იტალიურმა ინტერნეტპორტალმა ilmattino.it-მა “ნაპოლის” ახალწვეულ ხვიჩა კვარაცხელიასთან ინტერვიუ ჩაწერა, რომელსაც აქვე გთავაზობთ.
— რას ნიშნავს თქვენთვის ჩემპიონთა ლიგა?
— ჩემპიონთა ლიგა ფეხბურთთან დაკავშირებული ჩემი პირველი ოცნებაა. ამ ტურნირზე თამაშზე ვოცნებობ მას შემდეგ, რაც ფეხბურთის თამაში დავიწყე. “ნაპოლიში” ამ მხრივ ძალზედ მიმზიდველი ატმოსფეროა და მოუთმენლად ველი ჩემპიონთა ლიგის მატჩებში მოედანზე გასვლას.
— თქვენს მაისურზე “კვარა” იქნება გამოსახული?
— მირჩევნია, რომ სრული გვარი იყოს დაწერილი. ასე რომ, ჩემს 77-ნომრიან მაისურზე გამოსახული იქნება “კვარაცხელია”.
— რას გვეტყოდით კრიშტიანუ რონალდუზე?
— კრიშტიანუ შესანიშნავი ფეხბურთელი და საოცარი პროფესიონალია. მე მისით ყოველთვის შთაგონებული ვიყავი. საქართველოში ბევრს მესი უფრო მოსწონს, რომელიც თითქოს სხვა პლანეტიდან არის ჩამოსული. რონალდუთი აღფრთოვანებული ვარ, რადგან ის მესის დონეს დიდი მუშაობისა და თავგანწირვის წყალობით გაუთანაბრდა. მეც ასე მსურს საკუთარი კარიერის მოწყობა.
— ფაბიო კაპელომ თქვენ მოჰამედ სალაჰს შეგადარათ.
— იმედი მაქვს, ამ დონეს მივაღწევ. ამისთვის ვიცი, რაც უნდა გავაკეთო. ბევრს ვმუშაობ საკუთარ თავზე.
— რომელ პოზიციაზე გრძნობთ თავს ყველაზე მეტად კომფორტულად?
— ჩემი საყვარელი პოზიცია მარცხენა გარემარბის ადგილია, თუმცა თითქმის ყველა პოზიციას ვერგები. მიყვარს სტანდარტულების შესრულება, მაგრამ ვხედავ, რომ “ნაპოლიში” ძალიან კარგი დამრტყმელები არიან. ეს მწვრთნელის გადაწყვეტილებაა. თუ ამ პასუხისმგებლობას მე დამაკისრებენ, ძალზედ მოხარული ვიქნები.
— როგორი ურთიერთობა გაქვთ სპალეტისთან?
— ის აჩვენებს, რომ დიდი მასწავლებელია. ყოველდღე მასწავლის რაღაც ახალს და სასიამოვნოა იმის დანახვა, რომ ამას ყველასთან აკეთებს. ახალი სეზონისთვის მოსამზადებლად ცოტა დრო გვაქვს და ის ყველაფერს აკეთებს იმისთვის, რომ ჩვენამდე საკუთარი იდეები მოიტანოს.
— როგორ ფლობს რუსულ ენას?
— რამდენიმე სიტყვა მითხრა რუსულად, თუმცა შემდეგ ინგლისური ენა ვამჯობინეთ, რათა ურთიერთობა უფრო პირდაპირი იყოს.
— და თქვენ როგორ ხართ იტალიურთან?
— მითხრეს, რომ ჯერ ნეაპოლური ენა უნდა შევისწავლო, შემდეგ კი – იტალიური. მხოლოდ რამდენიმე სიტყვა ვისწავლე, თუმცა გუნდში კარგი მასწავლებლები მყავს, რომლებიც დამეხმარებიან. ადგილობრივი სამზარეულოს, პიცის, მოცარელასა და ყავის შესახებ უკვე ვისწავლე რაღაცები.
— მამათქვენი ბადრი ფეხბურთელი იყო. რამდენად მნიშვნელოვანია ეს თქვენი ზრდისთვის?
— მე მის წინაშე ვალდებული ვარ თუნდაც იმ თავისუფლებისთვის, რომელიც მან მომცა. მან გზის არჩევის საშუალება დამიტოვა: “შვილო, დაკავდი სპორტის იმ სახეობით, რომელიც ყველაზე მეტად მოგწონს”.
