ჭდე: კარვახალი

დანიელ კარვახალს გულთან დაკავშირებული პრობლემა ჰქონდა და საკმაო ხანი გაუცდა. ესპანელმა ვარჯიში სრული დატვირთვით დაიწყო და მას ამ შაბათს, მადრიდის “ატლეტიკოსთან” შეხვედრაში ელიან, რომელიც ლა ლიგა სანტანდერის ეგიდით შედგება.

“რეალის” მარჯვენა მცველმა უკვე აღმოფხვრილ პრობლემაზე ისაუბრა.

“შეშინებული ვიყავი, რომ იმ მდგომარეობის გამო, რომელშიც ჩემი გული იყო, კარიერის დასრულება მომიწევდა. პირველი სამი თუ ოთხი კვირა, ფაქტობრივად, ვერაფერს ვაკეთებდი. იმ პერიოდში გულის ცემას აკვირდებოდნენ, რომელიც ძალიან ნელი იყო. სხეული და მისი ორგანოები თავისებურად რეაგირებენ აქტიურობაზე. განსაკუთრებით, ეს მაშინ, ხდება, როცა ათლეტი ხარ და დიდი დატვირთვა გაქვს. ბედნიერი ვარ, რომ ეს ყოველივე დავძლიე და ახლა თავს კარგად ვგრძნობ.”

“დაბრუნება უფრო ადრე მინდოდა, თუმცა ექიმებთან და მწვრთნელთან საუბრის შემდეგ, გადაწყდა, რომ სანაკრებო პაუზის შემდეგ პირველივე მატჩში მივიღებდი მონაწილეობას. როგორც ექიმები მეუბნებიან, არანაირი საფრთხე არ მემუქრება და ჩემი გული მოსალოდნელ დატვიტრთვას გაუძლებს. უკვე მშვიდად ვარ და მოუთმენლად ველი, როდის გავალ მოედანზე,” – ამბობს კარვახალი.

დანიელ კარვახალი რამდენიმე სეზონია, რაც “რეალის” ძირითადი შემადგენლობის შეუცვლელ წევრად იქცა. მისი კონკურენტები – ალვარო არბელოა და დანილო იყვნენ, თუმცა კლუბი ორივემ დატოვა. ამჟამად, ესპანელს მეტოქეობას 18 წლის ფეხბურთელი, აჩრაფ ჰაკიმი უწევს. მოროკოელი სპორტსმენი “ბლანკოსის” აღზრდილია და გასულ ზაფხულში დაწინაურდა მთავარ გუნდში.

კარვახალმა ჟურნალისტებთან საკუთარ თავსა და თავის კონკურენტებზე ისაუბრა.

“აჩრაფი ფანტასტიკური ბიჭია. ის ბევრ რამეს სწრაფად ითვისებს და ამ სეზონში აქვს შესაძებლობა, რომ განვითარდეს. პირადად მე, არ მჭირდება სხვა მარჯვენა მცველი იმისთვის, რომ, როგორც ფეხბურთელი, გავიზარდო. ჩემი თავის კონკურენტი ისევ მე ვარ. მსურს, მაღალ დონეს მივაღწიო და გუნდს კიდევ უფრო დავეხმარო,” – აცხადებს დანი.