თბილისის “დინამომ” მიმდინარე სატრანსფერო ფანჯარაზე მარტივილის “მერანის” უკვე ყოფილი ფეხბურთელი, აკაკი შულაია დაიმატა. 20 წლის შემტევს თბილისელთა შემადგენლობაში სულ ახლახანს ჰქონდა დებიუტი. მისი პირველი ოფიციალური შეხვედრა ერვნული ლიგის მე-19 ტურში, ფოთის “კოლხეთთან” შედგა. იქ “დინამომ” მეგრული კლუბი ანგარიშით, 6-1 გაანადგურა.
Fanebi.Com-ი დაუკავშირდა შულაიას და მასთან ინტერვიუ ჩაწერა.
– შეაფასე “კოლხეთთან” შეხვედრა. რის ხარჯზე მიაღწიეთ ასეთ შედეგს?
– ამ მატჩში წარმატების განმაპირობებელი ერთ-ერთი ფაქტორი ბურთის ფლობა იყო. ჩვენ 90 წუთის მანძილზე ვაკონტროლებდით თამაშს, მწვრთნელის ყველა სხვა დანარჩენი დავალებაც პირნათლად შევასრულეთ. ამ ყველაფერმა კი შედეგი გამოიღო. ფაქტობრივად, პირველ ტაიმშივე შევძელით მეტოქის გატეხვა – მათ სამი უპასუხო გოლი გვუტანეთ. გარდა ამისა, ისიც უნდა ითქვას, რომ ეს განახლებული ჩემპიონატის პირველი თამაში იყო და მოტივირებულნი და კონცენტრირებულნი ვიყავით. მიხარია, რომ ასეთი რეზულტატი დავაფიქსირეთ.
– ფოთურ კლუბთან თამაში “დინამოში” შენი პირველი ოფიციალური შეხვედრა იყო. როგორ შეაფასებ დებიუტს? გამოდგა ის ისეთი, როგორიც გსურდა?
– ჩემთვის ამ თამაშს ძალიან დიდი მნიშვნელობა ჰქონდა. ეს, როგორც აღინიშნა, სადებიუტო შეხვედრა იყო და, შესაბამისად, ძალიან მონდომებული გავედი მინდორზე. მინდოდა, რომ გოლით აღმენიშნა ჩემი დებიუტი.
– მარტვილის “მერანში” საკმაო ხნის მანძილზე გამოდიოდი. რა როლი შეასრულა მეგრულმა კლუბმა შენს განვითარებაში?
– დიახ, იქ მე ოთხი წელი ვთამაშობდი. “მერანს” დიდი როლი აქვს ნათამაშები ჩემს ფეხბურთელად ჩამოყალიბებაში. რა თქმა უნდა, ამისთვის მარტვილის კლუბში ყველა მომუშავეს მადლობას ვუხდი. მინდა, “მერანს” წარამატებები ვუსურვო!
– მომავალ სატრანსფერო ფანჯარაზე, კარგი შემოთავაზების შემთხვევაში, საზღვარგარეთ წასვლას თუ განიხილავ? თუ ჯერ “დინამოში” აპირებ დამკვიდრებას და განვითარებას?
– “დინამოსთან” სამწლიანი კონტრაქტი გავაფორმე. ახლა ყველაფერი ჩემზეა დამოკიდებული: როგორ თამაშებს ჩავატარებ ამ კლუბში. თუ ღირსი ვიქნები, ყველაფერს განვიხილავ.
