ჭდე: ფაჩულია

დღეს, გამთენიისას, ოკეანგაღმიდან 1 კარგი და 1 ცუდი ამბავი მოვიდა. ცუდია ის, რომ ზაზა ფაჩულიას გუნდმა “მილუოკიმ” არსებობის 45-წლიან ისტორიაში შედეგიანობის ანტირეკორდი დაამყარა, ხოლო კარგი ამბავი თორნიკე შენგელიას ქულებია. მართალია, “ჩიკაგო ბულსის” ქართველმა ცენტრმა მხოლოდ 2 ქულა მიითვალა, თუმცა იმის ფონზე, რომ თორნიკეს ძალიან იშვიათად უწევს მოედანზე გასვლა, ეს შედეგიც მისასალმებელია.

აქამდე “მილუოკის” ყველაზე ცუდი შედეგი სეზონში წაგებული 62 მატჩი იყო. ფაჩულიას გუნდმა დღეს, გამთენიისას მიმდინარე სეზონის 63-ე მატჩი ტორონტოში “რეპტორსთან” წააგო და ანტირეკორდი დაამყარა. მილუოკელებმა კონფერენციის ერთ-ერთ მოწინავე გუნდთან შეხვედრა ბრძოლაში – 98:102 დათმეს.

ქართველი ფორვარდი სასტარტო ხუთეულში იყო, თუმცა მოედანზე მხოლოდ 9 წუთი გაატარა. ფაჩულიამ ჯარიმები თავიდანვე დააგროვა და 4 პერსონალურით ის მოედნიდან გაიყვანეს. მის ნაცვლად მატჩში ჩართული ჯონ ჰენსონი ისე კარგად გაისარჯა, რომ მწვრთნელა ქართველი ფორვარდი მოედანზე აღარ დააბრუნა. საბოლოოდ ჰენსონმა 39 წუთი ითამაშა და მილუოკელთგან საუკეთესო იყო 23 ქულით, 9 მოხსნით, 6 პასით და 3 დაფარებით. იმ 9 წუთში, რაც მოედანზე  იმყოფებოდა, ფაჩულიამ 1 სროლა ააცილა, 1 პასი გასცა და 1 ბურთი დაკარგა.

შენგელიას რაც შეეხება, მისმა “ჩიკაგომ” “ვაშინგტონი” 96:78 გაანადგურა. შეხვედრის ბოლო 1,50 წუთი დაუთმეს ქართველ ფორვარდს, რომელმაც 2 ორქულიანის განხორციელება მოასწრო, და 1 ჩააგდო. სხვა სტატისტიკური მაჩვენებელი შენგელიას არ ჰქონია.

45 მოგებითა და 32 მარცხით “ჩიკაგო” და “ტორონტო” აღმოსავლეთ კონფერენციაში 3-4 ადგილებს იყოფენ. მომდევნო მატჩი “ჩიკაგოს” 9 აპრილს მინესოტაში ელის.

gbf.ge

ზაზა ფაჩულიას გუნდმა ნბა-ში გამარჯვება იზეიმა. “მილუოკი ბასქმა” “ორლანდო მეჯიქს” უმასპინძლა და დაძაბულ ბრძოლაში დაამარცხა. მილუოკელები ბოლო პერიოდის წინ 3 ქულით ჩამორჩებოდნენ, თუმცა ბოლომდე იბრძოლეს,რაც დაუფასდათ – 105:98.

ქართველი ცენტრი სასტარტო ხუთეულში იყო, მაგრამ მოედანზე ხანგრძლივად არ დარჩენილა. ზაზამ 17 :11 წუთი ითამაშა და თამაში 4 ქულით, 6 მოხსნით და თითო ჩაჭრა-დაფარებით დაასრულა. ფაჩულიამ ორლანდოელთა ფარს თამაშიდან 5-ჯერ შეუტია, საიდანაც 2 სროლა ჩააგდო.

მილუოკელებს 21 ქულით ბრენდონ ნაითმა ულიდერა, რამონ სეშენსმა და ერსან ილიასოვამ კი 16-16 ქულა მოინაგრეს. ამ უკანასკნელმა ორმაგი დუბლი შეასრულა და 16 ქულას 11 მოხსნა მოაყოლა. ორლანდოელებში 14 ქულაზე მეტი არავის ჩაუგდია, არადა, 10-ქულიანი ბარიერი ერთბაშად 7-მა კალათბურთელმა დაძლია და მათ შორის საუკეთესო ნიკოლა ვუჩევიჩი იყო 12 ქულა-12 მოხსნით.

მილუოკელებისთვის ეს მიმდინარე სეზონში მე-13 გამარჯვება გახლდათ 63-ე მატჩში. ახლა ფაჩულიას გუნდს 3 გასვლითი მატჩი ელის, რომელთაგან უახლოესი ხვალ, მინესოტაში გაიმართება.

gbf.ge

ზაზა ფაჩულია სათამაშო დროსთან ერთად შედეგიანობასაც უმატებს. “მილუოკის” ქართელი ცენტრი 2-თვიანი იძულებითი უქმობის შემდეგ მოედანს 2 დღის წინ დაუბრუნდა და 12 წუთში 4 ქულა მიითვალა, დღეს, გამთენიისას კი ის 18 წუთით გავიდა მოედანზე და 12 ქულასთან ერთად 7 მოხსნა, 2 პასი და 1 ჩაჭრა დააგროვა.

რაც მთავარია, გაუთავებელი წაგებების შემდეგ მილუოკელებმა იმარჯვეს. ფაჩულიას გუნდმა “ნიუ იორკს” უმასპინძლა და დაძაბულ ბრძოლაში, 101:98 დაამარცხა. “ირმებმა” თანაბარი პირველი მეოთხედის შემდეგ მეორეში 10 ქულით იმარჯვეს და ლიდერობა დარჩენილ დროში კბილებით შეინარჩუნეს.

ფაჩულია სასტარტო ხუთეულში არ ყოფილა. ის ძირითად ცენტრ ლარი სანდერსს ენაცვლებოდა, რომელმაც 29 წუთში 8 ქულა და 11 მოხსნა გააკეთა. ზაზამ მთლიანობაში მოედანზე 18:25 წუთი გაატარა და 9-დან 4 ოქრულიანი და 4-დან 4 საჯარიმო ჩააგდო. მილუოკელებში საუკეთესო ბრენდონ ნაითი იყო 25ქულა-7 პასით.

“მილუოკის” 9 გამარჯვების წილ 39 მარცხი აქვს და აღმოსავლეთ კონფერენციასთან ერთად მთელს ლიგაში ბოლო ადგილზე იმყოფება. მომდევნო მატჩი მილუოკელებს დენვერში 5 თებერვალს ელით.

gbf.ge