“ზორიას” ფორვარდმა, ჯაბა ლიპარტიამ “ჩერნომორეცთან” შეხვედრის შესახაბ ისაუბრა, რომელიც ლუგანსკურმა გუნდმა სწორედ მისი გოლით მოიგო.
“რთული მატჩი იყო, “ჩერნომორეცი” რამდენიმე მოთამაშემ კი დატოვა, მაგრამ ოდესელებს მაინც კარგი გუნდი ჰყავთ.
მეორე ტამში ინიციატივას ჩვენ ვფლობდით, მომენტები შევქმენით და დამსახურებულადაც გავიმარჯვეთ. გოლების გატანა ყველას უხარია და გამონაკლისი არც მე ვარ. კარგია, რომ გატანა დავიწყე. იმედი მაქვს, ამ სეზონში კიდევ შევაგდებ” – განაცხადა ლიპარტიამ.
უკრაინის ჩემპიონატის მე-17 ტურში ლუგანსკის „ზარიამ“ ოდესის „ჩერნომორეცს“ უმასპინძლა და 77-ე წუთზე ქართველი შემტევის ჯაბა ლიპარტიას გოლით მეტოქე მინიმალური სხვაობით, 1:0 დაამარცხა.
ჯაბა თამაშში 54-ე წუთზე ჩაერთო, როდესაც გუნდის თავკაცმა იური ვერნიდუბმა ალექსანდრ გრიცაის შეცვლა გადაწყვიტა.
აღსანიშნავია, რომ ჯაბამ ზედიზედ მეორე მატჩში გაიტანა – წინა ტურში მან „ილიჩევეცის“ კარი აიღო, რომელთანაც მისმა გუნდმა გასვლაზე ანგარიშით 1:2 წააგო.
„ზარია“ – „ჩერნომორეცი“ 1:0
გოლი: ლიპარტია 77′
„ზარია“: სანტინი; ოპანასენკო, პილიავსკი, ვერნიდუბი, კამენიუკა; მალინოვსკი (ლიუბენოვიჩი 46′), მალიშევი, გრიცაი (ლიპარტია 54′); კარავაევი, ხომჩენოვსკი, ბუდკოვსკი (როროვიცკი 74′)
„ჩერნომორეცი“: მარტიშიუკი; ოლეინიკი, მარტინენკო, კრნეტა, პუტრაში; გრეჩიშკინი, ფილიმონოვი (კალიტოვი 71′); დანჩენკო (კიჩა 81′), ვასინი (კაბაევი 33′), ბალაშივი; დიდენკო
გაფრთხილებები: ოპანასენკო – მარტიშენკო, კაბაევი
ამ გამარჯვებით „ზარიამ“ 27 ქულა დააგროვა და სატურნირო ცხრილის მე-4 ადგილზე ავიდა. ამჟამად ლუგანსკელები მესამე ადგილზე მყოფ დნეპროპეტროვსკის „დნიპროს“, რომლის რიგებშიც ჯაბა კანკავა გამოდის, 7 ქულით ჩამორჩება. ცნობისთვის, ამ ტურში „დნიპრო“ თავის მატჩს მოგვიანებით ჩაატარებს – მისი მეტოქე ზაპოროჟიეს „მეტალურგი“ იქნება.
რაც შეეხება „ზარიას“, მე-18 ტურში ლუგანსკელები გასვლაზე „ვოლნს“ ესტუმრებიან.
უკრაინის ჩემპიონატის მე-16 ტურში მარიუპოლის “ილიჩივეცმა” ლუგანსკის “ზორია” დნეპროპეტროვსკში მიიღო და 2:1 მოუგო.
მატჩის 26-ე წუთზე ლუგანსკელთა ძირითადში დაბრუნებულმა ქართველმა შემტევმა, ჯაბა ლიპარტიამ საკუთარი გოლით წონასწორობის აღდგენა შეძლო, თუმცა საბოლოოდ ლუგანსკელები ერთ-ერთ აუტსაიდერთან მაინც დამარცხდნენ.
16 ტურის შემდეგ “ზორია” 24 ქულით მე-4 პოზიციაზე იმყოფება.
უკრაინის თასის გათამაშების პირველ 1/4 ფინალურ შეხვედრაში ლუგანსკის “ზორიამ” კიევის “დინამოს” ზაპოროჟიეში, “სლავუტიჩ არენაზე” უმასპინძა. შეხვედრა ნომინალური მასპინძლების მარცხით, 1:2 დასრულდა.
ლუგანსკელთა შემადგენლობაში სათადარიგოთა შორის იყო ქართველი შემტევი ჯაბა ლიპარტია, რომელსაც თამაშის საშუალება არ მისცემია. შეგახსენებთ, ლიპარტიას არც პრემიერლიგის უკანასკნელ ტურში უთამაშია.
განმეორებითი მატჩი კიევში 8 აპრილს შედგება.
