ჭდე: თემურ ქეცბაია

„ოქროს ბურთი 2015“ — ვის ერგო ქართველთა ხმები

Posted on by ბექა დოგრაშვილი

როგორც მოგეხსენებათ, „ოქროს ბურთის“ გამარჯვებულის ვინაობა ეროვნული ნაკრებების მთავარი მწვრთნელების, კაპიტნებისა და სპორტული ჟურნალისტების გამოკითხვის შედეგების დაჯამებით ვლინდება. ცნობილი გახდა, თუ ვის ერგო ქართველთა ხმები.

საქართველოს ეროვნული ნაკრების მთავარმა მწვრთნელმა კახა ცხადაძემ ასეთი არჩევანი გააკეთა: 1. ლიონელ მესი („ბარსელონა“, არგენტინა); 2. კრიშტიანუ რონალდუ („რეალი“, პორტუგალია); 3. რობერტ ლევანდოვსკი („ბაიერნი“, პოლონეთი).

საქართველოს ნაკრების კაპიტან ჯაბა კანკავას ხმები ასე გადანაწილდა: 1. ლიონელ მესი („ბარსელონა“, არგენტინა); 2. კრიშტიანუ რონალდუ („რეალი“, პორტუგალია); 3. მანუელ ნოიერი („ბაიერნი“, გერმანია).

საქართველოს მხრიდან ჟურნალისტმა ზურაბ ფოცხვერიამ ხმები შემდეგნაირად გაანაწილა: 1. კრიშტიანუ რონალდუ („რეალი“, პორტუგალია); 2. ლიონელ მესი („ბარსელონა“, არგენტინა); 3. ლუის სუარესი („ბარსელონა“, ურუგვაი).

 

ქეცბაიას აპოელმა “ასტერასი” დაამარცხა

Posted on by ბექა დოგრაშვილი

უეფას ევროპის ლიგის ჯგუფური ეტაპის მესამე ტურში თემურ ქეცბაიას მიერ დამოძღვრილმა აპოელმა ტრიპოლისის “ასტერასი” მიიღო და მეტოქე ანგარიშით 2:1 დაამარცხა. კვიპროსელებმა გოლი მატჩის დებიუტშივე გაუშვეს. შეხვედრის მე-8 წუთზე სტუმრები ბრაიან ლიუიმ დააწინაურა. მალევე სტადიონზე ელექტროენერგიის პრობლემა წარმოიშვა, რის გამოც შეხვედრა რამდენიმე წუთით შეწყდა, პირველ ნახევარს კი 12 წუთი დაემატა. ქეცბაიას გუნდმა პირველივე ტაიმში მოახერხა წონასწორობის აღდგენა: კომპენსირებულ დროში პენალტი ფერნანდო კავენაგიმ გამოიყენა. აპოელს გამარჯვება ბრაზილიელი მცველის, კარლაოს მიერ გატანილმა გოლმა მოუტანა.

ამრიგად, აპოელმა პირველი გამარჯვება ჩაიწერა, ჯგუფში “ასტერასი” ჩამოიტოვა და ახლა მესამე ადგილზეა. მეოთხე ტურში ქეცბაიას გუნდი “ასტერასს” უკვე საბერძნეთში დაუპირისპირდება.

ჯგუფის მეორე შეხვედრაში გელზენკირხენის “შალკე” შინ პრაღის “სპარტას” დაუზავდა — 2:2.

ევროპის ლიგა
K ჯგუფი
აპოელი — “ასტერასი” 2:1 (1:1)

გოლები: კავენაგი 45+9′ (პენ), კარლაო 59′ — ლიუი 8′.
გაფრთხილებები: შტილიჩი 38′, კავენაგი 45+11′, ვატერმანი 90+5′ — კურბელისი 4′.
მთავარი არბიტრი: ალექსეი ესკოვი (რუსეთი).

 

თემურ ქეცბაია: “ასტერასს” ორივე მატჩი უნდა მოვუგოთ”

Posted on by ბექა დოგრაშვილი

დღეს უეფას ევროპის ლიგის ჯგუფური ეტაპის მესამე ტურის მატჩები გაიმართება. თემურ ქეცბაიას მიერ დამოძღვრილი აპოელი საკუთარ მოედანზე ტრიპოლისის “ასტერასს” დაუპირისპირდება. კვიპროსულმა გუნდმა პირველი ორივე მატჩი – ჯერ “შალკესთან” (0:3) და შემდეგ “სპარტასთან” (0:2) მარცხით დაასრულა და ჯგუფიდან გასვლის შანსები მკვეთრად შეიმცირა. უქულოდ დარჩენილ აპოელს ჯგუფში ბოლო ადგილი უკავია, “ასტერასს”კი აქტივში 1 ქულა აქვს. მიუხედავად წარუმატებელი სტარტისა, ქეცბაიას იმედი აქვს, რომ მისი გუნდი “ასტერასს” როგორც კვიპროსში, ასევე საბერძნეთში დაამარცხებს.

“ჩვენ უნდა მოვიგოთ. ევროთასებზე ასპარეზობის გასაგრძელებლად ორივე მატჩში უნდა გავიმარჯვოთ, მაგრამ ვერმოგება სამყაროს დასასრული არ იქნება. ჩვენი მთავარი მიზანი კვიპროსის ჩემპიონატისა და თასის მოგებაა. ამის მიუხედავად, ევროთასებზე ასპარეზობას უბრძოლველად არ დავთმობთ. “ასტერასი” ძლიერი მეტოქეა და ბოლო ოთხ წელიწადში საბერძნეთის ერთ-ერთ საუკეთესო გუნდად გვევლინება”, – ციტირებს ქეცბაიას სიტყვებს Cyprusscore-ი.

მიუხედავად იმისა, რომ აპოელს ევროთასებზე გასული წლის აგვისტოს შემდეგ არ მოუგია, თემურ ქეცბაიას სჯერა, რომ მის გუნდს ევროპაში წარმატების მიღწევა შეუძლია.

“საკითხი იმაში მდგომარეობს, თუ რა გინდა და რისი მიღწევა შეგიძლია. თუ ამბიცია აღემატება გუნდის ძალას, მაშინ ვერაფერს ვერ მივაღწევთ. ჩვენს გუნდს ევროპაში ბრძოლა შეუძლია და არ ვთვლი, რომ ევროთასებზე კრახი განვიცადეთ.

აპოელი ბოლო ხუთი წლის განმავლობაში ევროპაში თანმიმდევრულად იბრძვის. ევროთასებზე არიან კლუბები – მაგალითად, პოლონური გუნდები, რომელთაც ჩვენზე დიდი ბიუჯეტი აქვთ, მაგრამ არ გაუკეთებიათ ის, რისი გაკეთებაც აპოელმა შეძლო”, – დაასრულა თემურ ქეცბაიამ.

აპოელსა და “ასტერასს” შორის მატჩი დღეს, თბილისის დროით 21: 00 საათზე დაიწყება და მას ალექსეი ესკოვის თავკაცობით რუს მსაჯთა ბრიგადა მოემსახურება.

 

თემურ ქეცბაია ტექბოლით გაერთო (ვიდეო)

Posted on by ბექა დოგრაშვილი

ნიქოზიის აპოელში, რომელსაც თემურ ქეცბაია თავკაცობს, ტექბოლი დაინერგა. ეს ფეხბურთზე დაფუძნებული ახალი მიმდინარეობაა, რომლის სათამაშოდ საჭიროა სპეციალური მაგიდა და ბურთი. ტექბოლის შემქმნელები ამბობენ, რომ ეს თამაში ხელს უწყობს მოთამაშის კონცენტრაციის გაუმჯობესებასა და გამძლეობის დახვეწას, ასევე ახალი ტექნიკური უნარების შეძენას.

ტექბოლზე საკუთარი ძალები თემურ ქეცბაიამაც მოსინჯა.

 

თემურ ქეცბაია: “მივიღეთ ის, რაც დავიმსახურეთ”

Posted on by ბექა დოგრაშვილი

თემურ ქეცბაიას მიერ დამოძღვრილი აპოელი უეფას ევროპის ლიგის K ჯგუფის მეორე ტურშიც დამარცხდა. კვიპროსული გუნდმა პრაღაში ადგილობრივ “სპარტასთან” შეხვედრა ანგარიშით 0:2 დათმო.

მატჩისშემდგომ პრესკონფერენციაზე ქეცბაიამ განაცხადა, რომ აპოელმა “ასტერასის” წინააღმდეგ გასამართი მომდევნო ორი მატჩი უნდა მოიგოს, რათა ჯგუფიდან გასვლის შანსი შეინარჩუნოს.

“გუნდს სჭირდება ლიდერები. ტრავმების მხრივ გარკვეული პრობლემები გვქონდა. ამის მიუხედავად, ზოგიერთ ნიუანსში თავი კარგად წარმოვაჩინეთ.

რა თქმა უნდა, გამძლეობაც უნდა ვახსენოთ, რადგან კვიპროსის ჩემპიონატის ფინიშსა და წინასასეზონო მზადებას შორის დრო ძალზედ მოკლეა. ფეხბურთელებიც ადამიანები არიან. აუცილებელია, რომ სეზონი ადრე დასრულდეს.

დღეს ის მივიღეთ, რაც დავიმსახურეთ. რეალისტები უნდა ვიყოთ. “ასტერასს” ორივე შეხვედრა უნდა მოვუგოთ, რათა ჯგუფიდან გასვლის შანსი შევინარჩუნოთ. დავმარცხდით, მაგრამ ბრძოლას ვაგრძელებთ. მართალია, დღეს ქომაგები დავამწუხრეთ, თუმცა იმედი მაქვს, მომდევნო მატჩში შევძლებთ მათ გაღიმებას.

შესვენებაზე ჩემს მოთამაშეებს ვუთხარი, რომ ზედმეტად აფასებენ გუნდს, რომელიც ასეთ პატივისცემას არ იმსახურებს. ფეხბურთელები არ უნდა გავაკრიტიკოთ. ორშაბათს მნიშვნელოვანი შეხვედრა გვაქვს (“ენოსისთან” – ავტ), რომელიც უნდა მოვიგოთ. თავი მაღლა უნდა ავწიოთ, ეს მატჩი უკვე წარსულია, ჩვენ კი წინ უნდა გავიხედოთ.

კვიპროსული გუნდისთვის იოლი არ არის ევროსარბიელზე ძირითადი შემადგენლობის ხუთი-ექვსი ფეხბურთელის დაკარგვა. მომიწია, დაცვითი ნახევარმცველები ცენტრალურ მცველებად და შემტევი ნახევარმცველები დაცვით ნახევარმცველებად მეთამაშებინა”, – ციტირებს ქეცბაიას სიტყვებს Cyprusscore-ი.

საკადრო პრობლემების გამო თემურ ქეცბაიას ძირითად შემადგენლობაში 1997 წელს დაბადებული რაფაელ ანასტასიუს დაყენება მოუწია, რომელმაც თავი კარგად წარმოაჩინა და გუნდის თავკაცისგან საქებარი სიტყვებიც დაიმსახურა.

“ეს ბიჭი ახალგაზრდულ გუნდში ვნახე და მისმა თამაშმა ჩემზე შთაბეჭდილება მოახდინა. დღეს მას შეუძლია, იამაყოს. დღევანდელ მატჩში ჩვენი გუნდის რიგებიდან საუკეთესო მოთამაშედ სწორედ ანასტასიუს დავასახელებდი. მწვრთნელისთვის ადვილი არ არის, როდესაც გუნდის საუკეთესო მოთამაშე 18 წლის ფეხბურთელია. ჩვენ წავაგეთ მატჩი, მაგრამ მოვიგეთ ფეხბურთელი”, – დაასრულა ქეცბაიამ.

 

ქეცბაიას აპოელი პრაღაშიც დამარცხდა (ვიდეო)

Posted on by ბექა დოგრაშვილი

თემურ ქეცბაიას მიერ დამოძღვრილი აპოელი უეფას ევროპის ლიგის K ჯგუფის მეორე ტურშიც დამარცხდა. კვიპროსული გუნდმა პრაღაში ადგილობრივ “სპარტასთან” შეხვედრა ანგარიშით 0:2 დათმო. მატჩი თანაბარ, არცთუ ისე მაღალ ტემპში დაიწყო. 24-ე წუთზე ანგარიშიც გაიხსნა: ჩეხთა მცველის, იაკუბ ბრაბეცის მახვილგონივრული გადაცემის შემდეგ “სპარტას” ერთ-ერთი ლიდერი დავიდ ლაფატა ხელსაყრელ პოზიციაზე გავიდა და ბურთი დაუცველის კარის წინ მდგარ ნიგერიელ ახალწვეულ კეჰინდე ფატაის გადააწოდა, რომელმაც მასპინძლები დააწინაურა.

მე-60 წუთზე გოლი თავად ბრაბეცმაც გაიტანა: კუთხურის გათამაშების შემდეგ სტუმართა მცველებს საკუთარ საჯარიმოში ჩეხი ფეხბურთელი გამოეპარათ და ამ უკანასკნელსაც ახლო მანძილიდან გოლის გატანა არ გასჭირვებია — 2:0.

ჯგუფის მეორე შეხვედრაში გელხენკირხენის “შალკემ” ტრიპოლისის “ასტერასი” ანგარიშით 4:0 გაანადგურა.

ამრიგად, უქულოდ დარჩენილი აპოელი ჯგუფში ბოლო ადგილს იკავებს. კვიპროსელებს 1 ქულით უსწრებს “ასტერასი”, დღევანდელი გამარჯვების შემდეგ 4 ქულა დააგროვა “სპარტამ”, შალკე” კი ჯგუფს უდანაკარგოდ ლიდერობს.

ევროპის ლიგა
K ჯგუფი
“სპარტა” — აპოელი 2:0 (1:0)

გოლები: ფატაი 24′, ბრაბეცი 60′.
გაფრთხილებები: ირაჩეკი 22′, მატეიოვსკი 47′ — ვანდერი 19′, ანტონიადესი 27′, მარიუ სერჟიუ 29′, არტიმატასი 40.
მთავარი არბიტრი: პაველ გილი (პოლონეთი).

 

ქეცბაია: “პრაღაში დადებითი შედეგისთვის ჩამოვედით”

Posted on by ბექა დოგრაშვილი

დღეს უეფას ევროპის ლიგის ჯგუფური ეტაპის მეორე ტურის მატჩები გაიმართება. თემურ ქეცბაიას მიერ დამოძღვრილი აპოელი პრაღაში ადგილობრივი “სპარტას” წინააღმდეგ ითამაშებს.

შეგახსენებთ, რომ პირველ ტურში აპოელი შინ გელზენკირხენის “შალკესთან” ანგარიშით 0:3 განადგურდა. “სპარტა” გასვლაზე ტრიპოლისის “ასტერასს” დაუზავდა — 1:1.

მიუხედავად ცუდი სტარტისა, ქეცბაიას სჯერა, რომ ჯგუფიდან გამსვლელი ორი გუნდის ვინაობა ეტაპის ბოლოს გადაწყდება.

“ჯგუფური ეტაპი ჯგუფის უკანასკნელ მატჩამდე გრძელდება. აქ დადებითი შედეგისთვის ჩამოვედით. გარკვეული პრობლემები გვაქვს, თუმცა პრობლემები ყოველთვის არის. ყველაფერს გავაკეთებთ იმისთვის, რომ ეს პრობლემები მოედანზე არ გამოჩნდეს”, – აღნიშნა თემურ ქეცბაიამ მატჩისწინა პრესკონფერენციაზე.

აპოელმა 26 სექტემბერს კვიპროსის ჩემპიონატში “არისი” ანგარიშით 4:0 გაანადგურა. “სპარტა” 27 სექტემბერს ეროვნულ ჩემპიონატში თანაქალაქელ “სლავიასთან” 0:1 დამარცხდა.

თემურ ქეცბაიამ განაცხადა, რომ აპოელის სამწვრთნელო შტაბმა ჩეხური გუნდის ბოლო მატჩი დეტალურად გაარჩია და საჭირო დასკვნები გააკეთა.

“სპარტამ” რამდენიმე კარგი ფეხბურთელი დაიმატა და ახლა ჩვენი მეტოქე უფრო ძლიერია, ვიდრე გასულ წლებში იყო. ამას ჩეხეთის ჩემპიონატში მათი პოზიციაც ადასტურებს (სატურნირო ცხრილის ლიდერია – ავტ). მოწინააღმდეგის რამდენიმე საშინაო და გასვლითი მატჩი ვნახეთ, მათი უკანასკნელი მატჩი დეტალურად გავარჩიეთ. მათ შეუძლიათ გატანა, თუმცა ბევრ გოლსაც უშვებენ. “სპარტა” ის გუნდია, რომელსაც შეუძლია, მცირე შეცდომის გამო დაგსაჯოს”, – ციტირებს ქეცბაიას სიტყვებს cyprusscore-ი.

მატჩი “სპარტასა” და აპოელს შორის დღეს, თბილისის დროით 21:00 საათზე დაიწყება და მას პაველ გილის თავკაცობით პოლონელ მსაჯთა ბრიგადა მოემსახურება.

 

ქეცბაიას აპოელი “შალკესთან” დამარცხდა (ვიდეო)

Posted on by ბექა დოგრაშვილი

თემურ ქეცბაიას მიერ დამოძღვრილმა აპოელმა უეფას ევროპის ლიგის სასტარტო მატჩში გელზენკირხენის “შალკე” მიიღო და ანგარიშით 0:3 დამარცხდა.

კვიპროსელებმა შეხვედრა აქტიურად დაიწყეს, თუმცა “შალკემ” მალევე მოახერხა ტერიტორიული და სათამაშო უპირატესობის დაუფლება. გერმანელებმა მასპინძელთა კართან არაერთი სახიფათო მომენტი შექმნეს, ორჯერ შორეული დარტყმით ბურთი ხარიხასაც გაარტყეს, 28-ე წუთზე კი ანგარიში გახსნეს, როცა საჯარიმო დარტყმის შესრულების შემდეგ ჟოელ მატიპმა კარიდან გამოსულ მეკარესაც და მეურვესაც დაასწრო თავით თამაში და ბურთი ზუსტი მიმართულებით გადაგზავნა. მატჩამდე ქეცბაია სწორედ იმაზე ამახვილებდა ყურადღებას, რომ “შალკეს” ფეხბურთელები სტანდარტულ მომენტებს ძალიან კარგად იყენებენ და ამიტომ, კვიპროსელ მცველებს განსაკუთრებული ყურადღება მართებდათ.

ზუსტად შვიდ წუთში “შალკეს” თავდამსხმელმა კლას-იან ჰუნტელაარმა შორეული დარტყმით გერმანელთა უპირატესობა ორბურთიანი გახადა.

71-ე წუთზე ჰუნტელაარმა დუბლი შეასრულა და საბოლოო შედეგი დააფიქსირა — 0:3.

აღსანიშნავია, რომ მატჩის 77-ე წუთზე კვიპროსელები მოედანზე რიცხობრივ უმცირესობაში დარჩნენ: მთავარი არბიტრის სიტყვიერი შეურაცხყოფისა და ემოციური პროტესტის გამო მოედნიდან ტომას დე ვინსენტი გააძევეს.

ჯგუფის მეორე შეხვედრა, რომელიც ტრიპოლისის “ასტერასსა” და პრაღის “სპარტას” შორის გაიმართა, ფრედ, ანგარიშით 1:1 დასრულდა.

ორი კვირის შემდეგ ჯგუფის მეორე ტურის მატჩები შედგება: “სპარტა” აპოელს უმასპინძლებს, “შალკე” კი “ასტერასს” მიიღებს.

ევროპის ლიგა
K ჯგუფი
აპოელი — “შალკე” 0:3 (0:2)

გოლები: მატიპი 28′, ჰუნტელაარი 35′, 71′.
გაფრთხილებები: მაკრიდისი 50′, ვანდერი 72′ — გაისი 10′, დი სანტო 37′.
გაძევება: დე ვინსენტი 77′.
მთავარი არბიტრი: ტონი შაპრონი (საფრანგეთი).

ქეცბაია: “შალკე” ფავორიტია, მაგრამ შინ ვთამაშობთ”

Posted on by ბექა დოგრაშვილი

დღეს უეფას ევროპის ლიგის ჯგუფური ეტაპი აიღებს სტარტს. K ჯგუფშია მოხვედრილი თემურ ქეცბაიას აპოელი, რომელიც დღეს, ნიქოზიაში გელზენკირხენის “შალკეს” უმასპინძლებს. ჯგუფში ტრიპოლისის “ასტერასი” და პრაღის “სპარტაც” არიან.

ქეცბაია დღევანდელ შეხვედრაში ფავორიტად “შალკეს” მიიჩნევს და იქვე აღნიშნავს, რომ ამ მატჩის შედეგს გადამწყვეტი მნიშვნელობა არ ექნება.

“თუ ფავორიტებთან კარგ შედეგებს ვაჩვებთ, დიდ ნაბიჯს გადავდგამთ საუკეთესო 32 გუნდს შორის მოსახვედრად. მომდევნო ეტაპზე თამაში გვსურს. ეს არ იქნება იოლი, მაგრამ გუნდმა უკვე აჩვენა, რომ აქვს პოტენციალი. თუ თავს კარგად წარმოვაჩენთ, დადებითი შედეგის ჩვენება შეგვიძლია. წინ მივიწევთ, მომენტებს ვქმნით, მაგრამ გარკვეული პრობლემები გვაქვს დაცვაში და იმედია, ამასაც გამოვასწორებთ.

“შალკე” ფავორიტია, მაგრამ ჩვენ შინ ვთამაშობთ. განსაკუთრებით ფრთხილად უნდა ვიყოთ დაცვაში. ძლიერი მეტოქე გვყავს, რომელიც განსაკუთრებით კარგად იყენებს სტანდარტულებს. ასე რომ, სიფრთხილე გვმართებს. ამ შეხვედრის შედეგზე არ არის დამოკიდებული ყველაფერი, რადგან წინ კიდევ ხუთი მატჩი გვექნება”, – ქეცბაიას კომენტარს cyprusscore.com-ი აქვეყნებს.

აპოელსა და “შალკეს” შორის შეხვედრა დღეს, თბილისის დროით 23:05 საათზე დაიწყება და მას ტონი შაპრონის თავკაცობით ფრანგ მსაჯთა ბრიგადა მოემსახურება.

 

ქეცბაია უეფას სუპერთასის მატჩის შესახებ

Posted on by ბექა დოგრაშვილი

საქართველოს ნაკრების ყოფილი მთავარი მწვრთნელი თემურ ქეცბაია “ბარსელონასა” და “სევილიას” შორის გამართულ უეფას სუპერთასის შეხვედრას (5:4) დაესწრო. მოგვიანებით ქართველმა სპეციალისტმა მატჩი ბერძენ ჟურნალისტებთან შეაფასა.

“წარმოუდგენელი სანახაობა ვიხილეთ და ვამაყობ, რომ ეს ჩემს ქვეყანაში მოხდა. ის ფაქტი, რომ სტადიონზე 52 ათასი გულშემატკივარი შეიკრიბა, ყველაფერზე მეტყველებს. ბევრი ფიქრობს, რომ ეს იყო სუპერთასის საუკეთესო მატჩი, რაც ოდესმე უნახავს”, – ქეცბაიას კომენტარი gazzetta.gr-ზე გამოქვეყნდა.

 

თემურ ქეცბაია საბერძნეთის ნაკრების ჩაბარების წინააღმდეგი არ არის

Posted on by ბექა დოგრაშვილი

საბერძნეთის ნაკრების მთავარი მწვრთნელის პოსტზე კვლავ მოიაზრება თემურ ქეცბაიას კანდიდატურა.

როგორც მოგეხსენებათ, გასულ კვირას სერხიო მარკარიანმა გუნდის თავკაცის პოსტი წარუმატებელი შედეგების გამო დატოვა. ურუგვაელი სპეციალისტის თავკაცობით ბერძნებმა სტუმრად უნგრელებთან უგოლოდ ითამაშეს, ფარერის ნაკრების ფეხბურთელების წინააღმდეგ გამართულ მატჩში კი ანგარიშით 1:2 დამარცხდნენ. ახლა გუნდს 2016 წლის ევროპის ჩემპიონატის საკვალიფიკაციო ეტაპის F ჯგუფში 2 ქულით უკანასკნელი ადგილი უკავია.

მას შემდეგ, რაც მარკარიანმა პოსტი დატოვა, კვლავ გავრცელდა ინფორმაცია საბერძნეთის ნაკრების მთავარი მწვრთნელის პოსტზე თემურ ქეცბაიას შესაძლო დანიშვნის შესახებ.

ბერძნულ ინტერნეტპორტალ Gazzetta.gr-ის რეპორტიორთან საუბრისას ქეცბაიამ განაცხადა, რომ საბერძნეთის ნაკრების ჩაბარების სურვილი აქვს, თუმცა საბერძნეთის ფეხბურთის ფედერაციიდან ამ დრომდე არავინ შეხმიანებია.

“ჩემს კანდიდატურას მანამდეც ასახელებდნენ, სანამ გუნდს მარკარიანს ჩააბარებდნენ და ახლაც ასახელებენ, თუმცა ეს თავისთავად არაფერს არ ნიშნავს. მთავარია, არა ის, ვის კანდიდატურას ასახელებენ, არამედ – საბოლოოდ ვინ გახდება ნაკრების თავკაცი.

როდესაც ეროვნულ ნაკრებში თამაშობ, ყველაფერი უნდა გააკეთო საკვალიფიკაციო ეტაპის დასაძლევად. გუნდში არიან უცხოეთში და საბერძნეთში მოთამაშე ფეხბურთელები, რომლებსაც შეუძლიათ საკვალიფიკაციო ეტაპის დაძლევა. საბერძნეთის ნაკრებს პერსპექტივა აქვს და საკვალიფიკაციო ეტაპიდან ფინალურ ტურნირებზე გასასვლელად უნდა იბრძოდეს.

კარგი ფეხბურთი მაღაზიაში არ იყიდება. მთავარია გუნდური ორგანიზება, დისციპლინა და ბევრი მოთმინება.

ჯგუფიდან გასვლა რთულია, მაგრამ მე მჯეროდა. ახლა მხოლოდ თეორიული შანსი არსებობს, თუმცა გუნდი არ უნდა გაჩერდეს. დარჩენილია მატჩები, რომლებიც რეიტინგის გასაუმჯობესებლად ნაკრებმა უნდა მოიგოს.

გამოცდილებისა და სწორი რეჟიმის წყალობით შეიძლება წარსულში მიღწეული წარმატებების გამეორება”, – ციტირებს ქეცბაიას სიტყვებს Gazzetta.gr

 

თემურ ქეცბაია: “პენალტი და ფეხბურთელის გაძევება გადაჭარბებული იყო”

Posted on by ბექა დოგრაშვილი

უეფას ევროპის ლიგის პირველი საკვალიფიკაციო რაუნდის განმეორებით შეხვედრაში ნიქოზიის “ომონიამ” “დინამო ბათუმი” ანგარიშით 2:0 დაამარცხა და ორი მატჩის ჯამში მომდევნო ეტაპზე თამაშის უფლება მოიპოვა.

მატჩს ესწრებოდა საქართველოს ეროვნული ნაკრების ყოფილი მთავარი მწვრთნელი თემურ ქეცბაია, რომელმაც აჭარის საზოგადოებრივი მაუწყებლის პირდაპირ ეთერში აღნიშნული შეხვედრის შესახებ კომენტარი გააკეთა.

“მიუხედავად იმისა, რომ “დინამო ბათუმმა” პირველი ტაიმი ღირსეულად ჩაატარა, მეორე ნახევარში ჩვენი კარის მიმართულებით პენალტი დაინიშნა და ფეხბურთელი გააძევეს მინდვრიდან. ამ ორი მატჩიდან გამომდინარე, შეიძლება ითქვას, რომ “დინამო ბათუმი” ღირსეულად გამოვიდა. გუნდმა ყველაფერი გააკეთა იმისთვის, რომ გასულიყო მომდევნო ეტაპზე, მაგრამ… ეტყობა, რომ “დინამოში” სერიოზული მუშაობა მიმდინარეობს და იმედი მაქვს, გუნდი მომდევნო სეზონში უფრო მზად იქნება.
ვფიქრობ, რომ გაძევებამ დიდი როლი ითამაშა ამ შეხვედრაში. ასეთ პირობებში ათი კაცით თამაში ძალიან ძნელია. რომ არა გაძევება, არავინ არ იცოდა, როგორი თამაში წავიდოდა. მსაჯს შეეძლო, პენალტი დაენიშნა და ფეხბურთელი არ გაეძევებინა. შეიძლება ითქვას, რომ თერთმეტმეტრიანი და გაძევება გადაჭარბებული იყო ამ მომენტში”, – აღნიშნა ქეცბაიამ.