ჭდე: დანი ალვეში

“ბარსელონას” ტექნიკური შეფი, რობერტ ფერნანდესი ადასტურებს ინფორმაციას, რომლის თანახმადაც დანი ალვეში ამ ზაფხულს “კამპ ნოუს” დატოვებს.

“დანი ალვეშმა კლუბის დატოვება გადაწყვიტა. ეს მისი პირადი გადაწყვეტილებაა, რომელსაც ჩვენ პატივს ვცემთ.

პირადად მე არ მომწონს ფაქტი, რომ ის მიდის. ალვეში ექსტრაორდინალური ფეხბურთელია, რომელიც ყველას უყვარს. მაგრამ ეს მისი გადაწყვეტილებაა, ჩვენ კი ვალდებულნი ვართ, რომ მას პატივი ვცეთ.

რაც შეეხება მის პოზიციას, ჩვენ უკვე გვყავს ალეიშ ვიდალი, რომელიც გასულ წელს შემოგვიერთდა. ასევე გვყავს სერხი რობერტოც.” – განაცხადა ფერნანდესმა.

აქვე გეტყვით იმასაც, რომ ალვეშის გადაბირების ყველაზე რეალური შანსი ტურინის “იუვენტუსს” აქვს.

Cadena SER-ის მიერ გავრცელებული ინფორმაციის თანახმად, ტურინის “იუვენტუსის” ხელმძღვანელები დიდი ტრანსფერისთვის ემზადებიან.

წყაროს ცნობით, 33 წლის ბრაზილიელის დღეები ესპანეთის ჩემპიონთა რიგებში დათვლილია, რამეთუ დანი ალვეში უკვე შეუთანხმდა “ბებერ ქალბატონს”.

Cadena SER-ის ცნობით ალვეშმა იტალიურ მხარესთან 3-წლიანი კონტრაქტი გააფორმა. ტრანსფერი კი ოფიციალურად რამოდენიმე დღეში დადასტურდება.

მიუხედავად იმისა, რომ ბრაზილიელის კონტრაქტი “ბლაუგრანასთან” 2017 წელს იწურება, ის ტურინში მაინც უფასოდ გადავა.