“იუვენტუსი” რონალდუს გადაწყვეტილების მოლოდინშია

ტურინის “იუვენტუსი” ელოდება, თუ რას გადაწყვეტს კრიშტიანუ რონალდუ საკუთარ მომავალთან დაკავშირებით.

იტალიური გამოცემა “ტუტოსპორტი” იტყობინება, რომ პორტუგალიელმა ფეხბურთელმა უნდა გადაწყვიტოს, დარჩება თუ არა ტურინულ კლუბში, ვინაიდან მისი წასვლა-არწასვლის საკითხზე დიდწილად არის დამოკიდებული “ბებერი სინიორას” სატრანსფერო მოქმედებები. თუ რონალდუ “იუვენტუსიდან” წავა, ტურინელებს რამდენიმე ფეხბურთელის შეძენის შესაძლებლობა გაუჩნდებათ. პორტუგალიელი საკუთარ კარიერასთან დაკავშირებით გადაწყვეტილებას, სავარაუდოდ, ივლისის შუა რიცხვებში მიიღებს.

შეგახსენებთ, რომ კრიშტიანუ რონალდუსა და “იუვენტუსს” შორის გაფორმებულ შრომით ხელშეკრულებას ვადა 2022 წლის ზაფხულამდე აქვს. გასულ სეზონში 36 წლის პორტუგალიელი თავდამსხმელი 29 გატანილი გოლით იტალიის სერია A-ს დაუკეთესო ბომბარდირი გახდა.

კრიშტიანუ რონალდუს “იუვენტუსის” რიგებში ორ-ორჯერ აქვს მოგებული იტალიის ჩემპიონატი და სუპერთასი, ერთხელ კი ქვეყნის თასს დაუეფლა.

რონალდუს განცხადება ევრო-2020-იდან გამოვარდნის შემდეგ

ევრო-2020-ის მერვედფინალურ ეტაპზე პორტუგალიის ეროვნული გუნდი ბელგიის ნაკრებთან ანგარიშით 0:1 დამარცხდა და ტურნირს გამოეთიშა, კრიშტიანუ რონალდუმ კი ამ წარუმატებლობის შემდეგ სოციალურ ქსელში პირველი განცხადება გამოაქვეყნა.

“სასურველ შედეგს ვერ მივაღწიეთ და ტურნირი უფრო ადრე დავტოვეთ, ვიდრე გვინდოდა, მაგრამ ჩვენი გამოსვლით ვამაყობთ. ევროპის ჩემპიონის ტიტულის დასაცავად ყველაფერი გავაკეთეთ. ამ გუნდმა დაამტკიცა, რომ პორტუგალიელებისთვის ბევრი სიხარულის მოტანა შეუძლია.

ჩვენი ქომაგები თავდაუზოგავად გვიჭერდნენ მხარს ტურნირზე ჩვენი ასპარეზობის დაწყებიდან დასრულებამდე. ჩვენ მათთვის ვიბრძოდით, რათა ეს ნდობა გაგვემართლებინა. სასურველ შედეგს ვერ მივაღწიეთ, მაგრამ გულშემატკივრებს გულწრფელ მადლობას ვუხდი.

ვულოცავ ბელგიის ნაკრებს და წარმატებას ვუსურვებ დანარჩენ გუნდებსაც. რაც შეგვეხება ჩვენ, დავბრუნდებით უფრო ძლიერები. წინ, პორრუგალია!” – დაწერა საკუთარ გვერდზე რონალდუმ.

რონალდუს “მანჩესტერ იუნაიტედში” დაბრუნება სურს

Cadena SER-ის ინფორმაციით, შესაძლოა, დამდეგ ზაფხულს ტურინის “იუვენტუსის” თავდამსხმელმა კრიშტიანუ რონალდუმ გუნდი გამოიცვალოს.

36 წლის პორტუგალიელმა ფეხბურთელმა სეზონის ბოლოს ახლობლებს უთხრა, რომ თუ “ბებერი ქალბატონი” ჩემპიონთა ლიგის საგზურს ვერ მოიპოვებდა, გუნდს დატოვებდა.

“იუვენტუსმა” იტალიის სერია A-ს გათამაშება მეოთხე ადგილზე დაასრულა და ჩემპიონთა ლიგაზე თამაშის უფლება მოიპოვა, თუმცა კლუბი დატოვა მთავარმა მწვრთნელმა ანდრეა პირლომ, რომელიც მასიმილიანო ალეგრიმ შეცვალა. ეს უკანასკნელი კი რონალდუზე გათვლებს არ აკეთებს.

თავად ფეხბურთელი პრიორიტეტულ ვარიანტად “მანჩესტერ იუნაიტედში” დაბრუნებას მოიაზრებს. შეგახსენებთ, რომ ის “წითელი ეშმაკების” ღირსებას 2003-დან 2009 წლამდე იცავდა. გარდა ამისა, განიხილება მადრიდის “რეალის” ვარიანტიც.

აღნიშნული კლუბებისთვის დამაბროკელებლ ფაქტორად რონალდუს მაღალი ხელფასის დასახელება შეიძლება. პორტუგალიელი სეზონის განმავლობაში დაახლოებით 30 მილიონ ევროს გამოიმუშავებს.

რონალდუ “იუვენტუსს” ტოვებს

“სპორტ მედიასეტის” ინფორმაციით, ტურინის “იუვენტუსის” თავდამსხმელი კრიშტიანუ რონალდუ გუნდს დატოვებს.

წყაროს თანახმად, “ბიანკონერის” თავკაცის პოსტზე ანდრეა პირლოს მასიმილიანო ალეგრი შეცვლის. ამ უკანასკნელის სტრატეგიული განვითარების პროექტში პორტუგალიელი ფეხბურთელი არ განიხილება.

დღეს კლუბი დატოვა სპორტულმა დირექტორმა ფაბიო პარატიჩიმაც.

კრიშტიანუ რონალდუმ გასულ სეზონში ჩატარებულ 44 მატჩში 36 გოლი გაიტანა და ოთხი შედეგიანი გადაცემა მიითვალა.

დარჩება თუ არა რონალდუ “იუვეში”?

ტურინის “იუვენტუსის” ფორვარდ კრიშტიანუ რონალდუს მომავალი ბურუსით არის მოცული. ჯერჯერობით უცნობია, დარჩება თუ არა პორტუგალიელი ფეხბურთელი იტალიურ კლუბში.

“სქაი სპორტსის” ცნობით, ზაფხულში რონალდუ “იუვენტუსის” ხელმძღვანელობასთან მოლაპარაკებას გამართავს. 36 წლის პორტუგალიელის გადაწყვეტილება დიდწილად იმაზე იქნება დამოკიდებული, შეინარჩუნებენ თუ არა თავიანთ პოსტებს გუნდის მთავარი მწვრთნელი ანდრეა პირლო და სპორტული დირექტორი ფაბიო პარატიჩი. თუ ისინი “იუვენტუსს” დატოვებენ, გუნდიდან რონალდუს აბარგების შანსი გაიზრდება.

ცნობისათვის, მხარეებს შორის გაფორმებულ მოქმედ შრომით ხელშეკრულებას ვადა 2022 წლის ზაფხულამდე აქვს.

2020-2021 წლების სეზონში კრიშტიანუ რონალდუმ 44 მატჩი ჩაატარა, 36 გოლი გაიტანა და ოთხი შედეგიანი გადაცემა მიითვალა. ის 29 გატანილი ბურთით იტალიის სერია A-ს საუკეთესო ბომბარდირი გახდა.

კრიშტიანუს ჰოლანსა და მბაპეს შორის საუკეთესოს დასახელება სთხოვეს

ტურინის “იუვენტუსის” ფორვარდ კრიშტიანუ რონალდუს დორტმუნდის “ბორუსიას” თავდამსხმელ ერლინგ ჰოლანსა და “პარი სენ-ჟერმენის” შემტევ კილიან მბაპეს შორის საუკეთესოს დასახელება სთხოვეს.

“რთულია ერთის ამორჩევა და თქმა, რომ საუკეთესო მაინცდამაინც ის იქნება. ახალი თაობის ფეხბურთელთა ცქერა საინტერესოა. ახლა ასპარეზზე ჰოლანი და მბაპე გამოდიან.

ზოგიერთი ფეხბურთელი მხოლოდ ერთ-ორ კარგ სეზონს ატარებს, დიადი მოთამაშეები კი წლიდან წლამდე ინარჩუნებენ დონეს. ამის გაკეთება ადვილი საქმე არ არის. ამას ბევრი შრომა და თავდადება სჭირდება”, – ციტირებს რონალდუს სიტყვებს Goal-ი.

კასანო: “იუვენტუსში” რონალდუს ტრანსფერი არასწორი პროექტია”

იტალიის ნაკრების ყოფილმა თავდამსხმელმა ანტონიო კასანომ აღნიშნა, რომ ტურინის “იუვენტუსმა” კრიშტიანუ რონალდუს დამატებით შეცდომა დაუშვა.

“იუვენტუსმა” რონალდუ ჩემპიონთა ლიგის მოსაგებად შეიძინა, თუმცა მისი მოსვლის შემდეგ გუნდს ყველაზე ცუდი შედეგი აქვს. “იუვე” სკუდეტოს მის გარეშეც მოიგებდა. მისი ტრანსფერი არასწორი პროექტია.

რონალდუს ანდრეა პირლოს იდეებთან საერთო არაფერი აქვს. ის გააგრძელებს გოლების გატანას, რადგან მას ეს მჯდომიარესაც კი შეუძლია. პირლოს საკუთარი გუნდისგან აქტიური პრესინგის ხილვა სურს. მართალია, რონალდუს მატჩის ბედის გადაწყვეტა შეუძლია, მაგრამ პრესინგზე ნაკლებად თამაშობს”, – ციტირებს კასანოს სიტყვებს Football Italia.

შეგახსენებთ, რომ კრიშტიანუ რონალდუ “იუვენტუსში” მადრიდის “რეალიდან” 2018 წელს 117 მილიონი ევროს სანაცვლოდ გადავიდა. პორტუგალიელმა ფეხბურთელმა გუნდთან ერთად ორ-ორჯერ მოიგო იტალიის ჩემპიონატი და ქვეყნის სუპერთასი. მასთან ერთად გუნდმა ჩემპიონთა ლიგის მეოთხეფდინალურ (2018-2019) და მერვედფინალურ (2019-2020) ეტაპებამდე გააღწია.

კრიშტიანუ და ჯარიმები: საშინელი სტატისტიკა

ტურინის “იუვენტუსის” თავდამსხმელ კრიშტიანუ რონალდუს ბოლო პერიოდში საჯარიმო დარტყმები არ გამოსდის, თუმცა სტანდარტულების შესრულებას ჯიუტად აგრძელებს.

პორტუგალიელ ფეხბურთელს ჯარიმის შესრულების მორიგი წარუმატებელი მცდელობა “კროტონეს” წინააღმდეგ გამართულ მატჩში (3:0) ჰქონდა. შეხვედრის 26-ე წუთზე რონალდუს დარტყმული ცოცხალ კედელს მოხვდა, 88-ე წუთზე კი ბურთი მეტოქის კარს გადაევლო.

SkyTG24-ის ჟურნალისტმა ჯუზეპე პასტორემ რონალდუს მიერ შესრულებული წარუმატებელი ჯარიმები დათვალა და გაარკვია, რომ იტალიის სერია A-ში გადმობარგების შემდეგ ანუ ორწელიწადნახევრის განმავლობაში პორტუგალიელმა ფეხბურთელმა 64 საჯარიმო დარტყმა შეასრულა, საიდანაც 42 ცოცხალ კედელს მოხვდა. რონალდუს მიერ შესრულებულ ჯარიმას გოლი მხოლოდ ერთხელ მოყვა და ეს გასული წლის ივლისში მოხდა, როდესაც “იუვენტუსმა” “ტორინო” ანგარიშით 4:1 დაამარცხა.

დავამატებთ, რომ კრიშტიანუ რონალდუს საერთო შედეგიანობა კვლავ უმაღლეს დონეზე რჩება. პორტუგალიელმა ფეხბურთელმა”კროტონესთან” ჩატარებულ მატჩში დუბლი შეასრულა და სერია A-ს ბომბარდირთა დავას 18 გატანილი ბურთით ლიდერობს.

გაშლილი ფეხით მეტოქეზე – მსაჯმა რონალდუს წითელი ბარათი არ უჩვენა (ვიდეო)

იტალიის სერია A-ს 33-ე ტურში “სასუოლოსა” და ტურინის “იუვენტუსს” შორის გამართული მატჩი ფრედ, ანგარიშით 3:3 დასრულდა. შეხვედრის 61-ე წუთზე ტურინელთა ერთ-ერთი ლიდერი კრიშტიანუ რონალდუ აშკარა წითელ ბარათს გადაურჩა. პორტუგალიელი ფეხბურთელი “სასუოლოს” კაპიტან ფრანჩესკო მანიანელიზე გაშლილი ფეხით წავიდა და ბუცის კბილანები მუხლზე ჩაარჭო, რითაც მოწინააღმდეგეს ძლიერი ტკივილი მიაყენა და ფეხბურთელის გამოცვლა გახდა საჭირო. როგორც წესი, ასეთი დარღვევა პირდაპირ გაძევებით ისჯება ხოლმე, თუმცა რონალდუმ მხოლოდ ყვითელი ბარათი მიიღო.

რონალდუს კარანტინის გავლა მოუწევს

ტურინის “იუვენტუსის” თავდამსხმელი ხვალ იტალიაში დაბრუნდება და სეზონის განახლებისთვის მოემზადება.

სანამ პორტუგალიელი ფეხბურთელი გუნდს შეუერთდება, ორი კვირის ვადით თვითიზოლაციაში ყოფნა მოუწევს. საზღვარგარეთიდან დაბრუნებული “იუვენტუსის” ყველა ფეხბურთელი ამგვარ კარანტინს გაივლის.

შეგახსენებთ, რომ კრიშტიანუ რონალდუმ იტალია 3 მარტს დატოვა და მშობლიურ მადეირას მიაშურა.

იტალიაში სპორტსმენებს ინდივიდუალურად ვარჯიშის უფლება 4 მაისიდან მიეცემათ. დღევანდელი გეგმის მიხედვით, გუნდური ვარჯიშები 18 მაისს უნდა განახლდეს. აპენინის ნახევარკუნძულზე იმედოვნებენ, რომ სერია A გაზაფხულის ბოლოს ან ივნისის პირველ ნახევარში განახლდება.

სვენ-გორან ერიქსონი: “ფერგიუსონი მოკვლით მემუქრებოდა, თუ რუნის მუნდიალზე წავიყვანდი”

ინგლისის ნაკრების ყოფილმა მთავარმა მწვრთნელმა სვენ-გორან ერიქსონმა გამოცემა “თაიმსს” საინტერესო ინტერვიუ მისცა, რომლის ერთ-ერთი მონაკვეთი “მანჩესტერ იუნაიტედის” ექსთავკაც ალექს ფერგიუსონთან მომხდარ ინციდენტს დაეთმო.

შვედმა სპეციალისტმა ინტერვიუში 2006 წელს მომხდარი ამბავი გაიხსენა. ამ პერიოდში “წითელი ეშმაკების” აწ უკვე ყოფილმა თავდამსხმელმა უეინ რუნიმ ტრავმა მიიღო და გამოჯანმრთელების პროცესი საკმაოდ გაეწელა. ინგლისელმა ფეხბურთელმა მსოფლიოს ჩემპიონატამდე ტრავმის მოშუშება ვერ მოასწრო, თუმცა უშუალოდ ტურნირის მიმდინარეობისას გამოჯამრთელებისა და თამაშის საშუალება ჰქონდა. ამის მიუხედავად, “მანჩესტერ იუნაიტედის” მთავარ მწვრთნელ ალექს ფერგიუსონს მუნდიალზე რუნის გაშვება არ სურდა, რასაც ერიქსონთან დაძაბული სატელეფონო საუბარი მოჰყვა.

შვედი სპეციალისტი იხსენებს:

“ალექსი უცნაური კაცი იყო. ასეთი ჩვევა ჰქონდა: დამირეკავდა დილის შვიდ საათზე ან უფრო ადრე და ყოველგვარი მისალმების გარეშე იწყებდა ყვირილით საუბარს. როდესაც ასეთი გაღიზიანებული იყო ხოლმე, მასთან კომუნიკაცია შეუძლებელი ხდებოდა.

მან ის დილაც ჩხუბით დაიწყო. ყვიროდა, რომ მომკლავდა, თუ რუნის მსოფლიოს ჩემპიონატზე წავიყვანდი.

მე მას ვკითხე: “რა ხდება ალექს, რაშია საქმე?” თუმცა, ის მე არ მისმენდა და განაგრძობდა ყვირილსა და მუქარას. საბოლოო ჯამში, ვუთხარი: “რუნის მსოფლიოს ჩემპიონატზე მაინც წავიყვან. კარგი შვებულება, ჩაო” და ტელეფონი გავუთიშე”.

უეინ რუნიმ 2006 წლის მსოფლიოს ჩემპიონატზე მართლაც ითამაშა, თუმცა “სამი ლომი” ტურნირს მეოთხედფინალურ ეტაპზე პორტუგალიის ნაკრებთან პენალტების სერიაში მარცხის შემდეგ გამოეთიშა.

ანანიძე: “ბეილი ჩემზე ძლიერია, მაგრამ ჩემზე ხშირად ტრავმიანობს, აღნაგობა არაფერ შუაშია”

საქართველოს ნაკრებისა და მოსკოვის “სპარტაკის” ნახევარმცველმა ჯანო ანანიძემ რუსული კლუბის ოფიციალური ვებგვერდისთვის მიცემულ ინტერვიუში უარყო მოსაზრება, თითქოს მისი ხშირი ტრავმიანობა ფიზიკურ მონაცემებთან არის დაკავშირებული.

“სპარტაკის” ლიდერობა მსურს, თუმცა მესმის, რომ ეს ან ახლა მოხდება ან არასდროს. ვგრძნობ, რომ შემიძლია ისე ვითამაშო, როგორც ამას ჩემგან გულშემატკივრები მოელიან. სამწუხაროდ, ხშირად ტრავმები მიშლიდა ხელს. ფაქტობრივად ათი წლიდან სამი მკურნალობაში მაქვს გატარებული. ხშირად ვკითხულობ, თითქოს ყველაფერი ჩემი აღნაგობის ბრალია, მაგრამ შეხედეთ მადრიდის “რეალის” ფეხბურთელ გარეტ ბეილს. ის ჩემზე სამჯერ მეტს იწონის და კუნთებიც სამჯერ დიდი აქვს, თუმცა ჩემზე ხშირად ტრავმიანობს. მან “რეალში” ყოფნის ექვსი წლიდან მხოლოდ წელიწადნახევარი ითამაშა.

ალბათ, უფროსების წინააღმდეგ თამაში საკმაოდ ადრეულ ასაკში დავიწყე. გარდა ამისა, თავიდან სატრენაჟორო დარბაზებს ხშირად არ ვსტუმრობდი. ახლა გაცილებით ხშირად ვვარჯიშობ. იმას არ ვამბობ, რომ რობოტის დონემდე უნდა მიხვიდე, როცა ბურთსაც ვეღარ გრძნობ, მაგრამ პროფილაქტიკა აუცილებელია, რათა კუნთები და სახსრები კარგ მდგომარეობაში იყოს.

დეკემბრამდე უნდა ვაჩვენო, რა შემიძლია: გოლების გატანა, საგოლე გადაცემები. თამაშის მიმდინარეობის წაყვანა. მთავარი მწვრთნელისგან ნდობას ვგრძნობ და ეს მეხმარება”, – აღნიშნა ანანიძემ.