ჭდე: Formula 1

ფორმულა 1-ის შვიდგზის ჩემპიონ მიხაელ შუმახერის ჯანმრთელობის მდგომარეობა თანდათან უმჯობესდება. გერმანელი ავტომრბოლელი მეუღლისა და შვილების ხმაზე უკვე რეაგირებს.

“შუმახერი მეუღლისა და შვილების ხმის გაგონებაზე ტირილს იწყებს. თითქოს სამწუხარო ამბავია, მაგრამ კარგი ფაქტია, რადგან შუმი სიცოცხლის ნიშნებს იბრუნებს”, – დაწერა სოციალურ ქსელში ფორმულა 1-ის თემებზე მომუშავე ჟურნალისტმა ანტონიო ბოსელიმ.

შეგახსენებთ, რომ გასული წლის 29 დეკემბერს მიხაელ შუმახერი საფრანგეთის ალპებში თხილამურებით სრიალისას ბილიკიდან გადავიდა, ძირს დაეცა და თავი ქვას დაარტყა, რის შემდეგაც კომაში ჩავარდა. გერმანელი ავტომბრობელი კომიდან თითქმის 6-თვიანი პერიოდის შემდეგ გამოვიდა.

 

ფორმულა 1-ში „ფერარის“ ესპანელმა პილოტმა ფერნანდო ალონსომ ცნობილ მომღერალ ჯასტინ ბიბერთან შეხვედრაზე უარი განაცხადა.

ბიბერი ამ უქმეებზე მონაკოში გამართულ გრანპრის დაესწრო და იტალიური საჯინიბო „სკუდერია ფერარი“ მოინახულა. კანადელმა მომღერალმა მსოფლიოს ორგზის ჩემპიონ ფერნანდო ალონსოსთან შეხვედრაც მოისურვა, თუმცა ესპანელმა პილოტმა განაცხადა, რომ ძალიან დაკავებული იყო და ბიბერს ვერ შეხვდებოდა. ხელმოცარულ მომღერალს ისღა დარჩენოდა, რომ ე.წ. „სელფი“ ფორმულა 1-ის ხელმძღვანელ ბერნი ეკლსტოუნთან გადაეღო.

ფერნანდო ალონსომ მონაკოს გრანპრი მეხუთე პოზიციიდან დაიწყო და მეოთხეზე დაასრულა. პირად ჩათვლაში ესპანელი პილოტი მესამე ადგილზეა. როგორც მოგეხსენებათ, ჩათვლას „მერსედესის“ მრბოლელები — ნიკო როსბერგი და ლუის ჰემილტონი უდგანან სათავეში.

ბექა დოგრაშვილი

გასული წლის დეკემბრის თვიდან კომაში მყოფ ავტომრბოლელ მიხაელ შუმახერს ცნობიერების ნიშნები უბრუნებდა. ინფორმაციას ამის შესახებ მისი მენეჯერი საბინა კემი ავრცელებს.

„მიხაელის მდგომარეობის პროგრესირება აშკარაა. მას ცნობიერების ნიშნები უბრუნდება და გამოფხიზლებას იწყებს. ყველას მადლობას ვუხდით თანაგრძნობისთვის. ამავე დროს, გთხოვთ, გაგებით მოეკიდოთ იმ ფაქტს, რომ დეტალების გამჟღავნებისგან თავს ვიკავებთ“, – ციტირებს კემის სიტყვებს „ბი ბი სი“.

გავრცელებული ინფორმაციით, გერმანელი ავტომრბოლელი უკვე დამოუკიდებლად სუნთქავს, მისი რეაქცია კი იმაზე მიუთითებს, რომ მიღებულ ინფორმაციას აღიქვამს. უცხოური პრესის ცნობით, ოჯახის წევრები, ნათესავები და მეგობრები შუმახერს არ შორდებიან, მას მუდმივად ესაუბრებიან.

შეგახსენებთ, რომ შუმახერი გასული წლის დეკემბერში, საფრანგეთის ალპებში თხილამურებით სრიალისას ბილიკიდან გადავიდა, ძირს დაეცა და თავი ქვას დაარტყა. გერმანელი ავტომრბოლელი გრენობლის კლინიკაშია მოთავსებული.

ბექა დოგრაშვილი

ფორმულა 1-ის 2014 წლის სეზონის მეორე გრანპრის მალაიზიამ უმასპინძლა. სეზონის პირველი დიდი პრიზის მსგავსად, ფინიშის ხაზზე პირველი დღესაც „მერსედესის“ პილოტი მივიდა, თუმცა არა ნიკო როსბერგი, არამედ ლუის ჰემილტონი. როსბერგი ამჯერად მეორე იყო, ესე იგი „მერსედესმა“ მალაიზიაში დუბლი გაიფორმა, რაც უკანასკნელი 60 წლის მანძილზე პირველად მოახერხა. ფინიშის ხაზზე მესამე სებასტიან ფეტელი იყო.

დღევანდელი გამარჯვებით კონსტრუქტორთა თასზე „მერსედესმა“ „მაკლარენს“ ლიდერობა ჩამოართვა და 25 ქულით გაუსწრო. მესამე ადგილზე გადმოინაცვლა „ფერარიმ“.

კონსტრუქტორთა თასი:

1.	„მერსედესი”	68 ქულა
2.	„მაკლარენი”	43 ქულა
3.	„ფერარი”	30 ქულა
4.	„უილიამსი”	20 ქულა
5.	„ფორს ინდია”	19 ქულა
6.	„რედ ბული”	15 ქულა
7.	„ტორო როსო”	7 ქულა
8.	„ზაუბერი”	0 ქულა
9.	„ლოტუსი”	0 ქულა
10.	„კატერჰემი”	0 ქულა
11.	„მარუსია”	0 ქულა

 

პირადი ჩათვლა:

1.	ნიკო როსბერგი (გერმანია, „მერსედესი”)	43 ქულა
2.	ლუის ჰემილტონი (დიდი ბრიტანეთი, „მერსედესი“)	25 ქულა
3.	ფერნანდო ალონსო (ესპანეთი, „ფერარი“)	24 ქულა
4.	ჯენსონ ბატონი (დიდი ბრიტანეთი, „მაკლარენი”)	23 ქულა
5.	კევინ მაგნუსენი (დანია, „მაკლარენი”)	20 ქულა
6.	ნიკო ჰიულკენბერგი (გერმანია, „ფორს ინდია”)	18 ქულა
7.	სებასტიან ფეტელი (გერმანია, „რედ ბული“)	15 ქულა
8.	ვალტერი ბოტასი (ფინეთი, უილიამსი”)	14 ქულა
9.	კიმი რაიკონენი (ფინეთი, „ფერარი”)	6 ქულა
10.	ფელიპე მასა (ბრაზილია „უილიამსი“)	6 ქულა
11.	ჟან-ერიკ ვერნი (საფრანგეთი, „ტორო როსო”)	4 ქულა
12.	დანიილ კვიატი (რუსეთი, „ტორო როსო”)	3 ქულა
13.	სერხიო პერესი (მექსიკა, „ფორს ინდია”)	1 ქულა

 

ბექა დოგრაშვილი

ფორმულა 1-ის შვიდგზის ჩემპიონმა მიხაელ შუმახერმა, რომელიც უკვე მესამე თვეა კომაში იმყოფება, წონაში მნიშვნელოვნად დაიკლო, რაც ექიმების შეშფოთებას იწვევს.

თუ 2013 წლის დეკემბრის თვეში შუმახერი 75 კილოგრამს იწონიდა, ახლა წითელ ბარონად წოდებული ავტომრბოლელი 20 კილოგრამით ნაკლებია. მართალია, შუმახერის ორგანიზმი მთელი ამ ხნის განმავლობაში დამოუკიდებლად ვერ ფუნქციონირებს, თუმცა მისი ამჟამინდელი წონა ყველა ნორმას არღვევს.

„კომაში მყოფი პაციენტისთვის წონის კლება ჩვეულებრივი მოვლენაა, მაგრამ 20 კილოგრამის დაკარგვა ბევრია. უნდა ვივარაუდოთ, რომ უმოძრაობის გამო კუნთების მუშაობა მნიშვნელოვნად გაუარესდება“, – განაცხადა ავტორიტეტულმა გერმანელმა ექიმმა კურტ დიემმა „ბილდის“ ჟურნალისტთან საუბრისას.

შეგახსენებთ, რომ შუმახერი გასული წლის დეკემბერში, საფრანგეთის ალპებში თხილამურებით სრიალისას დავარდა და თავის მძიმე დაზიანება მიიღო. გერმანელი ავტომრბოლელი გრენობლის კლინიკაშია მოთავსებული.

ბექა დოგრაშვილი

როგორც ჩანს, საერთაშორისო საავტომობილო ფედერაციაში (FIA) იმსჯელეს და გადაწყვიტეს, რომ ფორმულა 1-ის გრანპრიში გამარჯვებულ პილოტებს ტრიუმფისას ბოლიდის პროწიალისა და რგოლების მოხაზვის ნება დართონ. ყოველ შემთხვევაში, ასეთ ინფორმაციას ავრცელებს Motorsport-Total-ი.

მანამდე ეს ელემენტი აკრძალული იყო და პილოტებს სოლიდური ჯარიმებით სჯიდნენ. ახლა უკვე გამარჯვებულ ავტომრბოლელებს ბედაურის პროწიალის ნება მიეცემათ, თუმცა მხოლოდ იმ შემთხვევაში, თუ მათი ასეთი განავარდება საფრთხეს არ შეუქმნის დანარჩენ პილოტებსა და სტიუარდებს, არ გასცდება რეგლამენტით დადგენილ წესებსა და ორგანიზატორებს დაჯილდოების ცერემონიის გადადებას არ აიძულებს.

შეგახსენებთ, რომ გასულ სეზონში გამარჯვებას ასე ხშირად აღნიშნავდა სებასტიან ფეტელი, რომელიც ინდოეთის გრანპრის შემდეგ 25 ათასი ევროთი დააჯარიმეს. გერმანელმა პილოტმა ბედაური აბუ-დაბიში, ოსტინსა და სან პაულუში გამართული რბოლების შემდეგაც აპროწიალა, მაგრამ მაშინ ფეტელი დასჯას გადაურჩა.

ბექა დოგრაშვილი

ფორმულა 1-ის გუნდმა „სკუდერია ფერარიმ“ სამხრეთ აფრიკის ქალაქ იოჰანესბურგში საჩვენებელი რბოლა მოაწყო.

საჩვენებელი წრეები „ფერარისა“ და „უილიამსის“ ყოფილმა ტესტ-პილოტმა მარკ ჟენემ გაიარა. ჟენე ბოლიდ F60-ს მართავდა, რომლითაც იტალიური გუნდი 2009 წლის სეზონში ასპარეზობდა. ესპანელმა ტესტ-პილოტმა რბოლის დროს მექანიკოსებთან ერთად პიტ-სტოპების სერიაც მოაწყო.

„ღონისძიებამ წარმატებით ჩაიარა, 25 ათასზე მეტი ენერგიული გულშემატკივარი გვესწრებოდა! მადლობა „შელსა“ და სამხრეთ აფრიკას!“ – დაწერა სოციალურ ქსელში ჟენემ.

 

ბექა დოგრაშვილი

„რედ ბულის“ პილოტი სებასტიან ფეტელი თვლის, რომ რეგლამენტისა და ბოლიდთა კონსტრუქციაში ცვლილებების გამო თითოეულ ავტომრბოლელს ბოლიდის მართვის უნარების შეცვლა მოუწევს. გერმანელის თქმით, ფორმულა 1-ის პილოტები ახალ პირობებს უნდა შეეგუონ.

„დარწმუნებული ვარ, პილოტირებაში ახალი ელემენტები გაჩნდება და ზოგადად, სხვა მოთხოვნები დაწესდება. ამ ყველაფერთან ადაპტირება მოგვიწევს. ახალი ბოლიდი ტრეკზე სულ სხვანაირი იქნება. თუ ისევ ისე ვიმოძრავებთ, როგორც ეს ადრე ხდებოდა, ფინიშის ხაზამდეც ვერ მივაღწევთ. ეს სათქმელად ადვილია, მაგრამ სტილი როგორ უნდა შევიცვალოთ? თითოეულმა პილოტმა თვითონ უნდა იპოვოს ამ კითხვაზე სწორი პასუხი“, – ფეტელის სიტყვებს Autosport-ი ციტირებს.

აქვე გეტყვით იმასაც, რომ 2014 წლის სეზონის პირველი გრანპრი მელბურნში (ავსტრალია), 16 მარტს შედგება და რბოლა თბილისის დროით დილის 10:00 საათზე აიღებს სტარტს.

ბექა დოგრაშვილი

„რედ ბულის“ პილოტმა სებასტიან ფეტელმა, რომელიც გასულ წელს ფორმულა 1-ის ჩემპიონი მიჯრით მეოთხედ გახდა, 2013 წელს 29 მილიონი ევრო გამოიმუშავა. ამ ინფორმაციას „მოტორსპორტი“ ავრცელებს.

აღნიშნული თანხიდან 12 მილიონი 26 წლის გერმანელი ავტომრბოლელის სახელფასო შემოსავალია, დანარჩენი 17 მილიონი კი – სასპონსორო კონტრაქტებიდან და სხვადასხვა ეტაპების მოგებისთვის მიღებული ბონუსები.

შეგახსენებთ, რომ 2014 წლის სეზონიდან, შეთანხმების მიხედვით, ფეტელის პრემიალური თანხა კიდევ უფრო გაიზრდება.

აქვე გეტყვით იმასაც, რომ 2014 წლის სეზონის პირველი გრანპრი მელბურნში (ავსტრალია), 16 მარტს შედგება და რბოლა თბილისის დროით 10:00 საათზე აიღებს სტარტს.

ბექა დოგრაშვილი