ჭდე: ანტუან გრიზმანი

ანტუან გრიზმანმა, რომელმაც “ლეგანესთან” მატჩში ოთხი გოლის გატანა შეძლო, პრესასთან რამდენიმე მნიშვნელოვან თემაზე ისაუბრა და აღნიშნა, რომ “ბარსელონასთან” მატჩის წინ “ატლეტიკო” შესანიშნავ განწყობაზეა.

“ძალიან ბედნიერი ვარ ჩემი თამაშით. ოთხი გოლის გატანა დიდებული რამ იყო, მაგრამ ჩემთვის უფრო მნიშვნელოვანი თამაშის მოგება და “ბარსელონასთან” მატჩამდე კარგი განწყობის შენარჩუნებაა. ვნახოთ, იქნებ იქ უფრო ლამაზი რამ შევთავაზოთ გულშემატკივარს.

ჩემპიონატის დასრულებამდე 13 მატჩია დარჩენილი და ყველანაირად ვეცდებით, რომ თითოეული მათგანი მოვიგოთ. ამის შემდეგ კი ვნახავთ, რომელ პოზიციაზე დავასრულებთ ასპარეზობას.

ყველანაირად ვცდილობთ, რომ ფანები უფრო მეტად გავახაროთ. შესაძლოა, მოედნის გარეთ დავუშვა შეცდომები, არაადეკვატური განცხადება გავაკეთო, მაგრამ მოედანზე – არასოდეს,” – აცხადებს გრიზმანი.

მადრიდის “ატლეტიკოს” გენერალურმა დირექტორმა, მიგელ ანხელ გილ მარტინმა As-თან რამდენიმე მნიშვნელოვანი თემა განიხილა. მათ შორის იყო “როხიბლანკოს” ფრანგი ლიდერის, ანტუან გრიზმანის პოტენციური ტრანსფერი “მანჩესტერ იუნაიტედში”.

“რა თქმა უნდა, გრიზმანი “ატლეტიკოს” სეზონის მეორე ნახევარშიც დაეხმარება. კლუბი მასთან მოლაპარაკებების წარმოებას ახლა არ აპირებს, რადგანაც პრაქტიკულად წარმოუდგენელია, ვინმემ მისი გამოსასყიდი თანხა გადაიხადოს – პირველ ივლისამდე მისი გადაბირება მხოლოდ 200 მილიონად არის შესაძლებელი.

ფასზე უფრო მეტად მნიშვნელოვანი ჩვენთვის მისი როლია გუნდში. ანტუანი გუნდს დიდ დახმარებას უწევს და ჩვენი მიზანია, რომ ის და დიეგო კოშტა გუნდში კიდევ დიდი ხნის მანძილზე დარჩნენ,” – აცხადებს “ატლეტიკოს” დირექტორი.

მადრიდის “ატლეტიკოს” მთავარი მწვრთნელი, დიეგო სიმეონე აღიარებს, რომ “როხიბლანკოს” სათამაშო სტილი ანტუან გრიზმანს საშუალებას არ აძლევს, ისეთ ფეხბურთელებს გაუწიოს კონკურენცია, როგორიც ნეიმარი, მესი და რონალდუ არიან.

“თუ ერთ დღეს გრიზმანი “ატლეტიკოს” დატოვებს და შემტევ გუნდში გადავა, ის გაცილებით უფრო კარგი და პროდუქტიული გახდება. ამაში დარწმუნებული ვარ. ყველასათვის ნათელია, რომ მას შეტევითი თამაში სჭირდება.

მიუხედავად ამისა, ვთვლი, რომ გრიზმანი ერთ-ერთია იმ ფეხბურთელთაგან, რომლებმაც ჩემი მოსვლის შემდეგ უდიდესი პროგრესი განიცადეს. ისეთ გუნდებში, როგორიცაა “ბარსელონა”, “პარი სენ-ჟერმენი” და “რეალი” შემტევებს მხოლოდ შეტევაზე უწევთ ფიქრი, ჩვენთან კი დაცვის საქმეებსაც აგვარებენ. განსხვავება ნათელია.

ყოველთვის ვამბობ, რომ ჩემი ფეხბურთელები მიყვარს. თუ ფეხბურთელი ჩემთან მოვა და მეტყვის, რომ სხვა კლუბში გადასვლის საუკეთესო შანსი აქვს, მე მას გავუშვებ. განსაკუთრებით მაშინ, თუ ის ფეხბურთელი ისევე იხარჯებოდა გუნდისთვის, როგორც გრიზმანი,” – აცხადებს სიმეონე.

ცნობისთვის გეტყვით, რომ ბოლო დროს უცხოური მედია საკმაოდ აქტიურად ლაპარაკობს გრიზმანის მიმართ “ბარსელონასა” და “მანჩესტერ იუნაიტედის” ინტერესზე.