მინოლეს აგენტი:”ნაპოლისგან” ველი წინადადებას”

“ლივერპულის” სათადარიგო მეკარის სიმონ მინოლეს აგენტი ადასტურებს ცნობებს, რომლის თანახმადაც, ბელგიელი კლიენტის გადაბირების ვარიანტზე “ნაპოლის” ხელმძღვანელები მუშაობენ.

“მათგან წინადადებას მომდევნო დღეებში ველი. იმის გათვალისწინებით, რომ სატრანსფერო ბაზარი მალე იხურება, შეთავაზება მალე უნდა წარმოადგინონ, წინააღმდეგ შემთხვევაში ძალიან საეჭვოა, მხარეები შეთანხმდნენ.

მათი ინტერესი მინოლესადმი ახალი ნამდვილად არ არის. კარგა ხანია, რაც “ნაპოლის” მინოლე მოსწონს. ისინი მუდმივად აკვირდებოდნენ მინოლეს გარშემო არსებულ სიტუაციას და მომავალშიც ასე იქნება,” – აცხადებს ნიკო ვაესენი.

ანჩელოტი “ლივერპულთან” განადგურების შემდეგ: “მირჩევნია, ახლა შევრცხვეთ”

“ლივერპულთან” ჩატარებულ ამხანაგურ მატჩში განცდილი გამანადგურებელი მარცხის (5-0) შემდეგ, “ნაპოლის” ახალმა თავკაცმა კარლო ანჩელოტიმ პრესასთან ისაუბრა.

“ასეთი შედეგები, რა თქმა უნდა, უსიამოვნოა, თუმცა ზოგჯერ საჭიროცაა. წაგება ყოველთვის მტკივნეულია, მაგრამ ჩვენ გვჯერა და ენთუზიაზმით ვართ აღსავსენი.

გვინდოდა გახსნილი თამაში გვეჩვენებინა. ბევრ სირთულეს წავაწყდით, განსაკუთრებით დასაწყისში, როდესაც ბურთი ჩვენს საჯარიმოსთან დავკარგეთ, მაგრამ ვცდილობდით მალევე გადაგვეჭრა პრობელემები.

ბუნებრივია, ყველაფერს დრო სჭირდება. მჯერა რომ რაღაც კარგად გავაკეთეთ. 2-0-ის შემდეგ, თამაში უფრო დაბალანსებული გახდა და რამდენიმე კარგი შანსიც გვქონდა.შეგვეძლო დაცვაში ჩავმჯდარიყავით, მაგრამ ამაზე უარი ვთქვი.

არ გვჭირდებოდა დაცვიდან თამაში. “ლივერპულის” დონის გუნდებთან თამაში ჩვენ უნდა ვაკონტროლოთ, თუნდაც ეს შერცხვენადაც დაგვიჯდეს. მირჩევნია ახლა შევრცხვეთ, ვიდრე სეზონის დაწყების შემდეგ,” – აცხადებს იტალიელი სპეციალისტი.

“ნაპოლის” პრეზიდენტი იტალიური კლუბის ყიდვას გეგმავს

“ნაპოლის” პრეზიდენტი აურელიო დე ლაურენტისი მზად არის, ბანკროტად გამოცხადებული “ბარი” შეისყიდოს. ამ ინფორმაციას La Gazetta dello Sport ავრცელებს.

გასულ სეზონში “ბარი” სერია ბ-ში გამოდიოდა, სადაც ამ კლუბმა მეშვიდე პოზიცია დაიკავა. მიუხედავად ამისა, კლუბი ფინანსური პრობლემების გამო ბანკროტად გამოცხადდა და პროფესიონალური კლუბის სტატუსიც წაერთვა.

აურელიო დე ლაურენტისი დიდი პროექტის შედგენას გეგმავს, რომელიც “ბარის” სერია ა-ში დაბრუნების ვადად სამ სეზონს განსაზღვრავს.

თუმცა, საქმე ის არის, რომ იტალიის ფეხბურთის ფედერაციის წესის თანახმად, შეუძლებელია ერთი მფლობელის ორმა კლუბმა ერთ დივიზიონში იასპარეზოს.

ამ თემაზე საუბრისას, ლაურენტისმა განაცხადა: “ვაპირებ რევოლუცია მოვახდინო და ფედერაციას ეს წესი გავაუქმებინო”.

“ბარის” შეძენით ასევე დაინტერესებულია “ლაციოს” პრეზდიენტი კლაუდიო ლოტიტო.

“ნაპოლის” პრეზიდენტი: “კრიშტიანო რონალდუს ტრანსფერი დიდებული პროპაგანდა გახლდათ”

“ნაპოლის” პრეზიდენტი აურელიო დე ლაურენტისი უშუალო კონკურენტების მიერ გაკეთებულ ბრწყინვალე ტრანსფერს გამოეხმაურა. ამ უკანასკნელმა რონალდუს “იუვენტუსში” გადასვლას პროპაგანდა უწოდა.

“იუვენტუსის” მხრიდან კრიშტიანუ რონალდუს ტრანსფერი დიდებული პროპაგანდა გახლდათ მთლიანი ჩემპიონატისთვის და იმედი მაქვს, რომ ფანებში ენთუზიაზმს უფრო გააღვივებს. დიდი ტრანსფერის გარეშე მასიმილიანო ალეგრის ეს ნიშნული უდავოდ დაეცემოდა.

ზედიზედ შვიდი მოგებული “სკუდეტოს” შემდეგ ძალიან რთულია ფანების დაინტერესება, მათი აღელვება, ისევე როგორც სპონსორების. დღევანდელი სამყარო მთლიანად ინდუსტრიასა და პოლიტიკას ეკუთვნის.

რონალდუს, თავის მხრივ, ყველაზე ჭკვიანი აგენტი ჰყავს. რუი პატრისიოს ტრანსფერის თაობაზე მას პორტუგალიაში შევხვდი და მითხრა, რომ კრიშტიანუს ტრანსფერი გამამდიდრებდა. მაგრამ მაშინ ამაზე დავეწვდი, ახლა კი “იუვენტუსმა” ამ ტრანსფერით სერია ა-ს კლუბების მარკეტინგის დონე აწია.

რონალდუ ახლა ისეთივე ახალგაზრდა აღარ არის და საეჭვოა, შეძლებს თუ არა გაღებული თანხის ამოღებას. გაუმართლებლად მიმაჩნია კარიერის დასასრულში მყოფი ფეხბურთელისთვის ასეთი ხელფასის შეთავაზება,” – აცხადებს დე ლაურენტისი.

დე ლაურენტისი: “ბენზემა და დი მარია? რატომ უნდა ვიყიდო ორი ასაკოვანი ფეხბურთელი”

“ნაპოლის” პრეზიდენტი აურელიო დე ლაურენტისი ბოლო დროს უცხოურ პრესაში გავრცელებულ ჭორებს გამოეხმაურა და საკუთარი პოზიცია საკმაოდ მკაფიოდ დააფიქსირა.

“ვცდილობ თუ არა ბენზემასა და დი მარიას დამატებას? რა თქმა უნდა, არა. მე ახალგაზრდა ფეხბურთელები მჭირდება. რატომ უნდა ვიყიდო ორი ასაკოვანი მოთამაშე? ამას მათდამი დიდი პატივისცემით ვამბობ.

ფანების მოთხოვნები უნდა დავაკმაყოფილო? ისინი გულშემატკივრები არიან, რომელთაც დიდ პატივს ვცემ და არა დირექტორები. იმედი მაქვს, სიმშვიდეს შეინარჩუნებენ და მუშაობის საშუალებას მოგვცემენ.

ედინსონ კავანი? ეს ფეხბურთელი ყოველ ათ თვეში 20 მილიონ ევროს იღებს გადასახადების გარეშე, არამგონია, მას კარიერის ბოლოს ისეთ კლუბში მოუნდეს თამაში, სადაც ხელფასი გაუნახევრდება,” – განაცხადა დე ლაურენტისმა.

“ნაპოლი” ბენზემას ტრანსფერს უმიზნებს

“ნაპოლის” ახალმა მთავარმა მწვრთნელმა, კარლო ანჩელოტიმ, გუნდში კარიმ ბენზემას მოყვანის სურვილი გამოთქვა, რომელთან ერთადაც მუშაობის საკმაოდ კარგი გამოცდილება აქვს. ამ ინფორმაციას ბრიტანული Daily Mirror ადასტურებს.

როგორც ცნობილი ხდება, “იუვენტუსის” ტრანსფერის საპასუხოდ, “ნეაპოლიტანელები” მზად არიან ბენზემას სანაცვლოდ 45 მილიონი ევრო შესთავაზონ მადრიდულ გრანდს.

იქიდან გამომდინარე, რომ “რეალი” ზინედინ ზიდანმა და კრიშტიანუ რონალდუმ დატოვეს, ბენზემას წასვლის ალბათობა ძალიან დიდია. თანაც, უნდა გავითვალისწინოთ, რომ “რეალში” ყოფნისას კარლო ანჩელოტი მუდმივად იცავდა ფრანგ თავდამსხმელს.

სტატისტიკისთვის გეტყვიტ, რომ კარიმ ბენზემა “ბერნაბეუზე” 2009 წლიდან გამოდის. მის ანგარიშზე კი 413 ოფიციალურ მატჩში გატანილი 192 გოლია.

“ნაპოლიმ” სიმონე ვერდი დაიმატა

“ნაპოლიმ” “ბოლონიას” თავდამსხმელი, სიმონე ვერდი შეიძინა. ნეაპოლურმა კლუბმა ფეხბურთელის სანაცვლოდ 25 მილიონი ევრო გადაიხადა და მასთან 5-წლიანი კონტრაქტი გააფორმა.

25 წლის შემტევი “ნაპოლიში” გადასვლასთან ახლოს იანვარშიც იყო, მაგრამ მაშინ ტრანსფერი არ შედგა.

ვერდი “მილანის” აღზრდილია. 2011 წელს მან “როსონერი” დატოვა და “ტორინოში” გადავიდა, ამის შემდეგ იყო “იუვე სტაბიაში”, “ემპოლიში”, “ეიბარსა” და “კარპიში. 2016 წელს ის “ბოლონიას” წევრი გახდა, სადაც თავი კარგად წარმოაჩინა.

ჰამშიკი მომავალზე საუბრისას: “ანჩელოტის ფაქტორი, შესაძლოა, გადამწყვეტი აღმოჩნდეს”

“ნაპოლიდან” მაურისიო სარის წასვლის შემდეგ, მარეკ ჰამშიკი საკმაოდ აქტიურად ფიქრობდა კლუბის დატოვებაზე. კარლო ანჩელოტის მოსვლამ კი, ჰამშიკი დარჩენაში დაარწმუნა.

“ჩემი ოცნება კვლავაც იგივეა – მინდა “ნაპოლისთან” ერთად იტალიის ჩემპიონი გავხდე. ყოველთვის ვამბობდი და დღესაც ვიმეორებ, მინდა “ნეაპოლიტანელებს” ოცნება რეალურად ვუქციო.

გასულ სეზონში “იუვენტუსის” შეჩერება ვერ შევძელით. ანჩელოტისთან ერთად, ახლა, უფრო ძლიერები ვართ. ის დიდებული სპეციალისტია და მისი დანიშვნა ბრწყინვალე გადაწყვეტილება იყო კლუბის მხრიდან. ეს ფაქტორი, შესაძლოა, გადამწყვეტი აღმოჩნდეს ჩემი მომავლისთვის.

მე რომ “ნაპოლი” მიყვარს, ამაზე ორი აზრი არ არსებობს, მაგრამ კლუბის დატოვება რომ მომიხდეს, სხვა იტალიურ კლუბში არავითარ შემთხვევაში არ გადავალ. სავარაუდოდ, ევროპულ კლუბში არც გადავიდოდი, რადგანაც არ შემიძლია, ჩემს ხალხს ვუღალატო,” – აცხადებს ჰამშიკი.

“ჩელსისა” და მაურისიო სარის შორის მიმდინარე მოლაპარაკებები ბოლო მომენტში ჩაიშალა

“ნაპოლის” ყოფილი მთავარი მწვრთნელის, მაურისიო სარის, ლონდონის “ჩელსიში” გადასვლა გამორირიცხა. ამ ინფორმაციას იტალიური CalcioNapoli24 ადასტურებს.

როგორც ცნობილი ხდება, 25 მაისს სარიმ 4-წლიანი კონტრაქტი შეთანხმა “ჩელსისთან”, მისი ხელფასად კი 6 მილიონი ევრო იყო გათვლილი წელიწადში. თუმცა, ბოლო მომენტში “ჩელსიმ” უარი განაცხადა “ნაპოლისთვის” სარის კონტრაქტის გასაწყვეტად 8 მილიონი ევროს გადახდაზე.

“ნაპოლის” იურისტის, მატია გრასანის, ცნობით. ნებისმიერმა კლუბმა, რომელსაც სარის კონტრაქტის შესყიდვა უნდა, “ნეაპოლიტანელებს” უნდა მიმართოს. სარის კონტრაქტში, რომელსაც ვადა 2019 წელს ეწურება, არ არის პუნქტი, რომელიც მას ინდივიდუალურად მოქმედების უფლებას აძლევს.

სარის აგენტმა ამ საკითხთან დაკავშირებით საუბრისას იხუმრა კიდეც: “ჩელსი”? ეს რა არის? მსგავსი არაფერი გამიგია, საფეხბურთო კლუბია? ჩვენ მხოლოდ “ნაპოლი” ვიცით.”

ლაურენტისი: “როცა კარლოს ფეხბურთელების ყიდვაზე უარი ვუთხარი, კონტესგან განსხვავებით, გამიგო”

“ნაპოლის” პრეზიდენტმა, აურელიო დე ლაურენტისმა, კლუბის შიდა სამზარეულოზე ღიად ისაუბრა და განმარტა, თუ რატომ არჩია ანტონიო კონტეს კარლო ანჩელოტი.

“იმედი მაქვს, ანჩელოტი ჩვენთან კიდევ ათი წლის განმავლობაში დარჩება, მაგრამ მე ყოველთვის იმაზე უნდა ვიფიქრო, თუ რა არის კლუბისთვის უკეთესი.

ყოველთვის ვცდილობ, ობიექტური გადაწყვეტილებები მივიღო და გრძნობებს არ დავეყრდნო. ნუ ღელავთ, კარლოსთან ერთად ყველაფერი კარგად იქნება.

როდესაც მან კონკრეტული ფეხბურთელების შეძენა მთხოვა და უარი ვუთხარი, გამიგო და ისე არ დაუჟინებია, როგორც კონტეს. ანჩელოტი აქ იმიტომ მოვიდა, რომ კლუბი, გუნდი მოსწონს. ის “ნაპოლის” გამოყენებას არ ცდილობს, ამაში დარწმუნებული ვარ,” – აცხადებს ლაურენტისი.

რაიოლამ ბალოტელის “ნაპოლიში” გადასვლის შანსები შეაფასა

მინო რაიოლამ მარიო ბალოტელის “ნაპოლიში” გადასვლის შანსები შეაფასა. როგორც იცით, იტალიელი თავდამსხმელი “ნიცას” მაისურით ლიგა 1-ში გატანილი 43 გოლის შემდეგ თავისუფალი აგენტის სტატუსს ფლობს.

“ბალოტელი “ნაპოლიში”? ეს კითხვა ანჩელოტის უნდა დაუსვათ. მე მხოლოდ იმის თქმა შემიძლია, რომ იმ კლუბში მასზე ძლიერი მხოლოდ ლორენცო ინსინიეაა.

შემდეგ კი ჯერი დე ლაურენტისზე იქნება, მან უნდა გადაწყვიტოს, რამდენად სურს გუნდის გაძლიერება. მასთან სპეციფიკური ურთიერთობა მაქვს, ხშირ შემთხვევაში ჩვენი მოსაზრებები ერთმანეთს უპირისპირდება.

ჩვენი ურთიერთობა ტრანსფერზე გავლენას არ იქონიებს. ლაურენტისის წყალობით “ნაპოლი” დიდ ფეხბურთს უბრუნდება და თუ დავჭირდები, მე მათ გვერდით ვიქნები,” – აცხადებს რაიოლა.

დიეგო კოშტა ანჩელოტის შეხვდა და “ნაპოლის” მაისურთან ფოტოც გადაიღო (ვიდეო)

“ნაპოლის” ახალი მთავარი მწვრთნელი, კარლო ანჩელოტი, ხუთშაბათს მადრიდის “ატლეტიკოს” თავდამსხმელს, დიეგო კოშტას შეხვდა.

როგორც იტალიური პრესა იუწყება, კოშტა და ანჩელოტი ერთმანეთს შემთხვევით შეხვდნენ ლონდონურ რესტორან Babbo-ში, სადაც იტალიელი სპეციალისტი აგენტ კია ჯურაბჩიანთან აწარმოებდა მოლაპარაკებებს.