კლოპი: “პაუზის შემდეგ პირველი ვარჯიში სკოლის პირველ დღეს ჰგავდა”

“ლივერპულის” მთავარმა მწვრთნელმა იურგენ კლოპმა განახლებული საწვრთნელი პროცესისგან შექმნილი შთაბეჭდილების შესახებ ისაუბრა.

“დილა ძალიან კარგად დაიწყო. ჩვეულებრივზე ადრე გავიღვიძე. შემდეგ კი მივხვდი, რომ ეს ჩემი პირველი სამუშაო დღე იყო. სკოლის პირველ დღეს ჰგავდა, რომელიც 46 წლის წინ მქონდა, მაგრამ იმ დღეს მართლა ძალიან ჰგავდა. ჩავიცვი ფორმა და ბაზისკენ გავეშურე.

მივედი მელვუდში (“ლივერპულის” საწვრთნელი ბაზა), ბიჭების დანახვა ძალიან გამიხარდა. მართალია, ჯერ ყველა არ მინახავს, იქ მხოლოდ ათიოდე ფეხბურთელი და მწვრთნელები ვნახე, მაგრამ ვიტყოდი, რომ კარგი დასაწყისი გვაქვს. ისინი კარგ განწყობაზე იყვნენ. ძალზედ სასიამოვნო იყო ბაზაზე დაბრუნება”, – ციტირებს კლოპის სიტყვებს “ლივერპულის” ოფიციალური ვებგვერდი.

იურგენ კლოპი: “ყველაზე კარგად გერმანულ ფეხბურთს ვიცნობ, მაგრამ ეს დიდ უპირატესობას არ იძლევა”

“ლივერპულის” მთავარმა მწვრთნელმა იურგენ კლოპმა ჩემპიონთა ლიგის მერვედფინალური ეტაპის წილისყრის შესახებ კომენტარი გააკეთა. შეგახსენებთ, რომ მერსისაიდელებს მეტოქედ მიუნხენის “ბაიერნი” ერგოთ.

“ყველამ ვიცით, რომ “ბაიერნს” დიდებული სტადიონი აქვს და არენაზე საოცარი ატმოსფერო იქნება. ჩვენს ქომაგებს ნამდვილად კარგი მოგზაურობა ელით, მიუნხენი მშვენიერი ქალაქია. ფრენას დიდი დრო არ სჭირდება. ყველაზე კარგად სწორედ გერმანულ ფეხბურთს ვიცნობ, თუმცა ეს დიდ უპირატესობას არ იძლევა. საბოლოო ჯამში, ყველაფერს მაინც მოედანზე გასული ბიჭები წყვეტენ. დიდი დრო გავიდა მას შემდეგ, რაც “ბაიერნთან” დაპირისპირება მიწევდა. ასე რომ, მათთან შეხვედრას მოუთმენლად ველი”, – კლოპის კომენტარი უეფას ოფიციალურ ვებგვერდზე გამოქვეყნდა.

წყვილის პირველი შეხვედრა “ენფილდზე”, 19 თებერვალს ჩატარდება, განმეორებით მატჩს კი “ალიანც არენა” 13 მარტს მიიღებს.

“ლივერპულს” 126-წლიანი არსებობის ისტორიაში საუკეთესო სტარტი აქვს

“ლივერპულს” 126-წლიანი არსებობის ისტორიაში საუკეთესო სტარტი აქვს. “წითლებს” ინგლისის პრემიერლიგის საწყისი 15 ტურის შემდეგ არ წაუგიათ, მერსისაიდულმა გუნდმა 12-ჯერ იმარჯვა, სამჯერ კი შეხვედრა ფრედ დაასრულა, რაც “ენფილდროუდელთა” ისტორიაში საუკეთესო შედეგია.

მიუხედავად ამისა, “ლივერპულს” სატურნირო ცხრილში მეორე ადგილი უკავია და ლიდერ “მანჩესტერ სიტის” ორი ქულით ჩამორჩება.

შეგახსენებთ, რომ “ლივერპულს” ინგლისის ჩემპიონატი 1989–1990 წლების სეზონის შემდეგ არ მოუგია.

იურგენ კლოპი მსაჯის გადაწყვეტილებამ განარისხა (ვიდეო)

ინგლისის პრემიერლიგის 36-ე ტურში “ლივერპულმა” საკუთარ მოედანზე “საუთჰემპტონი” მიიღო. შეხვედრა უგოლოდ მიილია.

მატჩის ერთ-ერთ ეპიზოდში მერსისაიდული გუნდის მთავარი მწვრთნელი იურგენ კლოპი მსაჯის გადაწყვეტილებამ განარისხა. გერმანელმა სპეციალისტმა ბრაზი ასე გამოხატა.

კლოპი: “ლივერპულისთვის” იდეალური მწვრთნელი ვარ”

“ლივერპულის” მთავარი მწვრთნელი იურგენ კლოპი მოურიდებლად ამბობს, რომ მერსისაიდული გუნდისთვის იგი იდეალური თავკაცია.

“რომ ვფიქრობდე, რომ ჩემს საქმეს სხვა ჩემზე უკეთ გააკეთებდა, მაშინ აქ აღარ ვიქნებოდი. დასახულ მიზნებს უნდა მივაღწიოთ. რა დრო დასჭირდება მიზნების მიღწევას? წარმოდგენა არ მაქვს.

ვგრძნობ, რომ ფანები გუნდისთვის შესაფერის მწვრთნელად მთვლიან, ისინი ჩვენ გვენდობიან და ეს უნდა გამოვიყენოთ, მაგრამ ჩვენ გარშემო ბევრი დიდებული გუნდია. საქმე მხოლოდ ჩვენს მონდომებაში არ არის, მხოლოდ ამით ტიტულებს ვერ მოიგებ. მიზნების მისაღწევად უბრალოდ საუკეთესო უნდა იყო. სწორედ ამაზე ვმუშაობთ”, – ციტირებს კლოპის სიტყვებს “სქაი სპორტსი”.

ინგლისის პრემიერლიგის 28-ე ტურის თავზე “ლივერპულს” გათამაშების სატურნირო ცხრილში მეოთხე პოზიცია უკავია. კვირას მერსისაიდული გუნდი “მანჩესტერ სიტის” ესტუმრება.

კლოპი: “ეს ამ სეზონში “ლივერპულის” ერთ-ერთი საუკეთესო მატჩი იყო”

ინგლისის პრემიერლიგის 27-ე ტურის ცენტრალური მატჩი “ენფილდზე” გაიმართა, სადაც “ლივერპულმა” ლონდონის “არსენალი” მიიღო და მეტოქე ანგარიშით 3:1 დაამარცხა. შეხვედრა მერსისაიდული გუნდის მთავარმა მწვრთნელმა იურგენ კლოპმა შეაჯამა.

“არსენალის” მოცემული შემადგენლობისა და სიძლიერის გათვალისწინებით, ჩვენ ამ სეზონში ერთ-ერთი საუკეთესო მატჩი ჩავატარეთ. ბიჭები შესანიშნავად მოქმედებდნენ. “ლესტერ სიტისთან” განცდილი მარცხის შემდეგ გუნდში სერიოზული საუბარი გვქონდა. ის შეხვედრა კარგად გავაანალიზეთ.

ახლა პრემიერლიგაში ატრაქციონ “ამერიკული მთების” მაგვარი სიტუაციაა – ხან ზემოთ ხარ, ხანაც – ქვემოთ. ვიცით, როგორ უნდა ვიმოქმედოთ მომავალში”, – ციტირებს კლოპის სიტყვებს “ბიბისი”.

იურგენ კლოპი: “ბრექსიტი, ტრამპი, რანიერი… უცნაურობები ხდება”

“ლესტერ სიტის” მთავარი მწვრთნელის პოსტიდან კლაუდიო რანიერის გათავისუფლებას “ლივერპულის” თავკაცი იურგენ კლოპი გამოეხმაურა. გერმანელმა სპეციალისტმა ეს გადაწყვეტილება ევროკავშირის შემადგენლობიდან დიდი ბრიტანეთის გასვლასა და ამერიკის შეერთებული შტატების პრეზიდენტის პოსტზე დონალდ ტრამპის არჩევას შეადარა.

“ამ გადაწყვეტილებამ გამაკვირვა. ბოლო პერიოდში რამდენიმე უცნაური გადაწყვეტილების მომსწრენი გავხდით: ბრექსიტი, ტრამპი, რანიერი”, – აღნიშნა იურგენ კლოპმა.

შეგახსენებთ, რომ ინგლისის პრემიერლიგის მოგებიდან ცხრა თვის თავზე “ლესტერ სიტის” ხელმძღვანელობამ კლაუდიო რანიერი გუნდის მთავარი მწვრთნელის პოსტიდან გაათავისუფლა.

კლოპი: “ასეთი მარცხის შემდეგ ჭკვიანური რამის თქმა რთულია”

ინგლისის პრემიერლიგის 24-ე ტურში “ლივერპული” გასვლაზე “ჰალ სიტისთან” ანგარიშით 0:2 დამარცხდა. მერსისაიდული გუნდი ჩემპიონატში მიჯრით მეხუთე მატჩია, გამარჯვების მოპოვებას ვერ ახერხებს. “წითლების” მთავარი მწვრთნელი იურგენ კლოპი შექმნილი მდგომარეობით უკმაყოფილოა.

“თავის მართლება არ მინდა. ასეთი მარცხის შემდეგ რაღაც ჭკვიანურის თქმა რთულია. ჩემპიონთა ლიგის ზონაში მოხვედრაზე საუბარი ჯერ ადრეა. კარგად უნდა ვითამაშოთ და მხოლოდ ამის შემდეგ შეაფასებს ხალხი ჩვენს შანსს.

ვიცით, რომ “ლივერპულს” ბევრად უკეთ შეუძლია თამაში და ასეც უნდა ვიმოქმედოთ მოედანზე. დღევანდელივით აღარასდროს უნდა ვითამაშოთ”, – ციტირებს კლოპის სიტყვებს “ბიბისი”.

მოურინიო და კლოპი მატჩის მიმდინარეობისას ერთმანეთთან წაკინკლავდნენ (ვიდეო)

ინგლისის პრემიერლიგის 21-ე ტურში “მანჩესტერ იუნაიტედსა” და “ლივერპულს” შორის გამართული მატჩის (1:1) მეორე ტაიმის მიწურულს გუნდების მთავარი მწვრთნელები – ჟოზე მოურინიო და იურგენ კლოპი ერთმანეთთან წაკინკლავდნენ. უთანხმოების მიზეზი მოედნის ცენტრში ანდერ ერერასა და რობერტო ფირმინოს შეჯახება გახდა. კინკლაობის მიუხედავად, მატჩის ბოლოს მოურინიომ და კლოპმა ერთმანეთს ხელი ჩამოართვეს.

კლოპი: “მხითარიანი მსოფლიო დონის ფეხბურთელია”

ინგლისის პრემიერლიგის 21-ე ტურის ცენტრალური მატჩი “ოლდ ტრაფორდზე” გაიმართება, სადაც “მანჩესტერ იუნაიტედი” “ლივერპულს” მიიღებს. ამ პრინციპული მატჩის წინ მერსისაიდული გუნდის მთავარმა მწვრთნელმა იურგენ კლოპმა მეტოქეთა ბანაკიდან ჰენრიხ მხითარიანი გამოარჩია, რომელსაც დორტმუნდის “ბორუსიაში” თავკაცობდა.

“მხითარიანი ტექნიკურიც არის და სწრაფიც, რაც იშვიათი მოვლენა გახლავთ. ჰენრიხი შესანიშნავად ასრულებს შეტევებს და ერთგულად ეკიდება საკუთარ სამუშაოს. იგი მსოფლიო დონის მოთამაშეა. “მანჩესტერ იუნაიტედი” მხითარიანთან ერთად სულ სხვა გუნდია”, – ციტირებს კლოპის სიტყვებს ESPN.

მატჩი “მანჩესტერ იუნაიტედსა” და “ლივერპულს” შორის კვირას, თბილისის დროით 20:00 საათზე დაიწყება.

კლოპი: “მანჩესტერს” “ენფილდზე” ვეთამაშებით და ეს უნდა გამოვიყენოთ”

ინგლისის პრემიერლიგის მე-8 ტურის ცენტრალური მატჩი “ენფილდზე” ჩატარდება, სადაც “ლივერპული” “მანჩესტერ იუნაიტედს” მიიღებს. დამდეგი შეხვედრის შესახებ კომენტარი გააკეთა მერსისაიდული გუნდის მთავარმა მწვრთნელმა იურგენ კლოპმა.

“აღნიშნული შეხვედრის ისტორია ჩემთვის ცნობილია. მახარებს ის აჟიოტაჟი, რაც ამ მატჩის ირგვლივ არის შექმნილი. ასეთ შეხვედრაში ყველაფერი შესაძლებელია, მოხდეს. დარწმუნებული ვარ, რომ ამ მატჩს მთელი მსოფლიო მიადევნებს თვალყურს.

შეხვედრა “ენფილდზე” ჩატარდება და ეს უპირატესობა უნდა გამოვიყენოთ. ჩვენთვის დიდი პატივია ასეთ ისტორიულ შეხვედრაში მონაწილეობა”, – კლოპის კომენტარი მერსისაიდული კლუბის ოფიციალურ ვებგვერდზე გამოქვეყნდა.

“ლივერპულსა” და “მანჩესტერ იუნაიტედს” შორის მატჩი 17 ოქტომბერს ჩატარდება და თბილისის დროით 23:00 საათზე დაიწყება.

კლოპი: “ფეხბურთი მარტივი თამაშია, მაგრამ გამარჯვებაა რთული”

“ლივერპულის” მთავარმა მწვრთნელმა იურგენ კლოპმა ინგლისის პრემიერლიგაში საკუთარი გუნდის სტარტი შეაფასა. შეგახსენებთ, რომ “წითლებმა” გასვლაზე “ჩელსი” (2:1) და “არსენალი” (4:3) დაამარცხეს, შინ კი “ლესტერ სიტის” მოუგეს (4:1). გარდა ამისა, სტუმრად ფრედ ითამაშეს “ტოტენჰემთან” (1:1) და დამარცხდნენ “ბარნლისთან” (0:2).

“ჯერ მნიშვნელოვანი არაფერი მომხდარა. პრემიერლიგაში ხუთი მატჩი ჩავატარეთ, ორი სათასო შეხვედრაც ვითამაშეთ. სტაბილურობას უნდა მივაღწიოთ და ნებისმიერი სიტუაციიდან გამოსავალი უნდა ვიპოვოთ.

ასე არ ვფიქრობთ: “დიახ, ჩვენ ეს შევძელით”. ფეხბურთი საკმაოდ მარტივი თამაშია, მაგრამ გამარჯვების მოპოვებაა რთული. ყოველთვის უნდა ვიფიქროთ მომავალ მატჩზე და წარსულში მოპოვებული წარმატებით არ უნდა დავკმაყოფილდეთ”, – კლოპის კომენტარი “სქაი სპორტსმა” გამოაქვეყნა.