“სარბიელის” საიუბილეო ნომერი გამოიცა

დღეს, 11-წლიანი პაუზის შემდეგ გაზეთ “სარბიელის” საიუბილეო ნომერი გამოიცა. ზუსტად 30 წლის წინ, 1990 წლის 28 დეკემბერს აღნიშნული გამოცემის პირველი ნომერი დაიბეჭდა. მას შემდეგ წლების განმავლობაში “სარბიელი” მკითხველს უამრავ საინტერესო მასალას აწვდიდა და რაც მთავარია, ეს არ იყო გაზეთის ფურცლებზე სტანდარტული სიტყვებით მშრალი ინფორმაციის გადმოცემა. “სარბიელის” ჟურნალისტებმა სპეციფიკური წერის მანერით შეძლეს ის, რომ გაზეთს საკუთარი სტილი ჩამოუყალიბდა, რისი წყალობითაც მისი გამორჩევა სხვა უამრავ გამოცემას შორის იყო შესაძლებელი. ყველაზე მთავარი კი საქმისადმი პასუხისმგებლობა და ის გულწრფელობა გახლდათ, რომლისთვისაც ამ გაზეთის ავტორებს ყველაზე კრიტიკულ პერიოდებშიც არ უღალატიათ, საქებს აქებდნენ, საკრიტიკებელს აკრიტიკებდნენ. მკითხველმაც მალე შეიყვარა “სარბიელი” და ყოველდღიურობის ნაწილად აქცია.

დღევანდელი საიუბილეო-საკოლექციო ნომერიც ტრადიციულ სტილშია გადაწყვეტილი, ისევ იმ ხალხის მიერაა შედგენილი, ისევ იმ ენით, ისევ ისე საინტერესოდ, ისევ იმ ფასად, განსხვავება კი ისაა, რომ გამოცემა 32-გვერდიანია.

ვულოცავთ “სარბიელს” 30 წლის იუბილეს!

ომი და მშვიდობა იტალიურ ფეხბურთში: ულტრასები და დაძმობილებული გუნდები

ულტრასული დაჯგუფება სპორტული გუნდის მხარდასაჭერად შექმნილ ქომაგთა ორგანიზებულ ჯგუფს ნიშნავს. მას საფუძველი 50-იანი წლების დასაწყისში ჩაეყარა და განვითარების პიკს 80-იან წლებში მიაღწია, როდესაც თითქმის ყველა საფეხბურთო კლუბს ჰყავდა ულტრასდაჯგუფება. ულტრასების ხსენებისას ხშირად ასოცირება ინგლისელ ხულიგნებთან ხდება, თუმცა ეს სტერეოტიპული წარმოდგენაა. მიუხედავად ამისა, ვერ უარვყოფთ იმ ფაქტს, რომ ულტრასდაჯგუფებებს შორის ძალადობა ხშირია, თუმცა ეს მათი არსებობის შედეგი უფრო არის, ვიდრე მიზანი.

ულტრასები ძირითადად სტადიონის ქვედა იარუსზე, კარის მახლობელ სექტორებზე თავსდებიან და იქიდან ქომაგობენ თავიანთ გუნდს სხვადასხვა შეძახილებითა თუ სიმღერებით, ხშირად თვალსასეირო პერფორმანსებსაც დგამენ. ულტრასსამყაროში პოლიტიკაც ღრმად არის ფესვგადგმული. დაჯგუფებები ძირითადად მკვეთრად მემარცხენე ან მემარჯვენე მიმართულების პოლიტიკური იდეოლოგიის მატარებლები არიან და ხშირად ეს განსაზღვრავს სხვადასხვა გუნდების ფანკლუბების ერთმანეთთან დაახლოებას. ამასთან, მხოლოდ პოლიტიკა არ არის ორი ულტრასდაჯგუფების ერთმანეთთან დაძმობილების მიზეზი.

“ლაციო” და “ინტერი”
იტალიაში სხვადასხვა კლუბთა ულტრასდაჯგუფებებს შორის მეგობრობის ერთ-ერთი ყველაზე კარგი მაგალითია რომის “ლაციოსა” და მილანის “ინტერის” ფანთა შემთხვევა. “ლაციოს” ულტრასები ცნობილნი არიან თავიანთი მკვეთრად მემარჯვენე შეხედულებებით, მათთვის არც სვასტიკის დემონსტრირებაა უცხო. ამ გარემოების გამო ისინი “ინტერის” ულტრასებს დაუძმობილდნენ. მართალია, “ნერაძურის” ფანდაჯგუფება ასეთივე ექსტრემალური შეხედულებებით ცნობილი არ არის, თუმცა მათ გარკვეული კავშირი აქვს იტალიის სხვადასხვა მემარჯვენე ჯგუფებთან, მათ შორის “შავ გულთან”.

აღნიშნული გუნდების ულტრასები ხშირად კიდებენ ტრიბუნებზე ერთმანეთის მიმართ პატივსაცემ ბანერებს. პოსტერი წარწერით “Da sempre fieri del nostro gemellaggio alla nord di Milano rendiamo omaggio” (“ვამაყობთ და პატივს ვცემთ ჩვენს დაძმობილებას მილანის ჩრდილოეთთან”) ამის ერთ-ერთი მაგალითია.

ამ ორ კლუბს შორის კავშირი კარგად გამოჩნდა 2010 წელს გაჩაღებულ სკუდეტოსთვის ბრძოლაში. გათამაშების დასრულებამდე ორი ტურით ადრე “ლაციო” “ინტერს” მასპინძლობდა, რომელსაც საჩემპიონო რბოლაში მხოლოდ გამარჯვება აძლევდა ხელს. ტიტულისთვის ბრძოლაში მილანელთა უშუალო კონკურენტი “ლაციოს” თანაქალაქელი და პრინციპული მეტოქე “რომა” იყო, რომელიც ლიდერ “ინტერს” მხოლოდ ორი ქულით ჩამორჩებოდა. ის შეხვედრა “ლაციომ” თითქმის უბრძოლველად, ანგარიშით 0:2 დათმო და ორ კვირაში “ინტერმა” ისტორიაში მე-18 სკუდეტოს მოგება იზეიმა.

“მილანი” და “ბრეშა”
იტალიაში ერთ-ერთი ყველაზე ხანგრძლივი ძმობა “მილანსა” და “ბრეშას” აკავშირებთ. მათი დამეგობრება პოლიტიკურმა შეხედულებებმა განაპირობა და მიუხედავად იმისა, რომ “მილანის” ულტრასდაჯგუფებაში იდეოლოგია შეიცვალა, ამ კლუბების ფანებს შორის ძმობა გრძელდება. ისინი ხშირად სტუმრობენ ერთმანეთის სტადიონებს დაძმობილებული გუნდის გასამხნევებლად. აღსანიშნავია, რომ “ბრეშასთან” დამეგობრებამ “მილანს” ურთიერთობა გაუფუჭა ბერგამოს “ატალანტასთან”.

“ატალანტა” და “ტერნანა”
თავის მხრივ, “ატალანტას” ულტრასდაჯგუფება ნაკლებად ცნობილია. პოლიტიკური იდეოლოგიის თვალსაზრისით ისინი მემარცხენეები არიან და ეს გახდა მათი საფეხბურთო კლუბ “ტერნანას” ფანებთან დაძმობილების მიზეზი. ასე რომ, თუ “ატალანტას” ქომაგთა შორის “ტერნანას” წითელ-მწვანე ფორმასაც მოკრავთ თვალს, არ გაგიკვირდეთ.

“ფიორენტინა” და “ვერონა”
განსხვავებული პოლიტიკური იდეოლოგია არ არის ფანკლუბების დაძმობილებისთვის ხელის შემშლელი ფაქტორი, თუმცა ასეთი შემთხვევები იშვიათია. “ფიორენტინას” ულტრასები მემარცხენეები არიან, ხოლო “ვერონასი” – მემარჯვენეები. ამ განსხვავების მიუხედავად, მათ ერთმანეთთან საკმაოდ მყარი ურთიერთობა აკავშირებთ.

“ფიორენტინა” და “ტორინო”
ორი სხვადასხვა კლუბის ულტრასები შესაძლოა, საერთო მოძულე გუნდმა გააერთიანოს. მაგალითად, “ტორინოსა” და “ფიორენტინას” ფანები ერთმანეთთან “იუვენტუსის” სიძულვილმა დაამეგობრა. ამ გუნდების ულტრასები სტადიონზე ერთმანეთს თბილი შინაარსის ბანერებით ესალმებიან: “Il popolo Fiorentino saluta la vera Torino” (“ფლორენციელი ხალხი მიესალმება ნამდვილ ტურინს”).

მარტოხელა “იუვენტუსი”
“იუვენტუსი” იტალიაში გარკვეულწილად მარტოხელა კლუბია. “ბებერი სინიორას” ულტრასებს სხვა გუნდის ფანებთან ალიანსი არ შეუქმნიათ და ამას მრავალი მიზეზი აქვს, რომელთაგან ორია გამოსაყოფი: “იუვენტუსი” იტალიის მასშტაბით ყველაზე წარმატებული გუნდია და ეს სხვა გუნდის ფანებისთვის დამაბრკოლებელი ფაქტორია, ხოლო მეორე მიზეზად “კალჩოპოლის” სკანდალი უნდა მივიჩნიოთ. მართალია, “იუვენტუსმა” ძველი დიდება მალევე დაიბრუნა, თუმცა ტიტულების მოგებაზე რთული გატეხილი სახელის აღდგენა აღმოჩნდა. “იუვეს” ულტრასები მეგობრებს იტალიის გარეთ ეძებენ და ყველაზე მყარი კავშირი ნიდერლანდურ “დენ ჰააგის” ფანებთან აქვთ.

“პარმა” და”სამპდორია”
იტალიურ ფეხბურთში ერთმანეთთან დაძმობილების შედარებით ნაკლებად ცნობილი შემთხვევებია “პარმასა” და “სამპდორიას” ფანებისა და “ნაპოლისა” და “ჯენოას” ულტრასების მეგობრობა. “პარმასა” და “სამპდორიას” ფანების ძმობა ოც წელზე მეტს ითვლის. 2009 წლის კოპა იტალიის ფინალურ მატჩში გენუელთა საქომაგოდ “პარმას” ფანები რომში საგანგებოდ ჩავიდნენ კიდეც.

“ნაპოლი” და”ჯენოა”
“ნაპოლისა” და “ჯენოას” დამეგობრებას საფუძველი 1982 წელს ჩაეყარა. იმ სეზონის ბოლო ტურში გენუელებს სერია A-ში დასარჩენად კინკილა ქულა ჰყოფნიდათ, თუმცა “სან პაოლოზე” 0:1 მარცხდებოდნენ. საბოლოო ჯამში, ის შეხვედრა ფრედ, ანგარიშით 2:2 დასრულდა, “ჯენოამ” გადასარჩენად საჭირო ქულა მოიპოვა და სერია B-ში მის ნაცვლად “მილანი” დაქვეითდა. ამ ისტორიულმა მოვლენამ “ჯენოას” ულტრასების “ნაპოლის” ფანებთან დამეგობრება განაპირობა.

დარღვეული ძმობა
ყოფილა შემთხვევებიც, როდესაც ძლიერი და ერთი შეხედვით დაუშლელი ძმობა დარღვეულა. “ინტერისა” და “ვერონას” ულტრასთა მეგობრობა 80-იან წლებში დაიწყო და 2001 წლამდე გაგრძელდა. შემდეგ “ვერონას” ულტრასდაჯგუფების სათავეში ახალი ხალხი მოვიდა და “ინტერთან” “მეგობრობის ხელშეკრულებაც” გაუქმდა.

სხვადასხვა კლუბების ულტრასების ერთმანეთთან დამეგობრების შემთხვევები იტალიურ ფეხბურთს ლამაზ, რომანტიკულ ელფერს სძენს და ეს ისტორიები დასტურია იმისა, რომ ულტრასკონცეფცია უფრო მეტია, ვიდრე ხულიგნებთან ასოცირებული სტერეოტიპული შეხედულება.

რატომ არის მარკო მატერაცი “მკვლელი”?

დღეს ავკაც და ხულიგან ფეხბურთელთა ოჯახის სამაგალითო წევრი, მილანის „ინტერის“ ყოფილი მცველი მარკო მატერაცი 47-ე დაბადების დღეს ზეიმობს. Fanebi.com-ი იხსენებს იტალიელი ფეხბურთელის კარიერის იმ ეპიზოდებს, რისთვისაც მას მეტსახელად „მკვლელი“ დაარქვეს.

როგორც ნამდვილი „ინტერისტა“, მატერაცი ყოველთვის დიდი პასუხისმგებლობით ეკიდებოდა მილანურ დერბის. უფრო ზუსტად თუ ვიტყვით, ის მატჩის მიმდინარეობისას „მილანის“ თავდამსხმელებს ყოველთვის დიდი ყურადღებით ადევნებდა თვალყურს და თუ შესაფერის დროს იხელთებდა, მათ სხეულის რომელიმე ნაწილში კარგად უთავაზებდა კიდეც. 2000-იანი წლების დასაწყისში „როსონერის“ თავდასხმის მთავარ ძრავად ანდრეი შევჩენკო ითვლებოდა. უკრაინელი ფეხბურთელის სხეულის ნაწილზე, ალბათ, არ არსებობს ადგილი, რომელზეც მატერაცის თავისი ალი-კვალი არ დაემჩნია. ქვემოთ მოცემულ ვიდეორგოლში ასახულია მატერაცის ყველაზე უხეში თამაშების ამსახველი მომენტები. მისი ყველაზე ხშირი მსხვერპლი კი სწორედ შევჩენკო გახლდათ.

თავად ანდრეიმ მატერაცის წინააღმდეგ მხოლოდ ერთხელ იუხეშა. 2005 წელს გამართულ მილანურ დერბიში შევჩენკომ თავით მსუბუქად „ურქინა“ იტალიელ მცველს, მატერაცი მაშინვე ძირს დაეცა და დიდი ხანის განმავლობაში არც წამომდგარა. მსაჯი სწორად გაერკვა აღნიშნულ სიტუაციაში და უკრაინელი თავდამსხმელი მოედნიდან არ გააძევა.

მატერაციმ ერთ-ერთი ყველაზე გახმაურებული „გმირობა“ მოედანს მიღმა ჩაიდინა. 2004 წელს „ინტერსა“ და „სიენას“ შორის გამართულ მატჩში იტალიელი მცველი სათადარიგოთა სკამზე დარჩა, თუმცა ამას ხელი არ შეუშლია იმისთვის, რომ მას მთელი შეხვედრის განმავლობაში „ბიანკონერის“ მცველ ბრუნო ჩირილოსთან ეჩხუბა. ფინალურ სასტვენამდე მატერაციმ მას სახეში ხელიც გაარტყა, თუმცა ტელეკამერების ობიექტივში ეს ეპიზოდი ვერ მოხვდა. იტალიის ფეხბურთის ფედერაციამ ჩირილოს ჩვენების საფუძველზე „ინტერის“ მცველს გრძელვადიანი დისკვალიფიკაცია მისცა. აღნიშნული მატჩის შემდეგ ჩირილომ ჟურნალისტებს ინტერვიუ მისცა. გთავაზობთ ვიდეოს, რომელშიც ნათლად ჩანს მატერაცის „გმირული“ საქციელის შედეგი.

ზლატან იბრაჰიმოვიჩისა და მარკო მატერაცის მეგობრობა შვედი თავდამსხმელის „ინტერში“ გადასვლის დროიდან დაიწყო, თუმცა „იუვენტუსში“ იბრას ასპარეზობის პირველივე სეზონში იტალიელმა მცველმა ის უხეშად „მოცელა“.

ზლატანმა მატერაცის რამდენიმე წლის შემდეგ უპასუხა. 2010 წლის ნოემბერში გამართულ „მადონინაში“ იბრაჰიმოვიჩმა იტალიელი მცველის წინააღმდეგ კარატეს ილეთი გამოიყენა. მატერაცი მოედნიდან სასწრაფო წესით გაიყვანეს, ზლატანმა კი მატჩის შემდეგ ბოდიში მოიხადა.

ნამდვილი „შედევრი“ გამოუვიდა მარკო მატერაცის ჩემპიონთა ლიგის 2005-06 წლების სეზონის მეოთხედფინალურ ეტაპზე, „ვილიარეალის“ წინააღმდეგ გამართულ მატჩში. კუთხურის შესრულებისას იტალიელმა მცველმა იდაყვით ისე ჩაარტყა ხუან პაბლო სორინს სახეში, რომ საბრალო არგენტინელ ფეხბურთელს ძლიერი სისხლდება ძლივს შეუჩერეს, თუმცა „ვილიარეალის“ მოთამაშემ თამაში ვეღარ გააგრძელა. მატერაციმ იმდენად ოსტატურად იუხეშა, რომ თამაშის წესის დარღვევა ვერცერთმა მსაჯმა ვერ შენიშნა. ხულიგანს ყვითელი ბარათიც არ მისცეს.

მარკო მატერაცის მთავარი მიღწევა, რა თქმა უნდა, 2006 წლის მსოფლიოს ჩემპიონატის ფინალურ მატჩში ზინედინ ზიდანთან შეტაკება გახლავთ. სიმართლე რომ ვთქვათ, არც ფრანგ ფეხბურთელს იცნობდნენ იტალიაში „ფრთიან ანგელოზად“. „იუვენტუსის“ რიგებში ასპარეზობისას, ზიდანს ხშირად სდებდნენ ბრალს პროვოკაციულ ქმედებებში. ასეა თუ ისეა, ზიზუს გენიას მატერაციმ თავისი ავკაცობა დაუპირისპირა და ამით მიზანსაც მიაღწია. მთელი მატჩის განმავლობაში იტალიელი მცველი ფრანგ ნახევარმცველს ბინძური ფრაზებით „ამკობდა“. შეხვედრის დამატებით დროში ზიდანს მოთმინების ფიალა აევსო. როდესაც მატერაცი ზიზუს დასაც შეეხო, ფრანგმა ვეღარ მოითმინა და მას მკერდში თავი აძგერა. ამის გამო ზიდანი მოედნიდან გააძევეს. ასე დაასრულა ლეგენდარულმა ფრანგმა ფეხბურთელმა მოთამაშის კარიერა. საბოლოოდ, 2006 წლის მუნდიალის თასი იტალიის ნაკრებს ერგო, „სკუადრა აძურამ“ ფრანგები პენალტების სერიაში დაამარცხა, მარკო მატერაცი მსოფლიოს ჩემპიონი გახდა.

“ინტერმა” ცხრაკაციანი “უდინეზე” პოდოლსკის სადებიუტო გოლით დაამარცხა (ვიდეო)

იტალიის ჩემპიონატის 33-ე ტურში ანდრეა სტრამაჩიონის “უდინეზემ” მილანის “ინტერი” მიიღო და ანგარიშით 1:2 დამარცხდა.

ანგარიში სტუმართა არგენტინელმა თავდამსხმელმა მაურო იკარდიმ თერთმეტმეტრიანი დარტყმით გახსნა, თუმცა ორ წუთში მასპინძელთა გამოცდილმა ფორვარდმა ანტონიო დი ნატალემ წონასწორობა აღადგინა. რობერტო მანჩინის გუნდს სამი ქულა ლუკას პოდოლსკის შესანიშნავმა დარტყმამ  მოუტანა. გერმანელი ფეხბურთელისთვის ეს “ნერიაძურის” რიგებში გატანილი სადებიუტო გოლია.

აღსანიშნავია, რომ “უდინეზე” 58-ე წუთის შემდეგ მოედანზე ცხრა კაცით თამაშობდა. მე-40 წუთზე მინდვრიდან მაურინციო დომიცი გააძევეს, 58-ე წუთზე კი მთავარი არბიტრის შეურაცხყოფისთვის მის გზას ემანუელ აგიემანგ-ბადუ გაუყენეს.

“ინტერმა” აქტივში 48 ქულას მოუყარა თავი და ახლა სატურნირო ცხრილში მეშვიდე ადგილი უკავია. “უდინეზე” 38 ქულით მე-13 პოზიციაზე გახლავთ.

იტალიის ჩემპიონატი
33-ე ტური
“უდინეზე” — “ინტერი” 1:2 (0:0)

გოლები: დი ნატალე 50′ — იკარდი 48′ (პენ), პოდოლსკი 65′.
გაფრთხილებები: პინცი 14′, დომიცი 25′, კარნეზისი 46′, ვიდმერი 51′ აგიემანგ-ბადუ 58′ — გუარინი 19′, პოდოლსკი 70′, პალასიო 83′, მედელი 90+3′.
გაძევებები: დომიცი 40′, აგიემანგ-ბადუ 58′.

მანჩინი: “ვოლფსბურგს” სამი გოლი ვაჩუქეთ” (ვიდეო)

უეფას ევროპის ლიგის მერვედფინალურ ეტაპზე “ვოლფსბურგსა” და მილანის “ინტერს” შორის გამართული შეხვედრა გერმანელთა გამარჯვებით, ანგარიშით 3:1 დასრულდა. მატჩი შეაფასა “ნერიაძურის” მთავარმა მწვრთნელმა რობერტო მანჩინიმ.

“კარგად დავიწყეთ, თუმცა შემდეგ გაგვირთულდა თამაში. “ვოლფსბურგს” სამი გოლი ვაჩუქეთ.

უფრო ფრთხილად უნდა გვეთამაშა. თამაში კარგად მიმდინარეობდა. სამწუხარო ის არის, რომ უაზრო შეცდომები დავუშვით.

შეცდომას ყველა უშვებს, თუმცა მეკარე კარისოს უადგილო პასი მცველების ბრალიც არის, რადგან აუცილებელი არ არის, ბურთი ყოველთვის კიპერს დაუბრუნო. მცველები უფრო გაბედულები უნდა იყვნენ და წინ იყურონ.

ნათელი იყო, რომ “ვოლფსბურგთან” მძიმე შეხვედრა გველოდა. მეტოქისთვის დიდი სივრცეები არ უნდა დაგვეტოვებინა, ბურთი ასე ხშირად არ უნდა დაგვეკარგა. მოწინააღმდეგე გუნდი კონტრშეტევებზე ძალიან კარგად თამაშობს”, – ციტირებს მანჩინიოს სიტყვებს Football Italia.

“ინტერსა” და “ვოლფსბურგს” შორის განმეორებითი მატჩი 19 მარტს გაიმართება.

მარიო გომესი “ინტერთან” ვერ ითამაშებს

დღეს იტალიის სერია A-ს 25-ე ტური გაგრძელდება. დიდ ინტერესს იწვევს მილანის “ჯუზეპე მეაცაზე” გასამართი შეხვედრა: “ინტერი” — “ფიორენტინა”

ცნობილი გახდა, რომ სტუმართა თავდამსხმელი მარიო გომესი აღნიშნულ მატჩში მონაწილეობას ვერ მიიღებს. “ვიოლას” ოფიციალურ ვებგვერდზე გამოქვეყნებულ განაცხადში გერმანელი ფორვარდი არ იყო შეყვანილი. გარდა ამისა, სიაში არც მეკარე ჩიპრიან ტატარუშანუ გახლდათ. სამაგიეროდ, შემადგენლობას დაუბრუნდა ბორხა ვალერო, რომელმაც ბოლო ორი შეხვედრა ტერფის დაზიანების გამო გამოტოვა.

მატჩი “ინტერსა” და “ფიორენტინას” შორის დღეს, თბილისის დროით 21:00 საათზე დაიწყება.

 

“ინტერის” მონაწილეობით გამართულ მატჩებში კურიოზული ეპიზოდები გრძელდება

მილანის “ინტერის” მონაწილეობით გამართულ მატჩებში კურიოზული ეპიზოდები გრძელდება.

იტალიის სერია A-ს XIX ტურში “ემპოლისა” და “ინტერს” შორის შემდგარი შეხვედრის (0:0) მეორე ტაიმის მიმდინარეობისას გვერდით არბიტრს ერთ-ერთ მომენტში ფეხი დაუცდა და ძირს დაეცა, თამაშგარე მდგომარეობა კი წაქცეულმა დააფიქსირა. წაქცევის შემდეგ მსაჯმა მცირე ტრავმაც მიიღო, თუმცა მედიკოსებმა უმალ უწამლეს და მანაც მუშაობის გაგრძელება შეძლო.

ცნობისთვის, “ემპოლის” ქართველი თავდამსხმელი ლევან მჭედლიძე ძირითად შემადგენლობაში გახლდათ, მოედანზე 71 წუთი დაჰყო და ერთ-ერთი ყველაზე აქტიურიც იყო. ჩვენებურმა 57-ე წუთზე უხეში თამაშისთვის ყვითელი ბარათიც მიიღო.

შეგახსენებთ, რომ წინა ტურში “ინტერის” ფეხბურთელმა მარკო ანდრეოლიმ გუნდის მთავარ მწვრთნელ რობერტო მანჩინის უნებლიეთ ბურთი გაარტყა, რის შემდეგაც იტალიელი სპეციალისტი ძირს დაეცა.

 

“დერბი დელა იტალია” ფრედ დასრულდა

იტალიის სერია A-ს XVII ტურის დასკვნითი და ცენტრალური მატჩი ტურინში გაიმართა, სადაც ადგილობრივმა “იუვენტუსმა” მილანის “ინტერი” მიიღო. შეხვედრაში მოვლენები საინტერესოდ წარიმართა და საბოლოო ჯამში, მატჩი ფრედ, ანგარიშით 1:1 დასრულდა.

ანგარიში შეხვედრის მეხუთე წუთზე გაიხსნა: მასპინძელთა ნახევარმცველმა არტურო ვიდალმა მეტოქის საჯარიმო მოედანზე ეფექტური მოძრაობით ხელსაყრელ პოზიციაზე გადაინაცვლა და კარლოს ტევესს საგოლე გადაცემა გაუკეთა, ამ უკანაკსნელმა კი ბურთი ახლო მანძილიდან ცარიელ კარში გადაგზავნა.

“ნერიაძურიმ” ანგარიშის გათანაბრება 64-ე წუთზე შეძლო: ფრედი გუარინის პასის შემდეგ მაურო იკარდიმ “იუვენტუსის” კარის შორეულ კუთხეში დაარტყა და წონასწორობა აღადგინა.

Mauro Icardi

აღსანიშნავია, რომ მატჩის 54-ე წუთზე მოედანზე გამოვიდა “ინტერში” ახლადგადასული ლუკას პოდოლსკი, რომლისთვისაც ეს სადებიუტო შეხვედრა გახლდათ.

Lukas Podolski

მატჩის 86-ე წუთზე უხეში თამაშისთვის მთავარმა არბიტრმა მოედნიდან მატეო კოვაჩიჩი გააძევა.

სატურნირო ცხრილს “იუვენტუსი” 40 ქულით ლიდერობს. “ინტერს” 22 ქულით მე-11 პოზიცია უკავია.

იტალიის სერია A
XVII ტური:
“იუვენტუსი” — “ინტერი” 1:1 (1:0)

გოლები: ტევესი 5′ — იკარდი 64′.
გაფრთხილებები: მორატა 71′, ბონუჩი 82′ — იკარდი 66′, რანოკია 67′, დამბროზიო 75′, ჟუანი 80′, მედელი 84′.
გაძევება: კოვაჩიჩი 86′.

“დნიპროს” თავკაცი: “ჯაბა კანკავა სეზონის ბოლომდე ვერ ითამაშებს”

საქართველოს ნაკრების კაპიტანმა ჯაბა კანკავამ ტრავმა მიიღო და სეზონის ბოლომდე ვერ ითამაშებს. ამ ინფორმაციას დნეპროპეტროვსკის “დნიპროს” მთავარი მწვრთნელი მირონ მარკევიჩი ავრცელებს.

უკრაინული კლუბის თავკაცმა ევროპის ლიგის ჯგუფურ ეტაპზე მილანის “ინტერის” წინააღმდეგ გასამართ მატჩამდე საკადრო პრობლემებზე ისაუბრა და კანკავაც ახსენა.

“სან სიროზე” “ინტერის” წინააღმდეგ თამაში საინტერესოა როგორც ფეხბურთელებისთვის, ასევე ჩემთვის. თუმცა, ვფიქრობ, რომ ყველაფერი ბოლო ტურში გადაწყდება. რაც შეეხება დამდეგ შეხვედრას, ვიმეორებ, რომ ის ძალზედ პრესტიჟულია. გვინდა, კარგი თამაში ვაჩვენოთ. არა მგონია, ამ მატჩისთვის ფეხბურთელებს საგანგებოდ სჭირდებოდეთ განწყობის შექმნა, რადგან ასეთ სტადიონზე ასეთი დონის გუნდის წინააღმდეგ თამაში ბევრ რამედ ღირს.

შემადგენლობასთან დაკავშირებით პრობლემები გვაქვს: სტრინიჩი ვერ ითამაშებს, მატჩს გამოტოვებს ზოზულიაც. რაც შეეხება კანკავას, ის სეზონის ბოლომდე ვერ დაგვეხმარება.

მათეუს ლეიტა ოპტიმალურ ფორმაში არ არის, თუმცა 18-კაციან განაცხადში შეყვანილია და შესაძლოა, შეცვლაზე შემოვიდეს. ვისურვებდი, რომ “მეტალურგის” წინააღმდეგ გასამართ მატჩში სასტარტო წუთებიდანვე შეძლოს თამაში”, – აღნიშნა მარკევიჩმა.

“დნიპროს” ოფიციალური ვებგვერდის ცნობით, ჯაბა კანკავამ ვარჯიშზე კუნთი დაიშავა, რის გამოც მიმდინარე წელს თამაშს ვეღარ შეძლებს. როგორც ხედავთ, კლუბის თავკაცის მიერ მოწოდებული ინფორმაცია უფრო საგანგაშოა, რადგან მან კანკავას მოედანზე გასვლა მიმდინარე სეზონში გამორიცხა.

 

„დერბი დელა მადონინა“ „მილანმა“ მოიგო

იტალიის სერია A-ს ცენტრალური შეხვედრა „ჯუზეპე მეაზაზე“ გაიმართა, სადაც „მილანი“ თანაქალაქელ „ინტერს“ დაუპირისპირდა. მატჩის ბედი ერთადერთმა გოლმა გადაწყვიტა, რომელიც 65-ე წუთზე ნაიჯელ დე იონგმა თავური დარტყმით გაიტანა. დარჩენილ დროში ბევრი საინტერესო არც არაფერი მომხდარა და „მილანმა“ „დერბი დელა მადონინა“ ანგარიშით 1:0 გაიმარჯვა.

ამ გამარჯვებით „მილანმა“ 54 ქულას მოუყარა თავი და მე-8 პოზიციაზე აღზევდა. „ინტერი“ 57 ქულით მე-5 ადგილზე დარჩა.

იტალიის სერია A
36-ე ტური
„მილანი“ — „ინტერი“ 1:0 (0:0)
გოლი: დე იონგი 65′.
გაფრთხილებები: მექსესი 16′, დე იონგი 89′, აბიატი 90+2′ —კამბიასო 39′, სამუელი 75′, რანოკია 80′.

ერიკ თოჰირი: „ვიდიჩის „ინტერში“ ტრანსფერი 90 პროცენტით განხორციელებულია“

მილანის „ინტერის“ პრეზიდენტმა ერიკ თოჰირმა დაადასტურა ინფორმაცია, რომ „მანჩესტერ იუნაიტედის“ ცენტრალური მცველი ნემანია ვიდიჩი კარიერას „მილანის „ინტერში“ გააგრძელებს. შეგახსენებთ, რომ 32 წლის სერბ მცველს სეზონის ბოლოს „წითელ ეშმაკებთან“ კონტრაქტი ეწურება. ფეხბურთელმა უკვე ოფიციალურად დაადასტურა, რომ ინგლისურ კლუბთან ხელშეკრულებას აღარ გაახანგრძლივებს.

„რაც შეეხება ვიდიჩს, ტრანსფერი 90 პროცენტით განხორციელებულია. როდესაც ყველაფერი გადაწყდება, ოფიციალურ განცხადებას გავაკეთებთ“, – აღნიშნა თოჰირმა.

ინდონეზიელმა ბიზნესმენმა „ინტერის“ ამჟამინდელი მდგომარეობის შესახებაც გააკეთა კომენტარი.

„ბოლო ორი მატჩი კარგად ჩავატარეთ. გუნდი კარგ ფორმაშია, კარგად დაბალანსებული და შეკრულია. ვალტერ სამუელის წყალობით დაცვის ხაზი კიდევ უფრო გაძლიერდა. კარგი დროება გვიდგას, მაგრამ ფეხბურთელებზე ზეწოლის განხორციელებას არ ვაპირებ. იმედი მაქვს, დამდეგ შეხვედრებში კარგ შედეგებს ვაჩვენებთ. ერნანესის შეძენამდე შეტევის მხოლოდ ერთი ვარიანტი გვქონდა, ახლა უკვე ცენტრიდან შეტევაც შეგვიძლია“, – აღნიშნა თოჰირმა.

ბექა დოგრაშვილი

„ინტერს“ მორატას ყიდვა სურს

იტალიური პრესის ინფორმაციით, მადრიდის „რეალის“ ახალგაზრდა თავდამსხმელი ალვარო მორატა მილანის „ინტერის“ ინტერესთა სფეროში მოექცა.

„ტუტოსპორტის“ ცნობით, „ნერიაძური“ მზად არის, 21 წლის ფეხბურთელის სანაცვლოდ 12 მილიონი ევრო გაიღოს. მორატამ „სამეფო კლუბის“ ძირითად შემადგენლობაში ადგილი ვერ დაიმკვიდრა, რაზეც ძალიან წუხს. გავრცელებული ინფორმაციით, ფეხბურთელმა კლუბის ხელმძღვანელობას გასული წლის დეკემბრის თვეში იჯარის წესით განათხოვრებაც სთხოვა.

„ინტერი“ დიეგო მილიტოსთან და მაურო იკარდისთან განშორებას აპირებს. მილიტო კლუბს თავისუფალი აგენტის სტატუსით დატოვებს, იკარდის მიმართ ინტერესი კი „მონაკომ“ გამოავლინა. აქედან გამომდინარე, მილანურ კლუბში მორატას შესაძლო ტრანსფერს დიდი მნიშვნელობა ენიჭება.

ბექა დოგრაშვილი