ახალი ზელანდიის ნაკრების კაპიტანმა, რიჩი მაკქოუმ საქართველოს ეროვნულ ნაკრებზე ისაუბრა და “ბორჯღალოსნებთან” მსოფლიოს ჩემპიონატზე გამართული შეხვედრა გაიხსენა.
“საქართველოს ნაკრებმა ჩემზე დიდი შთაბეჭდილება მოახდინა. ამ გუნდში ყველა დიდი ბიჭი იყო. მათი უმეტესობა ახლა ევროპულ კლუბებში თამაშობს. ნამდვილად რთული მატჩი გამოდგა. ქართველების ერთ-ერთი ყველაზე ძლიერი მხარე დაცვაში თამაში იყო – მათი გარღვევა ძალიან რთული იყო. თუმცა, ზოგჯერ საქართველოს ნაკრები შეტევაში თავის შანსს ვერ იყენებდა.
მატჩის დაწყებამდე, ვფიქრობდით, რომ სავარაუდოდ, მოედანს გამარჯვებულები ჩვენ დავტოვებდით, მაგრამ მოგება ადვილი ნამდვილად არ ყოფილა. საქართველოს ნაკრების ყველა მორაგბე ძალიან მაღალი დონისაა. მათ იციან, როგორ ითამაშონ რაგბი, ისინი პროფესიონალები არიან. ჩემი აზრით, თუ საქართველოს ნაკრებს უფრო მაღალ დონეზე თამაშის საშუალება მიეცემა, ისინი კიდევ უფრო მოუმატებენ. შეხვედრის დასრულების შემდეგ, ყველა თანაგუნდელის მსგავსად, ძალიან დაღლილი ვიყავი და კუნთები მტკიოდა”, – ციტირებს მაკქოუს სიტყვებს rugbyonline.ru.
