ჯერარდი: “ტორესმა გული მატკინა”

“ლივერპულის” ყოფილმა კაპიტანმა სტივენ ჯერარდმა, რომელიც დღესდღეობით გლაზგოს “რეინჯერსს” წვრთნის, ის დრო გაიხსენა, როდესაც მერსისაიდულ გუნდში ფერნანდო ტორესთან ერთად თამაშობდა.

“ტორესთან ერთად საკმარისად დიდხანს არ მითამაშია, რადგან ის “ჩელსიში” გადავიდა და გული მატკინა. ლუის სუარესი ნამდვილი ცხოველი იყო, მაგრამ მე ჩემი კარიერის საუკეთესო წლები სწორედ ტორესთან ერთად გავატარე.

მაშინ ბევრს ვშრომობდით, რათა კონკურენტებთან ჩამორჩენა შეგვემცირებინა და ბრძოლაში ვყოფილიყავით. ვგრძნობდით, რომ პროგრესი გვქონდა, მაგრამ გადამწყვეტ მომენტში დიდი ფეხბურთელი წაგვართვეს. ამ დანაკლისის ამოსავსებად დიდი დრო იყო საჭირო.

ტორესთან ერთად თამაშის პერიოდში ბევრი გოლი გამქონდა, კარიერის პიკზე ვიდექი, თავს საოცრად ვგრძნობდი. მესმის, რომ ყველას განსხვავებული სიტუაცია აქვს. ადამიანებს თავიანთი ოცნებები და სურვილები აქვთ, გუნდში ყველა ადგილობრივი ვერ იქნება და ყველას ასე ვერ ეყვარება კლუბი. მე ეს მესმის და მათ არჩევანს პატივს ვცემ, მაგრამ თანაგუნდელის წასვლა მაინც გულდასაწყვეტია”, – ციტირებს ჯერარდის სიტყვებს Liverpool Echo.

შეგახსენებთ, რომ ტორესი და ჯერარდი “ენფილდზე” თანაგუნდელები 2007-დან 2011 წლამდე იყვნენ.

სალაჰი კოვიდინფიცირებულია

“ლივერპულის” ფორვარდ მოჰამედ სალაჰს კორონავირუსი დაუდასტურდა.

გასულ უქმეებზე ეგვიპტელმა ფეხბურთელმა “მანჩესტერ სიტის” წინააღმდეგ გამართულ მატჩში (1:1) გოლი გაიტანა, რის შემდეგაც ეროვნული ნაკრების ბანაკს მიაშურა. სალაჰი, სავარაუდოდ, სამშობლოში დაინფიცირდა. ის ფეხბურელთა და გუნდის პერსონალთა შორის ერთადერთია, ვისაც კორონავირუსი დაუდასტურდა.

28 წლის ფეხბურთელი თვითიზოლაციაში იმყოფება. დაავადება უსიმპტომოდ მიმდინარეობს.

უკვე ცნობილია, რომ მოჰამედ სალაჰს აფრიკის ერთა თასის შესარჩევ ეტაპზე ტოგოს ნაკრების წინააღმდეგ გასამართი ორივე მატჩის გამოტოვება მოუწევს. არაა გამორიცხული, ეგვიპტელმა ფეხბურთელმა ინგლისის პრემიერლიგაში “ლესტერ სიტისთან” და ჩემპიონთა ლიგაზე ბერგამოს “ატალანტასთან” 21 ნოემბერს ჩანიშნული შეხვედრებიც გამოტოვოს.

კლოპი: “პაუზის შემდეგ პირველი ვარჯიში სკოლის პირველ დღეს ჰგავდა”

“ლივერპულის” მთავარმა მწვრთნელმა იურგენ კლოპმა განახლებული საწვრთნელი პროცესისგან შექმნილი შთაბეჭდილების შესახებ ისაუბრა.

“დილა ძალიან კარგად დაიწყო. ჩვეულებრივზე ადრე გავიღვიძე. შემდეგ კი მივხვდი, რომ ეს ჩემი პირველი სამუშაო დღე იყო. სკოლის პირველ დღეს ჰგავდა, რომელიც 46 წლის წინ მქონდა, მაგრამ იმ დღეს მართლა ძალიან ჰგავდა. ჩავიცვი ფორმა და ბაზისკენ გავეშურე.

მივედი მელვუდში (“ლივერპულის” საწვრთნელი ბაზა), ბიჭების დანახვა ძალიან გამიხარდა. მართალია, ჯერ ყველა არ მინახავს, იქ მხოლოდ ათიოდე ფეხბურთელი და მწვრთნელები ვნახე, მაგრამ ვიტყოდი, რომ კარგი დასაწყისი გვაქვს. ისინი კარგ განწყობაზე იყვნენ. ძალზედ სასიამოვნო იყო ბაზაზე დაბრუნება”, – ციტირებს კლოპის სიტყვებს “ლივერპულის” ოფიციალური ვებგვერდი.

“ლივერპულისა” და “რეალის” ლეგენდები ამხანაგურ მატჩს ჩაატარებენ

“ლივერპულისა” და მადრიდის “რეალის” ყოფილი ფეხბურთელები მომავალი წლის გაზაფხულზე საქველმოქმედო მატჩს ჩაატარებენ.

მერსისაიდული გუნდის მხრიდან შეხვედრაში მონაწილე ყველა მოთამაშის ვინაობა ცნობილია: იან რაში, ჯონ არნე რიისე, გარი მაკალისტერი, მაიკლ ოეუნი, იერჟი დუდეკი, ჯეიმი კარაგერი, ლუის გარსია, პატრიკ ბერგერი, სალიფ დიაო, ჯეისონ მაკეტირი, ვლადიმირ შმიცერი, დევიდ ტომპსონი, სანდერ ვესტერველდი, დიტმარ ჰამანი, ჯონ ოლდრიჯი, ფილ ბები, სტეფან ანშო, დანიელ აგერი, რობი ფაულერი.

“რეალის” მხრიდან მატჩში მონაწილე ფეხბურთელთა მხოლოდ მცირე ნაწილის ვინაობაა ცნობილი: რობერტო კარლოსი, ლუიშ ფიგუ, ემილიო ბუტრაგენიო და სტივენ მაკმანამანი.

შეხვედრა 2017 წლის 25 მარტს, “ენფილდზე” ჩატარდება.

კარაგერი: “სიამოვნებით ჩავიბარებ “ევერტონს”, რათა ჩემპიონშიფში დავაქვეითო”

გუშინ “ევერტონის” ხელმძღვანელობამ გუნდის მთავარი მწვრთნელის პოსტიდან რობერტო მარტინესი გაათავისუფლა. ბუქმეიქერებმა უკვე დაიწყეს ფსონების მიღება, თუ ვინ ჩაიბარებს “კანფეტებს”. მოულოდნელად საკმაოდ მაღალი შანსი მიაკუთვნეს “ლივერპულის” ყოფილ მცველ ჯეიმი კარაგერს (66/1). ინგლისელი “ევერტონის” შესაძლო ჩაბარებას იუმორნარევი კომენტარით გამოეხმაურა.

“სიამოვნებით გამოვიყენებ ამ შესაძლებლობას, რათა ჩემპიონშიფში დაგაქვეითოთ”, – დაწერა სოციალურ ქსელში კარაგერმა.

“ლივერპული” — “დორტმუნდი” (სასტარტო შემადგენლობები)

დღეს უეფას ევროპის ლიგის მეოთხედფინალური ეტაპის საპასუხო მატჩები გაიმართება. “ენფილდზე” იურგენ კლოპის “ლივერპული” დორტმუნდის “ბორუსიას” მასპინძლობს. შეგახსენებთ, რომ წყვილის პირველი შეხვედრა ფრედ, ანგარიშით 1:1 დასრულდა.

უკვე ცნობილია გუნდების სასტარტო შემადგენლობები:

“ლივერპული”: მინიოლე, კლაინი, ლოვრენი, სახო, მორენო, ემრე ჯანი, მილნერი, ლალანა, ფირმინო, კოუტინიო, ორიგი.

“დორტმუნდი”: ვაიდენფელერი, პიშჩეკი, პაპასტატოპულოსი, ჰუმელსი, შმელცერი, ვაიგლი, კასტრო, მხითარიანი, კაგავა, როისი, ობამეიანგი.

მატჩს ჯიუნეთ ჩაქირის ხელმძღვანელობით თურქ მსაჯთა ბრიგადა მოემსახურება. შეხვედრა თბილისის დროით 23 საათსა და 5 წუთზე დაიწყება.

 

სუარესი: “თუ ინგლისში დავბრუნდები, მხოლოდ “ლივერპულში” ვითამაშებ”

“ბარსელონას” თავდამსხმელმა ლუის სუარესმა აღნიშნა, რომ “ენფილდის” ატმოსფერო ენატრება, სადაც იგი “ლივერპულის” ღირსებას იცავდა.

“არასდროს იცი, რა მოხდება მომავალში. თუ ერთ დღესაც ინგლისში დავბრუნდები, მხოლოდ “ლივერპულში” ვითამაშებ.
ფანები მენატრება. “ენფილდ როუდზე” უბრალოდ წარმოუდგენელი ატმოსფერო სუფევს ხოლმე.
ყველამ, ვისაც “ლივერპულში” უთამაშია, იცის, რამდენად მნიშვნელოვანია გულშემატკივრის ფაქტორი. “ლივერპულის” ფანები ჩემს გულში დარჩებიან”, – ციტირებს სუარესის სიტყვებს “სანი”.

ლუის სუარესმა “ლივერპულის” რიგებში 107 მატჩი ჩაატარა და 69 გოლი გაიტანა.

 

ჰენდერსონი კარიერის ბოლომდე შესაძლოა, ფეხის ტკივილმა დატანჯოს

“ლივერპულის” ნახევარმცველი ჯორდან ჰენდერსონი კარიერის ბოლომდე შესაძლოა, ფეხის ტკივილმა დატანჯოს.

Sportskeeda-ს ცნობით, ინგლისელ ფეხბურთელს მძიმე დაავადება დაუდგინეს, რომლის განკურნებაც შეუძლებელია, ამიტომ ჰენდერსონს მოედანზე გასვლა ტკივილგამაყუჩებლებით მოუწევს ხოლმე.

თავად მერსისაიდული გუნდის ნახევარმცველი ამბობს, რომ ტკივილი გარკვეული დროის შემდეგ გაივლის.

“მთელი დარჩენილი კარიერის განმავლობაში ტკივილი არ შემაწუხებს, უბრალოდ ამას ყურადღება უნდა მივაქციო”, – აღნიშნა “ლივერპულის” ნახევარმცველმა.

სხვათა შორის, ჰენდერსონის ტრავმა “მანჩესტერ იუნაიტედის” ყოფილმა მთავარმა მწვრთნელმა სერ ალექს ფერგიუსონმა ჯერ კიდევ წლების წინათ იწინასწარმეტყველა.

ფერგიუსონი თავის ავტობიოგრაფიულ წიგნში წერს, რომ “სანდერლენდის” მაშინდელმა მთავარმა მწვრთნელმა სტივ ბრიუსმა მასთან ჰენდერსონს რეკომენდაცია გაუწია, მაგრამ “წითელი ეშმაკების” ყოფილმა დამრიგებელმა შემოთავაზებული წინადადება უარით გაისტუმრა. ფერგიუსონმა თავისი გადაწყვეტილება ასე ახსნა, ჰენდერსონს ისეთ მიხრა-მოხრა აქვს, რომ შეიძლება მომავალში ტრავმული პრობლემები ჰქონდესო.

 

მინიოლემ “ბორდოსთან” მატჩში დაშვებულ შეცდომაზე კომენტარი გააკეთა

უეფას ევროპის ლიგის B ჯგუფში “ლივერპულსა” და “ბორდოს” შორის გამართულ მატჩში (2:1) მერსისაიდელთა კიპერ სიმონ მინიოლეს მიერ დაშვებული შეცდომის შესახებ კომენტარი თავად ბელგიელმა მეკარემ გააკეთა. შეგახსენებთ, რომ მინიოლემ აღნიშნული შეხვედრის მიმდინარეობისას ექვსი წამის წესი დაარღვია, რის გამოც დანიშნული თავისუფალი დარტყმით “ბორდომ” გოლი გაიტანა.

“რას ვიზამთ?! სამწუხაროდ, დიდი ხანი მოვიცადე. საბედნიეროდ, ყველაფერი გამოვასწორეთ და პლეი-ოფში გავედით. იმედი მაქვს, ტიტულსაც მოვიგებთ”, – ციტირებს მინიოლეს სიტყვებს BBC.

 

მინიოლემ გოლი 6 წამის წესის დარღვევისთვის დანიშნული თავისუფალი დარტყმით გაუშვა

უეფას ევროპის ლიგის B ჯგუფში “ლივერპულსა” და “ბორდოს” შორის გამართულ მატჩში საინტერესო რამ მოხდა. მერსისაიდული გუნდის კიპერმა სიმონ მინიოლემ 6 წამის წესი დაარღვია, რომელიც გულისხმობს იმას, რომ მეკარეს 6 წამის განმავლობაში აქვს ბურთის ხელში ჭერის უფლება. ბელგიელი კიპერი არათუ 6, არამედ 21 წამის განმავლობაში ვერ შეელია ბურთს, რისთვისაც “ბორდოს” სასარგებლოდ “ლივერპულის” საჯარიმო მოედანზე თავისუფალი დარტყმა დაინიშნა. სწორედ ამ ეპიზოდს მოყვა ფრანგთა გოლიც.

კლოპი: “ჩვენთვის ევროპის ლიგა მნიშვნელოვანი ტურნირია”

“ლივერპულის” მთავარმა მწვრთნელმა იურგენ კლოპმა განცხადა, რომ მისი გუნდისთვის ევროპის ლიგა მნიშვნელოვანი ტურნირია.

“ლივერპულში” უკვე ოთხი კვირაა, ვმუშაობ, თუმცა ეს დრო საკმარისია იმისთვის, რომ გუნდი ჩემად მოვიხსენიო.

ევროპის ლიგა ჩვენთვის მეტად მნიშვნელოვანი ტურნირია. აზრადაც არ მოგვსვლია ევროპის ლიგის უბრძოლველად დათმობა. გვინდა, რომ რაც შეიძლება შორეულ ეტაპამდე გავაღწიოთ”, – განაცხადა კლოპმა.

 

საბა კვირკველიამ “ლივერპულთან” მატჩში კინაღამ ავტოგოლი გაიტანა

უეფას ევროპის ლიგის ჯგუფურ ეტაპზე ყაზანის “რუბინსა” და “ლივერპულს” შორის გამართულ მატჩში (0:1) მასპინძელთა ქართველი ლეგიონერი საბა კვირკველია მოწოდების სიმაღლეზე იყო, მაგრამ პირველი ტაიმის ბოლოს ავტოგოლს გადაურჩა. ახალგაზრდა მცველმა თავით ბურთი საკუთარ კარში გადაგზავნა, თუმცა მეკარე სერგეი რიჟიკოვმა შესანიშნავი რეაქცია გამოავლინა და კვირკველია ავტოგოლისგან იხსნა.