“სარბიელის” საიუბილეო ნომერი გამოიცა

დღეს, 11-წლიანი პაუზის შემდეგ გაზეთ “სარბიელის” საიუბილეო ნომერი გამოიცა. ზუსტად 30 წლის წინ, 1990 წლის 28 დეკემბერს აღნიშნული გამოცემის პირველი ნომერი დაიბეჭდა. მას შემდეგ წლების განმავლობაში “სარბიელი” მკითხველს უამრავ საინტერესო მასალას აწვდიდა და რაც მთავარია, ეს არ იყო გაზეთის ფურცლებზე სტანდარტული სიტყვებით მშრალი ინფორმაციის გადმოცემა. “სარბიელის” ჟურნალისტებმა სპეციფიკური წერის მანერით შეძლეს ის, რომ გაზეთს საკუთარი სტილი ჩამოუყალიბდა, რისი წყალობითაც მისი გამორჩევა სხვა უამრავ გამოცემას შორის იყო შესაძლებელი. ყველაზე მთავარი კი საქმისადმი პასუხისმგებლობა და ის გულწრფელობა გახლდათ, რომლისთვისაც ამ გაზეთის ავტორებს ყველაზე კრიტიკულ პერიოდებშიც არ უღალატიათ, საქებს აქებდნენ, საკრიტიკებელს აკრიტიკებდნენ. მკითხველმაც მალე შეიყვარა “სარბიელი” და ყოველდღიურობის ნაწილად აქცია.

დღევანდელი საიუბილეო-საკოლექციო ნომერიც ტრადიციულ სტილშია გადაწყვეტილი, ისევ იმ ხალხის მიერაა შედგენილი, ისევ იმ ენით, ისევ ისე საინტერესოდ, ისევ იმ ფასად, განსხვავება კი ისაა, რომ გამოცემა 32-გვერდიანია.

ვულოცავთ “სარბიელს” 30 წლის იუბილეს!

ომი და მშვიდობა იტალიურ ფეხბურთში: ულტრასები და დაძმობილებული გუნდები

ულტრასული დაჯგუფება სპორტული გუნდის მხარდასაჭერად შექმნილ ქომაგთა ორგანიზებულ ჯგუფს ნიშნავს. მას საფუძველი 50-იანი წლების დასაწყისში ჩაეყარა და განვითარების პიკს 80-იან წლებში მიაღწია, როდესაც თითქმის ყველა საფეხბურთო კლუბს ჰყავდა ულტრასდაჯგუფება. ულტრასების ხსენებისას ხშირად ასოცირება ინგლისელ ხულიგნებთან ხდება, თუმცა ეს სტერეოტიპული წარმოდგენაა. მიუხედავად ამისა, ვერ უარვყოფთ იმ ფაქტს, რომ ულტრასდაჯგუფებებს შორის ძალადობა ხშირია, თუმცა ეს მათი არსებობის შედეგი უფრო არის, ვიდრე მიზანი.

ულტრასები ძირითადად სტადიონის ქვედა იარუსზე, კარის მახლობელ სექტორებზე თავსდებიან და იქიდან ქომაგობენ თავიანთ გუნდს სხვადასხვა შეძახილებითა თუ სიმღერებით, ხშირად თვალსასეირო პერფორმანსებსაც დგამენ. ულტრასსამყაროში პოლიტიკაც ღრმად არის ფესვგადგმული. დაჯგუფებები ძირითადად მკვეთრად მემარცხენე ან მემარჯვენე მიმართულების პოლიტიკური იდეოლოგიის მატარებლები არიან და ხშირად ეს განსაზღვრავს სხვადასხვა გუნდების ფანკლუბების ერთმანეთთან დაახლოებას. ამასთან, მხოლოდ პოლიტიკა არ არის ორი ულტრასდაჯგუფების ერთმანეთთან დაძმობილების მიზეზი.

“ლაციო” და “ინტერი”
იტალიაში სხვადასხვა კლუბთა ულტრასდაჯგუფებებს შორის მეგობრობის ერთ-ერთი ყველაზე კარგი მაგალითია რომის “ლაციოსა” და მილანის “ინტერის” ფანთა შემთხვევა. “ლაციოს” ულტრასები ცნობილნი არიან თავიანთი მკვეთრად მემარჯვენე შეხედულებებით, მათთვის არც სვასტიკის დემონსტრირებაა უცხო. ამ გარემოების გამო ისინი “ინტერის” ულტრასებს დაუძმობილდნენ. მართალია, “ნერაძურის” ფანდაჯგუფება ასეთივე ექსტრემალური შეხედულებებით ცნობილი არ არის, თუმცა მათ გარკვეული კავშირი აქვს იტალიის სხვადასხვა მემარჯვენე ჯგუფებთან, მათ შორის “შავ გულთან”.

აღნიშნული გუნდების ულტრასები ხშირად კიდებენ ტრიბუნებზე ერთმანეთის მიმართ პატივსაცემ ბანერებს. პოსტერი წარწერით “Da sempre fieri del nostro gemellaggio alla nord di Milano rendiamo omaggio” (“ვამაყობთ და პატივს ვცემთ ჩვენს დაძმობილებას მილანის ჩრდილოეთთან”) ამის ერთ-ერთი მაგალითია.

ამ ორ კლუბს შორის კავშირი კარგად გამოჩნდა 2010 წელს გაჩაღებულ სკუდეტოსთვის ბრძოლაში. გათამაშების დასრულებამდე ორი ტურით ადრე “ლაციო” “ინტერს” მასპინძლობდა, რომელსაც საჩემპიონო რბოლაში მხოლოდ გამარჯვება აძლევდა ხელს. ტიტულისთვის ბრძოლაში მილანელთა უშუალო კონკურენტი “ლაციოს” თანაქალაქელი და პრინციპული მეტოქე “რომა” იყო, რომელიც ლიდერ “ინტერს” მხოლოდ ორი ქულით ჩამორჩებოდა. ის შეხვედრა “ლაციომ” თითქმის უბრძოლველად, ანგარიშით 0:2 დათმო და ორ კვირაში “ინტერმა” ისტორიაში მე-18 სკუდეტოს მოგება იზეიმა.

“მილანი” და “ბრეშა”
იტალიაში ერთ-ერთი ყველაზე ხანგრძლივი ძმობა “მილანსა” და “ბრეშას” აკავშირებთ. მათი დამეგობრება პოლიტიკურმა შეხედულებებმა განაპირობა და მიუხედავად იმისა, რომ “მილანის” ულტრასდაჯგუფებაში იდეოლოგია შეიცვალა, ამ კლუბების ფანებს შორის ძმობა გრძელდება. ისინი ხშირად სტუმრობენ ერთმანეთის სტადიონებს დაძმობილებული გუნდის გასამხნევებლად. აღსანიშნავია, რომ “ბრეშასთან” დამეგობრებამ “მილანს” ურთიერთობა გაუფუჭა ბერგამოს “ატალანტასთან”.

“ატალანტა” და “ტერნანა”
თავის მხრივ, “ატალანტას” ულტრასდაჯგუფება ნაკლებად ცნობილია. პოლიტიკური იდეოლოგიის თვალსაზრისით ისინი მემარცხენეები არიან და ეს გახდა მათი საფეხბურთო კლუბ “ტერნანას” ფანებთან დაძმობილების მიზეზი. ასე რომ, თუ “ატალანტას” ქომაგთა შორის “ტერნანას” წითელ-მწვანე ფორმასაც მოკრავთ თვალს, არ გაგიკვირდეთ.

“ფიორენტინა” და “ვერონა”
განსხვავებული პოლიტიკური იდეოლოგია არ არის ფანკლუბების დაძმობილებისთვის ხელის შემშლელი ფაქტორი, თუმცა ასეთი შემთხვევები იშვიათია. “ფიორენტინას” ულტრასები მემარცხენეები არიან, ხოლო “ვერონასი” – მემარჯვენეები. ამ განსხვავების მიუხედავად, მათ ერთმანეთთან საკმაოდ მყარი ურთიერთობა აკავშირებთ.

“ფიორენტინა” და “ტორინო”
ორი სხვადასხვა კლუბის ულტრასები შესაძლოა, საერთო მოძულე გუნდმა გააერთიანოს. მაგალითად, “ტორინოსა” და “ფიორენტინას” ფანები ერთმანეთთან “იუვენტუსის” სიძულვილმა დაამეგობრა. ამ გუნდების ულტრასები სტადიონზე ერთმანეთს თბილი შინაარსის ბანერებით ესალმებიან: “Il popolo Fiorentino saluta la vera Torino” (“ფლორენციელი ხალხი მიესალმება ნამდვილ ტურინს”).

მარტოხელა “იუვენტუსი”
“იუვენტუსი” იტალიაში გარკვეულწილად მარტოხელა კლუბია. “ბებერი სინიორას” ულტრასებს სხვა გუნდის ფანებთან ალიანსი არ შეუქმნიათ და ამას მრავალი მიზეზი აქვს, რომელთაგან ორია გამოსაყოფი: “იუვენტუსი” იტალიის მასშტაბით ყველაზე წარმატებული გუნდია და ეს სხვა გუნდის ფანებისთვის დამაბრკოლებელი ფაქტორია, ხოლო მეორე მიზეზად “კალჩოპოლის” სკანდალი უნდა მივიჩნიოთ. მართალია, “იუვენტუსმა” ძველი დიდება მალევე დაიბრუნა, თუმცა ტიტულების მოგებაზე რთული გატეხილი სახელის აღდგენა აღმოჩნდა. “იუვეს” ულტრასები მეგობრებს იტალიის გარეთ ეძებენ და ყველაზე მყარი კავშირი ნიდერლანდურ “დენ ჰააგის” ფანებთან აქვთ.

“პარმა” და”სამპდორია”
იტალიურ ფეხბურთში ერთმანეთთან დაძმობილების შედარებით ნაკლებად ცნობილი შემთხვევებია “პარმასა” და “სამპდორიას” ფანებისა და “ნაპოლისა” და “ჯენოას” ულტრასების მეგობრობა. “პარმასა” და “სამპდორიას” ფანების ძმობა ოც წელზე მეტს ითვლის. 2009 წლის კოპა იტალიის ფინალურ მატჩში გენუელთა საქომაგოდ “პარმას” ფანები რომში საგანგებოდ ჩავიდნენ კიდეც.

“ნაპოლი” და”ჯენოა”
“ნაპოლისა” და “ჯენოას” დამეგობრებას საფუძველი 1982 წელს ჩაეყარა. იმ სეზონის ბოლო ტურში გენუელებს სერია A-ში დასარჩენად კინკილა ქულა ჰყოფნიდათ, თუმცა “სან პაოლოზე” 0:1 მარცხდებოდნენ. საბოლოო ჯამში, ის შეხვედრა ფრედ, ანგარიშით 2:2 დასრულდა, “ჯენოამ” გადასარჩენად საჭირო ქულა მოიპოვა და სერია B-ში მის ნაცვლად “მილანი” დაქვეითდა. ამ ისტორიულმა მოვლენამ “ჯენოას” ულტრასების “ნაპოლის” ფანებთან დამეგობრება განაპირობა.

დარღვეული ძმობა
ყოფილა შემთხვევებიც, როდესაც ძლიერი და ერთი შეხედვით დაუშლელი ძმობა დარღვეულა. “ინტერისა” და “ვერონას” ულტრასთა მეგობრობა 80-იან წლებში დაიწყო და 2001 წლამდე გაგრძელდა. შემდეგ “ვერონას” ულტრასდაჯგუფების სათავეში ახალი ხალხი მოვიდა და “ინტერთან” “მეგობრობის ხელშეკრულებაც” გაუქმდა.

სხვადასხვა კლუბების ულტრასების ერთმანეთთან დამეგობრების შემთხვევები იტალიურ ფეხბურთს ლამაზ, რომანტიკულ ელფერს სძენს და ეს ისტორიები დასტურია იმისა, რომ ულტრასკონცეფცია უფრო მეტია, ვიდრე ხულიგნებთან ასოცირებული სტერეოტიპული შეხედულება.

რატომ მოუხადა ბოდიში მალდინიმ მარადონას

“მილანის” ყოფილმა კაპიტანმა პაოლო მალდინიმ გაიხსენა ეპიზოდი, როდესაც მას დიეგო მარადონასთვის ბოდიშის მოხდა მოუწია:

“სერია A-ს დიდების დარბაზის დაჯილდოების ცერემონია იყო, მე მის გვერდით ვიჯექი. ეკრანზე ჩვენი დაპირისპირების რამდენიმე ეპიზოდი აჩვენეს. თავს ყოველთვის კორექტულ მცველად ვთვლიდი, მაგრამ უნდა ვაღიარო, რომ იმ ვიდეოებში მის წინააღმდეგ ძალზედ უხეშად ვთამაშობდი. ეს მხოლოდ იმიტომ ხდებოდა, რომ მარადონა ჩემს ქმედებებს წინასწარ იცნობდა და მე ყოველთვის ვაგვიანებდი.

ის ძალიან სწრაფი იყო, მას მთელი კარიერის განმავლობაში ურტყამდნენ. შემრცხვა და იმ ვიდეოკლიპის ნახვის შემდეგ მარადონას ბოდიში მოვუხადე.

ის ძალზედ მარდად აკონტროლებდა ბურთს და სწრაფად ცვლიდა მიმართულებას. მარადონა მართლაც ექსტრაორდინარული ფეხბურთელი იყო”.

შეგახსენებთ, რომ დიეგო მარადონა 60 წლის ასაკში გულის გაჩერების შედეგად გარდაიცვალა. ის “ნაპოლის” შემადგენლობაში 1984-დან 1991 წლამდე თამაშობდა. არგენტინელი ფეხბურთელი ორჯერ გახდა იტალიის ჩემპიონი, თითო-თითოჯერ კი ქვეყნის თასს და სუპერთასს დაეუფლა, ერთხელ მოიგო უეფას თასი. მის პატივსაცემად “ნაპოლიმ” კლუბში ათნომრიანი მაისური ხმარებიდან ამოიღო.

ლეო მესის ათწლიან კონტრაქტს შესთავაზებენ

“თაიმსის” ცნობით, ჰოლდინგური კომპანია City Football Group-ი “ბარსელონას” ლიდერ ლიონელ მესის ათწლიან კონტრაქტს შესთავაზებს. წინადადების დათანხმების შემთხვევაში, კონტრაქტის ვადის ამოწურვისას არგენტინელი ფეხბურთელი 43 წლის იქნება.

City Football Group-ი არის კომპანია, რომელიც შესულია ათი სხვადასხვა საფეხბურთო კლუბის მფლობელობაში, მათ შორის 100 პროცენტიანი წილი უკავია “მანჩესტერ სიტიში”. ჩანაფიქრის თანახმად, შრომითი ხელშეკრულებით გათვალისწინებულ საწყის რამდენიმე წელს ლეო მესი “მანჩესტერ სიტის” შემადგენლობაში გაატარებს, რის შემდეგაც ჰოლდინგის საკუთრებაში არსებულ რომელიმე კლუბში გადავა. კარიერის დასრულების შემდეგ არგენტინელი კლუბის ელჩი გახდება.

შესაძლოა, ტრანსფერი 2021 წლის იანვარშივე გაიჩარხოს.

შეგახსენებთ, რომ გასულ სატრანსფერო პერიოდში ლიონელ მესის “ბარსელონასთან” კონტრაქტის ვადაზე ადრე გაწყვეტა სურდა. არგენტინელი ფეხბურთელი გუნდში შექმნილი სიტუაციით იყო უკმაყოფილო, თუმცა კლუბმა დაარწმუნა, რომ მოქმედი კონტრაქტის ამოწურვამდე გუნდში დარჩენილიყო. მასსა და კლუბს შორის დადებულ შრომით ხელშეკრულებას ვადა 2021 წლის ზაფხულამდე აქვს.

City Football Group-ი დღესდღეობით შემდეგი საფეხბურთო კლუბების მფლობელობაშია:

“მანჩესტერ სიტი” (ინგლისი) — 100%
“მელბურნ სიტი” (ავსტრალია) — 100%
“მონტევიდეო სიტი ტორკე” (ურუგვაი) — 100%
“ლომელი” (ბელგია)  — 99%
“ნიუ იორკ სიტი” (აშშ)  — 80%
“მუმბაი სიტი” (ინდოეთი)  — 65%
“ჟირონა” (ესპანეთი)  — 44.3%
“სიჩუან ცზიუნიუ” (ჩინეთი)  — 29.7%
“იოკოჰამა მარინოსი” (იაპონია) — 20%
“ტრუა” (საფრანგეთი).

მარკ კლატენბურგი: “მოურინიო “ჩელსიდან” მის გათავისუფლებაში მე მადანაშაულებს”

ინგლისის პრემიერლიგის აწ უკვე ყოფილმა მსაჯმა მარკ კლატენბურგმა თქვა, რომ ჟოზე მოურინიო ლონდონის “ჩელსიდან” მის გათავისუფლებას სწორედ ინგლისელ არბიტრს აბრალებს.

ლონდონურმა კლუბმა პორტუგალიელი სპეცილიასტი 2015 წლის დეკემბერში, მომავალ ჩემპიონ “ლესტერ სიტისთან” დამარცხების (1:2) შემდეგ გაათავისუფლა. იმ მატჩს სწორედ კლატენბურგი სჯიდა. ინგლისელმა რეფერიმ მოურინიოსთან იმხანად არსებული ურთიერთობის შესახებ Paddy Power-ისთვის ჩაწერილ ინტერვიუში ისაუბრა:

“მოურინიო “ჩელსიდან” მის გათავისუფლებაში მე მადანაშაულებს, მე კი ვიტყოდი, რომ ის გუნდიდან მანამდე დაფიქსირებული შედეგების გამო უფრო გაუშვეს. “რეალიდან” დაბრუნებული მოურინიო ბევრს შრომობდა და თურმე, “ჩელსიდან” ჩემ გამო დაითხოვეს.

როდესაც “მანჩესტერ იუნაიტედში” მივიდა, იგივეს ფიქრობდა. ეგონა, რომ მე ვაპირებდი მის გათავისუფლებას, ამიტომ ის ჩემ მიმართ ყოველთვის ანტაგონისტურად იყო განწყობილი. საერთოდაც, სერ ალექს ფერგიუსონის მსგავსი მწვრთნელები ასეთები არიან: თუ მათი გუნდი იგებს, მატჩს მსოფლიოში საუკეთესო რეფერი სჯიდა”.

მოურინიო “არსენალის” ტვიტმა გააღიზიანა: “სხვების პრობლემები მაშინ გახარებს, როცა თავადვე გიჭირს”

“ტოტენჰემ ჰოთსპურის” მთავარი მწვრთნელი ჟოზე მოურინიო ლონდონის “არსენალის” მიკრობლოგზე გამოქვეყნებულმა ტვიტმა გააღიზიანა და პასუხის გაცემაც არ დააყოვნა.

ინგლისის პრემიერლიგის 32-ე ტურში “დეზები” “შეფილდ იუნაიტედს” ეწვივნენ და ანგარიშით 1:3 დამარცხდნენ. მატჩის შემდეგ “არსენალის” მიკრობლოგზე გაჩნდა ტვიტი: “მარტივი არ არის “ბრემოლ ლეინზე” “შეფილდ იუნაიტედის” ძლევა. ჩვენ გახსენებთ, როგორ კეთდება ეს”.

“ტოტენჰემის” თავკაცმა მეზობლებს პრესკონფერენციაზე უპასუხა.

“ისინი სატურნირო ცხრილის თავში რომ იყვნენ და ზედა ოთხეულში მოსახვედრად იბრძოდნენ, სხვების პრობლემებით არ დატკბებოდნენ. სხვების პრობლემები მხოლოდ იმას ახარებს, ვინც თვითონვე გასაჭირშია. ყველაფერს თავი რომ დავანებოთ, ეს სიტუაცია მათვე ერგებათ. მათ საზეიმო არაფერი აქვთ და ასეთი კომენტარებისთვის ნებისმიერ შემთხვევას იყენებენ. ჩვენ სატურნირო ცხრილში თითქმის ანალოგიური სიტუაცია გვაქვს”, – ციტირებს მოურინიოს სიტყვებს “სქაი სპორტსი”.

“ტოტენჰემს” სატურნირო ცხრილში მეათე პოზიცია უკავია და მეშვიდე ადგილზე მყოფ “არსენალს” ოთხი ქულით ჩამორჩება, თუმც ერტი მატჩით ნაკლები აქვს ჩატარებული.

გიგზი: “მოურინიოს გათავისუფლება გუნდს ვერ დაეხმარება”

“მანჩესტერ იუნაიტედის” ლეგენდარულმა ფეხბურთელმა რაიან გიგზმა გუნდში ჟოზე მოურინიოს მუშაობა შეაფასა და თქვა, რომ პორტუგალიელი სპეციალისტის გათავისუფლება სიტუაციას ვერ გამოასწორებს.

“არ მესმის, თავკაცის შეცვლა ამ ეტაპზე როგორ დაეხმარება გუნდს. ყველამ იცის, რაოდენ წარმატებული მწვრთნელი იყო მოურინიო ბოლო წლების განმავლობაში. ჟოზემ გუნდს გარკვეული სტაბილურობა შესძინა და კლუბმა ის უნდა შეინარჩუნოს.

მიუხედავად ამისა, ვთვლი, რომ გუნდის უკანასკნელი შედეგები “მანჩესტერ იუნატედის” დონეს არ შეესაბამება. ჩვენ საკმარისად კარგი ფეხბურთელები და მწვრთნელი გვყავს იმისთვის, რომ სიტუაცია შევცვალოთ”, – ციტირებს გიგზის სიტყვებს “სქაი სპორტსი”.

ჟოზე მოურინიოს ნათქვამი აქვს, რომ ახალი წლისთვის გუნდი სატურნირო ცხრილის ზედა ოთხეულში დაბრუნდება. ამ დროისთვის “წითელ ეშმაკებს” მეშვიდე პოზიცია უკავიათ და მეოთზე პოზიციას 7 ქულა აშორებთ.

კასილასი: “მოურინიოსთან სხვაგვარად უნდა მოვქცეულიყავი”

მადრიდის “რეალის” ექს-კაპიტანმა იკერ კასილასმა ის პერიოდი გაიხსენა, როდესაც გუნდის ყოფილ თავკაც ჟოზე მოურინიოსთან დაძაბული ურთიერთობა ჰქონდა და აღნიშნა, რომ იმ დროს სხვაგვარად უნდა მოქცეულიყო.

“კლუბში მოურინიოს ყოფნის მესამე წელს სიტუაცია გაფუჭდა. მისი თავკაცობისას “რეალში” ურთიერთობა დაიძაბა.

ესპანეთის ჩემპიონატი მოვიგეთ, მაგრამ გუნდში ურთიერთობა გაუარესდა. ეს არც ჩემთვის იყო კარგი, არც მოურინიოსთვის და არც კლუბისთვის. დღევანდელი გადმოსახედიდან ვფიქრობ, რომ მასთან ურთიერთობა პირადად უნდა გამერკვია. მაშინ ვფიქრობდი, რომ ჩუმად ყოფნით “რეალის” ღირსებას გავუფრთხილდებოდი. ახლა მგონია, რომ მაშინ სხვაგვარად უნდა მოვქცეულიყავი”, – თქვა კასილასმა Universo Valdano-სთვის მიცემულ ინტერვიუში.

მოურინიო მშვიდადაა: “თუ გამათავისუფლებენ, წარმოგიდგენიათ, რამდენს გადამიხდიან?”

“მანჩესტერ იუნაიტედის” მთავარი მწვრთნელი ჟოზე მოურინიო დარწმუნებულია, რომ მას გუნდიდან არ გაათავისუფლებენ. ინგლისის პრემიერლიგაში წარუმატებელი სტარტისა და პოლ პოგბასთან გაფუჭებული ურთიერთობის შემდეგ სულ უფრო აქტიურად საუბრობენ იმის შესახებ, რომ პორტუგალიელ სპეციალისტს “ოლდ ტრაფორდის” დატოვება მოუწევს, თუმცა თავად მოურინიო სხვაგვარად ფიქრობს.

“თუ გამათავისუფლებენ, წარმოგიდგენიათ, რამდენის გადახდა მოუწევთ ჩემთვის? ამბობენ, რომ წნეხის ქვეშ ვარ, მაგრამ მე ასე არ ვფიქრობ”, – თქვა მოურინიომ “ლა რეპუბლიკასთვის” მიცემულ ინტერვიუში.

პორტუგალიელ სპეცილისტსა და “მანჩესტერ იუნაიტედს” შორის გაფორმებულ მოქმედ შრომით ხელშეკრულებას ძალა 2020 წლის ზაფხულამდე აქვს.

ჟოზე მოურინიო “მანჩესტერ იუნაიტედის” ხელმძღვანელთა სატრანსფერო პოლიტიკით უკმაყოფილოა და ზაფხულში რამდენჯერმე თქვა, რომ გუნდი ახალი ფეხბურთელების დამატებას საჭიროებს.

პრემიერლიგის საწყისი ოთხი ტურის შემდეგ “წითელ ეშმაკებს” აქტივში ექვსი ქულით მეათე პოზიცია უკავიათ.

მოურინიოს “მანჩესტერ იუნაიტედის” ხელმძღვანელობასთან ურთიერთობა დაეძაბა

“მანჩესტერ იუნაიტედის” მთავარ მწვრთნელ ჟოზე მოურინიოს კლუბის ხელმძღვანელობასთან კონფლიქტი აქვს. ამის მიზეზი “წითელი ეშმაკების” სატრანსფერო პოლიტიკაა.

პორტუგალიელ სპეციალისტს ურთიერთობა დაეძაბა “მანჩესტერ იუნაიტედის” ვიცეპრეზიდენტ ედ ვუდვორდთან, რომელიც სატრანსფერო ბაზარზე კლუბის საქმიანობაზეა პასუხისმგებელი.

“დეილი მეილის” ცნობით, ჟოზე მოურინიო უკმაყოფილოა იმ ფაქტით, რომ მიმდინარე სატრანსფერო პერიოდში გუნდმა მხოლოდ სამი ფეხბურთელი დაიმატა – ბრაზილიელი ნახევარმცველი ფრედი, პორტუგალიელი მარჯვენაფლანგელი მცველი დიოგო დალოტი და ინგლისელი სარეზერვო მეკარე ლი გრანტი. ედ ვუდვორდს ამ ზაფხულს სატრანსფერო საქმიანობაზე თანხის დახარჯვა აღარ სურს, მოურინიო კი ფიქრობს, რომ გუნდი სრულად ჯერ არ დაკომპლექტებულა.

“ლივერპულის” წინააღმდეგ გამართული ამხანაგური მატჩის (1:4) შემდეგ გამართულ პრესკონფერენციაზე ჟოზე მოურინიო თქვა, რომ მას სეზონის მიმდინარეობისას ზაფხულის შეკრებაზე მყოფ ფეხბურთელთა მხოლოდ 30 პროცენტზე ექნება გათვლა.

მოურინიოს ისტორიული მიღწევა

ევროპის ლიგის ფინალურ მატჩში “მანჩესტერ იუნაიტედმა” ამსტერდმაის “აიაქსი” ანგარიშით 2:0 დაამარცხა, “წითელი ეშმაკების” თავკაცმა ჟოზე მოურინიომ კი ისტორიულ შედეგს მიაღწია.

კერძოდ, პორტუგალიელი სპეციალისტი პირველი მწვრთნელი გახდა, რომელსაც უეფას თასი/ევროპის ლიგა და ჩემპიონთა ლიგა ორ-ორჯერ აქვს მოგებული.

2003 წელს ჟოზე მოურინიო “პორტუსთან” ერთად უეფას თასის გამარჯვებული გახდა, ერთი წლის შემდეგ კი ჩემპიონთა ლიგა მოიგო. 2010 წელს პორტუგალიელი სპეციალისტის მიერ დამოძღვრილი მილანის “ინტერი” ჩემპიონთა ლიგის გამარჯვებული გახდა, დღეს კი “მანჩესტერ იუნაიტედთან” ერთად ევროპის ლიგა მოიგო.

ჟოზე მოურინიოს სამწვრთნელო კარიერის განმავლობაში 25 ტიტული აქვს მოგებული.

გვარდიოლა: “მოურინიო ჩემი მეზობელია”

ხვალ ინგლისის პრემიერლიგის 26-ე ტურში გადადებული მანჩესტერული დერბი ჩატარდება: “ეტიჰადზე” “სიტი” “იუნაიტედს” მიიღებს. დამდეგი შეხვედრის შესახებ “ქალაქელთა” მთავარმა მწვრთნელმა ხოსეპ გვარდიოლამ ისაუბრა.

“ინგლისის თასი უკვე წარსულია. ისღა დაგვრჩენია, “არსენალს” მივულოცოთ და მომავალზე ვიფიქროთ. წინ “მანჩესტერ იუნაიტედთან” მატჩია. ძლიერი მეტოქე გვყავს, რომელსაც ხანგრძლივი წაუგებელი სერია აქვს. ზლატან იბრაჰიმოვიჩის სახით მეტოქემ, რა თქმა უნდა, დიდი ძალა დაკარგა, მაგრამ მათ ლინგარდი და რაშფორდი ჰყავთ.

მე და ჟოზე მოურინიო მეზობლები ვართ და როცა ერთმანეთს ვხედავთ, ყოველთვის ვესალმებით.

“მანჩესტერ იუნაიტედთან” დავიდ სილვას თამაში საეჭვოა. ჟეზუსი მზადაა, მაგრამ ის კარგ ფიზიკურ მდგომარეობაში არ არის. მასთან შედარებით სერხიო აგუერო სათამაშოდ უფრო მზადაა. ამის მიუხედავად, თითოეულ მათგანს შეუძლია თამაში და ყველაფერი ჩვენს სქემაზე იქნება დამოკიდებული”, – ციტირებს გვარდიოლას სიტყვებს “ბიბისი სპორტი”.

მანჩესტერული დერბი ხვალ, თბილისის დროით 23:00 საათზე დაიწყება.