ჭდე: არსენალი

ლონდონის “არსენალის” მთავარმა მწვრთნელმა, არსენ ვენგერმა ალექსის სანჩესზე ისაუბრა, რომელიც მიმდინარე სეზონში გუნდის ნამდვილ ლიდერად ჩამოყალიბდა და რომელიც საუკეთესო სეზონს ატარებს გატანილი გოლების მხრივ.

“თავიდან, ალექსისი უბრალო ფეხბურთელი იყო, რომელიც ძირითადად გოლების გატანაზე იყო დაგეშილი. ჩვენთან მოსვლის შემდეგ კი, მან საგოლე გადაცემების კეთებაც დაიწყო.

ახლა კი ის იმ პოზიციაზე თამაშობს, საიდანაც გოლების გატანაც შეუძლია და მათი შექმნაც. მჯერა, რომ “არსენალში” ყოფნის პერიოდმა ის სრულყოფილ ფეხბურთელად აქცია.

მისგან ასეთი სეზონი მოსალოდნელი იყო, ამიტომაც არის ის განსაკუთრებული ფეხბურთელი,” – აცხადებს ფრანგი სპეციალისტი.

პრემიერ ლიგის 36-ე ტურის გადადებულ შეხვედრაში ანგარიში ლონდონის “არსენალის” ჩილელმა შემტევმა გახსნა, რომელმაც “საუთჰემპტონის” კარი მატჩის მეორე ნახევარში დალაშქრა.

“მეთოფეთა” ლიდერისათვის ეს პრემიერ ლიგის მიმდინარე სეზონში გატანილი მეოცე გოლია, რაც მის კარიერაში საუკეთესო მაჩვენებელი გახლავთ.

აქამდე მის საუკეთესო მაჩვენებლად 2013/14 წლების სეზონში ნაჩვენები შედეგი – ერთ სეზონში გატანილი 19 გოლი (საშინაო ჩემპიონატში) ითვლებოდა. მაშინ სანჩესი “ბარსელონას” ღირსებას იცავდა.

ამასთანავე, სანჩესი პირველი ფეხბურთელი გახდა 2011/12 წლების სეზონის შემდეგ, რომელმაც ჩემპიონატის ერთ სეზონში 20 გოლის გატანა შეძლო. ბოლოს ეს რობინ ვან პერსიმ მოახერხა, როდესაც ერთ სეზონში 30-ჯერ მოახერხა მეტოქის კარის აღება.