მიუნხენის ”ბაიერნის” ნახევარმცველს ფრანკ რიბერის ახალი მიზნები აქვს. ამჯერად, 30 წლის ფეხბურთელი ”ოქროს ბურთის” მოგებაზე ფიქრობს.
”რა თქმა უნდა, მჯერა, რომ ”ოქროს ბურთის” მოგება შემიძლია. გასულ სეზონში მოედანზე ყველაფერს ვაკეთებდი, რაც ამ ტიტულის მოგებისთვის არის საჭირო. როგორც პროფესიონალი მოვიქეცი და ჩემს გუნდთან ერთად შესანიშნავი სეზონი გამომივიდა – ყველანი კმაყოფილნი დავრჩით”, – განაცხადა ფრანკმა.
”საუკეთესო მოთამაშის ტიტულის მიღება და ამავე დროს, მესისა და რონალდუზე უკეთესი შედეგის ჩვენება – შესანიშნავი მიღწევაა. ამჟამად, საკუთარი თავით კმაყოფილი ვარ. სპორტული თვალსაზრისით, ეს ტიტული ჩემთვის ძალიან მნიშვნელოვანია, მისი წყალობით, თავდაჯერებულობა მემატება’, – დაასრულა რიბერიმ.
შეგახსენებთ, რომ გასულ სეზონში 30 წლის ფრანგმა ყველა ტურნირზე 11 გოლი გაიტანა და ამავე დროს, 18 შედეგიანი გადაცემაც გააკეთა.
ალექსანდრე მატევოსოვი