“სარბიელის” საიუბილეო ნომერი გამოიცა

დღეს, 11-წლიანი პაუზის შემდეგ გაზეთ “სარბიელის” საიუბილეო ნომერი გამოიცა. ზუსტად 30 წლის წინ, 1990 წლის 28 დეკემბერს აღნიშნული გამოცემის პირველი ნომერი დაიბეჭდა. მას შემდეგ წლების განმავლობაში “სარბიელი” მკითხველს უამრავ საინტერესო მასალას აწვდიდა და რაც მთავარია, ეს არ იყო გაზეთის ფურცლებზე სტანდარტული სიტყვებით მშრალი ინფორმაციის გადმოცემა. “სარბიელის” ჟურნალისტებმა სპეციფიკური წერის მანერით შეძლეს ის, რომ გაზეთს საკუთარი სტილი ჩამოუყალიბდა, რისი წყალობითაც მისი გამორჩევა სხვა უამრავ გამოცემას შორის იყო შესაძლებელი. ყველაზე მთავარი კი საქმისადმი პასუხისმგებლობა და ის გულწრფელობა გახლდათ, რომლისთვისაც ამ გაზეთის ავტორებს ყველაზე კრიტიკულ პერიოდებშიც არ უღალატიათ, საქებს აქებდნენ, საკრიტიკებელს აკრიტიკებდნენ. მკითხველმაც მალე შეიყვარა “სარბიელი” და ყოველდღიურობის ნაწილად აქცია.

დღევანდელი საიუბილეო-საკოლექციო ნომერიც ტრადიციულ სტილშია გადაწყვეტილი, ისევ იმ ხალხის მიერაა შედგენილი, ისევ იმ ენით, ისევ ისე საინტერესოდ, ისევ იმ ფასად, განსხვავება კი ისაა, რომ გამოცემა 32-გვერდიანია.

ვულოცავთ “სარბიელს” 30 წლის იუბილეს!

ომი და მშვიდობა იტალიურ ფეხბურთში: ულტრასები და დაძმობილებული გუნდები

ულტრასული დაჯგუფება სპორტული გუნდის მხარდასაჭერად შექმნილ ქომაგთა ორგანიზებულ ჯგუფს ნიშნავს. მას საფუძველი 50-იანი წლების დასაწყისში ჩაეყარა და განვითარების პიკს 80-იან წლებში მიაღწია, როდესაც თითქმის ყველა საფეხბურთო კლუბს ჰყავდა ულტრასდაჯგუფება. ულტრასების ხსენებისას ხშირად ასოცირება ინგლისელ ხულიგნებთან ხდება, თუმცა ეს სტერეოტიპული წარმოდგენაა. მიუხედავად ამისა, ვერ უარვყოფთ იმ ფაქტს, რომ ულტრასდაჯგუფებებს შორის ძალადობა ხშირია, თუმცა ეს მათი არსებობის შედეგი უფრო არის, ვიდრე მიზანი.

ულტრასები ძირითადად სტადიონის ქვედა იარუსზე, კარის მახლობელ სექტორებზე თავსდებიან და იქიდან ქომაგობენ თავიანთ გუნდს სხვადასხვა შეძახილებითა თუ სიმღერებით, ხშირად თვალსასეირო პერფორმანსებსაც დგამენ. ულტრასსამყაროში პოლიტიკაც ღრმად არის ფესვგადგმული. დაჯგუფებები ძირითადად მკვეთრად მემარცხენე ან მემარჯვენე მიმართულების პოლიტიკური იდეოლოგიის მატარებლები არიან და ხშირად ეს განსაზღვრავს სხვადასხვა გუნდების ფანკლუბების ერთმანეთთან დაახლოებას. ამასთან, მხოლოდ პოლიტიკა არ არის ორი ულტრასდაჯგუფების ერთმანეთთან დაძმობილების მიზეზი.

“ლაციო” და “ინტერი”
იტალიაში სხვადასხვა კლუბთა ულტრასდაჯგუფებებს შორის მეგობრობის ერთ-ერთი ყველაზე კარგი მაგალითია რომის “ლაციოსა” და მილანის “ინტერის” ფანთა შემთხვევა. “ლაციოს” ულტრასები ცნობილნი არიან თავიანთი მკვეთრად მემარჯვენე შეხედულებებით, მათთვის არც სვასტიკის დემონსტრირებაა უცხო. ამ გარემოების გამო ისინი “ინტერის” ულტრასებს დაუძმობილდნენ. მართალია, “ნერაძურის” ფანდაჯგუფება ასეთივე ექსტრემალური შეხედულებებით ცნობილი არ არის, თუმცა მათ გარკვეული კავშირი აქვს იტალიის სხვადასხვა მემარჯვენე ჯგუფებთან, მათ შორის “შავ გულთან”.

აღნიშნული გუნდების ულტრასები ხშირად კიდებენ ტრიბუნებზე ერთმანეთის მიმართ პატივსაცემ ბანერებს. პოსტერი წარწერით “Da sempre fieri del nostro gemellaggio alla nord di Milano rendiamo omaggio” (“ვამაყობთ და პატივს ვცემთ ჩვენს დაძმობილებას მილანის ჩრდილოეთთან”) ამის ერთ-ერთი მაგალითია.

ამ ორ კლუბს შორის კავშირი კარგად გამოჩნდა 2010 წელს გაჩაღებულ სკუდეტოსთვის ბრძოლაში. გათამაშების დასრულებამდე ორი ტურით ადრე “ლაციო” “ინტერს” მასპინძლობდა, რომელსაც საჩემპიონო რბოლაში მხოლოდ გამარჯვება აძლევდა ხელს. ტიტულისთვის ბრძოლაში მილანელთა უშუალო კონკურენტი “ლაციოს” თანაქალაქელი და პრინციპული მეტოქე “რომა” იყო, რომელიც ლიდერ “ინტერს” მხოლოდ ორი ქულით ჩამორჩებოდა. ის შეხვედრა “ლაციომ” თითქმის უბრძოლველად, ანგარიშით 0:2 დათმო და ორ კვირაში “ინტერმა” ისტორიაში მე-18 სკუდეტოს მოგება იზეიმა.

“მილანი” და “ბრეშა”
იტალიაში ერთ-ერთი ყველაზე ხანგრძლივი ძმობა “მილანსა” და “ბრეშას” აკავშირებთ. მათი დამეგობრება პოლიტიკურმა შეხედულებებმა განაპირობა და მიუხედავად იმისა, რომ “მილანის” ულტრასდაჯგუფებაში იდეოლოგია შეიცვალა, ამ კლუბების ფანებს შორის ძმობა გრძელდება. ისინი ხშირად სტუმრობენ ერთმანეთის სტადიონებს დაძმობილებული გუნდის გასამხნევებლად. აღსანიშნავია, რომ “ბრეშასთან” დამეგობრებამ “მილანს” ურთიერთობა გაუფუჭა ბერგამოს “ატალანტასთან”.

“ატალანტა” და “ტერნანა”
თავის მხრივ, “ატალანტას” ულტრასდაჯგუფება ნაკლებად ცნობილია. პოლიტიკური იდეოლოგიის თვალსაზრისით ისინი მემარცხენეები არიან და ეს გახდა მათი საფეხბურთო კლუბ “ტერნანას” ფანებთან დაძმობილების მიზეზი. ასე რომ, თუ “ატალანტას” ქომაგთა შორის “ტერნანას” წითელ-მწვანე ფორმასაც მოკრავთ თვალს, არ გაგიკვირდეთ.

“ფიორენტინა” და “ვერონა”
განსხვავებული პოლიტიკური იდეოლოგია არ არის ფანკლუბების დაძმობილებისთვის ხელის შემშლელი ფაქტორი, თუმცა ასეთი შემთხვევები იშვიათია. “ფიორენტინას” ულტრასები მემარცხენეები არიან, ხოლო “ვერონასი” – მემარჯვენეები. ამ განსხვავების მიუხედავად, მათ ერთმანეთთან საკმაოდ მყარი ურთიერთობა აკავშირებთ.

“ფიორენტინა” და “ტორინო”
ორი სხვადასხვა კლუბის ულტრასები შესაძლოა, საერთო მოძულე გუნდმა გააერთიანოს. მაგალითად, “ტორინოსა” და “ფიორენტინას” ფანები ერთმანეთთან “იუვენტუსის” სიძულვილმა დაამეგობრა. ამ გუნდების ულტრასები სტადიონზე ერთმანეთს თბილი შინაარსის ბანერებით ესალმებიან: “Il popolo Fiorentino saluta la vera Torino” (“ფლორენციელი ხალხი მიესალმება ნამდვილ ტურინს”).

მარტოხელა “იუვენტუსი”
“იუვენტუსი” იტალიაში გარკვეულწილად მარტოხელა კლუბია. “ბებერი სინიორას” ულტრასებს სხვა გუნდის ფანებთან ალიანსი არ შეუქმნიათ და ამას მრავალი მიზეზი აქვს, რომელთაგან ორია გამოსაყოფი: “იუვენტუსი” იტალიის მასშტაბით ყველაზე წარმატებული გუნდია და ეს სხვა გუნდის ფანებისთვის დამაბრკოლებელი ფაქტორია, ხოლო მეორე მიზეზად “კალჩოპოლის” სკანდალი უნდა მივიჩნიოთ. მართალია, “იუვენტუსმა” ძველი დიდება მალევე დაიბრუნა, თუმცა ტიტულების მოგებაზე რთული გატეხილი სახელის აღდგენა აღმოჩნდა. “იუვეს” ულტრასები მეგობრებს იტალიის გარეთ ეძებენ და ყველაზე მყარი კავშირი ნიდერლანდურ “დენ ჰააგის” ფანებთან აქვთ.

“პარმა” და”სამპდორია”
იტალიურ ფეხბურთში ერთმანეთთან დაძმობილების შედარებით ნაკლებად ცნობილი შემთხვევებია “პარმასა” და “სამპდორიას” ფანებისა და “ნაპოლისა” და “ჯენოას” ულტრასების მეგობრობა. “პარმასა” და “სამპდორიას” ფანების ძმობა ოც წელზე მეტს ითვლის. 2009 წლის კოპა იტალიის ფინალურ მატჩში გენუელთა საქომაგოდ “პარმას” ფანები რომში საგანგებოდ ჩავიდნენ კიდეც.

“ნაპოლი” და”ჯენოა”
“ნაპოლისა” და “ჯენოას” დამეგობრებას საფუძველი 1982 წელს ჩაეყარა. იმ სეზონის ბოლო ტურში გენუელებს სერია A-ში დასარჩენად კინკილა ქულა ჰყოფნიდათ, თუმცა “სან პაოლოზე” 0:1 მარცხდებოდნენ. საბოლოო ჯამში, ის შეხვედრა ფრედ, ანგარიშით 2:2 დასრულდა, “ჯენოამ” გადასარჩენად საჭირო ქულა მოიპოვა და სერია B-ში მის ნაცვლად “მილანი” დაქვეითდა. ამ ისტორიულმა მოვლენამ “ჯენოას” ულტრასების “ნაპოლის” ფანებთან დამეგობრება განაპირობა.

დარღვეული ძმობა
ყოფილა შემთხვევებიც, როდესაც ძლიერი და ერთი შეხედვით დაუშლელი ძმობა დარღვეულა. “ინტერისა” და “ვერონას” ულტრასთა მეგობრობა 80-იან წლებში დაიწყო და 2001 წლამდე გაგრძელდა. შემდეგ “ვერონას” ულტრასდაჯგუფების სათავეში ახალი ხალხი მოვიდა და “ინტერთან” “მეგობრობის ხელშეკრულებაც” გაუქმდა.

სხვადასხვა კლუბების ულტრასების ერთმანეთთან დამეგობრების შემთხვევები იტალიურ ფეხბურთს ლამაზ, რომანტიკულ ელფერს სძენს და ეს ისტორიები დასტურია იმისა, რომ ულტრასკონცეფცია უფრო მეტია, ვიდრე ხულიგნებთან ასოცირებული სტერეოტიპული შეხედულება.

“იუვენტუსის” ფანებს “ნაპოლისთან” სტუმრად გასამართ მატჩებზე დასწრება აეკრძალათ

ტურინის “იუვენტუსის” ფანები “ნაპოლისთან” სტუმრად გასამართ უახლოეს ორ მატჩს ვერ დაესწრებიან.

აღნიშნული გადაწყვეტილება უსაფრთხოების გამო მიიღეს, რადგან “ნაპოლისა” და “იუვენტუსის” ტიფოზებს შორის უკვე დიდი ხანია მტრობა და ზიზღი სუფევს. ფანებს შორის ურთიერთობა განსაკუთრებით მას შემდეგ დაიძაბა, რაც გონსალო იგუაინი “ნაპოლიდან” “იუვენტუსში” გადაბარგდა. ახლა ნეაპოლიტანური გუნდის ტიფოზები არგენტინელი ფეხბურთელის დასახვედრად საგანგებოდ ემზადებიან.

“ნაპოლისა” და “იუვენტუსს” შორის მატჩი 2 აპრილს გაიმართება და თბილისის დროით 22 საათსა და 45 წუთზე დაიწყება. 5 აპრილს კი ეს გუნდები იტალიის თასის ნახევარფინალური ეტაპის განმეორებით მატჩში დაუპირისპირდებიან ერთმანეთს (პირველი მატჩი “იუვენტუსმა” 3:1 მოიგო). ორივე შეხვედრა “სან პაოლოზე” შედგება და მატჩებზე დასწრება მხოლოდ კამპანიის რეგიონის (ადმინისტრაციული ცენტრი ნეაპოლი) მოსახლეობასა და აბონემენტის მქონე ფანებს შეეძლებათ.

“ნაპოლის” პრეზიდენტსა და მწვრთნელს შორის ურთიერთობა უკიდურესად დაიძაბა

“ნაპოლიში” კონფლიქტია გაღვივებული. კლუბის პრეზიდენტ აურელიო დე ლაურენტისსა და გუნდის მთავარ მწვრთნელ მაურიციო სარის შორის ურთიერთობა უკიდურესად დაიძაბა.

როგორც იტალიური გამოცემა “ლა გაძეტა დელო სპორტი” წერს, სერია A-ს 22-ე ტურში “პალერმოს” წინააღმდეგ გამართული მატჩის (1:1) შემდეგ ნეაპოლიტანური კლუბის პრეზიდენტმა გუნდის თავკაცს უყვირა.

დე ლაურენტისმა სარის გუნდის სასტარტო შემადგენლობის გამო ეჩხუბა. თავად მწვრთნელი პრეზიდენტს დაემუქრა, თუ ჩემს საქმეში კიდევ ჩაჰყოფ ცხვირს, გუნდს დავტოვებო. საქმეში “ნაპოლის” სპორტული დირექტორი კრისტიანო გინტოლიც ჩაერთო, რომელმაც მაურიციო სარის მხარე დაიჭირა და კლუბიდან შესაძლო წასვლაზე მანაც დაძრა სიტყვა.

რამდენიმე დღის შემდეგ სიტუაცია ოდნავ მიწყნარდა, მაგრამ ჩემპიონთა ლიგის მერვედფინალურ ეტაპზე მადრიდრის “რეალთან” ჩატარებული მატჩის შემდეგ (1:3) კონფლიქტმა ახალი ძალით იფეთქა. დე ლაურენტისმა გუნდის თამაში გააკრიტიკა, სარიმ კი თქვა, რომ პრეზიდენტმა ტელეეთერებში გამოსვლის ნაცვლად მას პირისპირ უნდა ესუაბროს.

“ლა გაძეტა დელო სპორტის” ცნობით, მაურიციო სარი გუნდში დარჩენას არ აპირებს და ნეაპოლიტანურ კლუბს მაქსიმუმ მიმდინარე სეზონის ბოლომდე უთავკაცოს.

“ნაპოლიმ” გასვლაზე “მილანი” დაამარცხა და “იუვესთან” სხვაობა მინიმუმამდე დაიყვანა (ვიდეო)

იტალიის სერია A-ს 21-ე ტურის ერთ-ერთი ცენტრალური მატჩი “სან სიროზე” გაიმართა, სადაც “მილანმა” “ნაპოლი” მიიღო. შეხვედრა სტუმართა გამარჯვებით, ანგარიშით 2:1 დასრულდა. სამივე გოლი მატჩის პირველ ტაიმში გავიდა. მაურიციო სარის გუნდი მეექვსე წუთზე ლორენცო ინსინიეს გოლით დაწინაურდა, ზუსტად სამ წუთში ხოსე კალეხონმა მეორე ბურთი გაიტანა და მე-9 წუთისთვის “ნაპოლი” უკვე 2:0 იგებდა. შეხვედრის 37-ე წუთზე იურაი კუცკამ ერთი ბურთი გაქვითა, მაგრამ მეტის გაკეთება მასპინძლებმა ვეღარ მოახერხეს და სეზონში მეხუთე მარცხი იწვნიეს.

“ნაპოლის” ამ გამარჯვების შემდეგ აქტივში 44 ქულა მოუგროვდა და ახლა ლიდერ ტურინის “იუვენტუსს” მხოლოდ ერთი ქულით ჩამორჩება, თუმცა “ბებერ სინიორას” ორი მატჩით ნაკლები აქვს ჩატარებული. “მილანი” 37 ქულით სატურნირო ცხრილის მეხუთე პოზიციაზეა და მადევარ “ინტერსა” და “ატალანტას” ამ ტურში მისი გადასწრების შესაძლებლობა მიეცათ.

იტალიის სერია A
21-ე ტური
“მილანი” — “ნაპოლი” 1:2 (1:2)
გოლები: კუცკა 37′ — ინსინიე 6′, კალეხონი 9′.

“ნაპოლის” საკლუბო რეკორდი

იტალიის სერია А-ს 37-ე ტურში “ნაპოლიმ” გასვლაზე “ტორინო” ანგარიშით 2:1 დაამარცხა.

ნეაპოლიტანურ გუნდს სატურნირო ცხრილში მეორე ადგილი უკავია და აქტივში 79 ქულა აქვს, რაც საკლუბო რეკორდია.

აქამდე “ნაპოლიმ” ორჯერ მოახერხა სერია А-ში 78 ქულის მოგროვება (2012-2013 და 2013-2014 წლების სეზონებში).

 

“ინტერმა” “ნაპოლი” დაამარცხა (ვიდეო)

იტალიის სერია A-ს 33-ე ტურში მილანის “ინტერმა” შინ “ნაპოლი” ანგარიშით 2:0 დაამარცხა.

მასპინძლებმა დაწინაურება მატჩის დებიუტშივე შეძლეს: გარი მედელის პასის შემდეგ მეტოქის საჯარიმო მოედანზე მყოფმა მაურო იკარდიმ ბურთი მარჯვენა ფეხით ლამაზად ჩამოიღო და მარცხენა ფეხით მეკარეს აუღებელი დაურტყა. აღსანიშნავია, რომ ამ ეპიზოდში არგენტინელი ფეხბურთელი თამაშგარე მდგომარეობაში იმყოფებოდა. 44-ე წუთზე მარსელო ბროზოვიჩი “ნაპოლის” კიპერ პეპე რეინასთან პირისპირ აღმოჩნდა და “ინტერის” უპირატესობა განამტკიცა.

მატჩის მეორე ნახევარში გოლი აღარ გასულა.

სატურნირო ცხრილში “ნაპოლის” 70 ქულით მეორე ადგილი აქვს დაკავებული და ლიდერ ტურინის “იუვენტუსს” ექვსი ქულით ჩამორჩება. “ინტერს” აქტივში 61 ქულა აქვს და მეოთხე პოზიცია უკავია.

იტალიის სერია A
33-ე ტური
“ინტერი” — “ნაპოლი” 2:0 (2:0)

გოლები: იკარდი 4′, ბროზოვიჩი 44′.
გაფრთხილებები: ნაგატომო 14′, მურილიო 33′, პერიშიჩი 42′, კონდოგბია 61′ — ჟორჟინიო 22′, ალბიოლი 55′, მერტენსი 73′.

“ნაპოლიმ” და “მილანმა” ქულები გაიყვეს (ვიდეო)

იტალიის სერია A-ს 26-ე ტურის დასკვნითი მატჩი “სტადიო სან პაოლოზე” გაიმართა, სადაც “ნაპოლიმ” “მილანი” მიიღო. შეხვედრა ფრედ, ანგარიშით 1:1 დასრულდა.

ანგარიში მატჩის 39-ე წუთზე მასპინძელთა თავდამსხმელმა ლორენცო ინსინიემ გახსნა. სტუმართა რიგებიდან 44-ე წუთზე გატანილი გოლით თავი ჯაკომო ბონავენტურამ გამოიჩინა. მატჩის მეორე ტაიმში მსაჯთან კამათისთვის ნეაპოლიტანელთა მთავარი მწვრთნელი მაურიციო სარი გააძევეს.

ამრიგად, “ნაპოლიმ” 57 ქულა დააგროვა და სატურნირო ცხრილის ლიდერ ტურინის “იუვენტუსს” მხოლოდ ერთი ქულით ჩამორჩება. “როსონერის” აქტივში 44 ქულა აქვს და ცხრილის მეექვსე პოზიცია უკავია.

იტალიის სერია A
26-ე ტური
“ნაპოლი” — “მილანი” 1:1 (1:1)

გოლები: ინსინიე 39′ — ბონავენტურა 44′.
გაფრთხილებები: დონარუმა 53′, მონტოლივო 66′.

“ნაპოლის” თავკაცი: “შესაძლოა, ჩემი მხრიდან ჰომოფობიური გამოვლინება მართლაც იყო”

იტალიის თასის მეოთხედფინალურ ეტაპზე “ნაპოლისა” და მილანის “ინტერს” შორის გამართულ მატჩში (0:2) ინციდენტი მოხდა. როგორც “ნერიაძურის” მთავარი მწვრთნელი რობერტო მანჩინი ამბობს, ნეაპოლიტანელთა თავკაცმა მაურიციო სარიმ შეხვედრის მიმდინარეობისას მას შეურაცხყოფა მიაყენა. საქმე კინაღამ ჩხუბამდე მივიდა. საბოლოო ჯამში კი, მანჩინი გააძევეს. მატჩის შემდეგ მანჩინიმ სარი რასიზმსა და ჰომოფობიაში დაადანაშაულა. “ინტერის” დამრიგებელს მოგვიანებით სარიმ უპასუხა.

“მოედანზე ასეთი ინციდენტები ხდება ხოლმე. მასწავლეს, რომ საფინალო სასტვენის შემდეგ მწვრთნელებმა ერთმანეთს ხელი უნდა ჩამოართვან. სტრესის გამო შესაძლოა, ნებისმიერი რამ მოხდეს, თუმც გასახდელში მანჩინის ბოდიში მოვუხადე და ეს ამბავი იქვე უნდა დასრულებულიყო.

ახლა ჰომოფობიასა და სხვა მიუღებელ გამოვლინებებში მადანაშაულებენ. უბრალოდ ენაზე ეს სიტყვა მომადგა და იმიტომაც ვთქვი. მომდევნო ჯერზე მანჩინის დემოკრატად მოვიხსენიებ. გეი მეგობრებიც მყავს, ასე რომ ჰომოფობი არ ვარ. დამსჯიან თუ არა დისკვალიფიკაციით? რატომ უნდა დამსაჯონ? ეს ჩვეულებრივი შეურაცხყოფაა. მანჩინიმ ბებერი არამზადა მიწოდა. გამოდის, რომ იგი მოხუცების მიმართ არის რასისტი? მე მას ბოდიში მოვუხადე, თუმც სინამდვილეში არც მახსოვს, რა ვუწოდე. შესაძლოა, ჩემი მხრიდან ჰომოფობიური გამოვლინება მართლაც იყო, მაგრამ იმ წუთებში აღშფოთებული ვიყავი და ყურადღებას არ ვაქცევდი, რას ვამბობდი. მანჩინის წინააღმდეგი არაფერი მაქვს. ასეთი ფაქტები სპორტში ხდება. არ ვიცი, ასე რატომ ეწყინა.

ვაღიარებ, რომ არასწორად მოვიქეცი, თუმცა სტადიონზე უარესებიც გამიგონია. თუ ეს სიტყვა მართლაც გამოვიყენე, ლგბტ საზოგადოებას ბოდიშს ვუხდი”, – მაურიციო სარის კომენტარი Football Italia-მ გამოაქვეყნა.

ამ ინციდენტის გამო “ნაპოლის” მთავარ მწვრთნელს ორმატჩიანი დისკვალიფიკაცია ემუქრება.

 

მანჩინიმ “ნაპოლის” თავკაცი რასიზმსა და ჰომოფობიაში დაადანაშაულა

იტალიის თასის მეოთხედფინალურ ეტაპზე “ნაპოლისა” და მილანის “ინტერს” შორის გამართულ მატჩში (0:2) ინციდენტი მოხდა. როგორც “ნერიაძურის” მთავარი მწვრთნელი რობერტო მანჩინი ამბობს, ნეაპოლიტანელთა თავკაცმა მაურიციო სარიმ შეხვედრის მიმდინარეობისას მას შეურაცხყოფა მიაყენა. საქმე კინაღამ ჩხუბამდე მივიდა. საბოლოო ჯამში კი, მანჩინი გააძევეს.

“სარი რასისტია, ასეთი ხალხი საფეხბურთო სამყაროდან უნდა გაყარონ. სარეზერვო მსაჯთან იმის გარკვევას ვცდილობდი, თუ რატომ დაამატა ხუთი წუთი, რის შემდეგაც ჩემთან სარი მოვარდა და გეი (დაცულია ცენზურა – ავტ.) მიწოდა. თუ ნამდვილი კაცები მისნაირები არიან, მაშინ ვამაყობ იმით, როგორიც ვარ.

თამაშზე საუბარს არ ვაპირებ. 60 წლის კაცისგან ასეთი ქცევა ნამდვილად სამარცხვინოა. შემდეგ გასახდელში შევხვდი და ბოდიშიც მომიხადა, მაგრამ მე მინდა, რომ იგი გულწრფელად წუხდეს იმით, როგორც მოიქცა. ინგლისში ასეთებს სათადარიგოთა სკამთან ნამდვილად არ გააჩერებდნენ”, – ციტირებს მანჩინის სიტყვებს Football Italia.

 

მარადონა: “ამ დღეს დიდი ხნის განმავლობაში ველოდით”

იტალიის სერია A-ს მე-19 ტურში მილანის “ინტერის” წაფორხილებით (0:1 “სასუოლო”) ისარგებლა “ნაპოლიმ”, რომელმაც “ფროსინონე” ანგარიშით 5:1 გაანადგურა და ჩემპიონატის პირველი წრე სატურნირო ცხრილს ლიდერის პოზიციაზე დაასრულა, რაც 1989/90 წლების სეზონის შემდეგ პირველად მოხდა. ამ ფაქტმა აღაფრთოვანა ნეაპოლიტანელთა ყოფილი ლიდერი დიეგო არმანდო მარადონა, რომელმაც იმედი გამოთქვა, რომ “ნაპოლი” სულაც სკუდეტოს დაისაკუთრებს.

“ნაპოლის” დღევანდელი გამარჯვება მახარებს. ამ დღეს დიდი ხნის განმავლობაში ველოდით. დღეს ნეაპოლის თითოეულ მაცხოვრებელს შეუძლია ზეიმის მოწყობა, რაც კიდევ უფრო გამაბედნიერებს. წინ, “ნაპოლი”! მინდა, რომ გუნდმა სკუდეტო მოიგოს!” – ციტირებს მარადონას სიტყვებს Sky Sports Italia.

“ნაპოლისა” და მადევარ “ინტერს” შორის სხვაობა ორ ქულას შეადგენს.

 

“ნაპოლის” პრეზიდენტი: “ჩვენ “რეალისა” და “ბარსელონას” დონეზე ვართ”

“ნაპოლის” პრეზიდენტმა აურელიო დე ლაურენტისმა მიმდინარე სეზონში მისი კლუბის თამაშზე ისაუბრა და აღნიშნა, რომ დღეს ნეაპოლიტანები მადრიდის “რეალისა” და “ბარსელონას” დონეზე დგანან.

“ჩვენ ლიდერები ვართ, რაც მაურიციო სარის (მთავარი მწვრთნელი) დამსახურებაა. სეზონის დასაწყისში მას გარკვეული სირთულეები ჰქონდა, თუმცა ახლა ფეხბურთელები მოედანზე იდეალურად მოქმედებენ.
რა თქმა უნდა, იმედი მაქვს, რომ ყველა მატჩს მოვიგებთ. ვიმედოვნებ, საშობაოდ უფრო მეტი ქულა გვექნება, ვიდრე მეორეადგილოსან გუნდს.
გაკოტრებული კლუბი ჩავიბარე და ახლა მსოფლიოში მე-15 ადგილზე ვართ. დღესდღეობით “რეალისა” და “ბარსელონას” დონეზე ვდგავართ. თუმცა ამ კლუბებსა და იმ გუნდებს, რომლებსაც რუსი ოლიგარქები ან არაბი შეიხები პატრონობენ, დიდძალი თანხები აქვთ, ჩვენ კი პატივს ვცემთ მიშელ პლატინის მიერ შემოღებული ფინანსური ფეარ-პლეის წესებს”, – “ნაპოლის” პრეზიდენტის კომენტარი Goal.com-მა გამოაქვეყნა.