“სარბიელის” საიუბილეო ნომერი გამოიცა

დღეს, 11-წლიანი პაუზის შემდეგ გაზეთ “სარბიელის” საიუბილეო ნომერი გამოიცა. ზუსტად 30 წლის წინ, 1990 წლის 28 დეკემბერს აღნიშნული გამოცემის პირველი ნომერი დაიბეჭდა. მას შემდეგ წლების განმავლობაში “სარბიელი” მკითხველს უამრავ საინტერესო მასალას აწვდიდა და რაც მთავარია, ეს არ იყო გაზეთის ფურცლებზე სტანდარტული სიტყვებით მშრალი ინფორმაციის გადმოცემა. “სარბიელის” ჟურნალისტებმა სპეციფიკური წერის მანერით შეძლეს ის, რომ გაზეთს საკუთარი სტილი ჩამოუყალიბდა, რისი წყალობითაც მისი გამორჩევა სხვა უამრავ გამოცემას შორის იყო შესაძლებელი. ყველაზე მთავარი კი საქმისადმი პასუხისმგებლობა და ის გულწრფელობა გახლდათ, რომლისთვისაც ამ გაზეთის ავტორებს ყველაზე კრიტიკულ პერიოდებშიც არ უღალატიათ, საქებს აქებდნენ, საკრიტიკებელს აკრიტიკებდნენ. მკითხველმაც მალე შეიყვარა “სარბიელი” და ყოველდღიურობის ნაწილად აქცია.

დღევანდელი საიუბილეო-საკოლექციო ნომერიც ტრადიციულ სტილშია გადაწყვეტილი, ისევ იმ ხალხის მიერაა შედგენილი, ისევ იმ ენით, ისევ ისე საინტერესოდ, ისევ იმ ფასად, განსხვავება კი ისაა, რომ გამოცემა 32-გვერდიანია.

ვულოცავთ “სარბიელს” 30 წლის იუბილეს!

ომი და მშვიდობა იტალიურ ფეხბურთში: ულტრასები და დაძმობილებული გუნდები

ულტრასული დაჯგუფება სპორტული გუნდის მხარდასაჭერად შექმნილ ქომაგთა ორგანიზებულ ჯგუფს ნიშნავს. მას საფუძველი 50-იანი წლების დასაწყისში ჩაეყარა და განვითარების პიკს 80-იან წლებში მიაღწია, როდესაც თითქმის ყველა საფეხბურთო კლუბს ჰყავდა ულტრასდაჯგუფება. ულტრასების ხსენებისას ხშირად ასოცირება ინგლისელ ხულიგნებთან ხდება, თუმცა ეს სტერეოტიპული წარმოდგენაა. მიუხედავად ამისა, ვერ უარვყოფთ იმ ფაქტს, რომ ულტრასდაჯგუფებებს შორის ძალადობა ხშირია, თუმცა ეს მათი არსებობის შედეგი უფრო არის, ვიდრე მიზანი.

ულტრასები ძირითადად სტადიონის ქვედა იარუსზე, კარის მახლობელ სექტორებზე თავსდებიან და იქიდან ქომაგობენ თავიანთ გუნდს სხვადასხვა შეძახილებითა თუ სიმღერებით, ხშირად თვალსასეირო პერფორმანსებსაც დგამენ. ულტრასსამყაროში პოლიტიკაც ღრმად არის ფესვგადგმული. დაჯგუფებები ძირითადად მკვეთრად მემარცხენე ან მემარჯვენე მიმართულების პოლიტიკური იდეოლოგიის მატარებლები არიან და ხშირად ეს განსაზღვრავს სხვადასხვა გუნდების ფანკლუბების ერთმანეთთან დაახლოებას. ამასთან, მხოლოდ პოლიტიკა არ არის ორი ულტრასდაჯგუფების ერთმანეთთან დაძმობილების მიზეზი.

“ლაციო” და “ინტერი”
იტალიაში სხვადასხვა კლუბთა ულტრასდაჯგუფებებს შორის მეგობრობის ერთ-ერთი ყველაზე კარგი მაგალითია რომის “ლაციოსა” და მილანის “ინტერის” ფანთა შემთხვევა. “ლაციოს” ულტრასები ცნობილნი არიან თავიანთი მკვეთრად მემარჯვენე შეხედულებებით, მათთვის არც სვასტიკის დემონსტრირებაა უცხო. ამ გარემოების გამო ისინი “ინტერის” ულტრასებს დაუძმობილდნენ. მართალია, “ნერაძურის” ფანდაჯგუფება ასეთივე ექსტრემალური შეხედულებებით ცნობილი არ არის, თუმცა მათ გარკვეული კავშირი აქვს იტალიის სხვადასხვა მემარჯვენე ჯგუფებთან, მათ შორის “შავ გულთან”.

აღნიშნული გუნდების ულტრასები ხშირად კიდებენ ტრიბუნებზე ერთმანეთის მიმართ პატივსაცემ ბანერებს. პოსტერი წარწერით “Da sempre fieri del nostro gemellaggio alla nord di Milano rendiamo omaggio” (“ვამაყობთ და პატივს ვცემთ ჩვენს დაძმობილებას მილანის ჩრდილოეთთან”) ამის ერთ-ერთი მაგალითია.

ამ ორ კლუბს შორის კავშირი კარგად გამოჩნდა 2010 წელს გაჩაღებულ სკუდეტოსთვის ბრძოლაში. გათამაშების დასრულებამდე ორი ტურით ადრე “ლაციო” “ინტერს” მასპინძლობდა, რომელსაც საჩემპიონო რბოლაში მხოლოდ გამარჯვება აძლევდა ხელს. ტიტულისთვის ბრძოლაში მილანელთა უშუალო კონკურენტი “ლაციოს” თანაქალაქელი და პრინციპული მეტოქე “რომა” იყო, რომელიც ლიდერ “ინტერს” მხოლოდ ორი ქულით ჩამორჩებოდა. ის შეხვედრა “ლაციომ” თითქმის უბრძოლველად, ანგარიშით 0:2 დათმო და ორ კვირაში “ინტერმა” ისტორიაში მე-18 სკუდეტოს მოგება იზეიმა.

“მილანი” და “ბრეშა”
იტალიაში ერთ-ერთი ყველაზე ხანგრძლივი ძმობა “მილანსა” და “ბრეშას” აკავშირებთ. მათი დამეგობრება პოლიტიკურმა შეხედულებებმა განაპირობა და მიუხედავად იმისა, რომ “მილანის” ულტრასდაჯგუფებაში იდეოლოგია შეიცვალა, ამ კლუბების ფანებს შორის ძმობა გრძელდება. ისინი ხშირად სტუმრობენ ერთმანეთის სტადიონებს დაძმობილებული გუნდის გასამხნევებლად. აღსანიშნავია, რომ “ბრეშასთან” დამეგობრებამ “მილანს” ურთიერთობა გაუფუჭა ბერგამოს “ატალანტასთან”.

“ატალანტა” და “ტერნანა”
თავის მხრივ, “ატალანტას” ულტრასდაჯგუფება ნაკლებად ცნობილია. პოლიტიკური იდეოლოგიის თვალსაზრისით ისინი მემარცხენეები არიან და ეს გახდა მათი საფეხბურთო კლუბ “ტერნანას” ფანებთან დაძმობილების მიზეზი. ასე რომ, თუ “ატალანტას” ქომაგთა შორის “ტერნანას” წითელ-მწვანე ფორმასაც მოკრავთ თვალს, არ გაგიკვირდეთ.

“ფიორენტინა” და “ვერონა”
განსხვავებული პოლიტიკური იდეოლოგია არ არის ფანკლუბების დაძმობილებისთვის ხელის შემშლელი ფაქტორი, თუმცა ასეთი შემთხვევები იშვიათია. “ფიორენტინას” ულტრასები მემარცხენეები არიან, ხოლო “ვერონასი” – მემარჯვენეები. ამ განსხვავების მიუხედავად, მათ ერთმანეთთან საკმაოდ მყარი ურთიერთობა აკავშირებთ.

“ფიორენტინა” და “ტორინო”
ორი სხვადასხვა კლუბის ულტრასები შესაძლოა, საერთო მოძულე გუნდმა გააერთიანოს. მაგალითად, “ტორინოსა” და “ფიორენტინას” ფანები ერთმანეთთან “იუვენტუსის” სიძულვილმა დაამეგობრა. ამ გუნდების ულტრასები სტადიონზე ერთმანეთს თბილი შინაარსის ბანერებით ესალმებიან: “Il popolo Fiorentino saluta la vera Torino” (“ფლორენციელი ხალხი მიესალმება ნამდვილ ტურინს”).

მარტოხელა “იუვენტუსი”
“იუვენტუსი” იტალიაში გარკვეულწილად მარტოხელა კლუბია. “ბებერი სინიორას” ულტრასებს სხვა გუნდის ფანებთან ალიანსი არ შეუქმნიათ და ამას მრავალი მიზეზი აქვს, რომელთაგან ორია გამოსაყოფი: “იუვენტუსი” იტალიის მასშტაბით ყველაზე წარმატებული გუნდია და ეს სხვა გუნდის ფანებისთვის დამაბრკოლებელი ფაქტორია, ხოლო მეორე მიზეზად “კალჩოპოლის” სკანდალი უნდა მივიჩნიოთ. მართალია, “იუვენტუსმა” ძველი დიდება მალევე დაიბრუნა, თუმცა ტიტულების მოგებაზე რთული გატეხილი სახელის აღდგენა აღმოჩნდა. “იუვეს” ულტრასები მეგობრებს იტალიის გარეთ ეძებენ და ყველაზე მყარი კავშირი ნიდერლანდურ “დენ ჰააგის” ფანებთან აქვთ.

“პარმა” და”სამპდორია”
იტალიურ ფეხბურთში ერთმანეთთან დაძმობილების შედარებით ნაკლებად ცნობილი შემთხვევებია “პარმასა” და “სამპდორიას” ფანებისა და “ნაპოლისა” და “ჯენოას” ულტრასების მეგობრობა. “პარმასა” და “სამპდორიას” ფანების ძმობა ოც წელზე მეტს ითვლის. 2009 წლის კოპა იტალიის ფინალურ მატჩში გენუელთა საქომაგოდ “პარმას” ფანები რომში საგანგებოდ ჩავიდნენ კიდეც.

“ნაპოლი” და”ჯენოა”
“ნაპოლისა” და “ჯენოას” დამეგობრებას საფუძველი 1982 წელს ჩაეყარა. იმ სეზონის ბოლო ტურში გენუელებს სერია A-ში დასარჩენად კინკილა ქულა ჰყოფნიდათ, თუმცა “სან პაოლოზე” 0:1 მარცხდებოდნენ. საბოლოო ჯამში, ის შეხვედრა ფრედ, ანგარიშით 2:2 დასრულდა, “ჯენოამ” გადასარჩენად საჭირო ქულა მოიპოვა და სერია B-ში მის ნაცვლად “მილანი” დაქვეითდა. ამ ისტორიულმა მოვლენამ “ჯენოას” ულტრასების “ნაპოლის” ფანებთან დამეგობრება განაპირობა.

დარღვეული ძმობა
ყოფილა შემთხვევებიც, როდესაც ძლიერი და ერთი შეხედვით დაუშლელი ძმობა დარღვეულა. “ინტერისა” და “ვერონას” ულტრასთა მეგობრობა 80-იან წლებში დაიწყო და 2001 წლამდე გაგრძელდა. შემდეგ “ვერონას” ულტრასდაჯგუფების სათავეში ახალი ხალხი მოვიდა და “ინტერთან” “მეგობრობის ხელშეკრულებაც” გაუქმდა.

სხვადასხვა კლუბების ულტრასების ერთმანეთთან დამეგობრების შემთხვევები იტალიურ ფეხბურთს ლამაზ, რომანტიკულ ელფერს სძენს და ეს ისტორიები დასტურია იმისა, რომ ულტრასკონცეფცია უფრო მეტია, ვიდრე ხულიგნებთან ასოცირებული სტერეოტიპული შეხედულება.

რატომ მოუხადა ბოდიში მალდინიმ მარადონას

“მილანის” ყოფილმა კაპიტანმა პაოლო მალდინიმ გაიხსენა ეპიზოდი, როდესაც მას დიეგო მარადონასთვის ბოდიშის მოხდა მოუწია:

“სერია A-ს დიდების დარბაზის დაჯილდოების ცერემონია იყო, მე მის გვერდით ვიჯექი. ეკრანზე ჩვენი დაპირისპირების რამდენიმე ეპიზოდი აჩვენეს. თავს ყოველთვის კორექტულ მცველად ვთვლიდი, მაგრამ უნდა ვაღიარო, რომ იმ ვიდეოებში მის წინააღმდეგ ძალზედ უხეშად ვთამაშობდი. ეს მხოლოდ იმიტომ ხდებოდა, რომ მარადონა ჩემს ქმედებებს წინასწარ იცნობდა და მე ყოველთვის ვაგვიანებდი.

ის ძალიან სწრაფი იყო, მას მთელი კარიერის განმავლობაში ურტყამდნენ. შემრცხვა და იმ ვიდეოკლიპის ნახვის შემდეგ მარადონას ბოდიში მოვუხადე.

ის ძალზედ მარდად აკონტროლებდა ბურთს და სწრაფად ცვლიდა მიმართულებას. მარადონა მართლაც ექსტრაორდინარული ფეხბურთელი იყო”.

შეგახსენებთ, რომ დიეგო მარადონა 60 წლის ასაკში გულის გაჩერების შედეგად გარდაიცვალა. ის “ნაპოლის” შემადგენლობაში 1984-დან 1991 წლამდე თამაშობდა. არგენტინელი ფეხბურთელი ორჯერ გახდა იტალიის ჩემპიონი, თითო-თითოჯერ კი ქვეყნის თასს და სუპერთასს დაეუფლა, ერთხელ მოიგო უეფას თასი. მის პატივსაცემად “ნაპოლიმ” კლუბში ათნომრიანი მაისური ხმარებიდან ამოიღო.

ლეო მესის ათწლიან კონტრაქტს შესთავაზებენ

“თაიმსის” ცნობით, ჰოლდინგური კომპანია City Football Group-ი “ბარსელონას” ლიდერ ლიონელ მესის ათწლიან კონტრაქტს შესთავაზებს. წინადადების დათანხმების შემთხვევაში, კონტრაქტის ვადის ამოწურვისას არგენტინელი ფეხბურთელი 43 წლის იქნება.

City Football Group-ი არის კომპანია, რომელიც შესულია ათი სხვადასხვა საფეხბურთო კლუბის მფლობელობაში, მათ შორის 100 პროცენტიანი წილი უკავია “მანჩესტერ სიტიში”. ჩანაფიქრის თანახმად, შრომითი ხელშეკრულებით გათვალისწინებულ საწყის რამდენიმე წელს ლეო მესი “მანჩესტერ სიტის” შემადგენლობაში გაატარებს, რის შემდეგაც ჰოლდინგის საკუთრებაში არსებულ რომელიმე კლუბში გადავა. კარიერის დასრულების შემდეგ არგენტინელი კლუბის ელჩი გახდება.

შესაძლოა, ტრანსფერი 2021 წლის იანვარშივე გაიჩარხოს.

შეგახსენებთ, რომ გასულ სატრანსფერო პერიოდში ლიონელ მესის “ბარსელონასთან” კონტრაქტის ვადაზე ადრე გაწყვეტა სურდა. არგენტინელი ფეხბურთელი გუნდში შექმნილი სიტუაციით იყო უკმაყოფილო, თუმცა კლუბმა დაარწმუნა, რომ მოქმედი კონტრაქტის ამოწურვამდე გუნდში დარჩენილიყო. მასსა და კლუბს შორის დადებულ შრომით ხელშეკრულებას ვადა 2021 წლის ზაფხულამდე აქვს.

City Football Group-ი დღესდღეობით შემდეგი საფეხბურთო კლუბების მფლობელობაშია:

“მანჩესტერ სიტი” (ინგლისი) — 100%
“მელბურნ სიტი” (ავსტრალია) — 100%
“მონტევიდეო სიტი ტორკე” (ურუგვაი) — 100%
“ლომელი” (ბელგია)  — 99%
“ნიუ იორკ სიტი” (აშშ)  — 80%
“მუმბაი სიტი” (ინდოეთი)  — 65%
“ჟირონა” (ესპანეთი)  — 44.3%
“სიჩუან ცზიუნიუ” (ჩინეთი)  — 29.7%
“იოკოჰამა მარინოსი” (იაპონია) — 20%
“ტრუა” (საფრანგეთი).

მარკ კლატენბურგი: “მოურინიო “ჩელსიდან” მის გათავისუფლებაში მე მადანაშაულებს”

ინგლისის პრემიერლიგის აწ უკვე ყოფილმა მსაჯმა მარკ კლატენბურგმა თქვა, რომ ჟოზე მოურინიო ლონდონის “ჩელსიდან” მის გათავისუფლებას სწორედ ინგლისელ არბიტრს აბრალებს.

ლონდონურმა კლუბმა პორტუგალიელი სპეცილიასტი 2015 წლის დეკემბერში, მომავალ ჩემპიონ “ლესტერ სიტისთან” დამარცხების (1:2) შემდეგ გაათავისუფლა. იმ მატჩს სწორედ კლატენბურგი სჯიდა. ინგლისელმა რეფერიმ მოურინიოსთან იმხანად არსებული ურთიერთობის შესახებ Paddy Power-ისთვის ჩაწერილ ინტერვიუში ისაუბრა:

“მოურინიო “ჩელსიდან” მის გათავისუფლებაში მე მადანაშაულებს, მე კი ვიტყოდი, რომ ის გუნდიდან მანამდე დაფიქსირებული შედეგების გამო უფრო გაუშვეს. “რეალიდან” დაბრუნებული მოურინიო ბევრს შრომობდა და თურმე, “ჩელსიდან” ჩემ გამო დაითხოვეს.

როდესაც “მანჩესტერ იუნაიტედში” მივიდა, იგივეს ფიქრობდა. ეგონა, რომ მე ვაპირებდი მის გათავისუფლებას, ამიტომ ის ჩემ მიმართ ყოველთვის ანტაგონისტურად იყო განწყობილი. საერთოდაც, სერ ალექს ფერგიუსონის მსგავსი მწვრთნელები ასეთები არიან: თუ მათი გუნდი იგებს, მატჩს მსოფლიოში საუკეთესო რეფერი სჯიდა”.

ვილიანი: “იმედი მაქვს, კვლავ შევძლებ მოურინიოსთან თანამშრომლობას”

ლონდონის “ჩელსის” ბრაზილიელმა ნახევარმცველმა ვილიანმა, რომელმაც რამდენიმე დღის წინ გვაუწყა, რომ ლონდონში რჩება, აღიარა, რომ მომავალში ჟოზე მოურინიოს ხელმძღვანელობით სურს თამაში.

“მოურინიო საუკეთესო სპეციალისტია, რომელთანაც ოდესმე მიმუშავია. ჩვენ მშვენიერი ურთიერთობა გვაქვს, კარგი მეგობრები ვართ.ხშირად ვწერთ ხოლმე ერთმანეთს, ვესაუბრებით. მასთან მუშაობისას ყოველთვის დიდ სიამოვნებას ვიღებდი, იმედი მაქვს, კვლავ შევძლებ მოურინიოსთან თანამშრომლობას.

არ ვიცი, იყო თუ არა ოფიციალური წინადადება “მანჩესტერ იუნაიტედის” მხრიდან, მაგრამ ის ყოველთვის ესაუბრება ჩემს აგენტს და ეუბნება – “ჩემთან მოიყვანე, ჩემთან”.

ამაზე ბევრს, რა თქმა უნდა, არ ვფიქრობ. ლონდონი გასაოცარი ქალაქია და აქ მე და ჩემი ოჯახი თავს დიდებულად ვგრძნობთ. ასე რომ, დიახ, აქ დარჩენას ვაპირებ,” – განაცხადა ბრაზილიელმა ნახევარმცველმა.

მოურინიო: “კონკურენტები ძლიერდებიან, “ლივერპული” ყველას და ყველაფერს ყიდულობს”

“მანჩესტერ იუნაიტედის” მთავარი მწვრთნელი ჟოზე მოურინიო სატრანსფერო ფანჯრის დახურვამდე იმედ გამოთქვამს, რომ “წითელი ეშმაკუნებიც” ისევ ეგაძლიერდებიან, როგორც მათი უშუალო კონკურენტები.

“ჩვენი კლუბის აღმასრულებელმა დირექტორმა ედ ვუდვორდმა იცის, რაც მინდა. ის ცდილობს, ყველაფერი გააკეთოს. სატრანსფერო ფანჯრის დახურვამდე კიდევ გვაქვს რამდენიმე დღე.

კლუბები, რომლებიც ჩვენ კონკურენტებად ითვლებიან, ძალიან ძლიერდებიან, მათ ფანტასტიკური გუნდები შეკრეს: “ჩელსიმ”, “ტოტენჰემმა” და “მანჩესტერ სიტიმ”. რაც შეეხება “ლივერპულს”, ისინი ყველას და ყველაფერს ყიდულობენ.

ასე რომ, თუ “მანჩესტერ იუნაიტედი” კიდევ უფრო არ გაძლიერდება, წინ რთული სეზონი გველის,” – აცხადებს პორტუგალიელი სპეციალისტი.

მოურინიოს “მანჩესტერ იუნაიტედის” ხელმძღვანელობასთან ურთიერთობა დაეძაბა

“მანჩესტერ იუნაიტედის” მთავარ მწვრთნელ ჟოზე მოურინიოს კლუბის ხელმძღვანელობასთან კონფლიქტი აქვს. ამის მიზეზი “წითელი ეშმაკების” სატრანსფერო პოლიტიკაა.

პორტუგალიელ სპეციალისტს ურთიერთობა დაეძაბა “მანჩესტერ იუნაიტედის” ვიცეპრეზიდენტ ედ ვუდვორდთან, რომელიც სატრანსფერო ბაზარზე კლუბის საქმიანობაზეა პასუხისმგებელი.

“დეილი მეილის” ცნობით, ჟოზე მოურინიო უკმაყოფილოა იმ ფაქტით, რომ მიმდინარე სატრანსფერო პერიოდში გუნდმა მხოლოდ სამი ფეხბურთელი დაიმატა – ბრაზილიელი ნახევარმცველი ფრედი, პორტუგალიელი მარჯვენაფლანგელი მცველი დიოგო დალოტი და ინგლისელი სარეზერვო მეკარე ლი გრანტი. ედ ვუდვორდს ამ ზაფხულს სატრანსფერო საქმიანობაზე თანხის დახარჯვა აღარ სურს, მოურინიო კი ფიქრობს, რომ გუნდი სრულად ჯერ არ დაკომპლექტებულა.

“ლივერპულის” წინააღმდეგ გამართული ამხანაგური მატჩის (1:4) შემდეგ გამართულ პრესკონფერენციაზე ჟოზე მოურინიო თქვა, რომ მას სეზონის მიმდინარეობისას ზაფხულის შეკრებაზე მყოფ ფეხბურთელთა მხოლოდ 30 პროცენტზე ექნება გათვლა.

მოურინიო ახალ რეგულაციაზე: ” სხვა კლუბების სატრანსფერო შეტევების მოგერიება მოგვიწევს”

“მანჩესტერ იუნაიტედის” მთავარმა მწვრთნელმა ჟოზე მოურინიომ პრემიერ ლიგის ახალ რეგულაციაზე გააკეთა კომენტარი, რომლის თანახმადაც პრემიერ ლიგის კლუბებისთვის 9 აგვისტოს დაიხურება სატრანსფერო ფანჯარა. თუმცა სხვა კლუბებს მათი ფეხბურთელების ყიდვა 31 აგვისტომდე შეეძლებათ.

“ერთი მხრივ, ეს ცვლილება საკმაოდ სამართლიანია, რადგანაც სატრანსფერო ფანჯარა სეზონის დაწყებამდე უნდა იხურებოდეს. მწვრთნელმა უნდა იცოდეს, რომ არსებულ გუნდთან მოუწევს თანამშრომლობა და სხვა მოთმაშის იმედი არ უნდა ჰქონდეს.

საკმაოდ უცნაურია, როდესაც ფეხბურთელი, რომელიც აგვისტოს თვეში ერთ კლუბში თამაშობდა, სექტემბერში მეორე კლუბის ღირსებას იცავდეს.

მეორე მხრივ კი მოგვიწევს, სხვა კლუბების სატრანსფერო შეტევების მოგერიება. ცხრა აგვისტოდან თვის ბოლომდე დიდი კლუბები ყველაფერს გააკეთებენ ჩვენი მოთამაშეების წასაყვანად,” – აცხადებს ჟოზე მოურინიო.

გეტყვით იმასაც, რომ კითხვას, აპირებს თუ არა საკუთარი კლუბის კიდევ უფრო გაძლიერებას, მოურინიომ ამგვარად უპასუხა: “დიდი სიამოვნებით მოვიყვანდი კიდევ ორ ფეხბურთელს”.

რა სიახლეები გველის პრემიერ ლიგის ახალ სეზონში?

მოურინიო: “რონალდუს “რეალიდან” წასვლის შემდეგ, პრემიერ ლიგა საუკეთესო ტურნირია”

ჟოზე მოურინიო კრიშტიანუ რონალდუს მადრიდის “რეალიდან” ტურინის “იუვენტუსში” გადასვლას გამოეხმაურა.

“პრემიერ ლიგა არის საუკეთესო ჩემპიონატი, სადაც თამაშობენ საუკეთესო ფეხბურთელები. ახლა შეგიძლიათ, იხილოთ, სამი განზომილება: ხალხი უყურებს იტალიის პირველობას რონალდუს გამო, პრემიერ ლიგას, იმიტომ, რომ ის ყველაზე კარგია და – ლა ლიგას, მესის გამო. ვულოცავ “იუვენტუსს” ამ ტრანსფერს, რადგან ეს ძალიან წაადგებათ, პირველ რიგში, საფეხბურთო თვალსაზრისით; ასევე: რეკლამირებასა და მარკეტინგში,” – ამბობს ჟოზე.

ჟოზე მოურინიომ მსოფლიო ჩემპიონატის ფინალის ფავორიტი დაასახელა

“მანჩესტერ იუნაიტედის” მთავარი მწვრთნელი, რომელიც აქტიურად ადევნებს თვალს მიმდინარე მსოფლიო ჩემპიონატს, ფინალში ფავორიტად საფრანგეთის საფეხბურთო ნაკრებს მიიჩნევს.

“ფავორიტი, რა თმა უნდა, საფრანგეთია. თუმცა, ყოველთვის ამბობენ, რომ ფინალს ფავორიტი არ ჰყავს. ასეთ მატჩში ორივე გუნდი აუცილებლად მოსაგებად უნდა გავიდეს. დარწმუნებული ვარ, რომ ხორვატებს ასეთი დამოკიდებულება ექნებათ.

დამატებითი ერთი დღე ფრანგების მარაგში, შესაძლოა, ძალზედ მნიშვნელოვანი აღმოჩნდეს. მაგრამ ხორვატებს ბრწყინვალე გუნდი ჰყავთ – ლუკა მოდრიჩი, მარიო მანძუკიჩი, ივან პერიშიჩი. მათ მოგების ყველანაირი შანსი აქვთ.

ვფიქრობ, რომ თანაბარ თამაშს ვიხილავთ. თამაში თუ გაიხსნება, ხორვატიას ნაკლები შანსი ექნება. მაგრამ მჯერა, რომ ხორვატების მებრძოლი სული ყველაფერს გააკეთებს მოსაგებად,” – აცხადებს მოურინიო.

მოურინიო პოგბასგან რაიოლას გაშვებას ითხოვს

“მანჩესტერ იუნაიტედის” მთავარი მწვრთნელი ჟოზე მოურინიო პოლ პოგბას იძულებულს ხდის, რომ თავი აგენტთან, მინო რაიოლასთან კონტრაქტი გაწყვიტოს.

France Football-ის ცნობით, საკმაოდ დიდი ხანია, რაც მოურინიო პოგბაზე ზეწოლას ახორციელებს. ფრანგი ნახევარმცველი კი კლუბის დატოვებაზეც ფიქრობს. გარდა ამისა, კლუბმა ფრედი იყიდა, რაც პოგბასთვის კონკურენციის დონის ამაღლებას ნიშნავს.

“წითელი ეშმაკუნები” მხოლოდ იმ შემთხვევაში აპირებენ პოგბას გაყიდვის წინადადების განხილვას, თუ სასწორზე 100 მილიონი ევრო იქნება. ჯერჯერობით ამ თანხის გადახდაზე თანახმა მხოლოდ “ბარსელონაა”.