Franck Ribery – Fanebi.Com – ფეხბურთი, კალათბურთი, რაგბი, სხვა

რიბერი 2-3 კვირას გამოტოვებს

Posted on ოქტომბერი 16, 2016 by ბექა დოგრაშვილი

მიუნხენის “ბაიერნის” ნახევარმცველი ფრანკ რიბერი საკუთარ გუნდს უახლოეს მატჩებში ვერ დაეხმარება. 33 წლის ფრანგ ფეხბურთელს კუნთებთან დაკავშირებული პრობლემები აწუხებს.

“რიბერის ორიდან სამ კვირამდე მოცდა მოუწევს, სანამ მოედანზე გასვლა შეეძლება”, – აღნიშნა “ბაიერნის” მწვრთნელმა ჰერმან გერლანდმა.

რიბერიმ “აინტრახტთან” გუშინ გამართული მატჩი (2:2) გამოტოვა. ფრანგი ფეხბურთელი ვერც ჩემპიონთა ლიგის ჯგუფურ ეტაპზე “პეესვე”-ს წინააღმდეგ 19 ოქტომბერს გასამართ შეხვედრაში მიიღებს მონაწილეობას. რიბერი 22 ოქტომბერს მიუნხენგლადბახის “ბორუსიასთან” ჩასატარებელ მატჩსაც გამოტოვებს.

„ოქროს ბურთი 2015“ — ვის ერგო ქართველთა ხმები

Posted on იანვარი 11, 2016იანვარი 11, 2016 by ბექა დოგრაშვილი

როგორც მოგეხსენებათ, „ოქროს ბურთის“ გამარჯვებულის ვინაობა ეროვნული ნაკრებების მთავარი მწვრთნელების, კაპიტნებისა და სპორტული ჟურნალისტების გამოკითხვის შედეგების დაჯამებით ვლინდება. ცნობილი გახდა, თუ ვის ერგო ქართველთა ხმები.

საქართველოს ეროვნული ნაკრების მთავარმა მწვრთნელმა კახა ცხადაძემ ასეთი არჩევანი გააკეთა: 1. ლიონელ მესი („ბარსელონა“, არგენტინა); 2. კრიშტიანუ რონალდუ („რეალი“, პორტუგალია); 3. რობერტ ლევანდოვსკი („ბაიერნი“, პოლონეთი).

საქართველოს ნაკრების კაპიტან ჯაბა კანკავას ხმები ასე გადანაწილდა: 1. ლიონელ მესი („ბარსელონა“, არგენტინა); 2. კრიშტიანუ რონალდუ („რეალი“, პორტუგალია); 3. მანუელ ნოიერი („ბაიერნი“, გერმანია).

საქართველოს მხრიდან ჟურნალისტმა ზურაბ ფოცხვერიამ ხმები შემდეგნაირად გაანაწილა: 1. კრიშტიანუ რონალდუ („რეალი“, პორტუგალია); 2. ლიონელ მესი („ბარსელონა“, არგენტინა); 3. ლუის სუარესი („ბარსელონა“, ურუგვაი).

რიბერი ინდივიდუალური პროგრამით ვარჯიშობს

Posted on იანვარი 7, 2016 by ბექა დოგრაშვილი

მიუნხენის “ბაიერნის” ნახევარმცველმა ფრანკ რიბერიმ ვარჯიში ინდივიდუალური პროგრამით განაახლა.

32 წლის ფრანგი ფეხბურთელი ჯერჯერობით ბურთის გარეშე ვარჯიშობს.

შეგახსენებთ, რომ ფრანკ რიბერი ფეხბურთელი ჩემპიონთა ლიგის ჯგუფურ ეტაპზე ზაგრების “დინამოს” წინააღმდეგ 11 დეკემბერს გამართულ მატჩში დაშავდა. გარდა ამისა, ფრანგ ფეხბურთელს 2015 წლის უმეტესი პერიოდი ტერფის ტრავმის გართულების გამო გაუცდა.

რიბერის შესაძლოა, კიდევ ორი თვე გაუცდეს

Posted on დეკემბერი 17, 2015 by ბექა დოგრაშვილი

მიუნხენის “ბაიერნის” ნახევარმცველ ფრანკ რიბერის მორიგი ტრავმა შესაძლოა, იმაზე სერიოზული აღმოჩნდეს, ვიდრე ვარაუდობდნენ.

შეგახსენებთ, რომ 32 წლის ფრანგი ფეხბურთელი ჩემპიონთა ლიგის ჯგუფურ ეტაპზე ზაგრების “დინამოს” წინააღმდეგ 11 დეკემბერს გამართულ მატჩში დაშავდა. რიბერი ზამთრის შესვენების დროს უნდა მომჯობინებულიყო, მაგრამ, როგორც აღმოჩნდა, “ბაიერნის” გარემარბმა ბარძაყის კუნთებიც დაიშავა. არ არის გამორიცხული, რიბერის ორი თვე გაუცდეს.

შეგახსენებთ, რომ ფრანკ რიბერის მიმდინარე კალენდარულ წელიწადში ცხრა თვე არ უთამაშია.

გვარდიოლამ რიბერის ემოციების მოთოკვისკენ მოუწოდა

Posted on მარტი 6, 2015 by ბექა დოგრაშვილი

მიუნხენის “ბაიერნის” მთავარმა მწვრთნელმა ხოსეპ გვარდიოლამ გუნდის ნახევარმცველ ფრანკ რიბერის ემოციების მოთოკვისაკენ მოუწოდა. ესპანელმა სპეციალისტმა აღნიშნა, რომ ფრანგი ფეხბურთელის შეუკავებლობა შეიძლება ბავარიულ გუნდს ძვირად დაუჯდეს.

შეგახსენებთ, რომ გერმანიის თასის მერვედფინალურ ეტაპზე ბრაუნშვაიგის “აინტრახტის” წინააღმდეგ გამართულ მატჩში (2:0) რიბერიმ თავი ვერ შეიკავა და მეტოქე გუნდის მცველ ბენიამინ სეკელს წაეკინკლავა.

“ძალიან ცუდი იქნება, თუ ჩემპიონთა ლიგის რომელიმე მატჩში მოედანზე ათი კაცით დავრჩებით. ასეთი რამ აღარ უნდა განმეორდეს. ოთხშაბათს გამართული მატჩი ფინალის ტოლფასი იყო. ჩვენ საკუთარი ემოცების კონტროლი უნდა ვისწავლოთ”, – გვარდიოლას სიტყვები “ბილდმა” გამოქვეყნა.

„ოქროს ბურთი 2014“ — ვის ერგო ქართველთა ხმები

Posted on იანვარი 13, 2015იანვარი 13, 2015 by ბექა დოგრაშვილი

გამოკითხვაში საკუთარი არჩევანი საქართველოს ეროვნული ნაკრების ყოფილმა მთავარმა მწვრთნელმა თემურ ქეცბაიამ პოსტის დატოვებამდე რამდენიმე კვირით ადრე გააკეთა. მისი ხმები ასე გადაანაწილა: 1. კრიშტიანუ რონალდუ („რეალი“, პორტუგალია); 2. მანუელ ნოიერი („ბაიერნი“, გერმანია); 3. არიენ რობენი („ბაიერნი“, ჰოლანდია).

საქართველოს ნაკრების კაპიტანმა ჯაბა კანკავამ ასეთი არჩევანი გააკეთა: 1. ანდრეს ინიესტა („ბარსელონა“, ესპანეთი); 2. კრიშტიანუ რონალდუ („რეალი“, პორტუგალია); 3. ლიონელ მესი („ბარსელონა“, არგენტინა).

საქართველოს მხრიდან ჟურნალისტმა ზურაბ ფოცხვერიამ ხმები შემდეგნაირად გაანაწილა: 1. კრიშტიანუ რონალდუ („რეალი“, პორტუგალია); 2. ლიონელ მესი („ბარსელონა“, არგენტინა); 3. გარეტ ბეილი („რეალი“, უელსი).

აქვე შეგიძლიათ იხილოთ გამოკითხვის შედეგების სრული სია: „ოქროს ბურთის“ შედეგები

„ჰამბურგი“ მოედანზე შეჭრილ ფანს სტადიონზე სამუდამოდ არ დაუშვებს

Posted on ოქტომბერი 31, 2014 by Alix

ფანის მიმართ, რომელიც „ჰამბურგსა“ და მიუნხენის „ბაიერნს“ შორის მატჩის ბოლოს მოედანზე შეიჭრა და ფრანკ რიბერის შეურაცხყოფა მიაყენა, გამოძიება დაიწყო.

ამავდროულად, „ჰამბურგმა“ ხსენებულ გულშემატკვივარს სტადიონზე შესვლა სამუდამოდ აუკრძალა.

შეგახსენებთ, რომ მატჩის შემდეგ „ჰამბურგმა“ მიუნხენის „ბაიერნს“ და ფრანკ რიბერის ოფიციალურად მოუბოდიშა.

ზიდანი იმედს არ კარგავს

Posted on ოქტომბერი 28, 2014 by ბექა დოგრაშვილი

ფეხბურთის ფრანგი სპეციალისტი ზინედინ ზიდანი იმედოვნებს, რომ მიუნხენის “ბაიერნის” ნახევარმცველი ფრანკ რიბერი სანაკრებო კარიერის დასრულებას გადაიფიქრებს და ეროვნულ გუნდს დაუბრუნდება. შეგახსენებთ, რიბერიმ ზაფხულში სანაკრებო კარიერის დასრულების შესახებ განცხადება გააკეთა.

“კარგი იქნებოდა, ნაკრებში რიბერის დაბრუნება. იმედი მაქვს, ის კიდევ ერთხელ დაფიქრდება ამ საკითხზე და გუნდში დაბრუნების გადაწყვეტლებას მიიღებს. რიბერი ჩვენს გუნდს ძალიან დაეხმარებოდა”, – ციტირებს ზიდანის სიტყვებს Todomercadoweb-ი.

რიბერის ყელში ამოუვიდა

Posted on სექტემბერი 18, 2014 by ბექა დოგრაშვილი

მიუნხენის “ბაიერნის” ნახევარმცველმა ფრანკ რიბერიმ განაცხადა, რომ ტრავმებისგან დაიღალა.

შეგახსენებთ, რომ ფრანგ ფეხბურთელს ზურგის ტკივილების გამო ბრაზილიაში წელს გამართული მსოფლიოს ჩემპიონატის გამოტოვება მოუხდა. ცოტა ხნის წინათ კი, რიბერიმ მუხლი აიტკია, რის გამოც “მანჩესტერ სიტის” წინააღმდეგ გუშინ გამართულ საჩემპიონთალიგო მატჩში უქმობა მოუწია.

“ყელში ამომივიდა! ეს სიტუაცია საშინლად მაშფოთებს. არ ვიცი, რა ხნით ვიქნები ასე უქმად”, – ციტირებს რიბერის სიტყვებს გერმნაული გამოცემა “კიკერი”.

ფრანკ რიბერიმ სანაკრებო კარიერა დაასრულა

Posted on აგვისტო 13, 2014აგვისტო 13, 2014 by ბექა დოგრაშვილი

მიუნხენის “ბაიერნის” 31 წლის ნახევარმცველმა ფრანკ რიბერიმ სანაკრებო კარიერა დაასრულა.

“ვგრძნობ, რომ ეს მომენტი დადგა. მინდა, რომ მთელი კონცენტრაცია ოჯახზე და “ბაიერნში” თამაშზე გავაკეთო. მსურს, გზა ახალგაზრდა ფეხბურთელებს დავუთმო”, – ციტირებს რიბერის სიტყვებს Goal.com-ი.

ფრანკ რიბერი საფრანგეთის ეროვნული ნაკრების ღირსებას 2006 წლიდან იცავდა. მან “მამლების” რიგებში 82 მატჩი ჩაატარა. ფეხბურთელმა მონაწილეობა მიიღო 2006 და 2010 წლებში გამართულ მსოფლიოს ჩემპიონატებზე, ასევე ევრო-2008-სა და ევრო-2012-ზე. რიბერიმ ბრაზილიაში წელს გამართული მუნდიალი ტრავმის გამო გამოტოვა.

FIFA 15 — ყველაზე მაღალრეიტინგული ფეხბურთელები

Posted on აგვისტო 11, 2014 by ბექა დოგრაშვილი

ვიდეოთამაშ FIFA 15-ის გამოსვლამდე სულ ცოტა დრო რჩება, მანამდე კი ვებგვერდმა Purely Football იმ ფეხბურთელთა სავარაუდო სია გამოაქვეყნა, რომელთაც აღნიშნულ თამაშში ყველაზე მაღალი რეიტინგი ექნებათ.

Purely Football-ის ვერსიით, FIFA 15-ის ყველაზე მაღალრეიტინგული მოთამაშეები იქნებიან:

ადგილი:	ფეხბურთელი:		რეიტინგი:
10.		სერხიო აგუერო (“მანჩესტერ სიტი”)	88
9.		რობერტ ლევანდოვსკი (“ბაიერნი”)	88
8.		იაია ტურე (“მანჩესტერ სიტი”)	88
7.		ფრანკ რიბერი (“ბაიერნი”)	89
6.		გარეტ ბეილი (“რეალი”)	89
5.		არიენ რობენი (“ბაიერნი”)	89
4.		ლუის სუარესი (“ბარსელონა”)	90
3.		ზლატან იბრაჰიმოვიჩი (“პსჟ”)	91
2.		კრიშტიანუ რონალდუ (“რეალი”)	93
1.		ლეო მესი (“ბარსელონა”)	94

ანრი: “ოქროს ბურთი” რიბერისთვის უნდა მიეცათ”

Posted on აგვისტო 6, 2014 by ბექა დოგრაშვილი

ხვალ გამთენიისას მიუნხენის “ბაიერნსა” და MLS-ის ნაკრებს შორის აშშ-ში ამხანაგური შეხვედრა გაიმართება. მატჩისწინა პრესკონფერენციაზე ერთმანეთს ბავარიელთა ნახევარმცველი ფრანკ რიბერი და “ნიუ-იორკ რედ ბულსის” თავდამსხმელი ტიერი ანრი შეხვდნენ. ანრიმ თანამემამულის მიმართ საქებარი სიტყვები არ დაიშურა.

“რიბერი უანგაროდ თამაშობს. მაშინაც კი, როცა მას გოლის გატანა შეუძლია, თანაგუნდელისთვის პასის გაკეთებას ამჯობინებს. ვფიქრობ, რომ შარშან “ოქროს ბურთი” მისთვის უნდა მიეცათ, რადგან “ბაიერნმა” ყველა შესაძლო ტიტული მოიგო და ამაში რიბერიმ წვლილი დიდია. თუმცა, როგორც ხშირად ხდება, ფეხბურთშიც მეტ ყურადღებას ინდივიდუალისტებს ვაქცევთ. რიბერი ასეთი არ არის. ვაჟიშვილი რომ მყავდეს, ვეტყოდი, რომ რიბერის და ტომას მიულერის თამაშისთვის ეცქირა”, – ანრის სიტყვები “ფრანს ფუტბოლმა” გამოაქვეყნა.

ცნობისთვის, “ბაიერნსა” და MLS-ის ნაკრებს შორის ამხანაგური მატჩი ხვალ, თბილისის დროით დილის 05:30 საათზე დაიწყება.