შვეიცარიის პროკურატურა ფიფას ყოფილ ხელმძღვანელ იოზეფ ბლატერისთვისა და უეფას ექსპრეზიდენტ მიშელ პლატინისთვის თაღლითობის საქმეზე 18-თვიან პირობით პატიმრობას მოითხოვს.
ბლატერსა და პლატინის თაღლითობაში ადანაშაულებენ. სასამართლო 2011 წელს მომხდარ ფაქტს განიხილავს, როდესაც ბლატერმა პლატინისთვის ორი მილიონი შვეიცარიული ფრანკის გადახდის განკარგულება გასცა. გენერალურ პროკურატურაში მიაჩნიათ, რომ თანხის გადაცემა უკანონოდ განხორციელდა, რამაც ფიფას აქტივებს ზარალი მიაყენა. ბლატერი და პლატინი ამტკიცებდნენ, რომ თანხის გადახდა მოხდა ფრანგი ფუნქციონერის მიერ 1998-დან 2002 წლამდე ფიფაში განხორციელებული საკონსულტაციო საქმიანობისთვის, ანაზღაურება კი სიტყვიერად იყო დათქმული.
ქალაქ ბელინცონას სასამართლო განაჩენს 8 ივლისს გამოიტანს. მაქსიმალური სასჯელი, რაც ფიფასა და უეფას ყოფილ ხელმძღვანელებს ემუქრებათ, ხუთ-ხუთი წლით თავისუფლების აღკვეთაა.
დღეს ჩემპიონთა ლიგის ფინალია. ამ ღამეს “ლივერპულის” ან მადრიდის “რეალის” კაპიტანი თავზემოთ სანუკვარ თასს აიტაცებს, თუმცა საინტერესოა, ორიგინალია თუ არა ტიტული, რომელსაც გამარჯვებული გუნდი მიიღებს. ამ კითხვაზე პასუხს ქვემოთ მოგახსენებთ.
ჩემპიონთა ლიგა (უწინდელი სახელწოდება ჩემპიონთა თასი) 1955-1956 წლების სეზონიდან თამაშდება. ტურნირის პირველი თასი დიზაინით დღევანდელისგან განსხვავებული იყო და ის ევროპის ჩემპიონატის ტიტულს უფრო ჩამოჰგავდა. 1967 წელს ეს თასი სამუდამო საკუთრებაში გადაეცა “რეალს”, რომელსაც იმ დროს გათამაშება ექვსჯერ ჰქონდა მოგებული. ამის შემდეგ ახალი და დღეს არსებული დიზაინის მქონე თასი დამზადდა. მოზრდილი სახელურების გამო ჯილდოს მეტსახელად “დიდი ყურები” შეარქვეს. ეს თასი პირველად გლაზგოს “სელტიკმა” მოიგო, თუმცა შოტლანდიურ კლუბს ტიტული სამუდამო საკუთრებაში არ გადაეცა. დადგენილი წესის თანახმად, ამისთვის საჭირო იყო ტურნირის ხუთჯერ ან ზედიზედ სამჯერ მოგება. გამარჯვებულ გუნდს ტურნირის ნამდვილი თასი საკუთრებაში ათი თვის ვადით ეძლეოდა, რის შემდეგაც ტიტული უეფაში ბრუნდებოდა, გუნდს კი შემცირებული ასლი ეძლეოდა.
1970-1973 წლებში ამსტერდამის “აიაქსმა” ტურნირი მიჯრით სამჯერ მოიგო და გახდა მეორე კლუბი, რომელსაც ტროფეი საკუთრებაში გადაეცა, რის შემდეგაც ახალი ორიგინალი თასი ჩამოისხა. 1973-1976 წლებში იგივე გაიმეორა მიუნხენის “ბაიერნმა” და მასაც გადაეცა ტურნირის ორიგინალი ჯილდო სამუდამო საკუთრებაში. 1994 წელს “მილანმა” გათამაშება მეხუთედ მოიგო და ტიტული სამუდამოდ დაისაკუთრა. 2005 წელს “ლივერპული” გახდა უკანასკნელი კლუბი, რომელსაც ტურნირის ორიგინალი თასი სამუდამო საკუთრებაში გადაეცა. ამრიგად, მხოლოდ ხუთ კლუბს უდგას მუზეუმში ჩემპიონთა ლიგის (ჩემპიონთა თასი) ნამდვილი თასი.
2008-2009 წლების სეზონიდან უეფა ჩემპიონთა ლიგის ტიტულს კლუბებს სამუდამო საკუთრებაში აღარ გადასცემს. ტურნირის მეექვსე ორიგინალი თასი უეფაში ინახება, გამარჯვებულ გუნდებს კი მისი ზუსტი ზომის ასლი გადაეცემათ, რომელზეც მოგებული კლუბის სახელწოდებაა ამოტვიფრული. გარდა ამისა, გამარჯვებულ კლუბებს სურვილისამებრ ტურნირის ორიგინალი თასის ასლის დამზადება შეუძლიათ, თუმცა კოპია ზომით მისი ნამდვილი ანალოგის მაქსიმუმ 80 პროცენტი უნდა იყოს. ახალი წესის თანახმად, კლუბს, რომელიც ჩემპიონთა ლიგას მეხუთედ ან ზედიზედ მესამედ მოიგებს, სათამაშო ფორმაზე სპეციალური ნიშნის გამოსახვის უფლება ეძლევა.
ჩემპიონთა ლიგის თასის თანამედროვე დიზაინი წარმოადგენს 73,5 სანტიმეტრის ვერცხლის ამფორას, რომელიც შეიგნიდან მოოქროვილია. ტიტული 7,5 კილოგრამს იწონის და მისი ნომინალური ღირებულება ათი ათასი შვეიცარიული ფრანკია. თასზე წინა მხარეს გამოსახულია უეფას ლოგო, ცენტრში კი ფრანგულად აწერია “COUPE DES CLUBS CHAMPIONS EUROPÉENS” (“ევროპის ჩემპიონ კლუბთა თასი”). ჯილდო 1967 წელს შვეიცარიელმა იუველირმა იურგ შტადელმანმა დაამზადა.
ასე რომ, ჩემპიონთა ლიგის გამარჯვებული გუნდი ორიგინალ თასს აღარ იღებს, თუმცა ეს სრულებითაც არ აკნინებს ამ ტურნირის პრესტიჟულობასა და მისი მოგების სურვილს.
ავტორიტეტული სპორტული ტელეარხი ESPN იუწყება, რომ შესაძლოა, უეფას 2023 წლის სუპერთასის მასპინძელი ქალაქი შეიცვალოს.
ორი წლის წინ შეხვედრის ჩატარების ადგილად რუსეთის ქალაქი ყაზანი შეირჩა, თუმცა წელს განვითარებული ცნობილი მოვლენების შემდეგ უეფას მასპინძლის შეცვლა სურს და ალტერნატიულ ვარიანტებს უკვე განიხილავს. აღნიშნულ ინფორმაციასთან დაკავშირებით უეფაში კომენტარი ჯერ არ გაკეთებულა.
შეგახსენებთ, რომ ევროპული ფეხბურთის მმართველმა ორგანომ სანქტ-პეტერბურგს ჩემპიონთა ლიგის წლევანდელი გათამაშების ფინალური მატჩის მასპინძლის სტატუსი ჩამოართვა და ეს პრივილეგია პარიზს მიანიჭა.
ევროპული ფეხბურთის მმართველი ორგანოს პრეზიდენტმა ალექსანდერ ჩეფერინმა ჩემპიონთა ლიგაზე “ოთხთა ფინალის” დანერგვის იდეაზე კომენტარი გააკეთა.
“კარგი იდეაა, მაგრამ რამდენიმე მატჩს ვკარგავთ. კლუბებისთვის ცუდი ისაა, რომ შინ ვერ ითამაშებენ, სატელევიზიო უფლებების მფლობელებისთვისაც ნაკლები შეხვედრაა. უეფას სუპერთასთან დაკავშირებით ახალი იდეა გვაქვს, მაგრამ მედიაში გასაჟღერებლად ჯერ ძალიან ადრეა”, – ციტირებს ჩეფერინის სიტყვებს ხორვატული dalmatinskiportal-ი.
პრესაში გავრცელდა ინფორმაცია, რომლის თანახმადაც, უეფა ჩემპიონთა ლიგის დასკვნითი ეტაპის ფორმატის ცვლილებას აპირებს. ჩანაფიქრის თანახმად, ტურნირის ნახევარფინალური ეტაპიდან ჩატარდება “ოთხთა ფინალი”, რაც გულისხმობს ერთ კონკრეტულ ქალაქში თითო-თითო ნახევარფინალური მატჩის გამართვას. ასეთი პრეცედენტი კორონავირუსული პანდემიის გამო 2019-2020 წლების სეზონში უკვე დაფიქსირდა.
მილანის “ინტერის” ნახევარმცველი ნიკოლო ბარელა უეფას ჩემპიონთა ლიგის მერვედფინალურ ეტაპზე “ლივერპულის” წინააღმდეგ გასამართ ორივე მატჩს გამოტოვებს.
როგორც მოგეხსენებათ, ჯგუფური ეტაპის დასკვნით ტურში მადრიდის “რეალთან” გამართული შეხვედრის (0:2) ერთ-ერთ ეპიზოდში იტალიელი ნახევარმცველი გაცხარდა და ედერ მილიტაოს დაუპირისპირდა, რის გამოც პირდაპირ წითელი ბარათი მიიღო. უეფას სადისციპლინო კომიტეტმა მომხდარზე იმსჯელა და ბარელა ორმატჩიანი დისკვალიფიკაციით დასაჯა.
“ინტერი” “ლივერპულს” “ჯუზეპე მეაცაზე” 16 თებერვალს მიიღებს, განმეორებითი მატჩი კი “ენფილდზე” 8 მარტს ჩატარდება.
დღეს ლეგენდარულ იტალიელ კიპერ ფრანჩესკო ტოლდოს 50 წელი შეუსრულდა. Fanebi.Com-ი თქვენთან ერთად გაიხსენებს ტოლდოს კარიერის ყველაზე გამორჩეულ ეპიზოდებს.
ჰოლანდიის დამმარცხებელი
ნიჭიერ მეკარეს დიდი ხნის განმავლობაში არ უმართლებდა: ის უმეტესად უფრო სახელოვანი თანაგუნდელების ჩრდილში ექცეოდა. ასე იყო ნაკრებში და ასე იყო “ინტერშიც”. ტოლდომ ეროვნულ ნაკრებში 2000 წლის ევროპის ჩემპიონატზე გაიბრწყინა. ტურნირამდე გამართულ ამხანაგურ მატჩში ჯანლუიჯი ბუფონმა ხელი მოტეხა და ასე გაეხსნა გზა ფრანჩესკოს.
ტურნირის ნახევარფინალურ ეტაპზე, “ამსტერდამ არენაზე”, ჰოლანდიის ნაკრების წინააღმდეგ გამართულ მატჩში ტოლდომ ექვსი პენალტიდან მხოლოდ ერთი გაუშვა. აქედან ორი თერთმეტმეტრიანი შეხვედრის ძირითად დროში დაინიშნა. თანაც, იტალიელები ჯანლუკა ძამბროტას გაძევების შემდეგ მოედანზე რიცხობრივ უმცირესობაში იყვნენ. ტოლდომ ჯერ ფრანკ დე ბურის დარტყმული მოიგერია, შემდეგ კი პატრიკ კლუივერტმა ბურთი ძელს გაარტყა. პენალტების სერიაში ჰოლანდიელები აშკარად ცუდად გამოიყურებოდნენ. ტოლდომ თითქოს მოაჯადოვა იმ საღამოს თავისი კარი. როგორც შემდეგ გახდა ცნობილი, ტოლდომ მატჩის წინა ღამეს პერსონალურ კომპიუტერში დისკეტებზე ჩაწერილი მასალის დახმარებით მეტოქე გუნდი პენალტების შესრულების მხრივ დაწვრილებით შეისწავლა.
მხსნელი გოლეადორი
ტოლდოს “ინტერი” ბევრჯერ გადაურჩენია, თუმცა ყველაზე დასამახსოვრებელი ეპიზოდი არა საკუთარ, არამედ მეტოქე გუნდის კართან მოხდა. 2002 წელი, პრინციპული ბრძოლა ტურნირის “იუვენტუსთან”. ყველაზე დრამატული მატჩის ბოლო ნაწილი გამოდგა: 89-ე წუთზე პიერლუიჯი კოლინამ „ინტერის” კარის მიმართულებით საეჭვო პენალტი დანიშნა, რომელიც ალესანდრო დელ პიერომ გოლად აქცია. 95-ე წუთზე კი ნამდვილი სასწაული მოხდა: „იუვენტუსის” კართან კუთხური დაინიშნა, ტოლდო მეტოქის საჯარიმოსკენ გაეშურა, ბურთის მოწოდების შემდეგ არეულობა შეიქმნა, რითაც ფრანჩესკომ ისარგებლა და ბურთი ბუფონის კარში გადაგზავნა. ტურინელებს ისღა დარჩენოდათ, კოლინასთან დაეჩივლათ, ჩვენს მეკარეზე თავდასხმა მოხდაო, თუმცა გოლი გავიდა და ამას ვინღა გააუქმებდა?!
“იების” საგუშაგოზე
90-იანი წლების ბოლოს “ფიორენტინა” მრისხანე ძალა იყო. “იების” რიგებში მანუელ რუი კოშტა და “მკვლელად” წოდებული ფორვარდი გაბრიელ ომარ ბატისტუტა ბრწყინავდნენ, თუმცა ერთ დღეს, როდესაც კლუბის მთავარ მწვრთნელ ჯოვანი ტრაპატონის ჰკითხეს, თუ ვინ იყო მისი გუნდის ყველაზე მნიშვნელოვანი ფიგურა, მან ასეთად ტოლდო დაასახელა. 1998/99 წლების სეზონში “ფიორენტინა” დიდი ხნის განმავლობაში ლიდერობდა სერია A-ს, თუმცა ფინიშის ხაზთან მას “მილანმა” და “ლაციომ” გადაასწრეს. ამის მიუხედავად, ქომაგებს სიხარული არ განელებიათ, რადგან “ფიორენტინამ” ჩემპიონთა ლიგის საგზური მოიპოვა და რაც ყველაზე მთავარია, ფლორენციელები იშვიათი სილამაზის ფეხბურთს თამაშობდნენ.
“ფიორენტინა” ჩემპიონთა ლიგაზეც ღირსეულად გამოვიდა. ჯგუფური ეტაპის გადამწყვეტ მატჩად ლონდონის “არსენალთან” სტუმრად გამართული მატჩი გამოდგა. იმ შეხვედრაში ფლორენციელები ბატისტუტას გოლით დაწინაურდნენ, რის შემდეგაც ლონდონელებმა შეტევები კიდევ უფრო გაამწვავეს და რომ არა ტოლდო, ინგლისელები, ალბათ, სასურველ შედეგსაც მიაღწევდნენ. იტალიელმა კიპერმა “ჰაიბერიზე” ნამდვილი სასწაული ჩაიდინა, როდესაც ორი მეტრის მანძილიდან კანუს დარტყმულზე რეაგირება მოასწრო და ბურთი მოიგერია. ნიგერიელ თავდამსხმელს ასეთი გაოცებული სახე, ალბათ, არც მანამდე და არც მას შემდეგ არ ჰქონია.
ტოლდო იტალიის ხუთგზის ჩემპიონი და “ინტერის” შემადგენლობაში ჩემპიონთა ლიგის გამარჯვებულია, თუმცა მან ეს ტიტული მაშინ მოიგო, როდესაც მილანური გუნდის პირველ მეკარედ ჟულიო სეზარი ითვლებოდა. მიუხედავად იმისა, რომ ტოლდო ქალაქ მილანიდან არ არის და არც “ინტერს” ქომაგობდა ბავშვობიდანვე, მან “ნერაძურის” სამაგალითოდ უერთგულა: “ინტერის” გამო უარი “ბენფიკას”, “ბაიერნს”, “ლივერპულსა” და “რეალს” ვუთხარი. ამ კლუბში გამარჯვება განსაკუთრებული რამაა. ეს იმ გრძნობას ჰგავს, შტორმის შემდეგ პორტს რომ უბრუნდები”.
ფრანჩესკო ტოლდო შეყვანილი იყო 1998 და 2002 წლის მსოფლიოს და 2004 წლის ევროპის ჩემპიონატების სანაკრებო განაცხადებში, თუმცა არცერთ მატჩში არ უთამაშია. მან იტალიის ნაკრებში ჩატარებულ 28 შეხვედრაში მხოლოდ 15 გოლი გაუშვა. გარდა ამისა, ტოლდო იტალიის რესპუბლიკისადმი გაწეული დამსახურებისთვის დაჯილდოებულია კავალერის ორდენით.
ყველაზე დიდი გამარჯვება
ფრანჩესკო ტოლდოს კარიერის მანძილზე 16 გუნდური ტიტული აქვს მოგებული, თუმცა იგი ყველაზე დიდ გამარჯვებად იმ სიყვარულს თვლის, რომელსაც ხალხისგან გრძნობს: “იცით, რა არის საუკეთესო? ხალხს 40 წლისა და უფრო დიდი ხნის ასაკშიც ვახსოვარ და ადამიანები ჩემზე დადებითად საუბრობენ. ჩემდამი ხალხის გულთბილი განწყობა ჩემთვის ყველაზე დიდი გამარჯვებაა”.
კარიერის დასრულება
ფრანჩესკო ტოლდო თავმდაბალი და მოკრძალებული პიროვნებაა და კარიერაც მოკრძალებულად, გამოსათხოვარი მატჩის გარეშე დაასრულა. 2010 წლის 7 ივლისს ტოლდომ კარიერის დასრულების შესახებ განაცხადა: “კარიერის დასრულების შესახებ გადაწყვეტილება მივიღე. ამას ოფიციალურად პირველად ვამბობ, ამიტომ ძალიან მიჭირს, თუმცა კლუბიდან არ მივდივარ — ახალგაზრდებთან მუშაობას გავაგრძელებ. რაც შეეხება გამოსათხოვარ მატჩს, ის არ იქნება“.
პროფესიული კარიერის დასრულების შემდეგ ფრანჩესკო ტოლდო გარკვეული ხნით იტალიის 21-წლამდელთა ნაკრებში მეკარეების მწვრთნელად მუშაობდა, დღესდღეობით კი პროექტ “ინტერი” სამუდამოდ” ერთ-ერთი ხელმძღვანელია. პროექტი კლუბის ლეგენდარულ ფეხბურთელებს აერთიანებს.
ევროპული ფეხბურთის მმართველი ორგანოს ოფიციალურ მიკრობლოგზე ჩემპიონთა ლიგის 2020-2021 წლების გათამაშების სიმბოლური გუნდი გამოქვეყნდა, რომელიც 23 ფეხბურთელით არის წარმოდგენილი.
მომდევნო სეზონიდან სტარტს აიღებს უეფას ახალი ტურნირი კონფერენციის ლიგა. ევროპული ფეხბურთის მმართველმა ორგანომ ახალი ტურნირის თასი წარადგინა.
ტროფეი 11 კილოგრამს იწონის, 57.5 სიგრძისაა და 32 ექვსკუთხა ფირფიტისგან შედგება, რაც ჯგუფურ ეტაპზე მონაწილე გუნდებს აღნიშნავს. ფირფიტები თასის ფუძიდან ზემოთ არის მიმართული, ზომაში იზრდება და ბრუნს აკეთებს.
კონფერენციის ლიგა ინკლუზიურობით უნიკალური პროექტია, ვინაიდან ტურნირში წარმოდგენილი იქნება 184 გუნდი უეფას 55 ეროვნული ასოციაციიდან, მათ შორის 46 კლუბი, რომლებიც ჩემპიონთა ლიგიდან (საკვალიფიკაციო ეტაპზე) და ევროპის ლიგიდან (საკვალიფიკაციო, ჯგუფური და მერვედფინალურ ეტაპზე) გადმოვლენ.
ტურნირი ჩემპიონთა ლიგისა და ევროპის ლიგის იდენტური ფორმატით გაიმართება. კონფერენციის ლიგის ჯგუფურ ეტაპზე 32 კლუბი ითამაშებს.
ფორმატი მოიცავს ჯგუფურ ეტაპს (რვა ჯგუფში გადანაწილებული ოთხ-ოთხი კლუბი), მერვედფინალს, მეოთხედფინალს, ნახევარფინალს და ფინალს. ტურნირის ფინალური სტადიის დაწყებამდე შედგება სამი საკვალიფიკაციო და შემდეგ საპლეიოფო ეტაპი. ჯგუფური ეტაპის საგზური პირდაპირ არცერთ გუნდს არ გადაეცემა. 17 საგზური გათამაშდება კონფერენციის ლიგის ძირითადი საკვალიფიკაციო გზით, ხუთი – საკვალიფიკაციო ეტაპის ჩემპიონთა ბადით, ხოლო დანარჩენ ათ ადგილს ევროპის ლიგის საკვალიფიკაციო ეტაპის პლეი-ოფში დამარცხებული გუნდები შეავსებენ.
ახალი ტურნირის ჯგუფების გამარჯვებულები მერვედფინალურ ეტაპზე პირდაპირ გავლენ, ხოლო მეორეადგილოსნები დამატებით საპლეიოფო რაუნდში ევროპის ლიგის ჯგუფური ეტაპის მესამეადგილოსნებს დაუპირისპირდებიან.
კონფერენციის ლიგა მოიცავს 141 მატჩს და 15 სათამაშო დღეს.
ტურნირის გამარჯვებული ავტომატურად მიიღებს ევროპის ლიგის მომდევნო სეზონის ჯგუფური ეტაპის საგზურს (თუ ეროვნულ ჩემპიონატში ნაჩვენები შედეგით ჩემპიონთა ლიგის საგზური არ მოიპოვა).
მატჩები გაიმართება ხუთშაბათ დღეს.
საქართველოდან კონფერენციის ლიგაზე სამი კლუბი იქნება წარმოდგენილი: ქვეყნის თასის გამარჯვებული, ეროვნული ლიგის მეორე და მესამეადგილოსანი. სამივე გუნდი ტურნირს პირველი საკვალიფიკაციო ეტაპიდან დაიწყებს.
კონფერენციის ლიგის პირველი გათამაშების ფინალურ მატჩს 2022 წლის 25 მაისს, ალბანეთის დედაქალაქი ტირანა ახალ ეროვნულ სტადიონზე უმასპინძლებს. არენა 21 690 მაყურებელზეა გათვლილი.
დამტკიცებულია ტურნირის სამწლიანი გრაფიკი, რაც იმას ნიშნავს, რომ გათამაშება 2021-დან მინიმუმ 2024 წლამდე ჩატარდება.
დღეს, უეფას 55-მა წევრმა ასოციაციამ, მათ შორის საქართველოს ფეხბურთის ფედერაციამ, ერთხმად დაამტკიცა დეკლარაცია, რომელიც მკაცრად გმობს სუპერლიგას.
უეფას მიერ გამოქვეყნებულ დეკლარაციაში ვკითხულობთ:
“უეფას 55 ასოციაცია და კონგრესის წევრები გმობენ ე.წ. “სუპერლიგას”. უეფას კონგრესი მტკიცედ არის დარწმუნებული, რომ დახურული “სუპერლიგა” ეწინააღმდეგება ევროპელობის იდეას – ერთიანობის, გახსნილობის, ურთიერთდახმარებისა და სპორტული ღირებულებების პრინციპებს. უეფასა და მის წევრ ასოციაციებს სჯერათ ევროპული მოდელის ჭეშმარიტების, რომელიც ეფუძნება ღია შეჯიბრებითობას, სოლიდარობასა და გადანაწილებას, რაც უზრუნველყოფს ფეხბურთის მდგრადობასა და განვითარებას ყველას სასარგებლოდ, ასევე ასტიმულირებს ევროპულ ღირებულებებსა და სოციალურ შედეგებს.
შეთქმულების მონაწილე კლუბები გულწრფელად ვერ ხედავენ, რომ მათ დღევანდელ სტატუსს მიაღწიეს არა იზოლაციის პირობებში, არამედ ევროპული სისტემის დინამიურ ფარგლებში, რომელშიც დიდმა, საშუალო და პატარა კლუბებმა საერთო წვლილი შეიტანეს თითოეულის წარმატებასა თუ წარუმატებლობაში. იმის წარმოდგენა, თითქოს მათ აქვთ ცალკე გამოყოფის და ერთად შექმნილი მემკვიდრეობის მოთხოვნის უფლება, მათი მხრიდან ევროპული ღირებულებების შეურაცხყოფაა.
უეფა, მისი ასოციაციები და ყველა, ვისაც ფეხბურთი უყვარს, მტკიცედ დგას, მაქსიმალურად შეეწინააღმდეგება და იბრძოლებს ამ კლუბების მფლობელებისა და მათი მხარდამჭერების აღნიშნული ნაბიჯის წინააღმდეგ. ჩვენ ვიცით, რა მორალური ღირებულებებია საფრთხეში და ფეხბურთს დავიცავთ ეგოისტური კლანისგან, რომელსაც არ ადარდებს ეს თამაში. ევროპული ფეხბურთი ჩვენ ვართ და არა – ისინი”.
შეგახსენებთ, რომ სუპერლიგაში ამ დროისთვის 12 კლუბია გაერთიანებული: “არსენალი”, “მანჩესტერ იუნაიტედი”, “მანჩესტერ სიტი”, “ლივერპული”, “ჩელსი”, “ტოტენჰემი”, “რეალი”, “ბარსელონა”, “ატლეტიკო”, “იუვენტუსი”, “ინტერი”, “მილანი”. დაანონსებულია კიდევ რვა კლუბის დამატება.
თავის მხრივ, ფიფა და უეფა ახალი პროექტის მონაწილე კლუბებს ეროვნული, ევროპული და მსოფლიო ტურნირებიდან მოკვეთით, მათ ფეხბურთელებს კი სანაკრებო დონეზე თამაშის აკრძალვით ემუქრება.
საფეხბურთო კლუბი “ყარაბაღი” სკანდალში გაეხვა. უეფას სადისციპლინო კომიტეტმა სოციალურ ქსელში გამოქვეყნებული პოსტის გამო კლუბის პრესსამსახურის უფროს ნურლან იბრაჰიმოვს დროებით ნებისმიერი საფეხბურთო საქმიანობის განხორციელება აუკრძალა. ევროპული ფეხბურთის მმართველმა ორგანომ 30 წლის აზერბაიჯანელი ჟურნალისტი აღნიშნული განცხადების გაკეთების გამო დასაჯა:
“სომხები უნდა დავხოცოთ. ბავშვები, ქალები, მოხუცები – ყოველგვარი განსხვავების გარეშე. ჩვენ ისინი უნდა დავხოცოთ. არავითარი დანდობა. თუ ამას არ ვიზამთ, ისინი დაგვხოცავენ ჩვენ და ჩვენს შვილებს. ისინი ამას აკეთებენ უკვე 120 წელია”.
მოგვიანებით ნურლან იბრაჰიმოვმა აღნიშნული პოსტი წაშალა, თუმცა სანქციას მაინც ვერ გადაურჩა. “ყარაბაღმა” გამოაქვეყნა განცხადება, რომელშიც ნათქვამია, რომ კლუბი ემიჯნება იბრაჰიმოვის ამ პოსტს და საკუთარ თანამშრომელს დისციპლინურ პასუხისმგებლობას დააკისრებს. სომხეთის ფეხბურთის ფედერაცია სულაც მოითხოვს, რომ “ყარაბაღი” ევროთასებიდან მოიკვეთოს.
უეფას სადისციპლინო კომიტეტი საქმის არსებით განხილვას უახლოეს დღეებში გამართავს და არ არის გამორიცხული, იბრაჰიმოვი ფეხბურთს სამუდამოდ ჩამოაშოროს.
შეგახსენებთ, რომ “ყარაბაღი” ევროპის ლიგის ჯგუფურ ეტაპზე თამაშობს. გუნდმა ორი მატჩი ჩაატარა და ორივე შეხვედრაში დამარცხდა: გასვლაზე თელ-ავივის “მაქაბისთან 0:1, შინ “ვილიარეალთან” 1:3. აზერბაიჯანული გუნდი ხუთშაბათს თურქულ “სივასპორს” ესტუმრება.
დუბლინში გამართულ უეფას აღმასრულებელი კომიტეტის სხდომაზე 2021-2024 წლების საშეჯიბრო ციკლში მესამე საკლუბო ტურნირის ჩატარება დამტკიცდა.
ახალი ტურნირი (სამუშაო სახელწოდებით UEL2) ჩემპიონთა ლიგისა და ევროპის ლიგის იდენტური ფორმატით გაიმართება. ტურნირის ჯგუფურ ეტაპზე 32 კლუბი ითამაშებს.
ფორმატი მოიცავს ჯგუფურ ეტაპს (რვა ჯგუფში გადანაწილებული ოთხ-ოთხი კლუბი), მერვედფინალს, მეოთხედფინალს, ნახევარფინალს და ფინალს.
ახალი ტურნირის მერვედფინალურ ეტაპამდე ჩატარდება დამატებითი საპლეიოფო რაუნდი, რომელშიც UEL2-ის ჯგუფური ეტაპის მეორე და ევროპის ლიგის ჯგუფური ეტაპის მესამეადგილოსნები დაუპირისპირდებიან ერთმანეთს.
ახალი ტურნირი მოიცავს 141 მატჩს და 15 სათამაშო დღეს.
ტურნირის გამარჯვებული ავტომატურად მიიღებს ევროპის ლიგის მომდევნო სეზონის საგზურს.
მატჩები გაიმართება ხუთშაბათ დღეს. ამრიგად, ჩემპიონთა ლიგის შეხვედრები კვლავინდებურად სამშაბათსა და ოთხშაბათს ჩატარდება, ხოლო ევროპის ლიგისა და ახალი ტურნირის მატჩები ხუთშაბათობით გაიმართება და დღის პირველი შეხვედრები თბილისის დროით, სავარაუდოდ, 18:30 საათიდან დაიწყება.
ახალი ტურნირის შემოღებით ევროთასების ჯგუფურ ეტაპზე მინიმუმ 34 ასოციაცია იქნება წარმოდგენილი (დღე მინიმუმ 26 ასოციაციაა წარმოდგენილი). ახალი ტურნირი ყველა ევროპული ასოციაციისთვის იქნება ღია. შენარჩუნებული იქნება დღეს არსებული კვოტირების სისტემა.
ახალი ტურნირის დასახელება/ბრენდი, ფინანსური დეტალები, კოეფიციენტთა სისტემა და კომერციული სტრატეგია 2019 წელს დამტკიცდება.
2021-2024 წლების ციკლში ევროპის ლიგის ფორმატი ახალი ტურნირის ფორმატის შესაბამისი იქნება. კერძოდ, მერვედფინალურ ეტაპამდე აღნიშნული რაუნდის საგზურისთვის ერთმანეთს ევროპის ლიგის ჯგუფური ეტაპის მეორე და ჩემპიონთა ლიგის ჯგუფური ეტაპის მესამეადგილოსნები დაუპირისპირდებიან.
ჩემპიონთა ლიგის ფორმატი და შერჩევის სქემა უცვლელად დარჩა.
მადრიდის “რეალისა” და ტურინის “იუვენტუსის” მეოთხედფინალური მატჩის დროს, სერხიო რამოსი, რომელიც მატჩს თვალს VIP ლოჟიდან ადევნებდა, მეორე ტაიმში გვირაბის შესასვლელთან ჩავიდა. ესპანელი სწორედ იქედან ამხნევებდა თანაგუნდელებს. ეს შეუმჩნეველი არ დარჩენიათ მსაჯებს, რომლებმაც მატჩის შემდეგ UEFA-ს გადასცეს აღნიშნული ინფორმაცია.
UEFA-მ განიხილა რამოსის შემთხვევა და გადაწყვიტა, რომ ის არ დაისჯება. როგორც განცხადებაში წერია, ესპანელი მცველი “მოედნის დონეზე” არ მდგარა. შესაბამისად, ის ორივე ნახევარფინალურ მატჩში იქნება.
“რეალი” ჩემპიონთა ლიგაზე” მიუნხენის “ბაიერნს” დაუპირისპირდება. პირველი მატჩი გერმანიაში 24 აპრილს, ხოლო მეორე დაპირისპირება უკვე ესპანეთში, პირველ მაისს შედგება.
