უეფას ევროპის ლიგის ნახევარფინალურ ეტაპზე ლისაბონის „ბენფიკასა“ და ტურინის „იუვენტუსს“ შორის გამართული პირველი შეხვედრა პორტუგალიელთა გამარჯვებით, ანგარიშით 2:1 დასრულდა. მატჩის შემდეგ „ბენფიკას“ კიპერმა არტურმა განაცხადა, რომ განმეორებით შეხვედრამდე მისმა გუნდმა პოზიციები გაიმყარა.
„სიმშვიდე უნდა შევინარჩუნო. გვესმის, რომ მეტოქედ ძლიერი გუნდი გვყავს, რომელიც ბევრი ნიჭიერი ფეხბურთელით არის დაკომპლექტებული. მათ შეუძლიათ, შეტევაში თავიანთი სიტყვა თქვან.
საბედნიეროდ, „ბენფიკა“ მთელი გუნდით უტევს და მთელი გუნდით იცავს თავს. მნიშვნელოვანი მატჩი მოვიგეთ და განმეორებითი შეხვედრამდე პოზიციები გავიმყარეთ“, – არტურის სიტყვებს Football italia ციტირებს.
შეგახსენებთ, რომ „იუვენტუსსა“ და „ბენფიკას“ შორის განმეორებითი მატჩი ტურინში, 1-ელ მაისს გაიმართება.
ბექა დოგრაშვილი