პეპ გვარდიოლამ “მანჩესტერ სიტის” მთავარ მწვრთნელზე დანიშვნისთანავე აითვალწუნა გუნდის ინგლისელი მეკარე, ჯო ჰარტი და საკმაოდ დიდი ხნის მანძილზე არჩევდა სასურველ მეკარეს. საბოლოო ჯამში, მან არჩევანი კლაუდიო ბრავოზე გააკეთა.
ჩილელი მეკარე “მანჩესტერ სიტიში” “ბარსელონადან”, 17 მილიონი ფუნტის სანაცვლოდ გადაბარგდა, თუმცა ძირითადის ადგილის შენარჩუნება ვერ მოახერხა და პეპმა ის მალევე ჩაანაცვლა უილი კაბალიეროს მეშვეობით.
არადა, შეიძლებოდა ყველაფერი სხვაგვარად ყოფილიყო, “ქალაქელებს” არჩევანი კლაუდიო ბრავოს ნაცვლად მარკ-ანდრე ტერ შტეგენზე რომ გაეკეთებინათ…
გვარდიოლას, რომელიც ბოლო წლები მანუელ ნოიერის მაღალ კლასსა და გამბედაობას იყო მიჩვეული, სჭირდებოდა ისეთი მეკარე, რომელიც მცველებს შეტევისას წინ წასვლის უფლებას მისცემდა და ბურთის მიღებისთვის ნებისმიერ შემთხვევაში მზად იქნებოდა.
ტერ შტეგენი კი სწორედ ასეთი ტიპის მეკარეა, მაგრამ კატალონიელებს კატეგორიულად არ უნდოდათ გერმანელი მეკარის დაკარგვა, რომელმაც წინა ორი წელი ბრავოს ჩრდილში გაატარა.
ასე რომ, გვარდიოლა ბედს დაემორჩილა და ბრავო წაიყვანა მანჩესტერში. შედეგად, ის რაც “სიტიმ” ბრავოს დამატებით დაკარგა, “ბარსელონამ” მოიგო. ტერ შტეგენის მიერ “სანტიაგო ბერნაბეუზე” განხორციელებული 12 სეივიც საკმარისია იმის აღსაწერად, თუ რამდენად სწორი იყო “ლურჯ-ბროწეულისფერთა” მიერ ზაფხულში გადადგმული ნაბიჯი.
გარდა ამისა, შტეგენმა სრულყოფილად შეძლო თავისი შესაძლებლობების წარმოჩენა – პასები მოედნის ნებისმიერ მონაკვეთში, ორივე ფეხით თამაში და რაც ყველაზე მნიშვნელოვანია, ბურთთან ერთად ის თავს ძალიან კომფორტულად გრძნობდა.
პასების ოსტატი
ბოლო წლებია, რაც “ბარსელონას” საფირმო ნიშნებს ბურთის ფლობა შეადგენს, ყველაფერი, შეტევის მზადება კი მეკარიდან იწყება, შემდეგ შემტევ ფეხბურთელებზეა დამოკიდებული მანევრების განხორციელება და ბურთის ბადეში მოთავსება.
გავიხსენოთ გასული სეზონი, როდესაც “ბარსელონას” დაცვა არც ისე მწყობრად მოქმედებდა და მცველები ხშირად, პრესინგის დროს რთულ სიტუაციაშიც იგდებდნენ თავს. ასეთ დროს კი, ტერ შტეგენი ყოველთვის მათ გვერდით იყო და სთავაზობდა, ბურთი მისკენ გაეგზავნათ, რაც დაგვეთანხმებით, რომ მცველისთვის ყოველთვის დიდი შვებაა.
სტატისტიკისთვის გეტყვით, რომ “ბორუსია მიუნხენგლადბახის” 25 წლის მეტოქე საშუალოდ ერთ მატჩში უფრო მეტ გადაცემას აკეთებდა, ვიდრე მანუელ ნოიერი – 20.4 მოკლე და 6.3 გრძელ პასი თითოეულ 90 წუთში ნოიერის 16.4-ის და 5-ის წინააღმდეგ.
ეს ფოტო “ბარსელონასა” და “რეალ სოსიედადს” შორის გამართული მატჩიდანაა (3-2), რომელსაც “კამპ ნოუმ” უმასპინძლა. როგორც ვხედავთ, ტერ შტეგენი მუდამ წინაა გამოწეული და საკუთარ თავს სთავაზობს თანაგუნდელს.
სამუელ უმტიტის კი მეტოქის პრესინგისგან თავის დაღწევა და წინსვლა უჭირდა.
ბასკური გუნდის ფეხბურთელები საკმაოდ კარგად იყვნენ განლაგებულები მარცხენა ფლანგზე, მასპინძლებს კი ბურთის საპირისპირო ფლანგზე გადატანა სჭირდებოდათ. გასაჭირში მყოფ “ბარსას” ფეხბურთელს პიკე ეხსნებოდა, მაგრამ მეტოქეთა თავდამსხმელი ძალიან ახლოს იყო და ასეთი პასის გაკეთება დიდ რისკს შეიცავდა.
სწორედ ამ დროს, ცენტრალური მცველი შემობრუნდა, დაინახა ტერ შტეგენი, რომელიც სწორედ მას ეხსნებოდა და პასიც გაუკეთა. გერმანელმა მეკარეც საკმაოდ ადვილად გადასცა ბურთი პიკეს და დაძაბულობაც განიმუხტა.
ეს ფოტოც იმავე მატჩიდანაა აღებული და საკმაოდ ნათლად ჩანს, თუ როგორ ეხმარება ტერ შტეგენის სიმშვიდე დიდი ზეწოლის ქვეშ მყოფ “ბარსელონას”.
ტერ შტეგენმა ამ შემთხვევაშიც უმტიტისგან მიიღო ბურთი. გერმანელ მეკარეს მაშინვე მიუახლოვდა ჩაბი პრიეტო, მისმა თანაგუნდელებმა კი საკმაოდ ორგანიზებულად აიყვანეს ყველა ის ფეხბურთელი, რომელიც მეკარეს ეხსნებოდა.
მსგავს სიტუაციაში, ყველა სხვა მეკარე ბურთს მოიშორებდა და წინ, ძლიერად მოიგერიებდა. შესაძლოა, ეს ერთი შეხედვით ყველაზე უსაფრთხო გამოსავალია, მაგრამ გამომდინარე იქიდან, რომ “ბარსელონას” ფეხბურთელები მეორე სართულზე ბრძოლაში მუდმივად აგებდნენ “რეალ სოსიედადის” მოთამაშეებთან, ეს ბურთის დაკარგვას უდრიდა.
ნაცვლად ამისა, ტერ შტეგენი ამჩნევს, თუ როგორ იწყებს უმტიტი მოძრაობას მარცხენა ფლანგისკენ და ნელ პასს უკეთებს “ლიონის” ყოფილ მცველს. “ბარსელონა” თავის მორიგ იერიშს იწყებს…
ტერ შტეგენი პრესინგის წინააღმდეგ
პრესინგი თანამედროვე ფეხბურთის ერთ-ერთი მთავარი კომპონენტი გახდა. დღესდღეობით, ფეხბურთის ისეთი სპეციალისტები, როგორებიც არიან იურგენ კლოპი, პეპ გვარდიოლა და ტომას ტუჰელი, მუდმიავ მოუწოდებენ უბურთოდ ყოფნისას თავიანთ ფეხბურთელებს მეტოქის ნახევარზე აქტიურობისკენ.
ასეთი პრესინგის განეიტრალების ორი გზა არსებობს: მაღალი პასების მეშვეობით ბურთი წინ მოიგერიო და შემტევების იმედზე იყო, ან პრესინგს სწრაფი და ზუსტი პასები დაუპირისპირო, რითიც მეტოქის დაცვის ეშელონების გაჭრას შეძლებ.
რა თქმა უნდა, მეორე გზა გაცილებით უფრო რთულია, მაგრამ “ბარსელონა” ყოველთვის ამ მეთოდს მიმართავდა. ეს გასაკვირი არც არის, როცა გუნდში მრავლად უმაღლესი დონის ფეხბურთელები, რატომ უნდა აირჩიო უფრო რთული გზა?
დღეს, “ბარსელონა” ზეწოლას უმეტეს შემთხვევაში ტერ შტეგენის გასაოცარი ნიჭის საფუძველზე უმკლავდება.
ამ შემთხვევაში, ტერ შტეგენი მეკარის საჯარიმოში იმყოფება ბურთით და რთული სიტუაციიდან მოკლე პასებით თავის გამოძვრენას ვერ შეძლებს.
ნაცვლად ბურთის მოშორებისა, ტერ შტეგენი კიდევ ერთხელ იღებს ჭკვიანურ გადაწყვეტილებას და ივან რაკიტიჩის მიმართულებით აკეთებს გადაცემას, რომელიც მისგან 40 იარდით არის დაშორებული.
გერმანელ მეკარეს მარცხენა ფეხზე გადააქვს ბურთი და ერთი გადაცემის მეშვეობით ოთხ ფეხბურთელს აყენებს თამაშგარე მდგომარეობაში. მის ხორვატ თანაგუნდელს კი თავიუსფლად შეუძლია სახიფათო შეტევის წარმოება.
ყველაფერთან ერთად, ტერ შტეგენი ჯერ კიდევ 25 წლისაა და საუკეთესო ფორმაში ჯერაც არ ყოფილა. შესაძლოა, მისი წყალობით “ბარსელონას” მეკარის პრობლემა კიდევ 6-7 წლის მანძილზე არ ექნეს.
შესაძლოა, მსოფლიოში იყვნენ ტერ შტეგენზე უკეთესი მეკარეებიც, მაგრამ “ბარსელონასთვის” ის ზედგამოჭრილი, სრულყოფილი ვარიანტია.
