ჭდე: Italy

სალაჰი: “იტალიაში ფანები მეტოქეს პატივს სცემენ, ინგლისში – არა”

Posted on by ბექა დოგრაშვილი

“ლივერპულის” თავდამსხმელმა მოჰამედ სალაჰმა იტალიური და ინგლისური სპორტული კულტურა ერთმანეთისგან განასხვავა.

“როდესაც “რომაში” ვთამაშობდი, ფანები ფრანჩესკო ტოტის აპლოდისმენტით შინაც ეგებებოდნენ და სტუმრადაც. ასე ხდებოდა დანიელე დე როსის, ჯანლუიჯი ბუფონისა და ალესანდრო დელ პიეროს შემთხვევაშიც. ინგლისში ასე არ არის. აქ ფანები მეტოქე გუნდის ფეხბურთელების მიმართ ყოველთვის საწინააღმდეგოდ არიან განწყობილნი. ბუფონი იტალიის რომელ ქალაქშიც არ უნდა წავიდეს, ყველგან დამსახურებულ პატივისცემას იღებს”, – ციტირებს სალაჰის სიტყვებს “კორიერე დელო სპორტი”.

ეგვიპტელმა საუკეთესო მეკარეებიც დაასახელა, რომელთა წინააღმდეგაც უთამაშია:

“ერთ კონკრეტულ მეკარეს ვერ გამოვარჩევ, ამიტომ ოთხს მათგანს დავასახელებ: კასილასი, ბუფონი, ალისონი და ნოიერი. ბევრი სხვა დიდებული კიპერი არსებობს, მაგრამ ამ მომენტში ისინი არ მახსენდება. ერთი მათგანის დასახელება რთულია. როდესაც იტალიაში ვთამაშობდი, ბუფონი შეუდარებელი იყო. საოცარი გრძნობაა მის წინააღმდეგ თამაში. მან კარიერაში ყველაფერი მოიგო და ეს წარმოუდგენელია”.

ფრანჩესკო ტოლდო — 50

Posted on by ბექა დოგრაშვილი

დღეს ლეგენდარულ იტალიელ კიპერ ფრანჩესკო ტოლდოს 50 წელი შეუსრულდა. Fanebi.Com-ი თქვენთან ერთად გაიხსენებს ტოლდოს კარიერის ყველაზე გამორჩეულ ეპიზოდებს.

ჰოლანდიის დამმარცხებელი
ნიჭიერ მეკარეს დიდი ხნის განმავლობაში არ უმართლებდა: ის უმეტესად უფრო სახელოვანი თანაგუნდელების ჩრდილში ექცეოდა. ასე იყო ნაკრებში და ასე იყო “ინტერშიც”. ტოლდომ ეროვნულ ნაკრებში 2000 წლის ევროპის ჩემპიონატზე გაიბრწყინა. ტურნირამდე გამართულ ამხანაგურ მატჩში ჯანლუიჯი ბუფონმა ხელი მოტეხა და ასე გაეხსნა გზა ფრანჩესკოს.

ტურნირის ნახევარფინალურ ეტაპზე, “ამსტერდამ არენაზე”, ჰოლანდიის ნაკრების წინააღმდეგ გამართულ მატჩში ტოლდომ ექვსი პენალტიდან მხოლოდ ერთი გაუშვა. აქედან ორი თერთმეტმეტრიანი შეხვედრის ძირითად დროში დაინიშნა. თანაც, იტალიელები ჯანლუკა ძამბროტას გაძევების შემდეგ მოედანზე რიცხობრივ უმცირესობაში იყვნენ. ტოლდომ ჯერ ფრანკ დე ბურის დარტყმული მოიგერია, შემდეგ კი პატრიკ კლუივერტმა ბურთი ძელს გაარტყა. პენალტების სერიაში ჰოლანდიელები აშკარად ცუდად გამოიყურებოდნენ. ტოლდომ თითქოს მოაჯადოვა იმ საღამოს თავისი კარი. როგორც შემდეგ გახდა ცნობილი, ტოლდომ მატჩის წინა ღამეს პერსონალურ კომპიუტერში დისკეტებზე ჩაწერილი მასალის დახმარებით მეტოქე გუნდი პენალტების შესრულების მხრივ დაწვრილებით შეისწავლა.

 

მხსნელი გოლეადორი
ტოლდოს “ინტერი” ბევრჯერ გადაურჩენია, თუმცა ყველაზე დასამახსოვრებელი ეპიზოდი არა საკუთარ, არამედ მეტოქე გუნდის კართან მოხდა. 2002 წელი, პრინციპული ბრძოლა ტურნირის “იუვენტუსთან”. ყველაზე დრამატული მატჩის ბოლო ნაწილი გამოდგა: 89-ე წუთზე პიერლუიჯი კოლინამ „ინტერის” კარის მიმართულებით საეჭვო პენალტი დანიშნა, რომელიც ალესანდრო დელ პიერომ გოლად აქცია. 95-ე წუთზე კი ნამდვილი სასწაული მოხდა: „იუვენტუსის” კართან კუთხური დაინიშნა, ტოლდო მეტოქის საჯარიმოსკენ გაეშურა, ბურთის მოწოდების შემდეგ არეულობა შეიქმნა, რითაც ფრანჩესკომ ისარგებლა და ბურთი ბუფონის კარში გადაგზავნა. ტურინელებს ისღა დარჩენოდათ, კოლინასთან დაეჩივლათ, ჩვენს მეკარეზე თავდასხმა მოხდაო, თუმცა გოლი გავიდა და ამას ვინღა გააუქმებდა?!

 

“იების” საგუშაგოზე
90-იანი წლების ბოლოს “ფიორენტინა” მრისხანე ძალა იყო. “იების” რიგებში მანუელ რუი კოშტა და “მკვლელად” წოდებული ფორვარდი გაბრიელ ომარ ბატისტუტა ბრწყინავდნენ, თუმცა ერთ დღეს, როდესაც კლუბის მთავარ მწვრთნელ ჯოვანი ტრაპატონის ჰკითხეს, თუ ვინ იყო მისი გუნდის ყველაზე მნიშვნელოვანი ფიგურა, მან ასეთად ტოლდო დაასახელა. 1998/99 წლების სეზონში “ფიორენტინა” დიდი ხნის განმავლობაში ლიდერობდა სერია A-ს, თუმცა ფინიშის ხაზთან მას “მილანმა” და “ლაციომ” გადაასწრეს. ამის მიუხედავად, ქომაგებს სიხარული არ განელებიათ, რადგან “ფიორენტინამ” ჩემპიონთა ლიგის საგზური მოიპოვა და რაც ყველაზე მთავარია, ფლორენციელები იშვიათი სილამაზის ფეხბურთს თამაშობდნენ.

 

“ფიორენტინა” ჩემპიონთა ლიგაზეც ღირსეულად გამოვიდა. ჯგუფური ეტაპის გადამწყვეტ მატჩად ლონდონის “არსენალთან” სტუმრად გამართული მატჩი გამოდგა. იმ შეხვედრაში ფლორენციელები ბატისტუტას გოლით დაწინაურდნენ, რის შემდეგაც ლონდონელებმა შეტევები კიდევ უფრო გაამწვავეს და რომ არა ტოლდო, ინგლისელები, ალბათ, სასურველ შედეგსაც მიაღწევდნენ. იტალიელმა კიპერმა “ჰაიბერიზე” ნამდვილი სასწაული ჩაიდინა, როდესაც ორი მეტრის მანძილიდან კანუს დარტყმულზე რეაგირება მოასწრო და ბურთი მოიგერია. ნიგერიელ თავდამსხმელს ასეთი გაოცებული სახე, ალბათ, არც მანამდე და არც მას შემდეგ არ ჰქონია.

 

ტოლდო იტალიის ხუთგზის ჩემპიონი და “ინტერის” შემადგენლობაში ჩემპიონთა ლიგის გამარჯვებულია, თუმცა მან ეს ტიტული მაშინ მოიგო, როდესაც მილანური გუნდის პირველ მეკარედ ჟულიო სეზარი ითვლებოდა. მიუხედავად იმისა, რომ ტოლდო ქალაქ მილანიდან არ არის და არც “ინტერს” ქომაგობდა ბავშვობიდანვე, მან “ნერაძურის” სამაგალითოდ უერთგულა: “ინტერის” გამო უარი “ბენფიკას”, “ბაიერნს”, “ლივერპულსა” და “რეალს” ვუთხარი. ამ კლუბში გამარჯვება განსაკუთრებული რამაა. ეს იმ გრძნობას ჰგავს, შტორმის შემდეგ პორტს რომ უბრუნდები”.

ფრანჩესკო ტოლდო შეყვანილი იყო 1998 და 2002 წლის მსოფლიოს და 2004 წლის ევროპის ჩემპიონატების სანაკრებო განაცხადებში, თუმცა არცერთ მატჩში არ უთამაშია. მან იტალიის ნაკრებში ჩატარებულ 28 შეხვედრაში მხოლოდ 15 გოლი გაუშვა. გარდა ამისა, ტოლდო იტალიის რესპუბლიკისადმი გაწეული დამსახურებისთვის დაჯილდოებულია კავალერის ორდენით.

ყველაზე დიდი გამარჯვება
ფრანჩესკო ტოლდოს კარიერის მანძილზე 16 გუნდური ტიტული აქვს მოგებული, თუმცა იგი ყველაზე დიდ გამარჯვებად იმ სიყვარულს თვლის, რომელსაც ხალხისგან გრძნობს: “იცით, რა არის საუკეთესო? ხალხს 40 წლისა და უფრო დიდი ხნის ასაკშიც ვახსოვარ და ადამიანები ჩემზე დადებითად საუბრობენ. ჩემდამი ხალხის გულთბილი განწყობა ჩემთვის ყველაზე დიდი გამარჯვებაა”.

Toldo

კარიერის დასრულება
ფრანჩესკო ტოლდო თავმდაბალი და მოკრძალებული პიროვნებაა და კარიერაც მოკრძალებულად, გამოსათხოვარი მატჩის გარეშე დაასრულა. 2010 წლის 7 ივლისს ტოლდომ კარიერის დასრულების შესახებ განაცხადა: “კარიერის დასრულების შესახებ გადაწყვეტილება მივიღე. ამას ოფიციალურად პირველად ვამბობ, ამიტომ ძალიან მიჭირს, თუმცა კლუბიდან არ მივდივარ — ახალგაზრდებთან მუშაობას გავაგრძელებ. რაც შეეხება გამოსათხოვარ მატჩს, ის არ იქნება“.

პროფესიული კარიერის დასრულების შემდეგ ფრანჩესკო ტოლდო გარკვეული ხნით იტალიის 21-წლამდელთა ნაკრებში მეკარეების მწვრთნელად მუშაობდა, დღესდღეობით კი პროექტ “ინტერი” სამუდამოდ” ერთ-ერთი ხელმძღვანელია. პროექტი კლუბის ლეგენდარულ ფეხბურთელებს აერთიანებს.

იტალიური ფეხბურთის ვარსკვლავები სამწვრთნელო კურსს გაივლიან

Posted on by ბექა დოგრაშვილი

იტალიური ფეხბურთის ვარსკვლავები A და B კატეგორიის სამწვრთნელო ლიცენზიის მისაღებად კურსებს გაივლიან.

კურსებზე ალესანდრო დელ პიერო, დანიელე დე როსი, კრისტიან ვიერი, ალესანდრო მატრი, რიკარდო მონტოლივო, ჯამპაოლო პაცინი, დავიდ პისარო, ფედერიკო ბალძარეტი და ინიაციო აბატე ჩაეწერნენ. კურსები კოვერჩანოში მდებარე ბაზაზე ჩატარდება და მისი წარმატებით დასრულების შემთხვევაში, მონაწილეები უეფას A და B კატეგორიის სამწვრთნელო ლიცენზიას მიიღებენ.

აღნიშნული დოკუმენტი ახალგაზრდულ და ქალთა გუნდებში, აგრეთვე იტალიის სერია B-მდე არსებულ დივიზიონებში მოასპარეზე კლუბებში მუშაობის საშუალებას იძლევა. გარდა ამისა, A და B კატეგორიის სამწვრთნელო ლიცენზია სერია A-სა და სერია B-ს გუნდების მთავარი მწვრთნელების ასისტენტად მუშაობის უფლებას იძლევა.

შეგახსენებთ, რომ დე როსი იტალიის ეროვნული ნაკრების სამწვრთნელო შტაბში უკვე მუშაობს და “სკუადრა აძურას” ევრო-2020-ზეც გაჰყვება, თუმცა ის გუნდის თავკაცის თანაშემწის ფუნქციებს არ ასრულებს.

იტალიაში “ინტერი” გალიდერდა (ვიდეო)

Posted on by ბექა დოგრაშვილი

იტალიის სერია A-ს 22-ე ტურის ერთ-ერთი ცენტრალური მატჩი “ჯუზეპე მეაცაზე” გაიმართა, სადაც მილანის “ინტერმა” რომის “ლაციო” მიიღო. როგორც მოგეხსენებათ, გათამაშების ერთპიროვნულმა ლიდერმა “მილანმა” “სპეციასთან” შეხვედრა დათმო (0:2), რითაც “ნერაძურის” გალიდერების შანსი გაუჩნდა. ამისთვის ანტონიო კონტეს გუნდს “ლაციო” უნდა დაემარცხებინა. თავის მხრივ, რომაელები, გამარჯვების შემთხვევაში, მეექვსედან მესამე პოზიციამდე აღზევდებოდნენ.

თამაში მაღალ ტემპში, ორმხრივი შეტევებით დაიწყო, ანგარიში კი 22-ე წუთზე მასპინძლებმა გახსნეს. რომელუ ლუკაკუსა და ლაუტარო მარტინესის გათამაშებული კომბინაცია რომაელთა საჯარიმო მოედანზე არგენტინელი ფეხბურთელის წაქცევით შეფერხდა და მთავარმა არბიტრმაც უმალ თერთმეტმეტრიანის ნიშნულისკენ მიუთითა. პენალტი ლუკაკუმ უშეცდომოდ შეასრულა – 1:0. ტაიმის ბოლოს “ლაციოს” საჯარიმოს მისადგომებთან მარსელო ბროზოვიჩის ვარდნის შედეგად ბელგიელი ფორვარდი პეპე რეინასთან ერთი ერთზე დარჩა და დუბლი შეასრულა – 2:0.

მატჩის 61-ე წუთზე “ლაციოს” თამაშის შემოტრიალების იმედი მიეცა. სერგეი მილინკოვიჩ-სავიჩის საჯარიმო დარტყმის შემდეგ ბურთი გონსალო ესკალანტეს მოხვდა და სამირ ჰანდანოვიჩის კარში შევარდა – 2:1. “ნერაძურიმ” სიმონე ინძაგის გუნდს ცივი შხაპი სამ წუთში გადაასხა: ბროზოვიჩმა საკუთარი საჯარიმოს მისადგომეთან მეტოქეს ბურთი აართვა და ლუკაკუს გრძელი გადაცემა გაუკეთა, ბელგიელმა ფეხბურთელმა სოლო რეიდი მოაწყო, მეტოქეს გაასწრო, მოტიტვლებულ საჯარიმოში შეიჭრა და ბურთი მარტოდმარტო დარჩენილ ლაუტაროს მიაწოდა, ამ უკანასკნელმა კი ცარიელ კარში შეაგორა – 3:1.

“ლაციოსთან” მოპოვებული გამარჯვებით “ინტერმა” აქტივში 50 ქულას მოუყარა თავი და გათამაშების სატურნირო ცხრილს ერთპიროვნულად ჩაუდგა სათავეში, ერთი პუნქტით ნაკლები აქვს “მილანს”, ხოლო მესამე პოზიციაზე 43 ქულით “რომა” გახლავთ. “ლაციო” 40 პუნქტით “ნაპოლისთან” და “ატალანტასთან” 5-7 ადგილებს იყოფს.

იტალიის სერია A
XXII ტური
“ინტერი” — “ლაციო” 3:1 (2:0)
გოლები: ლუკაკუ 22′ (პენ), 45′, მარტინესი 64′ — ესკალანტე 61′.

“რომას” ტექნიკური მარცხი ჩაუთვალეს

Posted on by ბექა დოგრაშვილი

იტალიის თასზე “რომასა” და “სპეციას” შორის გამართულ მატჩში დედაქალაქურ გუნდს ტექნიკური მარცხი ჩაუთვალეს.

“მგლებმა” შეხვედრის დამატებითი ტაიმის მიმდინარეობისას მეექვსე შეცვლა განახორციელეს, რაც დადგენილი წესების დარღვევად ითვლება. გუნდებს მაქსიმუმ ხუთი ცვლილების განხორციელების უფლება აქვთ.

მართალია, “რომა” ანგარიშით 2:4 დამარცხდა, თუმცა წესის დარღვევის გამო პაულუ ფონსეკას გუნდს ტექნიკური მარცხი და ანგარიშით 0:3 წაგება ჩაეთვალა.

რატომ არის მარკო მატერაცი “მკვლელი”?

Posted on by ბექა დოგრაშვილი

დღეს ავკაც და ხულიგან ფეხბურთელთა ოჯახის სამაგალითო წევრი, მილანის „ინტერის“ ყოფილი მცველი მარკო მატერაცი 47-ე დაბადების დღეს ზეიმობს. Fanebi.com-ი იხსენებს იტალიელი ფეხბურთელის კარიერის იმ ეპიზოდებს, რისთვისაც მას მეტსახელად „მკვლელი“ დაარქვეს.

როგორც ნამდვილი „ინტერისტა“, მატერაცი ყოველთვის დიდი პასუხისმგებლობით ეკიდებოდა მილანურ დერბის. უფრო ზუსტად თუ ვიტყვით, ის მატჩის მიმდინარეობისას „მილანის“ თავდამსხმელებს ყოველთვის დიდი ყურადღებით ადევნებდა თვალყურს და თუ შესაფერის დროს იხელთებდა, მათ სხეულის რომელიმე ნაწილში კარგად უთავაზებდა კიდეც. 2000-იანი წლების დასაწყისში „როსონერის“ თავდასხმის მთავარ ძრავად ანდრეი შევჩენკო ითვლებოდა. უკრაინელი ფეხბურთელის სხეულის ნაწილზე, ალბათ, არ არსებობს ადგილი, რომელზეც მატერაცის თავისი ალი-კვალი არ დაემჩნია. ქვემოთ მოცემულ ვიდეორგოლში ასახულია მატერაცის ყველაზე უხეში თამაშების ამსახველი მომენტები. მისი ყველაზე ხშირი მსხვერპლი კი სწორედ შევჩენკო გახლდათ.

თავად ანდრეიმ მატერაცის წინააღმდეგ მხოლოდ ერთხელ იუხეშა. 2005 წელს გამართულ მილანურ დერბიში შევჩენკომ თავით მსუბუქად „ურქინა“ იტალიელ მცველს, მატერაცი მაშინვე ძირს დაეცა და დიდი ხანის განმავლობაში არც წამომდგარა. მსაჯი სწორად გაერკვა აღნიშნულ სიტუაციაში და უკრაინელი თავდამსხმელი მოედნიდან არ გააძევა.

მატერაციმ ერთ-ერთი ყველაზე გახმაურებული „გმირობა“ მოედანს მიღმა ჩაიდინა. 2004 წელს „ინტერსა“ და „სიენას“ შორის გამართულ მატჩში იტალიელი მცველი სათადარიგოთა სკამზე დარჩა, თუმცა ამას ხელი არ შეუშლია იმისთვის, რომ მას მთელი შეხვედრის განმავლობაში „ბიანკონერის“ მცველ ბრუნო ჩირილოსთან ეჩხუბა. ფინალურ სასტვენამდე მატერაციმ მას სახეში ხელიც გაარტყა, თუმცა ტელეკამერების ობიექტივში ეს ეპიზოდი ვერ მოხვდა. იტალიის ფეხბურთის ფედერაციამ ჩირილოს ჩვენების საფუძველზე „ინტერის“ მცველს გრძელვადიანი დისკვალიფიკაცია მისცა. აღნიშნული მატჩის შემდეგ ჩირილომ ჟურნალისტებს ინტერვიუ მისცა. გთავაზობთ ვიდეოს, რომელშიც ნათლად ჩანს მატერაცის „გმირული“ საქციელის შედეგი.

ზლატან იბრაჰიმოვიჩისა და მარკო მატერაცის მეგობრობა შვედი თავდამსხმელის „ინტერში“ გადასვლის დროიდან დაიწყო, თუმცა „იუვენტუსში“ იბრას ასპარეზობის პირველივე სეზონში იტალიელმა მცველმა ის უხეშად „მოცელა“.

ზლატანმა მატერაცის რამდენიმე წლის შემდეგ უპასუხა. 2010 წლის ნოემბერში გამართულ „მადონინაში“ იბრაჰიმოვიჩმა იტალიელი მცველის წინააღმდეგ კარატეს ილეთი გამოიყენა. მატერაცი მოედნიდან სასწრაფო წესით გაიყვანეს, ზლატანმა კი მატჩის შემდეგ ბოდიში მოიხადა.

ნამდვილი „შედევრი“ გამოუვიდა მარკო მატერაცის ჩემპიონთა ლიგის 2005-06 წლების სეზონის მეოთხედფინალურ ეტაპზე, „ვილიარეალის“ წინააღმდეგ გამართულ მატჩში. კუთხურის შესრულებისას იტალიელმა მცველმა იდაყვით ისე ჩაარტყა ხუან პაბლო სორინს სახეში, რომ საბრალო არგენტინელ ფეხბურთელს ძლიერი სისხლდება ძლივს შეუჩერეს, თუმცა „ვილიარეალის“ მოთამაშემ თამაში ვეღარ გააგრძელა. მატერაციმ იმდენად ოსტატურად იუხეშა, რომ თამაშის წესის დარღვევა ვერცერთმა მსაჯმა ვერ შენიშნა. ხულიგანს ყვითელი ბარათიც არ მისცეს.

მარკო მატერაცის მთავარი მიღწევა, რა თქმა უნდა, 2006 წლის მსოფლიოს ჩემპიონატის ფინალურ მატჩში ზინედინ ზიდანთან შეტაკება გახლავთ. სიმართლე რომ ვთქვათ, არც ფრანგ ფეხბურთელს იცნობდნენ იტალიაში „ფრთიან ანგელოზად“. „იუვენტუსის“ რიგებში ასპარეზობისას, ზიდანს ხშირად სდებდნენ ბრალს პროვოკაციულ ქმედებებში. ასეა თუ ისეა, ზიზუს გენიას მატერაციმ თავისი ავკაცობა დაუპირისპირა და ამით მიზანსაც მიაღწია. მთელი მატჩის განმავლობაში იტალიელი მცველი ფრანგ ნახევარმცველს ბინძური ფრაზებით „ამკობდა“. შეხვედრის დამატებით დროში ზიდანს მოთმინების ფიალა აევსო. როდესაც მატერაცი ზიზუს დასაც შეეხო, ფრანგმა ვეღარ მოითმინა და მას მკერდში თავი აძგერა. ამის გამო ზიდანი მოედნიდან გააძევეს. ასე დაასრულა ლეგენდარულმა ფრანგმა ფეხბურთელმა მოთამაშის კარიერა. საბოლოოდ, 2006 წლის მუნდიალის თასი იტალიის ნაკრებს ერგო, „სკუადრა აძურამ“ ფრანგები პენალტების სერიაში დაამარცხა, მარკო მატერაცი მსოფლიოს ჩემპიონი გახდა.

ფრანჩესკო ტოლდო — სათადარიგო ჩემპიონი

Posted on by ბექა დოგრაშვილი

დღეს ლეგენდარულ იტალიელ კიპერ ფრანჩესკო ტოლდოს 45 წელი შეუსრულდა. Fanebi.Com-ი თქვენთან ერთად გაიხსენებს ტოლდოს კარიერის ყველაზე გამორჩეულ ეპიზოდებს.

ჰოლანდიის დამმარცხებელი
ნიჭიერ მეკარეს დიდი ხნის განმავლობაში არ უმართლებდა: ის უმეტესად უფრო სახელოვანი თანაგუნდელების ჩრდილში ექცეოდა. ასე იყო ნაკრებში და ასე იყო „ინტერშიც“. ტოლდომ ეროვნულ ნაკრებში 2000 წლის ევროპის ჩემპიონატზე გაიბრწყინა. ტურნირამდე გამართულ ამხანაგურ მატჩში ჯანლუიჯი ბუფონმა ხელი მოტეხა და ასე გაეხსნა გზა ფრანჩესკოს.

ტურნირის ნახევარფინალურ ეტაპზე, „ამსტერდამ არენაზე“, ჰოლანდიის ნაკრების წინააღმდეგ გამართულ მატჩში ტოლდომ ექვსი პენალტიდან მხოლოდ ერთი გაუშვა. აქედან ორი თერთმეტმეტრიანი შეხვედრის ძირითად დროში დაინიშნა. თანაც, იტალიელები ჯანლუკა ძამბროტას გაძევების შემდეგ მოედანზე რიცხობრივ უმცირესობაში იყვნენ. ტოლდომ ჯერ ფრანკ დე ბურის დარტყმული მოიგერია, შემდეგ კი პატრიკ კლუივერტმა ბურთი ძელს გაარტყა. პენალტების სერიაში ჰოლანდიელები აშკარად ცუდად გამოიყურებოდნენ. ტოლდომ თითქოს მოაჯადოვა იმ საღამოს თავისი კარი.

 

მხსნელი გოლეადორი
ტოლდოს „ინტერი“ ბევრჯერ გადაურჩენია, თუმცა ყველაზე დასამახსოვრებელი ეპიზოდი არა საკუთარ, არამედ მეტოქე გუნდის კართან მოხდა. 2002 წელი, პრინციპული ბრძოლა ტურნირის „იუვენტუსთან“. ყველაზე დრამატული მატჩის ბოლო ნაწილი გამოდგა: 89-ე წუთზე პიერლუიჯი კოლინამ „ინტერის“ კარის მიმართულებით საეჭვო პენალტი დანიშნა, რომელიც ალესანდრო დელ პიერომ გოლად აქცია. 95-ე წუთზე კი ნამდვილი სასწაული მოხდა: „იუვენტუსის“ კართან კუთხური დაინიშნა, ტოლდო მეტოქის საჯარიმოსკენ გაეშურა, ბურთის მოწოდების შემდეგ არეულობა შეიქმნა, რითაც ფრანჩესკომ ისარგებლა და ბურთი ბუფონის კარში გადაგზავნა. ტურინელებს ისღა დარჩენოდათ, კოლინასთან დაეჩივლათ, ჩვენს მეკარეზე თავდასხმა მოხდაო, თუმცა გოლი გავიდა და ამას ვინღა გააუქმებდა?!

 

„იების“ საგუშაგოზე
90-იანი წლების ბოლოს „ფიორენტინა“ მრისხანე ძალა იყო. „იების“ რიგებში მანუელ რუი კოშტა და „მკვლელად“ წოდებული ფორვარდი გაბრიელ ომარ ბატისტუტა ბრწყინავდნენ, თუმცა ერთ დღეს, როდესაც კლუბის მთავარ მწვრთნელ ჯოვანი ტრაპატონის ჰკითხეს, თუ ვინ იყო მისი გუნდის ყველაზე მნიშვნელოვანი ფიგურა, მან ასეთად ტოლდო დაასახელა. 1998/99 წლების სეზონში „ფიორენტინა“ დიდი ხნის განმავლობაში ლიდერობდა სერია A-ს, თუმცა ფინიშის ხაზთან მას „მილანმა“ და „ლაციომ“ გადაასწრეს. ამის მიუხედავად, ქომაგებს სიხარული არ განელებიათ, რადგან „ფიორენტინამ“ ჩემპიონთა ლიგის საგზური მოიპოვა და რაც ყველაზე მთავარია, ფლორენციელები იშვიათი სილამაზის ფეხბურთს თამაშობდნენ.

 

„ფიორენტინა“ ჩემპიონთა ლიგაზეც ღირსეულად გამოვიდა. ჯგუფური ეტაპის გადამწყვეტ მატჩად ლონდონის „არსენალთან“ სტუმრად გამართული მატჩი გამოდგა. იმ შეხვედრაში ფლორენციელები ბატისტუტას გოლით დაწინაურდნენ, რის შემდეგაც ლონდონელებმა შეტევები კიდევ უფრო გაამწვავეს და რომ არა ტოლდო, ინგლისელები, ალბათ, სასურველ შედეგსაც მიაღწევდნენ. იტალიელმა კიპერმა „ჰაიბერიზე“ ნამდვილი სასწაული ჩაიდინა, როდესაც ორი მეტრის მანძილიდან კანუს დარტყმულზე რეაგირება მოასწრო და ბურთი მოიგერია. ნიგერიელ თავდამსხმელს ასეთი გაოცებული სახე, ალბათ, არც მანამდე და არც მას შემდეგ არ ჰქონია.

 

ტოლდო იტალიის ხუთგზის ჩემპიონი და „ინტერის“ შემადგენლობაში ჩემპიონთა ლიგის გამარჯვებულია, თუმცა მან ეს ტიტული მაშინ მოიგო, როდესაც მილანური გუნდის პირველ მეკარედ ჟულიო სეზარი ითვლებოდა. გარდა ამისა, ის შეყვანილი იყო 1998 და 2002 წლის მსოფლიოს და 2004 წლის ევროპის ჩემპიონატების სანაკრებო განაცხადებში, თუმცა არცერთი მატჩი არ ჩაუტარებია. იტალიის ნაკრებში ჩატარებულ 28 შეხვედრაში მხოლოდ 15 გოლი გაუშვა. გარდა ამისა, ტოლდო იტალიის რესპუბლიკისადმი გაწეული დამსახურებისთვის დაჯილდოებულია კავალერის ორდენით.

ყველაზე დიდი გამარჯვება
ფრანჩესკო ტოლდოს კარიერის მანძილზე 16 გუნდური ტიტული აქვს მოგებული, თუმცა იგი ყველაზე დიდ გამარჯვებად იმ სიყვარულს თვლის, რომელსაც ხალხისგან გრძნობს: „იცით, რა არის საუკეთესო? ხალხს 40 წლისა და უფრო დიდი ხნის ასაკშიც ვახსოვარ და ადამიანები ჩემზე დადებითად საუბრობენ. ჩემდამი ხალხის გულთბილი განწყობა ჩემთვის ყველაზე დიდი გამარჯვებაა“.

Toldo

კარიერის დასრულება
ფრანჩესკო ტოლდო თავმდაბალი და მოკრძალებული პიროვნებაა და კარიერაც მოკრძალებულად, გამოსათხოვარი მატჩის გარეშე დაასრულა. 2010 წლის 7 ივლისს ტოლდომ კარიერის დასრულების შესახებ განაცხადა: „კარიერის დასრულების შესახებ გადაწყვეტილება მივიღე. ამას ოფიციალურად პირველად ვამბობ, ამიტომ ძალიან მიჭირს, თუმცა კლუბიდან არ მივდივარ — ახალგაზრდებთან მუშაობას გავაგრძელებ. რაც შეეხება გამოსათხოვარ მატჩს, ის არ იქნება“.

პროფესიული კარიერის დასრულების შემდეგ ფრანჩესკო ტოლდო გარკვეული ხნით იტალიის 21-წლამდელთა ნაკრებში მეკარეების მწვრთნელად მუშაობდა, დღესდღეობით კი პროექტ “ინტერი” სამუდამოდ” ერთ-ერთი ხელმძღვანელია. პროექტი კლუბის გამორჩეულ ფეხბურთელებს აერთიანებს.

 

ფრანჩესკო ტოტი — 40 წელი

Posted on by ბექა დოგრაშვილი

დღეს ლეგენდარულ იტალიელ ფეხბურთელ ფრანჩესკო ტოტის 40 წელი შეუსრულდა.

Totti1

ფრანჩესკო ტოტის “რომას” შემადგენლობაში დებიუტი 1993 წლის 28 მარტს, “ბრეშას” წინააღმდეგ გამართულ მატჩში (0:2) ჰქონდა. მაშინ გუნდს ვუიადინ ბოშკოვი წვრთნიდა. 16 წლის ტოტი მოედანზე მატჩის დასრულებამდე სამი წუთით ადრე შევიდა. სადებიუტო გოლი 1994-1995 წლების სეზონში “ფოჯას” კარში გაიტანა.

Totti2

ფრანჩესკო ტოტიმ კაპიტნის სამლკავური 1998-1999 წლების სეზონში, 22 წლის ასაკში ჩაიბარა. ზდენეკ ზემანის ხელმძღვანელობის პირობებში ტოტიმ თავი ნამდვილ ლიდერად წარმოაჩინა და 1998 წლის ოქტომბერში ბრაზილიელი ალდაირისგან ოფიციალურად ჩაიბარა კაპიტნის სამკლავური. იმ სეზონში ტოტი სერია А-ს საუკეთესო ფეხბურთელად დასახელდა.

Totti3

1996 წელს ფრანჩესკო ტოტი იტალიის ახალგაზრდული ნაკრების შემადგენლობაში ევროპის ჩემპიონი გახდა, ეროვნულ გუნდში კი დებიუტი 1998 წლის ოქტომბერში ჰქონდა. დინო ძოფმა 22 წლის ფეხბურთელი ევრო-2000-ის საკვალიფიკაციო ეტაპზე შვეიცარიის ნაკრების წინააღმდეგ გამართულ მატჩში ბოლო ოცი წუთი ათამაშა.

ჰოლანდიის ნაკრების წინააღმდეგ ევრო-2000-ის ნახევარფინალურ მატჩში ტოტი მოედანზე ძირითადი დროის ამოწურვამდე რამდენიმე წუთით ადრე შევიდა და ყველაფერი გააკეთა, რასაც მისგან მწვრთნელი მოითხოვდა: გააძლიერა თამაში და შემდეგ ანტონიო პანენკას სტილში გადამწყვეტი პენალტიც გაიტანა.

Totti5

ფრანჩესკო ტოტი ევრო-2000-ის ფინალური სტადიის საუკეთესო ფეხბურთელად დასახელდა, თუმცა ინდივიდუალური მიღწევა ფინალურ მატჩში საფრანგეთის ნაკრებთან განცდილმა დასანანმა მარცხმა დაჩრდილა.

2000-2001 წლებში ფრანჩესკო ტოტიმ პირველი და ჯერჯერობით უკანასკნელი სკუდეტო მოიგო. იგი გაბრიელ ბატისტუტასთან და მარკო დელვეკიოსთან ერთად ჩემპიონი გუნდის შეუცვლელი ლიდერი გახლდათ. 1983 წლის შემდეგ პირველად “რომამ” სკუდეტო მოიგო. გუნდმა ჩემპიონის ტიტული “პარმას” წინააღმდეგ გამართულ მატჩში დაისკაუთრა, რომელიც “მგლებმა” ანგარიშით 3:1 მოიგეს, ჩესკომ მაშინაც გაიტანა. მას შემდეგ “რომა” არაერთხელ ყოფილა იტალიის ჩემპიონობასთან ახლოს, თუმცა 2001 წელს მოპოვებული წარმატება ჯერჯერობით მიუღწევლად რჩება.

ფრანჩესკო ტოტის კარიერაში არც იმპულსურ გამოხტომებს მოვისაკლისებთ. არასპორტული საქციელის გამო იტალიელს არაერთხელ მიუღია ყვითელი თუ წითელი ბარათი. ყველაზე დასამახსოვრებელი შემთხვევა კი ევრო-2004-ზე მოხდა, როდესაც ტოტიმ დანიელ ნახევარმცველ კრისტიან პოულსენს ზურგიდან შეაფურთხა. მომენტი ვერავინ შეამჩნია, თუმცა კადრი კამერების ობიექტივში მაინც მოხვდა და ტოტი სამმატჩიანი დისკვალიფიკაციით დასაჯეს, იტალიის ნაკრები კი ჯგუფში ჩარჩა.

2006 წელს ფრანჩესკო ტოტი იტალიის ნაკრებთან ერთად მსოფლიოს ჩემპიონი ხდება. თავად ჩესკომ იმ გუნდში ერთ-ერთი გადამწყვეტი როლი შეასრულა. ტოტიმ ტრავმა მუნდიალზე გამგზავრებამდე ცოტა ხნით ადრე მოიშუშა, ამიტომ ძველებურად თვალწარმტაცი არ ყოფილა, თუმცა ტურნირის სიმბოლურ ნაკრებში მოხვედრა მაინც დაიმსახურა. მალევე, 31 წლის ასაკში ტოტიმ სანაკრებო კარიერის დასრულების გადაწყვეტილებაც მიიღო.

2006-2007 წლების სეზონში ფრანჩესკო ტოტი ოქროს ბუცის მფლობელი ხდება. იმ სეზონს პრობლემების გარეშე არ ჩაუვლია: ტრავმები, დისკვალიფიკაცია, გამოუყენებელი პენალტი, თუმცა გათამაშების ბოლოს ტოტის ოქროს ბუცის სახით ნამდვილი ტრიუმფი ელოდა. 50 მატჩში 32 გოლი გაიტანა და ევროპის საუკეთესო ბომბარდირი გახდა.

Totti10

“ჯალოროსოს” ტიფოზებისთვის ფრანჩესკო ტოტი ნამდვილ ლიდერად ითვლება. ფეხბურთელსა და მწვრთნელებს შორის მომხდარი ნებისმიერი კონფლიქტის შემთხვევაში ფანებმა მხარი ტოტის დაუჭირეს. ტიფოზებმა მას “რომის იმპერატორი” შეარქვეს. ტოტის არაერთხელ ჰქონია ევროპის ტოპ-კლუბებისგან შემოთავაზებები, თუმცა იგი “რომას” ერთგულად რჩება.

2014 წლის სექტემბერში ფრანჩესკო ტოტიმ ჩემპიონთა ლიგაზე “მანჩესტერ სიტის” გაუტანა და მორიგი უნიკალური რეკორდი დაამყარა. იგი გახდა ჩემპიონთა ლიგის ყველაზე ასაკოვანი მეგოლე, თანაც ეს მის პროფესიულ კარიერაში გატანილი მე-300 გოლი გახლდათ.

Totti12

2015 წლის იანვარი, “რომა” “ლაციოსთან” 0:2 აგებს. მეორე ტაიმში ფრანჩესკო ტოტი ორ გოლს იტანს და ანგარიშს ათანაბრებს, ერთ-ერთ გოლს კი ორიგინალურად აღნიშნავს: ფეხბურთელმა სელფი გადაიღო. გარდა ამისა, ტოტი რომაული დერბის საუკეთესო ბომბარდირიც გახდა (11 გოლი).

ფრანჩესკო ტოტი არამხოლოდ “რომას” ფანებს შორის არის პოპულარული. ჩემპიონთა ლიგის 2015-2016 წლების გათამაშებაში მადრიდის “რეალის” ინჩადა “სანტიაგო ბერნაბეუზე” იტალიელ ფეხბურთელს მქუხარე ოვაციით შეეგება.

Totti14

2016 წლის 8 მაისს ფრანჩესკო ტოტიმ სერია A-ში მე-600 მატჩი ჩაატარა. მას მხოლოდ ხავიერ ძანეტი (615 მატჩი) და პაოლო მალდინი (647 მატჩი) უსწრებენ. ტოტის იტალიის ჩემპიონატში 250 გოლი აქვს გატანილი და მხოლოდ სილვიო პიოლეს ჩამორჩება, რომელმაც თავის დროზე 274 გოლი მიითვალა. ზედიზედ 23 სეზონის განმავლობაში ტოტი ჩემპიონატში მინიმუმ ერთ გოლს მაინც იტანს.

Totti15

ფრანჩესკო ტოტი 40 წლისაა, კვლავ მოედანზეა, კვლავ “რომას” ფორმა აცვია და კვლავ იტანს გოლებს, თან აცხადებს, თუ კარგ ფორმაში ვიქნები, კარიერა რატომ უნდა დავასრულოო?! იქვე დასძენს, ბუცების ლურსმანზე დაკიდვის შემდეგ ფეხბურთიდან წასვლას არ ვაპირებო. “რომა” ტოტის და ტოტი ფეხბურთის გარეშე მართლაც წარმოუდგენელია.

იტალია შინ საფრანგეთთან დამარცხდა (ვიდეო)

Posted on by ბექა დოგრაშვილი

იტალიის ნაკრებმა ქალაქ ბარიში საფრანგეთის ეროვნული გუნდი მიიღო. საერთაშორისო ამხანაგური მატჩი ფრანგების გამარჯვებით, ანგარიშით 3:1 დასრულდა. აღსანიშნავია, რომ “სკუადრა აძურამ” ჯამპიერო ვენტურას თავკაცობით პირველი შეხვედრა ჩაატარა.

ანგარიში მატჩის მე-17 წუთზე ფრანგმა თავდამსხმელმა ანტონი მარსიალმა გახსნა. ოთხ წუთში გრაციანო პელემ წონასწორობა აღადგინა, მაგრამ დიდიე დეშამის გუნდი ოლივიე ჟირუს გოლით მალევე დაწინაურდა მეორედ. მეორე ტაიმში ფრანგთა მცველმა ლეივინ კურზავამ საბოლოო ანგარიში დააფიქსირა — 1:3.

ამხანაგური მატჩი
იტალია — საფრანგეთი 1:3 (1:2)
გოლები: პელე 21′ — მარსიალი 17′, ჟირუ 28′, კურზავა 81′.

იტალია 1:0 შვედეთი — ვინ გახდა მატჩის საუკეთესო ფეხბურთელი?

Posted on by ბექა დოგრაშვილი

ევროპის ჩემპიონატის E ჯგუფში იტალიისა და შვედეთის ნაკრებებს შორის გამართული მატჩი “სკუადრა აძურას” გამარჯვებით, ანგარიშით 1:0 დასრულდა. შეხვედრის საუკეთესო მოთამაშედ იტალიელთა თავდამსხმელი ედერი დასახელდა, რომელმაც გამარჯვების გოლი გაიტანა.

ედერმა მატჩი სრულად ჩაამთავრა, გოლი კი 88-ე წუთზე გაიტანა.

ევრო-2016: იტალიელთა განაცხადი

Posted on by ბექა დოგრაშვილი

იტალიის ნაკრებმა 2016 წლის ევროპის ჩემპიონატზე წასაყვან ფეხბურთელთა განაცხადი გამოაქვეყნა.

მეკარეები: ჯანლუიჯი ბუფონი (“იუვენტუსი”), ფედერიკო მარკეტი (“ლაციო”), სალვატორე სირიგუ (“პარი სენ-ჟერმენი”);

მცველები: მატია დე შილიო (“მილანი”), ჯორჯო კიელინი, ანდრეა ბარძალი, ლეონარდო ბონუჩი (ყველა – “იუვენტუსი”), მატეო დარმიანი (“მანჩესტერ იუნაიტედი”, ინგლისი), ანჯელო ოგბონა (“ვესტ ჰემი”, ინგლისი);

ნახევარმცველები: ანტონიო კანდრევა, მარკო პაროლო (ორივე – “ლაციო”), ალესანდრო ფლორენცი, დანიელე დე როსი, სტეფან ელ შაარავი (ყველა – “რომა”), ტიაგო მოტა (“პარი სენ-ჟერმენი”), ფედერიკო ბერნარდესკი (“ფიორენტინა”), ემანუელე ჯაკერინი (“ბოლონია”);

თავდამსხმელები: სიმონე ძაძა (“იუვენტუსი”), ჩირო იმობილე (“ტორინო”), ედერი (“ინტერი”), ლორენცო ინსინიე (“ნაპოლი”), გრაციანო პელე (“საუთჰემპტონი”, ინგლისი).

შეგახსენებთ, რომ იტალიელები ევროპის ჩემპიონატის ჯგუფურ ეტაპზე ბელგიელების, ირლანდიელებისა და შვედების წინააღმდეგ ითამაშებენ.

კონტემ დამდეგი ამხანაგური მატჩებისთვის “სკუადრა აძურას” განაცხადი დაასახელა

Posted on by ბექა დოგრაშვილი

ანტონიო კონტეს თავკაცობით იტალიის ნაკრების სამწვრთნელო შტაბმა უახლოესი ამხანაგური მატჩებისთვის “სკუადრა აძურას” განაცხადი დაასახელა. 24 მარტს იტალიელები ესპანელებს გაეჯიბრებიან, 29 მარტს კი გერმანელებთან ითამაშებენ.
მეკარეები: ბუფონი, პერინი, სირიგუ;

მცველები: აჩერბი, ანტონელი, ასტორი, ბარძალი, ბონუჩი, დარმიანი, დე სილვესტრი, რანოკია;

ნახევარმცველები: ფლორენცი, ჯაკერინი, ჟორჟინიო, მონტოლივო, ტიაგო მოტა, პაროლო, სორიანო, ვერატი;

თავდამსხმელები: ბერნარდესკი, ბონავენტურა, კანდრევა, ედერი, ელ შაარავი, იმობილე, ინსინიე, პელე, ძაძა.