დესპოტოვიჩი: “ხვიჩა ევროპაში ერთ-ერთი საუკეთესო გახდება, თუ…”

ყაზანის “რუბინის” თავდამსხმელმა ჯორჯე დესპოტოვიჩმა თანაკლუბელ ხვიჩა კვარაცხელიას პერსპექტივის შესახებ კომენტარი გააკეთა.

“ხვიჩა უმაღლესი დონის ფეხბურთელი გახდება და ღმერთმა ქნას, ამაში ხელი ტრავმებმა არ შეუშალოს. თუ ზრდას გააგრძელებს, ევროპაში ერთ-ერთი საუკეთესო გახდება. ის ყოველ ვარჯიშზე მოტივირებულია”, – ციტირებს დესპოტოვიჩის სიტყვებს sport24.

გავრცელებული ინფორმაციის თანახმად, ხვიჩა კვარაცხელიათი “მილანი”, “ნაპოლი” და ტურინის “იუვენტუსი” არიან დაინტერესებულნი.

მიმდინარე სეზონში 20 წლის ქართველმა ფეხბურთელმა “რუბინის” ფორმით 21 მატჩი ჩაატარა, ოთხი ბურთი გაიტანა და ამდენივე საგოლე გადაცემა მიითვალა, მსოფლიოს 2022 წლის ჩემპიონატის საკვალიფიკაციო ეტაპზე კი სამ შეხვედრაში ორი გოლი (ესპანეთთან, საბერძნეთთან) ჩაიწერა.

ვილი სანიოლი — მწვრთნელი ჰიტცფელდის ფილოსოფიითა და უხერხული განცხადებებით

საქართველოს ეროვნული ნაკრების თავკაცის პოსტზე მიუნხენის “ბაიერნის” ყოფილი მარჯვენაფლანგელი მცველი ვილი სანიოლი დაინიშნა, რომლის სამწვრთნელო კარიერაც მხოლოდ ოთხ წელს ითვლის. ფრანგმა ბუცები ლურსმანზე 2009 წელს, 32 წლის ასაკში, ხშირის ტრავმიანობის გამო დაასრულა, თუმცა ფეხბურთში დარჩენა გადაწყვიტა.

სანიოლს “ბაიერნში” თამაშის პერიოდში არაერთ წარმატებულ სპეციალისტთან უმუშავია და გასაკვირი არ არის, რომ მან საკმაოდ სწრაფად აუღო ალღო სამწვრთნელო მუშაობის სპეციფიკას. სანიოლს მოთამაშის კარიერა სულ ოთხი წლის დასრულებული ჰქონდა, როდესაც საფრანგეთის ახალგაზრდული ნაკრების მთავარი მწვრთნელის პოსტი ანდეს. მან ამ პოზიციაზე ერთი წლის განმავლობაში, 2013-დან 2014 წლამდე იმუშავა და საკმაოდ წარმატებულადაც. გუნდმა ცხრა მატჩიდან შვიდი გამარჯვებით, ორი კი ფრედ დაასრულა, ბურთების შეფარდებით 29-6-ზე. მაშინ სანიოლის განკარგულებაში ისეთი ფეხბურთელები იყვნენ, როგორებიც არიან: ანტონი მარსიალი (“მანჩესტერ იუნაიტედი”), ლიუკა დინი (“ევერტონი”), ფლორენ ტოვენი (“მარსელი”), ადრიან რაბიო (“იუვენტუსი”), სამიუელ უმტიტი (“ბარსელონა”), იაია სანოგო (“ტულუზა”), ჯეფრი კონდოგბია (“ატლეტიკო”). სანიოლს სათამაშო წყობის ვარირების შესაძლებლობა ეძლეოდა და ხშირად ცვლიდა სქემას 4-4-2-დან ე.წ. “რომბით” – 4-2-3-1.

საფრანგეთის 21 წლამდე ნაკრებში ვილი სანიოლის წარმატებული შედეგებმა უმალ მიიქცია საფრანგეთის პირველი და მეორე ლიგების კლუბთა ყურადღება. მათ შორის იყო “ბორდოც”, რომელსაც გუნდის მთავარი მწვრთნელის პოსტზე ზინედინ ზიდანის ხილვა სურდა, თუმცა ალტერნატიულ ვარიანტად სწორედ სანიოლის კანდიდატურას მიიჩნევდა.

“ჟირონდელებმა” ახალბედა სპეციალისტს ნდობა გამოუცხადეს და რაც მთავარია, შემდგომი განვითარებისთვის საჭირო რესურსებითაც უზრუნველყვეს.

სანიოლმა “ბორდოში” “ბაიერნის” ყოფილი თავკაცის, ოტმარ ჰიტცფელდის ფილოსოფია მიიტანა:

“მინდა შემტევი გუნდის ხილვა. “ბაიერნში” გავიგე, რომ დიდი შედეგების მისაღწევად მოედანზე თამაშით უნდა ისიამოვნო. ამისთვის კი საჭიროა ბურთის ფლობა და თავისუფლად მოქმედება. ჩემს ფეხბურთელებს, რა თქმა უნდა, ღირსეულად მართებთ თავიანთი საქმის შესრულება, მაგრამ რა აზრი ექნება ამას, თუ მაყურებელი სიამოვნებას ვერ მიიღებს?”

სადებიუტო სეზონის მეორე ტურში სანიოლის” ბორდომ” “მონაკო” ანგარიშით 4:1 დაამარცხა, თუმცა იმ სეზონში “ჟირონდელებს” ასეთი დიდი სხვაობით აღარ მოუგიათ. “ბორდოში” სანიოლის მუშაობის პირველი წელი დადებითად შეფასდა, გუნდმა წინა სეზონის შედეგი გააუმჯობესა და სატურნირო ცხრილში მეექვსე ადგილი დაიკავა.

საზოგადოება შეთანხმდა, რომ ვილი სანიოლისგან კარგი მწვრთნელის დადგომა შესაძლებელი იყო, მაგრამ ფრანგმა სპეციალისტმა თავადვე შეილახა იმიჯი და რაც ყველაზე საინტერესოა, ეს არა შედეგებით, არამედ თავისი განცხადებებით “მოახერხა”.

“სანამ “ბორდოს” მთავარი მწვრთნელი ვიქნები, აფრიკელ ფეხბურთელებს ნაკლებად შევიძენთ. არ მინდა, რომ ყოველ ორ წელიწადში აფრიკის თასის გამო ნახევარი გუნდი დავკარგო. აფრიკელი მოთამაშეების მთავარი უპირატესობები დაბალი ხელფასი, სიიაფე, მებრძოლი ხასიათი და ფიზიკური ძალაა, მაგრამ ფეხბურთში ტექნიკა, ინტელექტი და დისციპლინაც მნიშვნელოვანია. ყველაფერი ერთმანეთთან არის დაკავშირებული”, – თქვა სანიოლმა.

ამ განცხადების შემდეგ ფრანგი სპეციალისტი ბევრმა აითვალწუნა, მას რასიზმში დასდეს ბრალი და აფრიკული წარმომავლობის ფეხბურთელები მომდევნო ტურის ბოიკოტირებითაც დაიმუქრნენ.

“ვწუხვარ, თუ ჩემმა სიტყვებმა ან მისმა არასწორად ფორმულირებამ ვინმე შეურაცხყო ან გაანაწყენა. ბოდიშს ვიხდი. მე მხედველობაში მხოლოდ ფეხბურთი მქონდა. ინტელექტის თაობაზე ჩემი სიტყვები მხოლოდ ტაქტიკურ განსწავლულობას ეხებოდა. არავითარ შემთხვევაში არ ვგულისხმობდი ადამიანების გონებრივი შესაძლებლობების დონეს”, – თავი იმართლა მოგვიანებით სანიოლმა.

ფრანგი სპეციალისტის კიდევ ერთი უხერხული განცხადება მსაჯის მიმართ იყო ნათქვამი, რის გამოც ის სამმატჩიანი დისკვალიფიკაციითაც დაისაჯა. სანიოლმა ჟურნალისტებთან გამართულ პრესკონფერენციაზე ამჯერადაც სცადა თავის მართლება:

“ეს ხუმრობა იყო, რომელიც არასწორად გაიგეს. ის მსაჯის მიმართ ვთქვი, მაგრამ იმ კომენტარში რაიმე სახის რისხვა ან აგრესია არ ჩამიდია. ეს იყო უბრალოდ ვაზელინთან დაკავშირებული სახალისო ამბავი… ხედავთ? თქვენც გეცინებათ. ჩემი აზრით, ამ სიტყვებში საწყენი არაფერია. სადისციპლინო კომიტეტს განმარტებები მივეცი, მაგრამ ჩემს საქმეს მოწყენილი და იუმორს მოკლებული ხალხი განიხილავდა”.

ვილი სანიოლს პოზიტიურად აღარ უყურებდნენ, “ბორდომ” შედეგებიც გააუარესა და სატურნირო ცხრილში მე-14 პოზიციამდე ჩამოქვეითდა, რის შემდეგაც კლუბის ხელმძღვანელობამ მთავარი მწვრთნელის შეცვლის გადაწყვეტილება მიიღო. სანიოლს 2015-2016 წლების სეზონი “ბორდოში” აღარ ჩაამთავრებინეს.

ამის შემდეგ ვილი სანიოლს სამუშაოდ აღარ იწვევდნენ, ფრანგმა თავისი სიტყვებით თითქოს კარიერა მოისპო კიდეც. სანიოლი ერთი წელი უსაქმოდ იყო, შემდეგ კი შანსი მისცეს იქ, სადაც უყვართ – მიუნხენის “ბაიერნში”. 2017 წელს ბავარიელთა თავკაცმა კარლო ანჩელოტიმ სანიოლი თანაშემწედ მიიწვია, თუმცა მათი თანამშრომლობა ხანმოკლე აღმოჩნდა. სანიოლის მისვლიდან ორ თვეში იტალიელი სპეციალისტი გაათავისუფლეს, ფრანგმა კი “ბაიერნის” მთავარი მწვრთნელის მოვალეობის შემსრულებლის პოზიციაზე გადაინაცვლა, მაგრამ ბავარიელები მასში დიდ პოტენციალს ვერ ხედავდნენ და ამ თანამდებობაზე მხოლოდ რვა დღე გააჩერეს, შემდეგ კი იუპ ჰაინკესი და მისი სამწვრთნელო შტაბი მოიყვანეს. იმ რვა დღეში “ბაიერნმა” სანიოლის” ხელმძღვანელობით ერთი მატჩი ჩაატარა – გუნდმა “ჰერტასთან” ფრედ, 2:2 ითამაშა.

ვილი სანიოლის სამწვრთნელო კარიერაში 2017 წლის ოქტომბრის შემდეგ წყვეტაა. მას შემდეგ ფრანგი ძირითადად საფეხბურთო ექსპერტად მუშაობდა. თითქმის ოთხწლიანი პაუზის შემდეგ კი მწვრთნელ სანიოლს შანსი საქართველოს ეროვნულ ნაკრებში ეძლევა.

სვენ-გორან ერიქსონი: “ფერგიუსონი მოკვლით მემუქრებოდა, თუ რუნის მუნდიალზე წავიყვანდი”

ინგლისის ნაკრების ყოფილმა მთავარმა მწვრთნელმა სვენ-გორან ერიქსონმა გამოცემა “თაიმსს” საინტერესო ინტერვიუ მისცა, რომლის ერთ-ერთი მონაკვეთი “მანჩესტერ იუნაიტედის” ექსთავკაც ალექს ფერგიუსონთან მომხდარ ინციდენტს დაეთმო.

შვედმა სპეციალისტმა ინტერვიუში 2006 წელს მომხდარი ამბავი გაიხსენა. ამ პერიოდში “წითელი ეშმაკების” აწ უკვე ყოფილმა თავდამსხმელმა უეინ რუნიმ ტრავმა მიიღო და გამოჯანმრთელების პროცესი საკმაოდ გაეწელა. ინგლისელმა ფეხბურთელმა მსოფლიოს ჩემპიონატამდე ტრავმის მოშუშება ვერ მოასწრო, თუმცა უშუალოდ ტურნირის მიმდინარეობისას გამოჯამრთელებისა და თამაშის საშუალება ჰქონდა. ამის მიუხედავად, “მანჩესტერ იუნაიტედის” მთავარ მწვრთნელ ალექს ფერგიუსონს მუნდიალზე რუნის გაშვება არ სურდა, რასაც ერიქსონთან დაძაბული სატელეფონო საუბარი მოჰყვა.

შვედი სპეციალისტი იხსენებს:

“ალექსი უცნაური კაცი იყო. ასეთი ჩვევა ჰქონდა: დამირეკავდა დილის შვიდ საათზე ან უფრო ადრე და ყოველგვარი მისალმების გარეშე იწყებდა ყვირილით საუბარს. როდესაც ასეთი გაღიზიანებული იყო ხოლმე, მასთან კომუნიკაცია შეუძლებელი ხდებოდა.

მან ის დილაც ჩხუბით დაიწყო. ყვიროდა, რომ მომკლავდა, თუ რუნის მსოფლიოს ჩემპიონატზე წავიყვანდი.

მე მას ვკითხე: “რა ხდება ალექს, რაშია საქმე?” თუმცა, ის მე არ მისმენდა და განაგრძობდა ყვირილსა და მუქარას. საბოლოო ჯამში, ვუთხარი: “რუნის მსოფლიოს ჩემპიონატზე მაინც წავიყვან. კარგი შვებულება, ჩაო” და ტელეფონი გავუთიშე”.

უეინ რუნიმ 2006 წლის მსოფლიოს ჩემპიონატზე მართლაც ითამაშა, თუმცა “სამი ლომი” ტურნირს მეოთხედფინალურ ეტაპზე პორტუგალიის ნაკრებთან პენალტების სერიაში მარცხის შემდეგ გამოეთიშა.

ანანიძე: “ბეილი ჩემზე ძლიერია, მაგრამ ჩემზე ხშირად ტრავმიანობს, აღნაგობა არაფერ შუაშია”

საქართველოს ნაკრებისა და მოსკოვის “სპარტაკის” ნახევარმცველმა ჯანო ანანიძემ რუსული კლუბის ოფიციალური ვებგვერდისთვის მიცემულ ინტერვიუში უარყო მოსაზრება, თითქოს მისი ხშირი ტრავმიანობა ფიზიკურ მონაცემებთან არის დაკავშირებული.

“სპარტაკის” ლიდერობა მსურს, თუმცა მესმის, რომ ეს ან ახლა მოხდება ან არასდროს. ვგრძნობ, რომ შემიძლია ისე ვითამაშო, როგორც ამას ჩემგან გულშემატკივრები მოელიან. სამწუხაროდ, ხშირად ტრავმები მიშლიდა ხელს. ფაქტობრივად ათი წლიდან სამი მკურნალობაში მაქვს გატარებული. ხშირად ვკითხულობ, თითქოს ყველაფერი ჩემი აღნაგობის ბრალია, მაგრამ შეხედეთ მადრიდის “რეალის” ფეხბურთელ გარეტ ბეილს. ის ჩემზე სამჯერ მეტს იწონის და კუნთებიც სამჯერ დიდი აქვს, თუმცა ჩემზე ხშირად ტრავმიანობს. მან “რეალში” ყოფნის ექვსი წლიდან მხოლოდ წელიწადნახევარი ითამაშა.

ალბათ, უფროსების წინააღმდეგ თამაში საკმაოდ ადრეულ ასაკში დავიწყე. გარდა ამისა, თავიდან სატრენაჟორო დარბაზებს ხშირად არ ვსტუმრობდი. ახლა გაცილებით ხშირად ვვარჯიშობ. იმას არ ვამბობ, რომ რობოტის დონემდე უნდა მიხვიდე, როცა ბურთსაც ვეღარ გრძნობ, მაგრამ პროფილაქტიკა აუცილებელია, რათა კუნთები და სახსრები კარგ მდგომარეობაში იყოს.

დეკემბრამდე უნდა ვაჩვენო, რა შემიძლია: გოლების გატანა, საგოლე გადაცემები. თამაშის მიმდინარეობის წაყვანა. მთავარი მწვრთნელისგან ნდობას ვგრძნობ და ეს მეხმარება”, – აღნიშნა ანანიძემ.

“დილა” – “ტორპედოს” მატჩისას მოედანზე ძაღლი შევიდა (ვიდეო)

საქართველოს ეროვნული ლიგის 28-ე ტურში გორის “დილასა” და ქუთაისის “ტორპედოს” მატჩის (0:0) მიმდინარეობისას მოედანზე ძაღლი შევიდა, რის გამოც შეხვედრა რამდენიმე წუთით შეჩერდა.

საქართველოს ნაკრებმა ლატვიასთან რეაბილიტაცია მოახდინა

“დინამო არენაზე” საქართველოსა და ლატვიის ეროვნულ ნაკრებთა შორის საერთაშორისო ამხანაგური მატჩი გაიმართა და მასპინძელთა გამარჯვებით, ანგარიშით 5:0 დასრულდა. შეხვედრას ორივე ქვეყნის პრეზიდენტი – გიორგი მარგველაშვილი და რაიმონდს ვეიონისი დაესწრნენ და მატჩის დაწყებამდე ფეხბურთელებსა და სტადიონზე შეკრებილ პუბლიკას მიესალმნენ. არცთუ ისე მრავალრიცხოვან ქართველ ქომაგებთან ერთად ტრიბუნაზე იყვნენ ლატვიიდან ჩამოსული გულშემატკივრებიც, რომლებიც ნაკრებს ყველა თამაშზე დაჰყვებიან.

მატჩი არცთუ ისე მაღალ ტემპში დაიწყო, მე-15 წუთიდან კი ქართველი ფეხბურთელები მეტოქის ნახევარზე დამკვიდრდნენ და დაწინაურდნენ კიდეც. საჯარიმო მოედანზე ორთაბრძოლისას გიორგი ქვილითაია წააქციეს და ლატვიელთა კარის მიმართულებით პენალტი დაინიშნა, რომელიც ჯანო ანანიძემ გოლად აქცია – 1:0. მატჩის 32-ე წუთზე მასპინძელთა უპირატესობა გაიზარდა. ანანიძემ კუთხური მოაწოდა, ქვილითაიამ კი ფეხით ერთი შეხებით გადაგზავნა ბურთი ლატვიელთა კარში – 2:0. შეხვედრის პირველი ნახევარი ამავე ანგარიშით დასრულდა.

მატჩის მეორე ტაიმში საქართველოს ნაკრების სათამაშო უპირატესობა კიდევ უფრო გაიზარდა, რაც ანგარიშშიც აისახა. 68-ე წუთზე გიორგი არაბიძის მიერ მოწოდებულ კუთხურს ქვილითაია თავური დარტყმით გამოეხმაურა და დუბლი გაიფორმა – 3:0. გოლის გატანის შანსი თავად არაბიძესაც ჰქონდა, მაგრამ ახლო მანძილიდან ერთი შეხებით დარტყმის შემდეგ ბურთი კარს ზემოდან გადაევლო. სამაგიეროდ, 77-ე წუთზე ანანიძემ შორეული დარტყმით მეოთხედ შეარხია ლატვიელთა კარის ბადე. მატჩის მიწურულს არაბიძემ საჯარიმო დარტყმით მაინც გაიტანა თავისი გოლი და საბოლოო ანგარიში დააფიქსირა – 5:0.

ამ გამარჯვებით საქართველოს ნაკრებმა ლატვიასთან ურთიერთშეხვედრებში სრული თანაფარდობა აღადგინა. კერძოდ, რვა მატჩიდან სამჯერ ქართველებმა იმარჯვეს, სამჯერ ლატვიელებმა, ორი შეხვედრა კი ფრედ დასრულდა.

 

საერთაშორისო ამხანაგური მატჩი
საქართველო – ლატვია 5:0 (2:0)

საქართველო: მაკარიძე, ლობჟანიძე, ნავალოვსკი (ტაბიძე 78′), ხოჭოლავა, კაშია, კვეკვესკირი, გვილია (კიტეიშვილი 36′), ჯიღაური (არაბიძე 63′), ანანიძე (ყაზაიშვილი 83′), ქვილითაია (კაჭარავა 78′), დვალიშვილი (კობახიძე 63′).
მთავარი მწვრთნელი: ვლადიმირ ვაისი.

ლატვია: ვანინსი (შტეინბორსი 46′), მაკსიმენკო, ლაიზანსი (ლაზდინში 81′), ვიშნაკოვსი (რაკელსი 46′), დავის იკაუნიეკსი, სოლოვიოვსი, გორკში, იანის იკაუნიეკსი, იაგოდინსკი (ოშსი 46′), კარლსონსი (საბალა 46′), კლუშკინსი (ლუკიანოვსი 65′).
მთავარი მწვრთნელი: მარიანს პაჰარსი.

გოლები: ანანიძე 18′ (პენ), 77′. ქვილითაია 32′, 68′, არაბიძე 90′.
გაფრთხილებები: დვალიშვილი 37′ – კლუშკინსი 57′, დავის იკაუნიეკსი 58′, იანის იკაუნიეკსი 84′.

მთავარი არბიტრი: სურენ ბალიანი (სომხეთი).

დაეხმარეთ ვლადიმირ ვაისს სასტარტო განაცხადის დაყენებაში

საქართველოს ნაკრები წლის პირველ ოფიციალურ მატჩს 24 მარტს, “დინამო არენაზე”, სერბეთის ეროვნული გუნდის წინააღმდეგ ჩაატარებს. წარმოიდგინეთ თავი გუნდის მთავარ მწვრთნელად და აღნიშნული შეხვედრისთვის თქვენეული სასტარტო შემადგენლობა დაასახელეთ.

მემორანდუმი საქართველოსა და უკრაინის სპორტისა და ახალგაზრდობის საქმეთა სამინისტროებს შორის

უკრაინის ახალგაზრდობისა და სპორტის სამინისტროსა და საქართველოს სპორტისა და ახალგაზრდობის საქმეთა სამინისტროს შორის ხელი მოეწერა მემორანდუმს ახალგაზრდობის, ფიზიკური კულტურისა და სპორტის სფეროებში თანამშრომლობის შესახებ.

მემორანდუმი 2 მარტს სპორტისა და ახალგაზრდობის საქმეთა სამინისტროში გაფორმდა, რომელსაც ხელი მოაწერეს საქართველოს სპორტისა და ახალგაზრდობის საქმეთა მინისტრმა ტარიელ ხეჩიკაშვილმა და უკრაინის ახალგაზრდობისა და სპორტის მინისტრმა იგორ ჟდანოვმა. მინისტრების შეხვედრას ასევე ესწრებოდნენ უკრაინის ელჩი საქართველოში იგორ დოლგოვი და მინისტრის მოადგილეები – შალვა გოგოლაძე და რევაზ ჯაველიძე.

ტარიელ ხეჩიკაშვილის განცხადებით – “ყველას კარგად მოეხსენება, რომ უკრაინა აღმოსავლეთ ევროპაში ერთ-ერთი ყველაზე მოწინავე და წარმატებული ქვეყანაა სპორტული შედეგების მიხედვით. ბუნებრივია, ჩვენს სპორტსმენებს დიდად წაადგებათ უკრაინელებთან ერთობლივი სპორტული შეკრებები და ორმხირივ გაცვლით პროგრამებში მონაწილეობა. მათ შორის, ჩვენ ვგეგმავთ სუამის სამიტის ფარგლებში კიდევ უფრო მჭიდრო თანამშრომლობას და ერთობლივი ჩემპიონატებისა და შეჯიბრებების გამართვას.

ჩვენს სამინისტროებს შორის გაფორმებული მემორანდუმი სწორედ რომ ხელს შეუწყობს ერთის მხრივ სპორტის განვითარებას და მეორეს მხრივ, ახალგაზრდული ორგანიზაციების კიდევ უფრო დაახლოვებას და ერთობლივი პროექტების განხორციელებას. ვფიქრობ, ასეთი ფორმატი საშუალებას მოგვცემს სპორტული ტურიზმის განვითარების კუთხითაც წარმატებული ნაბიჯები გადავდგათ, კონკრეტული ნაკრებები მზად არიან ჩამოვიდნენ საქართველოში და ქართველ სპორტსმებებთან ერთად გაიარონ ერთობლივი შეკრებები.”

მემორანდუმის ფარგლებში გათვალისწინებულია ორი ქვეყნის თანამშრომლობა, ფიზიკური კულტურის, ახალგაზრდობის, საგანმანათლებლო, სამეცნიერო, მოხალისეობრივი, საკანონმდებლო, ევროპული ინტეგრაციისა და ევროკავშირთან ასოცირების შესახებ შეთანხმების იმპლემენტაციის პროცესში გამოცდილების გაზიარების მიმართულებით. მემორანდუმის გაფორმება ხაზს უსვამს ორ ქვეყანას შორის ურთიერთობების კიდევ უფრო მაღალ საფეხურზე გადანაცვლებას.

“ჩვენ გავაფორმეთ მემორანდუმი სპორტისა და ახალგაზრდობის სფეროში, რაც რა თქმა უნდა, ხელს შეუწყობს ქართველი და უკრაინელი ახალგაზრდების ურთიერთობებს, ასევე გაცვლითი პროგრამების განხორციელებას როგორც სპორტის, ასევე ახალგაზრდობის მიმართულებებით. ჩვენ მდიდარი კულტურული ფასეულობები გაგვაჩნია და ვფიქრობ მათი გაზიარება და ასევე ერთობლივი სპორტული და ახალგაზრდული პროექტების განხორციელება სიკეთის მომტანი იქნება ორივე ქვეყნისათვის.

საქართველოს სპორტისა და ახალგაზრდობის საქმეთა მინისტრთან საუბარი გვქონდა კონკრეტულ პროექტებზეც, მაგალითად 2017 წლის სექტემბერში ტორონტოში დაგეგმილია საბრძოლო მოქმედებების დროს დაზარალებულთა შორის სპორტული თამაშები, სადაც უკრაინის ნაკრებიც იღებს მონაწილეობას. ვისაუბრეთ იმის თაობაზე, რომ ამ თამაშებისთვის უკრაინელმა სამხედროებმა საქართველოში გაიარონ სპორტული წვრთნები და ასევე ჩატარდეს ამხანაგური მატჩი ფეხბურთში საქართველოსა და უკრაინის გუნდებს შორის.

ზოგადად, მსურს განვაცხადო, რომ საქართველო და უკრაინა დიდი ხანია მეგობრობენ და მჭიდროდ თანამშომლობენ ერთმანეთთან არაერთი მიმართულებით. ჩვენ აქტიურად გიჭერდით მხარს, როდესაც რუსეთის მხრიდან აგრესიას ჰქონდა ადგილი საქართველოში და ასევე ქართველები გვედგნენ მხარში რუსი ოკუპანტების წინააღმდეგ ბრძოლისას. ასევე მსურს ვისარგებლო შემთხვევით და მოგილოცოთ ვიზალიბერალიზაციის პროცესის წარმატებით განხორციელება.” – განაცხადა იგორ ჟდანოვმა.

აღსანიშნავია რომ უკრაინული მხარის ინიციატივით კიევში სულ ახლახანს გაიმართა სუამის სამუშაო ჯგუფის შეხვედრა, რომელშიც მონაწილეობას იღებდა საქართველოს სპორტის და ახალგაზრდობის საქმეთა სამინისტროს დელეგაციაც. საქასრთველოს მხრიდან გამოთქვა ინიციატივა საქართველოში სუამის წევრი ქვეყნის ახალგაზრდებისთვის საზაფხულო ბანაკების ჩატარების თაობაზე.

ამ მხრივ, გამოსარჩევია საქართველოსა და უკრაინის მრავალწლიანი მეგობრული თანამშრომლობა ყველაზე მძიმე პერიოდებში, კონკრეტულად 2014 წელს, როდესაც საქართველომ უმასპინძლა უკრაინის აღმოსავლეთ რეგიონებში სამხედრო მოქმედებებისა და აგრესიის შედეგად დაზარალებულ უკრაინელ ახალგაზრდებს „მომავლის ბანაკში”, რამაც ხელი შეუწყო მათი რეაბილიტაციისა და ცხოვრების ჩვეულ რეჟიმში დაბრუნებას.

სპორტისა და ახალგაზრდობის საქმეთა სამინისტროს პრესსამსახური

ევროპის ჩემპიონატის სასტარტო მატჩებისთვის “ბორჯღალოსანთა” შემადგენლობა დასახელდა

ბორჯღალოსნები 2017 წლის ‘რაგბი ევროპის ჩემპიონატს’ საფუძვლიანად განახლებული რაზმით იწყებენ – 11 თებერვალს საქართველოს ნაკრები ბელგიას ეწვევა, ხოლო 19 თებერვალს, წლის პირველი საშინაო მატჩში, რუსთავის სტადიონზე, 15 საათზე, გერმანიას მივიღებთ.

საქართველომ იაპონიაში, 2019 წლის მსოფლიო თასზე ასპარეზობა 2015 წელსვე, ბრიტანეთში, უკეთეს 12 გუნდში მოხვედრით დაიბევა.

წელს და გაისად ‘რაგბი ევროპის ჩემპიონატის’ ყველა სხვა მონაწილე იაპონიის საგზურის მოსაპოვებლად იბრძვის, მაგრამ ჩვენთან რკენის შედეგი შესარჩევი ტურნირის ცხრილში არ ეთვლება. ამიტომ, ევროპულ თამაშებს ახალგაზრდების გამოსაცდელად გამოვიყენებთ.

მილთონ ჰეიგი, ბორჯღალოსნების მთავარი მწვრთნელი:

“ჩვენ მიზანს, რა თქმა უნდა, ტურნირის მოგება წარმოადგენს, სხვა მხრივ კი გვინდა, რომ სათამაშო პოზიციებზე „სიღრმე“ — კონკურენცია შევქმნათ და ახალგაზრდა მორაგბეებს შანსი მივცეთ. წლევანდელ გათამაშებაში უნდა ვცადოთ სტილის განვითარება და თამაშიც უფრო თანმიმდევრული გავხადოთ. ასევე მნიშვნელოვანია შეტევითსა და დაცვით სტილებში სიახლეთა შეტანა”.

რადიკალური გზა

ჰეიგმა შარშან, 11 ტესტში სულ 5 ახალბედა გამოსცადა, 2017 წლის რაგბი ევროპის ჩემპიონატის პირველი ორი მატჩისთვის (ბელგიის და გერმანიის წინააღმდეგ) კი, 31-კაცა რაზმში, ერთბაშად 8 უკეპო შეიყვანა. თუ ბელგია-გერმანიასთან ყველანი ითამაშებენ, ბორჯღლოსანთა ამქარის წევრთა რიცხვი 249-მდე ავა.

“პირველი ორი მატჩისთვის ახალგაზრდები შევარჩიეთ, რაც მათ კარგ შესაძლებლობას მისცემს, სამწვრთნელო შტაბს უნარები დაანახონ. ვინაიდან ჩვენი მზერა 2019 წლის მსოფლიოს თასისკენაა მიმართული, ცხადია, ეს შანსი სამომავლოდ მათი შერჩევის პროცესის დასაწყისია. ამ ბიჭებმა უნდა გაითავისონ, რომ მათ ყოველ ქმედებას თვალს მივადევნებთ არა მხოლოდ მოედანზე, არამედ მის მიღმაც. საქმისადმი მათ მიდგომასა და პროფესიონალიზმს მიკროსკოპით დავაკვირდებით”, – რაზმში გამოძახებული ახალბედების შესახებ შენიშნა ჰეიგმა.

ახალი სეზონის სტარტზე არ ითამაშებს 2016 წლის ნოემბრის ტესტების 15 მონაწილე, ანუ თითქმის მთელი ძირითადი შემადგენლობა. დიახ, მწვრთნელი რისკავს, მაგრამ მის თამამ არჩევანს ზურგს უმაგრებს ისტორია — ორივე მეტოქეს ბევრად ვჯობივართ:

საქართველო – ბელგია (2013-2014)
2 ტესტი (1 შინ – 1 გარეთ)
2-0 (52:13, ლელოებით 8/1)

საქართველო – გერმანია (1995-2016)
5 ტესტი (3 შინ – 2 გარეთ)
5-0 (252:26, ლელოებით 37/3)

ისიც სათქმელია, რომ ამ, ექსპერიმენტულ რაზმშიც საკმაოდ არიან გამოცდილი ლიდერები: კვირიკაშვილი, კაჭარავა, მალაღურაძე, ხმალაძე, ბეგაძე და ნემსაძე, ახალბედა პირველ-ხაზელები კი, იმედია, წინა-მორბედთა ჩაყრილ ტრადიციას უპრობლემოდ გააგრძელებენ და მეტოქეს დაჯაბნიან.

ბელგიამდე საფრანგეთში

ბორჯღალოსნები 2017 წლის ‘რაგბი ევროპის ჩემპიონატის’ პირველი ორი მატჩისთვის შეკრებას 4 თებერვალს, საფრანგეთში დაიწყებენ. გუნდი ტულუზაში 9 თებერვლამდე დარჩება, მერე გეზს ბრიუსელისკენ აიღებს და ბელგიას 11 თებერვალს, საქართველოს დროით 18 საათზე შეერკინება.

ნაკრები შინ 13 თებერვალს დაბრუნდება და გერმანიასთან მატჩისთვის ‘შევარდენის’ სანაკრებო ბაზაზე მოემზადება. 19 თებერვლის თამაში რუსთავში გაიმართება და 15 საათზე დაიწყება.

ბორჯღალოსანთა განაცხადი

 

ეროვნულ გუნდს თედორე გრიგალაშვილი გამოაკლდა (ვიდეო)

საქართველოს ეროვნული ნაკრები ამხანაგური მატჩების მოსამზადებელი ეტაპის ფარგლებში, დღეიდან ორჯერად ვარჯიშებს ატარებს. ვლადიმირ ვაისის ხელმძღვანელობით, ნაკრები თბილისში, ანდრო ჟორდანიას სახელობის „დინამოს“ საწვრთნელ ბაზაზე ემზადება. შემადგენლობას დღეს თბილისის „საბურთალოს“ წევრი თედორე გრიგალაშვილი ტრავმის გამო გამოაკლდა. ნაკრები დედაქალაქში მზადებას 19 ფეხბურთელით განაგრძობს.

საქართველოს ნაკრების მთავარი მწვრთნელი ვლადიმირ ვაისი 18 იანვარს, 14:00 საათზე სასტუმრო „ბომონდ გარდენში“ მედიის წარმომადგენლებისთვის პრესკონფერენციას გამართავს. 16:45 საათზე ეროვნული ნაკრები ღია ვარჯიშს თბილისის „დინამოს“ ბაზაზე ჩაატარებს.

საქართველოს ნაკრების შემადგენლობა უზბეკეთთან და იორდანიასთან გასამართ ამხანაგურ შეხვედრებში:

მეკარეები: როინ კვასხვაძე („ტორპედო“, ქუთაისი), ომარ მიგინეიშვილი („სამტრედია“, სამტრედია), ოთო გოშაძე („საბურთალო“, თბილისი)

მცველები: თორნიკე გრიგალაშვილი („ჩიხურა“, საჩხერე), დავით ხოჭოლავა („ჩერნომორეცი“, ოდესა, უკრაინა), გიორგი რეხვიაშვილი („ლოკომოტივი“, თბილისი), ლაშა შერგელაშვილი („რიგასი“,ლატვია), უჩა ლობჟანიძე („ატირაუ“, ყაზახეთი), გიორგი ქიმაძე („ტორპედო“, ქუთაისი), ჯიმი ტაბიძე („გენტი“, ბელგია)

ნახევარმცველები: თეიმურაზ შონია („დინამო“, ბათუმი), გიორგი განუგრავა („ჩიხურა“, საჩხერე), ოლეგ მამასახლისი („ტორპედო“, ქუთაისი), ოთარ კიტეიშვილი („დინამო“ თბილისი), ბაჩანა არაბული („დინამო“, თბილისი), გიორგი ხარაიშვილი („საბურთალო“,თბილისი), ბექა ტუღუში („ტორპედო“, ქუთაისი), საბა ლობჟანიძე („დინამო“, თბილისი), გიორგი პაპუნაშვილი („დინამო“, თბილისი)

თავდამსხმელები: ვლადიმერ დვალიშვილი („ატირაუ“, ყაზახეთი), ბუდუ ზივზივაძე („სამტრედია“, სამტრედია)

საქართველოს ნაკრების პირველი ვარჯიში (ვიდეო)

საქართველოს ეროვნულმა ნაკრებმა ამხანაგური მატჩებისთვის მოსამზადებელი ეტაპის ფარგლებში თბილისში პირველი ვარჯიში გამართა. დღეს ვლადიმირ ვაისმა ნაკრებში გამოძახებული 20 ფეხბურთელი ანდრო ჟორდანიას სახელობის „დინამო” თბილისის საწვრთნელ ბაზაზე ავარჯიშა. საქართველოს ნაკრებს დუბაიში გამგზავრებამდე ორჯერადი ვარჯიშები ექნება. ნაკრებში გამოძახებული ორი ლეგიონერი, ყაზახეთის „ატირაუს“ წევრები ვლადიმერ დვალიშვილი და უჩა ლობჟანიძე გუნდს დუბაიში შეუერთდებიან.

„ნაკრებში გამოძახებით ძალიან გახარებული ვარ, ამიხდა ეს ოცნება და ბედნიერი ვარ. რაც შეეხება პირველ ვარჯიშს, კარგი გამოვიდა. ხვალიდან ორჯერად ვარჯიშებზე გადავდივართ. იანვარში არ არის ხოლმე სანაკრებო შეკრებები. თუმცა ფეხბურთის ფედერაციამ გააკეთა ეს იმისთვის, რომ საქართველოს ჩემპიონატის ფეხბურთელები ნახოს საქმეში და დადებითი იყოს ნაკრებისათვის.“ – ბუდუ ზივზივაძე

„კარგი მომენტია, როდესაც ნაკრებში გიძახებენ ეროვნული ჩემპიონატიდან. პირველად გამომიძახეს ნაკრებში და ეს ორმაგი მოტივაციაა, ყველანაირად დავიხარჯები საქართველოს ნაკრებისთვის“ – საბა ლობჟანიძე

საქართველოს ნაკრების შემადგენლობა:

მეკარეები: როინ კვასხვაძე („ტორპედო“, ქუთაისი), ომარ მიგინეიშვილი („სამტრედია“, სამტრედია), ოთო გოშაძე („საბურთალო“, თბილისი)

მცველები: თორნიკე გრიგალაშვილი („ჩიხურა“, საჩხერე) თედორე გრიგალაშვილი („საბურთალო“, თბილისი), დავით ხოჭოლავა („ჩერნომორეცი“, ოდესა, უკრაინა), გიორგი რეხვიაშვილი („ლოკომოტივი“, თბილისი), ლაშა შერგელაშვილი („რიგასი“,ლატვია), უჩა ლობჟანიძე („ატირაუ“, ყაზახეთი), გიორგი ქიმაძე („ტორპედო“, ქუთაისი), ჯიმი ტაბიძე („გენტი“, ბელგია)

ნახევარმცველები: თეიმურაზ შონია („დინამო“, ბათუმი), გიორგი განუგრავა („ჩიხურა“, საჩხერე), ოლეგ მამასახლისი („ტორპედო“, ქუთაისი), ოთარ კიტეიშვილი („დინამო“ თბილისი), ბაჩანა არაბული („დინამო“, თბილისი), გიორგი ხარაიშვილი („საბურთალო“,თბილისი), ბექა ტუღუში („ტორპედო“, ქუთაისი), საბა ლობჟანიძე („დინამო“, თბილისი), გიორგი პაპუნაშვილი („დინამო“, თბილისი)

თავდამსხმელები: ვლადიმერ დვალიშვილი („ატირაუ“, ყაზახეთი), ბუდუ ზივზივაძე („სამტრედია“, სამტრედია)

ამხანაგური მატჩების განრიგი დუბაიში

23 იანვარი
საქართველო-უზბეკეთი

25 იანვარი
საქართველო-იორდანია

THE BEST — რომელმა ფეხბურთელებმა მიიღეს ხმები საქართველოდან

როგორც მოგეხსენებათ, ფიფას წლის საუკეთესო ფეხბურთელის ვინაობა ეროვნული ნაკრებების მთავარი მწვრთნელების, კაპიტნებისა და სპორტული ჟურნალისტების გამოკითხვის შედეგების დაჯამებით ვლინდება. ცნობილი გახდა, თუ რომელმა ფეხბურთელებმა მიიღეს ხმები საქართველოდან.

საქართველოს ეროვნული ნაკრების მთავარმა მწვრთნელმა ვლადიმირ ვაისმა ასეთი არჩევანი გააკეთა: 1. ლიონელ მესი („ბარსელონა“, არგენტინა); 2. კრიშტიანუ რონალდუ („რეალი“, პორტუგალია); 3. გარეტ ბეილი („რეალი“, უელსი).

საქართველოს ნაკრების კაპიტნის, ჯაბა კანკავას ხმები ასე გადანაწილდა: 1. ანტუან გრიზმანი („ატლეტიკო“, საფრანგეთი); 2. ლიონელ მესი („ბარსელონა“, არგენტინა); 3. კრიშტიანუ რონალდუ („რეალი“, პორტუგალია).

საქართველოს მხრიდან ჟურნალისტმა ზურაბ ფოცხვერიამ ხმები შემდეგნაირად გაანაწილა: 1. კრიშტიანუ რონალდუ („რეალი“, პორტუგალია); 2. ანტუან გრიზმანი („ატლეტიკო“, საფრანგეთი); 3. ლიონელ მესი („ბარსელონა“, არგენტინა).