ჭდე: Tottenham Hotspur

კონტემ “ტოტენჰემში” გასტრონომიული რეგულაციები შემოიღო

Posted on by ბექა დოგრაშვილი

“ტოტენჰემ ჰოთსპურის” ახალმა მთავარმა მწვრთნელმა ანტონიო კონტემ გუნდში ახალი გასტრონომიული რეგულაციები შემოიღო. როგორც ირკვევა, ერთ-ერთი ვარჯიშის შემდეგ იტალიელმა სპეციალისტმა რამდენიმე ფეხბურთელს უთხრა, რომ მათ ზედმეტი წონა აქვთ.

კონტემ “ტოტენჰემში” სავალდებულო გუნდური ლანჩი შემოიღო, მენიუდან მძიმე საკვები, სენდივიჩი, კეტჩუპი და მაიონეზი ამოიღო, ფეხბურთელებს კი მეტი ხილის მიღება დაავალა.

“ტოტენჰემის” მოთამაშეები ნაკლები ხილის წვენი მიეცემათ, კერძების მომზადებისას კი მზესუმზირის ზეთისა და კარაქის რაოდენობა შემცირდება.

შეგახსენებთ, რომ ანტონიო კონტემ “ტოტენჰემ ჰოთსპური” 2 ნოემბერს ჩაიბარა. მხარეებს შორის გაფორმებულ შრომით ხელშეკრულებას ვადა 2023 წლის ზაფხულამდე აქვს. კონტრაქტი კიდევ ერთი სეზონით გახანგრძლივების შესაძლებლობას იძლევა.

ლონდონურმა გუნდმა კონტეს ხელმძღვანელობით ორი მატჩი ჩაატარა: კონფერენციის ლიგაზე “ტოტენჰემმა” არნემის “ვიტესი” ანგარიშით 3:2 დაამარცხა, პრემიერლიგაში კი “ევერტონთან” უგოლო ფრე ითამაშა.

ხვიჩა კვარაცხელიას დამატება “ტოტენჰემსაც” სურს

Posted on by ბექა დოგრაშვილი

“სკაი იტალია” იუწყება, რომ საქართველოს ეროვნული ნაკრებისა და ყაზანის “რუბინის” ნახევარმცველ ხვიჩა კვარაცხელიათი ლონდონის “ტოტენჰემ ჰოთსპური” დაინტერესდა.

მანამდე გავრცელებული ინფორმაციით, 20 წლის ქართველი ფეხბურთელის დამატება იტალიურ “მილანსაც” სურს, თუმცა “როსონერის” ტრანსფერისთვის მოთხოვნილი ფინანსური რესურსის მობილიზება უჭირს, რის გამოც “რუბინს” ოფიციალურად ჯერჯერობით არ მიმართავს. ფინანსების მხრივ ინგლისურ კლუბში გაცილებით კარგი სიტუაციაა.

შეგახსენებთ, რომ ხვიჩა კვარაცხელია “რუბინში” 2019 წლის ზაფხულში გადავიდა. მან რუსეთის პრემიერლიგის გასულ გათამაშებაში 23 მატჩი ჩაატარა, ოთხი გოლი გაიტანა და ამდენივე შედეგიანი გადაცემა მიითვალა. მან სეზონის მიმდინარეობისას 78 წარმატებული დრიბლინგი მოაწყო, რითაც ჩემპიონატის საუკეთესო დრიბლიორი გახდა. კვარაცხელიამ საქართველოს ეროვნულ ნაკრებში ჩატარებულ რვა შეხვედრაში სამი ბურთი გაიტანა.

სპეციალიზებული ინტერნეტპორტალი Transfermarkt-ი ხვიჩა კვარაცხელიას სატრანსფერო ღირებულებას 18 მილიონ ევროდ აფასებს.

ჰარი კეინს “ტოტენჰემის” დატოვება სურს

Posted on by ბექა დოგრაშვილი

ინგლისში ხმა დაირხა, რომ “ტოტენჰემ ჰოთსპურის” თავდამსხმელ ჰარი კეინს გუნდის გამოცვლა სურს. ამის მიზეზად ის სახელდება, რომ 27 წლის ფეხბურთელს ტიტულის მოგება უნდა და დარწმუნებული არ არის, რომ ამას “დეზების” შემადგენლობაში მოახერხებს.

თავის მხრივ, “ტოტენჰემი” კეინის მსურველ კლუბებს საკმაოდ მაღალ მოთხოვნებს უყენებს. ლონდონური კლუბის პრეზიდენტი დენიელ ლევი ინგლისელი ფორვარდის სანაცვლოდ მინიმუმ 120 მილიონ ფუნსტ სტერლინგს მოითხოვს. გარდა ამისა, “ტოტენჰემს” ფეხბურთელის პრემიერლიგის მასშტაბით კონკურენტ გუნდში გაყიდვა არ სურს.

ჰარი კეინმა ინგლისის ჩემპიონატის მიმდინარე გათამაშებაში ჩატარებულ 27 შეხვედრაში 17 გოლი გაიტანა და 13 შედეგიანი გადაცემა მიითვალა.

“ტოტენჰემის” ფეხბურთელებმა შესვენებაზე იჩხუბეს

Posted on by ბექა დოგრაშვილი

ინგლისის პრემიერლიგის მე-20 ტურში “ტოტენჰემ ჰოთსპურსა” და “ლივერპულს” შორის გამართული მატჩის (1:3) შესვენებისას “დეზების” ფეხბურთელებს შორის კონფლიქტი მოხდა.

მერსისაიდელებმა ანგარიში პირველი ტაიმის კომპენსირებულ დროში გახსნეს. გასახდელში შესულმა ლონდონელებმა ერთმანეთს საქმის გარჩევა დაუწყეს, ყველაზე მეტად კი სერჟ ორიე აქტიურობდა, რომელიც ჟოზე მოურინიომ მეორე ნახევრის სტარტზევე შეცვალა. კოტ დივუარელი ფეხბურთელი შეცვლამ იმდენად გააღიზიანა, რომ მატჩის დასრულებას აღარ დაელოდა, შხაპი მიიღო და სტადიონი დატოვა.

“ტოტენჰემს” სატურნირო ცხრილში მეექვსე ადგილი უკავია.

პრემიერლიგამ “ტოტენჰემს” მეტოქე შეუცვალა, “ჩელსის” მატჩი გადადო

Posted on by ბექა დოგრაშვილი

ინგლისის პრემიერლიგის ადმინისტრაციამ “ტოტენჰემ ჰოთსპურის” უახლოეს განრიგში გარკვეული ცვლილებები განახორციელა, რაც კორონავირუსული პანდემიით არის გამოწვეული.

გათამაშების მე-18 ტურში ჩრდილოლონდონელებს “ასტონ ვილასთან” უნდა ეთამაშათ, თუმცა 13 იანვარს ისინი “ფულემს” მიიღებენ. თავის მხრივ, “ტოტენჰემსა” და “ფულემს” შორის ჩასატარებელი შეხვედრა 30 დეკემბერს უნდა გამართულიყო. ამასთან, “ფულემსა” და “ჩელსის” შორის მატჩი, რომელიც პარასკევს უნდა ჩატარებულიყო, შაბათ დღეს, 16 იანვარს ჩაინიშნა.

“ევერტონსა” და “ასტონ ვილას” შორის შაბათს ჩანიშნული შეხვედრა კვირას გაიმართება.

შეგახსენებთ, რომ “ასტონ ვილას” 14 წევრს კორონავირუსი დაუდასტურდა, რის გამოც გუნდი იზოლაციაშია.

ინგლისის თასის მესამე რაუნდში “ლივერპულის” წინააღმდეგ ჩატარებულ შეხვედრაში (1:4) ბირმინგემელებმა მოედანზე ახალგაზრდული შემადგენლობა გაიყვანეს.

სვენ-გორან ერიქსონი: “ფერგიუსონი მოკვლით მემუქრებოდა, თუ რუნის მუნდიალზე წავიყვანდი”

Posted on by ბექა დოგრაშვილი

ინგლისის ნაკრების ყოფილმა მთავარმა მწვრთნელმა სვენ-გორან ერიქსონმა გამოცემა “თაიმსს” საინტერესო ინტერვიუ მისცა, რომლის ერთ-ერთი მონაკვეთი “მანჩესტერ იუნაიტედის” ექსთავკაც ალექს ფერგიუსონთან მომხდარ ინციდენტს დაეთმო.

შვედმა სპეციალისტმა ინტერვიუში 2006 წელს მომხდარი ამბავი გაიხსენა. ამ პერიოდში “წითელი ეშმაკების” აწ უკვე ყოფილმა თავდამსხმელმა უეინ რუნიმ ტრავმა მიიღო და გამოჯანმრთელების პროცესი საკმაოდ გაეწელა. ინგლისელმა ფეხბურთელმა მსოფლიოს ჩემპიონატამდე ტრავმის მოშუშება ვერ მოასწრო, თუმცა უშუალოდ ტურნირის მიმდინარეობისას გამოჯამრთელებისა და თამაშის საშუალება ჰქონდა. ამის მიუხედავად, “მანჩესტერ იუნაიტედის” მთავარ მწვრთნელ ალექს ფერგიუსონს მუნდიალზე რუნის გაშვება არ სურდა, რასაც ერიქსონთან დაძაბული სატელეფონო საუბარი მოჰყვა.

შვედი სპეციალისტი იხსენებს:

“ალექსი უცნაური კაცი იყო. ასეთი ჩვევა ჰქონდა: დამირეკავდა დილის შვიდ საათზე ან უფრო ადრე და ყოველგვარი მისალმების გარეშე იწყებდა ყვირილით საუბარს. როდესაც ასეთი გაღიზიანებული იყო ხოლმე, მასთან კომუნიკაცია შეუძლებელი ხდებოდა.

მან ის დილაც ჩხუბით დაიწყო. ყვიროდა, რომ მომკლავდა, თუ რუნის მსოფლიოს ჩემპიონატზე წავიყვანდი.

მე მას ვკითხე: “რა ხდება ალექს, რაშია საქმე?” თუმცა, ის მე არ მისმენდა და განაგრძობდა ყვირილსა და მუქარას. საბოლოო ჯამში, ვუთხარი: “რუნის მსოფლიოს ჩემპიონატზე მაინც წავიყვან. კარგი შვებულება, ჩაო” და ტელეფონი გავუთიშე”.

უეინ რუნიმ 2006 წლის მსოფლიოს ჩემპიონატზე მართლაც ითამაშა, თუმცა “სამი ლომი” ტურნირს მეოთხედფინალურ ეტაპზე პორტუგალიის ნაკრებთან პენალტების სერიაში მარცხის შემდეგ გამოეთიშა.

ანანიძე: “ბეილი ჩემზე ძლიერია, მაგრამ ჩემზე ხშირად ტრავმიანობს, აღნაგობა არაფერ შუაშია”

Posted on by ბექა დოგრაშვილი

საქართველოს ნაკრებისა და მოსკოვის “სპარტაკის” ნახევარმცველმა ჯანო ანანიძემ რუსული კლუბის ოფიციალური ვებგვერდისთვის მიცემულ ინტერვიუში უარყო მოსაზრება, თითქოს მისი ხშირი ტრავმიანობა ფიზიკურ მონაცემებთან არის დაკავშირებული.

“სპარტაკის” ლიდერობა მსურს, თუმცა მესმის, რომ ეს ან ახლა მოხდება ან არასდროს. ვგრძნობ, რომ შემიძლია ისე ვითამაშო, როგორც ამას ჩემგან გულშემატკივრები მოელიან. სამწუხაროდ, ხშირად ტრავმები მიშლიდა ხელს. ფაქტობრივად ათი წლიდან სამი მკურნალობაში მაქვს გატარებული. ხშირად ვკითხულობ, თითქოს ყველაფერი ჩემი აღნაგობის ბრალია, მაგრამ შეხედეთ მადრიდის “რეალის” ფეხბურთელ გარეტ ბეილს. ის ჩემზე სამჯერ მეტს იწონის და კუნთებიც სამჯერ დიდი აქვს, თუმცა ჩემზე ხშირად ტრავმიანობს. მან “რეალში” ყოფნის ექვსი წლიდან მხოლოდ წელიწადნახევარი ითამაშა.

ალბათ, უფროსების წინააღმდეგ თამაში საკმაოდ ადრეულ ასაკში დავიწყე. გარდა ამისა, თავიდან სატრენაჟორო დარბაზებს ხშირად არ ვსტუმრობდი. ახლა გაცილებით ხშირად ვვარჯიშობ. იმას არ ვამბობ, რომ რობოტის დონემდე უნდა მიხვიდე, როცა ბურთსაც ვეღარ გრძნობ, მაგრამ პროფილაქტიკა აუცილებელია, რათა კუნთები და სახსრები კარგ მდგომარეობაში იყოს.

დეკემბრამდე უნდა ვაჩვენო, რა შემიძლია: გოლების გატანა, საგოლე გადაცემები. თამაშის მიმდინარეობის წაყვანა. მთავარი მწვრთნელისგან ნდობას ვგრძნობ და ეს მეხმარება”, – აღნიშნა ანანიძემ.

“ინტერმა” რაჯა ნაინგოლანი ტრანსფერზე დააყენა

Posted on by ბექა დოგრაშვილი

მილანის “ინტერმა” გუნდის ნახევარმცველ რაჯა ნაინგოლანის ტრანსფერზე დაყენება გადაწყვიტა.

მილანურ გუნდში ბელგიელი ფეხბურთელის პირველი სეზონი არაერთმნიშვნელოვანი გამოდგა: ნაინგოლანმა დიდი პერიოდი ლაზარეთში გაატარა, თუმცა ცალკეულ შემთხვევებში ჰქონდა საკმაოდ კარგი თამაშებიც.

“კორიერე დელო სპორტი” წერს, რომ “ნერაძურიმ” ფეხბურთელთან განშორების გადაწყვეტილება მიიღო. წყაროს თანახმად, “ინტერის” ხელმძღვანელობამ ნაინგოლანის აგენტ ალესანდრო ბელტრამის უკვე აცნობა, რომ ფეხბურთელი ტრანსფერზეა დაყენებული.

ბუფონს “ბრეშა” ეპატიჟება

Posted on by ბექა დოგრაშვილი

ლეგენდარული იტალიელი მეკარე ჯანლუიჯი ბუფონი პროფესიული კარიერის დასრულებას ჯერ არ აპირებს.

“პარი სენ-ჟერმენიდან” წამოსვლის შემდეგ 41 წლის კიპერი, სავარაუდოდ, სამშობლოს მიაშურებს. Football Italia წერს, რომ ბუფონის დამატებით “ბრეშა” არის დაინტერესებული, რომელმაც ვეტერანი მეკარისთვის წინადადება უკვე მოამზადა. შეგახსენებთ, რომ “ბრეშამ” იტალიის სერია B მოიგო და დამდეგ წელს სერია A-ში იასპარეზებს.

როგორც მოგეხსენებათ, ჯანლუიჯი ბუფონმა გასული სეზონი “პარი სენ-ჟერმენში” გაატარა, რომლის რიგებშიც ყველა ტურნირზე ერთად 25 მატჩი ჩაატარა და ამდენივე გოლი გაუშვა. იტალიელი კიპერი პარიზული კლუბის გარდა კარიერის განმავლობაში ტურინის “იუვენტუსისა” და “პარმას” ღირსებას იცავდა.

ჯეიმს მილნერი: “მესიმ ვირი მიწოდა”

Posted on by ბექა დოგრაშვილი

“ლივერპულის” ნახევარმცველმა ჯეიმს მილნერმა ჩემპიონთა ლიგის ნახევარფინალურ ეტაპზე “ბარსელონასთან” გამართული მატჩის მიმდინარეობისას ლიონელ მესისთან მომხდარი კონფლიქტის შესახებ ისაუბრა.

როგორც აღმოჩნდა, 33 წლის ინგლისელს ესპანური ენა ესმის. აღსანიშნავია, რომ ის შვილებს ხშირად სწორედ ესპანურ ენაზე ესაუბრება, სწორედ ასე გაიგო მან მესის ნათქვამი სიტყვები. მილნერმა “ენფილდზე”, “ლივერპულსა” და “ბარსელონას” შორის გამართული მატჩის პირველი ნახევრის შემდეგ არგენტინელთან საუბარი გაიხსენა.

“მესი უკმაყოფილო იყო. პირველი ტაიმის შემდეგ გასახდელისკენ მიმავალს ესპანურად საუბარი დამიწყო. მან მე მიწოდა “Burro”. ეს სიტყვა ითარგმნება, როგორც “ვირი”, თუმცა მგონია, რომ ამ ტერმინს ესპანურ ფეხბურთში უხეში ფეხბურთელების მიმართ იყენებენ.

მე მას ვკითხე, ყველაფერი რიგზე იყო თუ არა, თუმცა ყურადღება არ მომაქცია. ჩემი აზრით, ის ვერ მიხვდა, რომ ესპანური ენა მესმოდა. მან თქვა: “ასე უხეშად იმიტომ ითამაშე, რომ ბურთი ფეხებს შორის გაგიძვრინე.” მე საუბარი აღარ გამიგრძელებია და გასახდელში შევედი. მის მიმართ მხოლოდ აღტაცებას გამოვხატავ.

ამის მიუხედავად, მესის თამაშით აღფრთოვანებული ვარ. მას ყველაფრის თქმის უფლება აქვს. ცხადია, მის წინააღმდეგ თამაში რთულია. თუ მის შეჩერებას შეეცდები, შეიძლება, ისე მოხდეს, რომ სულელი გამოჩნდე. მეც ასე დამემართა – მან ბურთი ფეხებს შორის გამიძვრინა, ამ კადრს კი მილიონობით ნახვა აქვს. მე არც პირველი ვყოფილვარ და არც უკანასკნელი. ის შეუდარებელი ფეხბურთელია”, – აღნიშნა მილნერმა “დეილი მეილთან” საუბრისას.

ზინედინ ზიდანმა ფლორენტინო პერესს ექვსი მოთხოვნა წაუყენა

Posted on by ბექა დოგრაშვილი

“მარკას” ცნობით, მადრიდის “რეალის” მთავარმა მწვრთნელმა ზინედინ ზიდანმა კლუბის პრეზიდენტ ფლორენტინო პერესს მოლაპარაკების პროცესში ექვსი მოთხოვნა წაუყენა:

1. გუნდზე სრული კონტროლი;
2. იმ მოთამაშეების გაყიდვა, რომლებიც არ სჭირდება;
3. მარსელო და ისკო არ იყიდებიან;
4. გუნდი ნეიმარს არ შეიძენს;
5. ხამეს როდრიგესი არ დაბრუნდება;
6. გუნდი მბაპეს ყიდვას შეეცდება.

შეგახსენებთ, რომ გუშინ მადრიდის “რეალმა” გუნდის მთავარი მწვრთნელის პოსტიდან სანტიაგო სოლარი გაათავისუფლა, თავკაცის თანამდებობაზე კი ზინედინ ზიდანი დაბრუნდა. მხარეებს შორის გაფორმებულ შრომით ხელშეკრულებას ძალა 2022 წლის ზაფხულამდე ექნება.

როგორც მოგეხსენებათ, ფრანგი სპეციალისტი “სამეფო კლუბს” 2016 წლის იანვრიდან 2018 წლის მაისამდე თავკაცობდა. ამ არასრული სამი წლის განმავლობაში გუნდმა ცხრა ტიტული დაისაკუთრა, მათ შორის ზედიზედ სამჯერ ჩემპიონთა ლიგის გამარჯვებული გახდა, ერთხელ კი ესპანეთის პრიმერადივიზიონი მოიგო.

“რეალს” ესპანეთის პრიმერადივიზიონის 27-ე ტურის თავზე სატურნირო ცხრილში მესამე ადგილი უკავია და ლიდერ “ბარსელონას” 12 ქულით ჩამორჩება. გუნდმა ჩემპიონთა ლიგის მერვედფინალურ ეტაპზე ამსტერდამის “აიაქსის” ბარიერი ვერ დაძლია (ორი მატჩის ჯამში 3:5). “სამეფო კლუბი” ესპანეთის თასის გათამაშებასაც გამოეთიშა, სადაც “ბარსელონასთან” ნახევარფინალში დამარცხდა (ორი მატჩის ჯამში 1:4).

იკარდის მეუღლე: “მე საფეხბურთო რევოლუციონერი ვარ”

Posted on by ბექა დოგრაშვილი

მილანის “ინტერის” ფორვარდ მაურო იკარდის მეუღლემ ვანდა ნარამ, რომელიც ამავდროულად ფეხბურთელის აგენტიც გახლავთ, საკუთარ თავს საფეხბურთო რევოლუციონერი უწოდა.

“ყოველთვის ვამბობდი, რომ იკარდის აგენტად მუშაობა იოლი საქმეა, ვინაიდან ის ევროპის ერთ-ერთი საუკეთესო ფეხბურთელია. ბევრ მოთამაშეს ჰყავს აგენტად აყვანილი საკუთარი ნათესავი, მაგრამ მათ შორის ქალი არ არის. ფეხბურთის სამყაროში ქალები შინ სხედან და ჩუმად არიან. აი, ამიტომ ვარ მე რევოლუციონერი.

საკუთარი თავის წარდგენა არ მჭირდება, ვინაიდან მე ყველაზე წარმატებულ საფეხბურთო ტელეპროგრამაში ვმუშაობ, ვარ გავლენიანი ადამიანი. გარდა ამისა, გახლავართ დედა, მეუღლე, მეგობარი, ერთგული, მოკრძალებული, გულწრფელი, პირდაპირი და კარგი ადამიანი”, – ციტირებს ვანდა ნარას სიტყვებს Нару Gente.

შეგახსენებთ, რომ მაურო იკარდისა და მილანის “ინტერს” შორის ურთიერთობა გაფუჭებულია. კლუბმა ფეხბურთელს კაპიტნის სამკლაური ჩამოართვა, თავად იკარდი კი გუნდში თამაშზე უარს აცხადებს. ვანდა ნარას სურს, რომ იკარდის ხელფასის სახით წელიწადში ათი მილიონი ევრო ჰქონდეს, თუმცა მხარეები ამაზე ვერ თანხმდებიან.