ჭდე: დუგლას კოშტა

მიუნხენის “ბაიერნის” გენერალური დირექტორი, კარლ-ჰაინც რუმენიგე ადასტურებს ინფორმაციას, რომლის მიხედვითაც “ბავარიელები” ტურინის “იუვენტუსთან” აწარმოებენ მოლაპარაკებებს დუგლას კოშტას ტრანსფერის თაობაზე.

“იუვენტუსთან” მოლაპარაკებების მაგიდაზე ვზივართ, თუმცა ჯერჯერობით შეთანხმებისთვის არ მიგვიღწევია. მოლაპარაკებები პოზიტიური და საკმაოდ სერიოზულია.

ფეხბურთელმა თავად განგვიცხადა, რომ კლუბის დატოვება სურს. არ მოგატყუებთ, არის თანხის განსაზღვრული ოდენობა, რომლის მიღების შემთხვევაშიც ტრანსფერს დასრულებულად ჩავთვლით,” – აცხადებს რუმენიგე.

როგორც იცით, 26 წლის ბრაზილიელი გარემარბი გერმანიაში დონეცკის “შახტარიდან” გადავიდა 30 მილიონი ევროს სანაცვლოდ.

მირჩა ლუჩესკუმ მიუნხენის “ბაიერნის” ბრაზილიელ ფეხბურთელს, დუგლას კოშტას კლუბის დატოვება ურჩია.

“დუგლას კოშტა დიდებული ფეხბურთელი და კარგი ადამიანია, მაგრამ მას ისეთი გარემო ესაჭიროება, რომელიც მის შესაძლებლობებს კიდევ უფრო გაზრდის.

მე თუ მკითხავთ, მას “იუვეში” ვურჩევდი გადასვლას, რადგანაც სერია ა დღემდე ყველაზე რთულ ჩემპიონატად რჩება მსოფლიოში.

ბუნდესლიგაში ყველა გუნდი ერთნაირად თამაშობს, იტალიაში კი ასე არ არის. ამ მხრივ ეს ჩემპიონატი საკმაოდ მრავალფეროვანია,” – აცხადებს ლუჩესკუ.

დუგლას კოშტას მიერ Instagram-ზე გამოქვეყნებულმა ორიოდე ფოტომ გერმანული “ბაიერნის” ფანებში პანიკა გამოიწვია.

როგორც იცით, ამ დროისთვის ბავარიელთა ბრაზილიელი ფეხბურთელი მელბურნში ისვენებს. დასვენებისას მან გადაწყვიტა ძალები ფუტსალშიც მოესინჯა – დუგლასმა ადგილობრივი კლუბის, “პასკუე ვალეს” რიგებში ითამაშა. “პასკუე ვალეს” მეტოქე კი “ფიცროი” იყო.

მატჩის შემდეგ ბრაზილიელმა რამოდენიმე ფოტო გამოაქვეყნა, სადაც ის აღნიშნული კლუბის ჟაკეტშია გამოწყობილი. იქიდან გამომდინარე, რომ “პასკუე ვალეს” გერბი ძალიან წააგავს “იუვენტუსის” გერბს, ბევრს ეგონა, რომ ეს მისი ტურინში გადაბარგების მიმანიშნებელი იყო.