სკანდალი ტოკიოში – ქართველი პარაძიუდოისტი სასტუმროს დაცვის წევრს ფიზიკურად გაუსწორდა
იაპონური მედიის ცნობით, ტოკიოს პოლიციაში საქართველოს პარალიმპური ნაკრების წევრთან დაკავშირებით საქმე აღიძრა.
Japan Today-ს მიერ გავრცელებული ინფრომაციით, ერთ-ერთი ქართველი პარაძიუდოისტი სასტუმროს დაცვის წარმომადგენელს ფიზიკურად გაუსწორდა.
როგორც ირკვევა, საქართველოს ნაკრების ერთ წევრს კოვიდ 19 დაუდასტურდა, რის გამოც მთელი გუნდი სასტუმროში, კარანტინში იმყოფებოდა. სასტუმროს თანამშრომლების თქმით, 12 აგვისტოს ქართველი ძიუდოისტი და მისი რამდენიმე თანაგუნდელი სასტუმროს დერეფანში ხმაურობდა. დაცვის წარმომადგენელმა, რომელიც 60 წელზე მეტისაა, მათ დამშვიდებისაკენ და საკუთარ ოთახებში დაბრუნებისაკენ მოუწოდა. ამის საპასუხოდ, ქართველმა პარაძიუდოისტმა მას ხელი ჰკრა და წააქცია. Fuji TV-ის ინფორმაციით, სასტუმროს დაცვის წევრს დაცემის შემდეგ ნეკნი გაუტყდა.
მოგვიანებით, პარაძიუდოისტმა პოლიციაში აღიარა, რომ მას და მის თანაგუნდელებს ალკოჰოლი ჰქონდათ მიღებული. საქართველოს დელეგაციის ერთ-ერთმა წარმომადგენელმა თქვა, რომ ამ ინციდენტის შემდეგ, ძიუდოისტს სამშობლოში დააბრუნებენ.
შეგახსენებთ, რომ პარალიმპიური თამაშები 24 აგვისტოს დაიწყება. საქართველო ამ ღონისძიებაზე 14 პარასპორტსმენით იასპარეზებს, რომელთა შორის 6 პარაძიუდოისტია.
