადიონზე გაიმართება, რომელიც 36 400 მაყურებელს იტევს.
ამრიგად, უეფას სუპერთასის მატჩზე დასწრების მხრივ “დინამო არენას” რეკორდი მინიმუმ კიდევ ორი წლის განმავლობაში არ გაუმჯობესდება. შეგახსენებთ, რომ თბილისურ სუპერთასს 51 490 გულშემატკივარი დაესწრო, რაც ნეიტრალურ სტადიონზე ჩატარებული სუპერთასის მატჩებიდან სარეკორდო მაჩვენებელია.
