სატრანსფერო სიახლეები
“რომას” კოლაროვი უნდა
იტალიური, “რომას” მთავარ სპეციალისტს, რუდი გარსიას, ზაფხულის სატრანსფერო ფანჯრის დროს, “მანჩესტერ სიტის” ნახევარმცველის, ალექსანდერ კოლაროვის შეძენა სურს. ჯერ-ჯერობით თანხა არ არის ცნობილი, თუმცა საეჭვოა, რომ “სიტიმ” კოლაროვი დათმოს, რადგან ის გუნდში საუკეთესოა საკუთარ პოზიციაზე.
“მანჩესტერი” კარვალიოს მიუბრუნდა
“მანჩესტერ იუნაიტედი” “სპორტინგის” ფეხბურთელს, უილიამ კარვალიოს მიუბრუნდა. როგორც იცით, ინგლისელები გასულ თვეში იყვნენ დაინტერესებულები პორტუგალიელი ნახვარმცველით, თუმცა მოიესის გაშვების შემდეგ, შეწყდა მასზე ფიქრი. ახლა კი ცნობილი ხდება, რომ “იუნაიტედი” 30 მილიონის გადახდას გეგმავს მის სანაცვლოდ. ცნობისთვის, კარვალიოთი “მანჩესტერის” გარდა, “ლივერპულიც” არის დაინტერესებული.
რას გადაწყვეტს ვერტონგენი?
ბელგიელი მცველი, იან ვერტონგენი ზაფხულის სატრანსფერო ფანჯარას ელოდება. როგორც იცით, “ტოტენჰემში” ახალ მწვრთნელს ელიან და სწორედ მასზე იქნება დამოკიდებული დარჩება, თუ არა ვერტონგენი ლონდონში. ცნობილია, რომ ბელგიელს უფრო მაღალი დონის კლუბში სურს თამაში.
რობენი ვან გაალის სამიზნე
ბრიტანული პრესა იტყობინება, რომ ლუი ვან გაალის პირველი სამიზნე, არიენ რობენი იქნება. როგორც იცით, ჰოლანდიელები ერთად არაერთ გუნდში მუშაობდნენ და როგორც ჩანს, ვან გაალს კვლავ სურს რობენის ხილვა მის გაწვრთნილ გუნდში. ცნობილია, რომ “იუნაიტედი” 30 მილიონს გადაიხდის რობენის სანაცვლოდ.
“ლივერპული” შოუსთვის იბრძვის
ცნობილია, რომ ზაფხულის სატრანსფერო ფანჯრის დროს “მანჩესტერ იუნაიტედთან” ერთად, ლუკ შოუსთვის “ლივერპულიც” იბრძოლებს. დღეს, ბრენდან როჯერსმა 40 მილიონი ფუნტი შესთავაზა “საუთჰემპტონს” შოუსა და ლოვრენის სანაცვლოდ. რაც შეეხება “იუნაიტედს”, ისინი 34 მილიონს იხდიან მხოლოდ შოუს სანაცვლოდ.
ვერმაელენი იტალიაში წავა
გასულ წელსაც ბევრი იწერებოდა იმის შესახებ, რომ ტომას ვერმაელენი “არსენალს” დატოვებდა, თუმცა მან საბოლოოდ დარჩენა ამჯობინა. ზაფხულში, კი ის სავარაუდოდ დატოვებს ლონდონს. როგორც იცით, ბელგიელი მცველი “მეთოფეების” კაპიტანია, თუმცა ის მოულოდნელად სათადარიგო სკამის ფეხბურთელად იქცა. ცნობილია, რომ მისით იტალიური გუნდები არიან დაინტერესებულები.
სუარესი “ლივერპულში” ბედნიერია
ურუგვაელმა ფეხბურთელმა, ლუის სუარესმა განაცხადა, რომ ის მერსისაიდულ გრანდში ბედნიერია და წასვლას არ აპირებს. როგორც იცით, სუარესით მადრიდის “რეალია” დაინტერესებული და ისინი მზად არიან 70 მილიონმდე გადაიხადონ მის სანაცვლოდ.
ვენგერი 3 წლით გაახანგრძლივებს
ცნობილია, რომ მაისის ბოლოს, არსენ ვენგერი კონტრაქტს 3 წლით გაახანგრძლივებს. 64 წლის სპეციალისტი, ამჟამად ასოციაციის თასის ფინალში არის და მისი დასრულების შემდეგ, საბოლოოდ გახდება კონტრაქტის დეტალები ცნობილი. თუ ეს ხელშეკრულება გაფორმდა, მაშინ ვენგერს “არსენალში” 21 წელი შეუსრულდება.
მანჯუკიჩი პრემიერ ლიგაში
დიდი ალბათობით, ზაფხულის სატრანსფერო ფანჯრის დროს, მარიო მანჯუკიჩი პრემიერ ლიგაში გადაბარგდება. როგორც იცით, ხორვატ ფეხბურთელს “ბაიერნის” დატოვება, რობერტ ლევანდოვსკის გამო აქვს გადაწყვეტილი. ცნობილია, რომ მანჯუკიჩს ერთ-ერთი მსურველი, ლონდონის “ჩელსი” იქნება.
