საქართველოსა და უკრაინის ახალგაზრდულ ნაკრებებს შორის ზესტაფონის დავით აბაშიძის სახელობის სტადიონზე დღეს გამართული ამხანაგური მატჩი უხვგოლიანი გამოდგა. შეხვედრა ფრედ, ანგარიშით 3:3 დასრულდა.
წვიმიანი ამინდის მიუხედავად, მატჩი ორმხრივ იერიშებში წარიმართა. ანგარიში უკრაინელებმა გახსნეს. მე-19 წუთზე გოლი ედუარდ სობოლმა გაიტანა, თუმცა სამ წუთში რომან ჭანტურიამ წონასწორობა აღადგინა. სტუმრები 27-ე წუთზე რომან იარემჩუკმა კვლავ დააწინაურა, 35-ე წუთზე კი ოთარ კიტეიშვილმა ანგარიში გაათანაბრა. მატჩის პირველი ნახევარი 2:2 დასრულდა. შეხვედრის მეორე ნახევარში გუნდებმა გოლები გაცვალეს. 65-ე წუთზე ლევან შენგელიამ მასპინძლები წინ გაიყვანა, თუმცა 90-ე წუთზე ბექა ვაჩიბერაძემ, რომელიც უკრაინის მოქალაქეა, ანგარიში გაათანაბრა და საბოლოო შედეგი დააფიქსირა — 3:3.
საქართველოს 21-წლამდელთა ნაკრები მომდევნო მატჩს ევროპის ჩემპიონატის საკვალიფიკაციო ეტაპის ეგიდით გამართავს. ქართველი ფეხბურთელები 3 ივნისს სტუმრად შვედეთში ითამაშებენ.
საქართველო U21: კუპატაძე, გეგეჭკორი, ტაბიძე, მარგველაშვილი, თევზაძე, გოროზია, გვილია; ხარაშივილი, კიტეიშვილი, არაბული, ჭანტურია.
