საქართველოს ნაკრების ყოფილი მთავარი მწვრთნელი თემურ ქეცბაია “ბარსელონასა” და “სევილიას” შორის გამართულ უეფას სუპერთასის შეხვედრას (5:4) დაესწრო. მოგვიანებით ქართველმა სპეციალისტმა მატჩი ბერძენ ჟურნალისტებთან შეაფასა.
“წარმოუდგენელი სანახაობა ვიხილეთ და ვამაყობ, რომ ეს ჩემს ქვეყანაში მოხდა. ის ფაქტი, რომ სტადიონზე 52 ათასი გულშემატკივარი შეიკრიბა, ყველაფერზე მეტყველებს. ბევრი ფიქრობს, რომ ეს იყო სუპერთასის საუკეთესო მატჩი, რაც ოდესმე უნახავს”, – ქეცბაიას კომენტარი gazzetta.gr-ზე გამოქვეყნდა.
საქართველოს ვიცე-პრემიერი კახა კალაძე სოციალური ქსელის მეშვეობით თბილისში ჩატარებულ სუპერთასის მატჩსა და ზვიად სიჭინავას მიერ საქართველოს ფეხბურთის ფედერაციის საპრეზიდენტო პოსტის დატოვების შესახებ გავრცელებულ ინფორმაციას გამოეხმაურა.
კალაძის განცხადებას უცვლელად გთავაზობთ:
“ეს მოხდა!
საქართველომ , თბილისმა, “დინამო-არენამ” უმასპინძლა მსოფლიო დონის მატჩს!
უეფა-ს სუპერთასის გათამაშებაზე “ბარსელონა” “სევილია” -ს შეხვდა.
დამეთანხმებით ეს იყო დაუვიწყარი სანახაობა და სპორტული ეიფორია, მიღებული პოზიტივი კიდევ დიდხანს გაყვება გულშემატკივარს.
დიდი მადლობა ყველას, ვინც ითანამშრომლა უეფასთან, განახორციელა ეს პროექტი, ვინც გაუწია ამ მატჩს ორგანიზება, რაც მთავარია- უზრუნველყო შეხვედრის უნაკლოდ ჩატარება! მადლობა და დაფასება ყველა იმ ადამიანს, ვინც თუნდაც მცირედი წვლილი შეიტანა საერთო, სახალხო სიხარულის შექმნაში!
აქვე მინდა ავღნიშნო პერსონალურად ფედერაციის პრეზიდენტის ზვიად სიჭინავას მონაწილეობა. მისი უზარმაზარი წვლილია, რომ სუპერთასის ასეთი მნიშვნელოვანი თამაში ჩატარდა აქ, და ასეულ მილიონობით ადამიანის ყურადღება სხვადასხვა ქვეყნებიდან მიპყრობილი იყო თბილისზე! მის კარიერაში, მის დამსახურებებში ამ საფეხბურთო ზეიმის მოწყობაც სათანადო ადგილს დაიკავებს.
ზვიად სიჭინავას ბოლო განცხადებასაც მსურს გამოვეხმაურო- წასვლის შესახებ: ფეხბურთი განსაკუთრებული სამყაროა; განსაკუთრებული ურთიერთობებით, გამარჯვებებით და დამარცხებებით, განსაკუთრებული ურთიერთდამოკიდებულებით, არაერთხელ თქმულა რომ, ჩვენ ვართ ერთი მთლიანობა, გუნდი, ოჯახი- და ამიტომ თითოეულის ნათქვამი, გადაწყვეტილება და თუნდაც პრობლემა ყველასთვის საერთო და გათავისებული ხდება… არ აქვს მნიშვნელობა მოქმედი მოთამაშე მიდიხარ, მწვრთნელი თუ ფედერაციის პრეზიდენტი, არ აქვს მნიშვნელობა წასვლის მიზეზს, და არც მიზეზის ინტერპრეტაციებს- ეს ყველაფერი წარსულს დავუტოვეთ … მთავრია მხოლოდ ის რომ, თითოეული ჩვენგანი, ვინც ფეხბურთის ისტორიას ვქმნიდით, ვინც საფუძველს ვუქმნიდით მომავალ თაობებს ამ სპორტში- ყველა ღირსეულ, დამსახურებულ და მადლობით გაცილებას იმსახურებს. ასე უნდა ყოფილიყო ყოველთვის, ასე იქნება დღეს და იქნება მომავალშიც”.
ბორის პაიჭაძის სახელობის “დინამო არენაზე” გამართულმა სუპერთასის მატჩმა მოლოდინს გადააჭარბა. სტადიონზე შეკრებილმა მაყურებელმა ორი დიდებული გუნდის დრამატული ბრძოლა, ლამაზი თამაში და 120 წუთში გატანილი ცხრა გოლი იხილა.
მატჩს უეფას ოფიციალური ვებგვერდის კორესპონდენტი ენდი ჯეიმსი ესწრებოდა, რომელმაც შეხვედრის შემდეგ აღფრთოვანება ვერ დამალა.
“სიმართლე გითხრათ, ეს ერთ-ერთი საუკეთესო მატჩია, რაც ოდესმე მინახავს. შესაძლოა, საუკეთესოც კი იყოს. “ბარსელონა” სუპერთასის გამარჯვებულია. ეს იყო მატჩი, რომელსაც ყველაფერი ჰქონდა. საოცარი ღამე გამოვიდა!” – აღნიშნა ჯეიმსმა.
თბილისში გამართულმა უეფას სუპერთასის მატჩმა მოლოდინს გადააჭარბა. ბორის პაიჭაძის სახელობის “დინამო არენაზე” შემდგარ დაპირისპირებაში სხვადასხვა სახის რეკორდები დამყარდა.
• ლიონელ მესიმ დუბლი შეასრულა და ევროთასებზე გატანილი გოლების რაოდენობით კრიშტიანუ რონალდუს გაუთანაბრდა (80);
• უეფას სუპერთასის მატჩებში მესის სულ სამი გატანილი გოლი მოუგროვდა, რითაც არი ჰაანს, ფრანსუა ვან დერ ელსტს, გერდ მიულერს, ოლეგ ბლოხინს, რადამელ ფალკაოს, რობ რენსენბრინკსა და ტერი მაკდერმოტს გაუთანაბრდა;
• ევერ ბანეგამ გოლი მატჩის მესამე წუთზე გაიტანა. ეს უეფას სუპერთასის არსებობის ისტორიაში ყველაზე სწრაფი გოლია;
• დანიელ ალვესმა უეფას სუპერთასი მეოთხედ მოიგო, რითაც პაოლო მალდინის შედეგი გაიმეორა;
• ალვესმა მალდინის კიდევ ერთი მიღწევა გაიმეორა: ბრაზილიელმა უეფას სუპერთასის მეხუთე მატჩში მიიღო მონაწილეობა;
• ლუის ენრიკე გახდა მეოთხე პირი, რომელმაც უეფას სუპერთასი მოიგო როგორც ფეხბურთელის, ასევე მწვრთნელის რანგში. მანამდე ეს მოახერხეს ხოსეპ გვარდიოლამ, კარლო ანჩელოტიმ და დიეგო სიმეონემ, თუმცა მხოლოდ ლუის ენრიკეს აქვს სუპერთასის მატჩში გოლი გატანილი (1997 წ.);
• “ბარსელონამ” უეფას სუპერთასი მეხუთედ მოიგო, რითაც “მილანის” შედეგი გაიმეორა;
• “ბარსელონამ” უეფას სუპერთასის მატჩში მეცხრედ ითამაშა. უახლოეს მადევარს ორით ნაკლები მატჩი აქვს ჩატარებული;
• “ბარსელონა” გახდა პირველი გუნდი, რომელმაც უეფას სუპერთასის ერთ მატჩში ხუთი გოლი გაიტანა;
• “სევილია” გახდა პირველი გუნდი, რომელმაც სუპერთასის მატჩში ოთხი გოლი გაიტანა, თუმცა დამარცხდა;
• “სევილია” სუპერთასის არსებობის ისტორიაში გახდა პირველი გუნდი, რომელმაც სამბურთიანი სხვაობა აღმოფხვრა;
• ცხრა გატანილი გოლით თბილისური სუპერთასი ყველაზე შედეგიანია;
• უეფას სუპერთასის მატჩში ესპანური დაპირისპირება მესამედ ვიხილეთ (ყოველ ჯერზე ერთ-ერთი მეტოქე “სევილია” იყო). ტიტულისთვის ერთმანეთში ორჯერ უბრძოლიათ იტალიის წარმომადგენლებს;
• საქართველომ პირველად უმასპინძლა უეფას საფეხბურთო ტურნირის ფინალურ მატჩს;
• თბილისურ სუპერთასს 51 490 გულშემატკივარი დაესწრო, რაც ნეიტრალურ სტადიონზე ჩატარებული სუპერთასის მატჩებიდან სარეკორდო მაჩვენებელია.
უეფას სუპერთასის მატჩში “ბარსელონამ” “სევილია” დრამატულ ბრძოლაში, ანგარიშით 5:4 დაამარცხა. შეხვედრის შემდეგ ბორის პაიჭაძის სახელობის “დინამო არენას” საპრესკონფერენციო დარბაზში მედიის კითხვებს კატალონიელთა მთავარმა მწვრთნელმა ლუის ენრიკემ უპასუხა.
— ბევრად უფრო რთული მატჩი აღმოჩნდა, ვიდრე თქვენ მოელოდით…
— არა, ასე არ არის. ჩვენ თავიდანვე ვიცოდით, რთული რთული მატჩი გველოდა. ყველამ დაინახა, ამ დონეზე რაოდენ რთულია გამარჯვება, როგორ იცვლება ხანმოკლე დროში ყველაფერი. მეტოქემ კარგი თამაში აჩვენა და ანგარიშის გათანაბრება დაიმსახურა. მიხარია, რომ გამარჯვებული ჩვენ დავრჩით.
— ჩვენ ვიხილეთ “ბარსელონას ორი მხარე. მატჩი კარგად დაიწყეთ, მაგრამ შემდეგ სიტუაცია შეიცვალა…
— როცა გუნდი აგებს, დასაკარგი აღარაფერია. მეტოქემ ბევრი გარისკა, თერთმეტმეტრიანი დარტყმითა და კარგი თამაშის წყალობით ანგარიშის გათანაბრება მოახერხა. “სევილიას” კარგი გუნდი ჰყავს. ბევრს ეგონა, რომ ადვილად მოვიგებდით, თუმცა ასე არ მოხდა.
— ნეიმარის შემცვლელად რატომ შეაჩერეთ არჩევანი რაფინიაზე?
— პედროს ტრავმის მხრივ გარკვეული პრობლემა ჰქონდეს, ამას დაემატა გუნდიდან მისი შესაძლო წასვლა. გადაწყვეტილებას ახლა რომ ვიღებდი, ამჯერადაც რაფინიას ვათამაშებდი.
— როგორი შთაბეჭდილება დატოვა ქვეყანამ? კმაყოფილი ხართ სტადიონით, პირობებითა და ორგანიზებით?
— ჩვენ გრძელი გზა გამოვიარეთ, მაგრამ ყველაფრით კმაყოფილები ვართ: მოედნით, ორგანიზებით, ქომაგობით.
— “სევილიამ” გასაოცრად ითამაშა და შეიძლება ითქვას, რომ პენალტების სერია დაიმსახურა. რისი მიღწევა შეუძლიათ წელს ანდალუსიელებს?
— ჩვენ “სევილიას” კარგად ვიცნობთ. მეტოქემ კარგად ითამაშა და პირველი გოლიც გაიტანა. როდესაც იგებ, ბევრად უკეთესია თამაშის კონტრშეტევებზე აგება, მაგრამ ლეოს დახმარებით თამაში შემოვატრიალეთ. საბოლოო ჯამში, კარგად ვითამაშეთ.
უეფას სუპერთასის მატჩში “ბარსელონამ” “სევილია” დრამატულ ბრძოლაში, ანგარიშით 5:4 დაამარცხა. შეხვედრის შემდეგ ბორის პაიჭაძის სახელობის “დინამო არენას” საპრესკონფერენციო დარბაზში მედიის კითხვებს ანდალუსიელთა მთავარმა მწვრთნელმა უნაი ემერიმ უპასუხა.
— მატჩის ბოლოს ორმაგი ცვლილება განახორციელეთ. ეს თქვენი მხრიდან ვა-ბანკი იყო თუ დაგეგმილი ცვლილებები?
— პირდაპირ გეტყვით, როცა ანგარიშით 1:4 მარცხდები, ბევრს აღარაფერს ელი. მხოლოდ ის ვთქვით, რომ დარჩენილ დროში მაქსიმუმისთვის უნდა მიგვეღწია. ჯერ ერთი გოლი გავიტანეთ, შემდეგ მეორე და იმედიც მოგვეცა. გუნდს თავდაჯერება მოემატა და მიზანსაც მივაღწიეთ – ანგარიში გავათანაბრეთ. ამის შემდეგ ცოტა ამოვისუნთქეთ. დამატებით დროში გვჯეროდა, რომ მოგება შეგვეძლო, თუმცა გოლი გავუშვით და ასეთ დროს რთულია თამაშის კიდევ ერთხელ შემოტრიალება.
— ამ მატჩში ბევრი ტაქტიკური ცვლილება განახორციელეთ. რას გამოყოფდით?
— ამ საღამოს ჩვენი მთავარი მიზანი კარგი თამაშის ჩვენება იყო. ჩვენ დავამტკიცეთ, რომ უმაღლესი დონის გუნდებთან თანაბრად თამაში შეგვიძლია. ყველაზე ცუდი იქნებოდა ის, რომ ისე არ გვეთამაშა, როგორც ჩვენ გვსურდა. ჩვენს ფანებს შეუძლიათ, რომ ჩვენი თამაშით კმაყოფილნი იყვნენ.
— ახლა როგორი განწყობა გაქვთ?
— ჩვენ გამარჯვება გვინდოდა და შედეგით უკმაყოფილონი ვართ, მაგრამ თამაში გვაძლევს კმაყოფილების საშუალებას. გუნდისთვის რთულია ამ მარცხის გადაყლაპვა, თუმცა ჩვენ კიდევ შევხვდებით უძლიერეს მეტოქეებს.
— როგორ ფიქრობთ, დაიმსახურა “ბარსელონამ” ეს გამარჯვება?
— “ბარსელონას” გამარჯვება უნდა მივულოცოთ. იყო თუ არა დამსახურებული, ეს სუბიექტური მოსაზრებაა. მატჩის მიწურულს სამი ძალიან კარგი შანსი მოგვეცა და ვიმსახურებდით პენალტების სერიას. საბოლოო ჯამში, კმაყოფილი ვარ და შეგვიძლია, ვიამაყოთ ამ თამაშით. გაითვალისწინეთ, რომ “ბარსელონა” მსოფლიოს საუკეთესო კლუბია, რომელმაც ყველაფერი მოიგო.
— ოდესმე შეძლებთ ლეო მესის გაჩერებას, რომელმაც “სევილიას” უკვე 24-ე გოლი გაუტანა?
— მესის ვულოცავ ამ გამარჯვებას. იგი უნიკალური შესაძლებლობების მქონე ფეხბურთელია. წარმოუდგენელია, უმაღლეს დონეზე თამაშობდე ამდენი წლის მანძილზე. დაველოდოთ და ვნახავთ, შევძლებთ თუ არა ოდესმე მის გაჩერებას.
— ეს სეზონის სასტარტო მატჩი იყო. რას გეუბნებათ ეს შეხვედრა დამდეგი სეზონისთვის?
— პირველი ნაბიჯი გადავდგით იქითკენ, რომ ახალ სეზონში წარმატებულად ვითამაშოთ. ეს ახალი სეზონის ფუნდამენტია. როდესაც ტრავმირებული ფეხბურთელები გამოჯანმრთელდებიან, მეტი შესაძლებლობა გვექნება და უკეთ ავთამაშდებით.
უეფას სუპერთასის მატჩში “ბარსელონამ” “სევილია” დრამატულ ბრძოლაში, ანგარიშით 5:4 დაამარცხა. მატჩის საუკეთესო მოთამაშედ კატალონიელთა ლიდერი ლიონელ მესი დაასახელეს, რომელმაც დუბლი შეასრულა. მატჩის შემდეგ საპრესკონფერენციო დარბაზში მესიმ ჟურნალისტების კითხვებს უპასუხა.
— თბილისი გახდა 25-ე ევროპული ქალაქი, სადაც გოლი გაიტანეთ. სუპერთასის მოგების გარდა, კიდევ რით იქნება ეს მატჩი დასამახსოვრებელი?
— ისეთი შეგრძნება გვქონდა, თითქოს შინ ვთამაშობდით. კმაყოფილები ვართ.
— კარგად ითამაშეთ. ძირითად 90 წუთში მესამე გოლის გატანაც შეგეძლოთ. რას ფიქრობთ იმაზე, რომ ყველა მხარს გიჭერდათ — ორივე გუნდის გულშემატკივრები?
— ყველას დიდ მადლობას ვუხდი ამ მხარდაჭერისთვის.
— რამდენად არის განსხვავება საკლუბო და სანაკრებო ჯილდოებს შორის?
— ყველაზე მნიშვნელოვანი გამარჯვება და რაც შეიძლება მეტი ტიტულის მოგებაა. დღეს ჩვენ უეფას სუპერთასი მოვიგეთ და ეს ძალზედ მნიშვნელოვანი ტიტულია.
— მესი განსაკუთრებით უყვართ საქართველოში. გსმენიათ თუ არა 60-იან წლებში მოთამაშე მიხეილ მესხის შესახებ, რომელმაც არგენტინა აღტაცებაში მოიყვანა? გვარებშიც მსგავსებაა — მესი, მესხი…
— თამაში უცნაურად დაიწყო: ჯერ ვაგებდით, შემდეგ გავათანაბრეთ და დავწინაურდით კიდევაც. მეტოქე პრესინგს გვიწყობდა. საბედნიეროდ, ჩვენთვის ყველაფერი კარგად დასრულდა. რაც შეეხება მესხს, სამწუხაროდ, მასზე არაფერი მსმენია.
— თქვენ ნამდვილად ხართ მატჩის საუკეთესო მოთამაშე, მაგრამ შეხვედრა პედრომ მოიგო. რას ფიქრობთ მისი გუნდიდან შესაძლო წასვლის შესახებ?
— კმაყოფილი ვარ, რომ გადამწყვეტი გოლი სწორედ პედრომ გაიტანა. არ ვიცი, რა გადაწყვეტილებას მიიღებს იგი, თუმცა ჩვენ ნებისმიერ შემთხვევაში, პატივი უნდა ვცეთ მის პოზიციას და მხარი უნდა დავუჭიროთ.
უეფას ბავშვთა ფონდმა სპეციალური პრესრელიზი გამოგვიგზავნა, რომელშიც წერია, რომ სუპერთასის გახსნის ცერემონიას სიმბოლური დატვირთვა ექნება. ღონისძიებაში მონაწილეობას მიიღებენ ცხრა ქვეყნიდან შერჩეული ბავშვები, რომლებიც მშვიდობისა და ერთიანობის ჯაჭვს გააკეთებენ.
ფეხბურთი მშვიდობისთვის გვაერთიანებს
1000 ბავშვის, ფეხბურთელის და მსაჯისგან შექმნილი ცოცხალი ჯაჭვი მშვიდობისა და ერთობის მხარდასაჭერად
თბილისში, სამშაბათს, 11 აგვისტოს გასამართი უეფას სუპერ თასის მატჩი, საფეხბურთო კლუბებს – ბარსელონასა და სევილიას შორის, გამორჩეული ისტორიული მომენტი იქნება მსოფლიო ფეხბურთში. პირველად, გახსნის ცერემონიაში წარმოდგენილი იქნება ცოცხალი ჯაჭვი: სიმბოლური აქტი, რომელიც გააერთიანებს ფეხბურთელებს, მსაჯებს და ათასს სოციალურად დაუცველ ბავშვს და მათ თანმხლებ პირებს საქართველოდან და რვა მეზობელი ქვეყნიდან. საქართველოს ფეხბურთის ფედერაციისა და უეფას ბავშვთა ფონდის ამ ინიციატივის მიზანია გაავრცელოს ძლიერი გზავნილი: “ფეხბურთი მშვიდობისთვის გვაერთიანებს.”
თბილისი აღმოსავლეთ-ევროპული ქალაქია, რომელიც მასპინძლობს უეფას სუპერ თასს, მას შემდეგ რაც 2012 წელს ის აღარ ტარდება მონაკოში, სადაც ეს მატჩი იმართებოდა 1998 წლიდან. ახლა სხვა ქალაქებსაც შეუძლიათ უმასპინძლონ განვლილი სეზონის ევროპის ორი მთავარი საკლუბო შეჯიბრის – უეფას ჩემპიონთა ლიგისა და უეფას ევროპა ლიგის გამარჯვებულთა დაპირისპირებას. სფფ-მ, უეფას ბავშვთა ფონდის მხარდაჭერით, გადაწყვიტა ხელიდან არ გაეშვა შესაძლებლობა და ევროპის კონფლიქტური ზონებიდან ჩამოსული ბავშვების დახმარებით გადმოეცა მშვიდობისა და ერთობის იდეა, გვეჩვენებინა, თუ როგორ შეუძლია ფეხბურთს ხალხის გაერთიანება. სომხეთის, აზერბაიჯანის, ბელორუსის, ყაზახეთის, მოლდოვის, რუსეთის, თურქეთისა და უკრაინის საფეხბურთო ასოციაციები დადებითად გამოეხმაურნენ ამ ინიციატივას.
სფფ-ს პრეზიდენტმა, ბატონმა ზვიად სიჭინავამ ბრძანა: “ყველა მიიღებს მშვიდობისა და ერთიანობის გზავნილს ბავშვებისგან – გზავნილს რომელიც მნიშვნელოვანია საზოგადოებისთვის. ამ გზავნილის წინასამატჩო ცერემონიაში ჩართვა გვაჩვენებს თუ რამდენად მნიშვნელოვანია ეს ძირითადი ღირებულებები უეფასთვის – ღირებულებები,რომლებმაც უეფას ბავშვთა ფონდის ინაუგურაციამდე მიგვიყვანა. მსურს მადლობა გადავუხადო ყველა მონაწილე ასოციაციას მხარდაჭერისა და საერთო ძალსიხმევისთვის, რომ ფეხბურთის უზარმაზარი პოპულარობა გამოვიყენოთ, როგორც პლატფორმა, ამ მნიშვნელოვანი ღირებულებების ფართო საზოგადოებისათვის მისაწოდებლად.”
ბატონმა მიშელ პლატინიმ, უეფას პრეზიდენტმა, დაამატა: “ფეხბურთი გვაძლევს დიდ შესაძლებლობას გავერთიანდეთ როგორც საზოგადოება და სრულყოფილი ცხოვრების შანსი მივცეთ ბავშვებს. ბავშვობა ის დროა, როდესაც ვამჟღავნებთ ყველაზე განსაკუთრებულ შესაძლებლობებს და ვიმედოვნებთ, რომ ამ ბავშვების მონაწილეობამ ამ უდიდეს ღონისძიებაში თბილისში, შეიძლება სულის შთაბეროს მათ მომავალს. მსურს მადლობა გადავუხადოთ საქართველოს ფეხბურთის ფედერაციას და მის პრეზიდენტს, ზვიად სიჭინავას, უეფას ბავშვთა ფონდთან ერთად გაწეული სამუშაოსთვის, რომ ამ პროექტის დახმარებით უკეთესი მომავლის იმედი ჩაესახათ დაუცველი ბავშვებისთვის. უეფას ბავშვთა ფონდი დაარსდა 2015 წელს, უეფას პრეზიდენტის ინიციატივით. იგი გამოხატავს უეფას სურვილს, გამოიყენოს ფეხბურთი როგორც კეთილი ძალა საზოგადოებაში. ფონდმა მრავალი ჰუმანიტარული და განვითარების პროგრამა განახორციელა მთელს მსოფლიოში. გარდა ამისა, წლის დასაწყისში, ბევრი ბავშვი დაესწრო უეფას ევროპა ლიგის ფინალურ მატჩს ვარშავაში, უეფას ჩემპიონთა ლიგის ფინალურ მატჩს ბერლინში და უეფას ევროპის ახალგაზრდული ჩემპიონატის ფინალურ მატჩს პრაღაში.
პროექტში ჩართული თითოეული ცხრა ეროვნული ასოციაცია დაუკავშირდა თავის
ქვეყანაში დაუცველი ბავშვების მხარდამჭერ აღიარებულ უწყებას, რათა ამ
პროექტისთვის შეერჩიათ მონაწილეები. ბავშვები უნდა ყოფილიყვნენ 10-12 წლის,
ადგილობრივი მასობრივი საფეხბურთო ტურნირების გამარჯვებულები, ბავშვთა
სახლების ბინადრები, საქართველოს ოკუპირებული ტერიტორიებიდან დევნილები და სამხედრო ოპერაციებში დაღუპული ჯარისკაცების ოჯახის წევრები.
მონაწილეობას მიიღებენ:
20 ბავშვი და 3 უფროსი სომხეთიდან
20 ბავშვი და 2 უფროსი აზერბაიჯანიდან
15 ბავშვი და 2 უფროსი ბელორუსიდან
720 ბავშვი და 130 უფროსი საქართველოდან
10 ბავშვი და 2 უფროსი ყაზახეთიდან
19 ბავშვი და 4 უფროსი მოლდოვიდან
9 ბავშვი და 3 უფროსი რუსეთიდან
15 ბავშვი და 3 უფროსი თურქეთიდან
20 ბავშვი და 3 უფროსი უკრაინიდან
უეფას ბავშვთა ფონდის პრესრელიზი
უეფას სუპერთასის მატჩისწინა პრესკონფერენციაზე “სევილიას” მარჯვენაფლანგელმა მცველმა კოკემ განაცხადა, რომ დანაკლისის გამო შესაძლოა, მას ცენტრში მოუწიოს თამაში, თუმცა ეს პრობლემას არ წარმოადგენს. კოკეს თქმით, მის გუნდს ნებისმიერ მეტოქესთან შეუძლია ღირსეულად თამაში და გამარჯვების მოპოვება.
“როდესაც გუნდში ასეთი სიტუაციაა, მწვრთნელი რა პოზიციაზეც დამაყენებს, იქ უნდა ვითამაშო და შესაბამისი დავალება შევასრულო.
ალბათ, “ბარსელონაში” მეტი ცვლილება მოხდა, ვიდრე ჩვენთან, თუმცა კატალონიურ გუნდს აქვს ურყევი ფილოსოფია. იმედია, ხვალ 90 წუთის განმავლობაში მოგვცემა ჩვენი თამაშის ჩვენების სასუალება.
ჩვენ ევროპის ლიგის ფინალში კონოპლიანკას წინააღმდეგ ვითამაშეთ და ძალიან გაგვიჭირდა, პირადად მე ვიყავი მისი მეურვე. ახლა ის ახალ ქვეყანაში, ახალ ლიგაში თამაშობს და ეს მისთვის გამოწვევაა. ადაპტაცია არ არის იოლი პროცესი, თუმცა მჯერა, რომ იგი გამოავლენს თავის შესაძლებლობებს.
ნეიმარის არყოფნა “ბარსელონასთვის” დიდი დანაკლისია, მას პედრო ჩაანაცვლებს. ესპანელს გასულ სეზონში ისეთი სიხშირით არ უთამაშია, როგორც ნეიმარს, თუმცა მან საკლუბო და სანაკრებო დონეზეც დაამტკიცა, რომ შეტევაშიც შეუძლია თამაში და დაცვაშიც.
“სევილიას” უახლოესი ისტორიიდან გამომდინარე, ჩვენ ნებისმიერ მეტოქესთან ნებისმიერ დონეზე შეგვიძლია თამაში. ასე რომ, ქართველ გულშემატკივრებს შეუძლიათ, ჩვენც გვიქომაგონ”, – აღნიშნა კოკემ.
მატჩი სამშაბათს, “დინამო არენაზე”, 22:45 საათზე დაიწყება.
სამშაბათს, “დინამო არენაზე” უეფას სუპერთასის მატჩში ერთმანეთს “ბარსელონასა” და “სევილიას” ფეხბურთელები დაუპირისპირდებიან. მატჩისწინა პრესკონფერენციაზე კატალონიელთა მხრიდან ანდრეს ინიესტა და დანიელ ალვესი წარსდგნენ ჟურნალისტების წინაშე და მათ შეკითხვებს უპასუხეს.
— ფიქრობთ თუ არა, რომ ეს მატჩი ზედმეტად ადრე ტარდება? რამდენად დიდია პასუხისმგებლობა?
— (ინიესტა) ეს ახალი სეზონის პირველი მატჩია. რაც შეეხება ჩემს პასუხისმგებლობას, ის არასდროს იცვლება, თანაც ამ სეზონში გუნდის კაპიტანი გავხდი. ძალიან მაღალი დონის თანაგუნდელები მყავს და გუნდში ყველაფერი ისეა, როგორც მანამდე იყო. მეც და ჩემი თანაგუნდელებიც შევეცდებით, რომ საუკეთესო თამაში ჩავატაროთ.
— (ალვესი) არ შეიძლება იმაზე ვიფიქროთ, რომ ეს მატჩი ადრე ტარდება. აღნიშნული შეხვედრა ჩვენი გეგმის ნაწილია და ამ გეგმას უცვლელად მივყვებით. როგორც ყოველთვის, მაქსიმუმს გავიღებთ იმისთვის, რომ ახალ სეზონში გუნდის მუზეუმს ახალი თასი შევძინოთ.
— ახალი სეზონი იწყება და შანსი გაქვთ, რომ ექვსი ტიტული მოიგოთ. ფიქრობთ ამაზე? დანი ალვესი კლუბის დატოვებას აპირებდა და ახლა რა ხდება? ნეიმარის არყოფნაზე რას იტყვით?
— (ინიესტა) სეზონის დასაწყისში შანსი გვაქვს, სამი ტიტული მოვიგოთ: უეფას სუპერთასი, ესპანეთის სუპერთასი და საკლუბო მსოფლიოს ჩემპიონატი. რთულია ყველაფრის მოგება, თუმცა ვნახოთ. ხვალინდელი მატჩი პირველი გამოცდაა და ყველაფერს გავაკეთებთ, რომ წარმატებით დავძლიოთ. მეტოქეს კარგად ვიცნობთ და იმედია, ჩვენს არსენალში აღმოჩნდება საკმარისი ძალა მის დასამარცხებლად. ახლა მხოლოდ ხვალინდელ მატჩზე ვფიქრობთ.
— (ალვესი) კლუბიდან ჩემ წასვლაზე აღარ არის საუბარი, მე ვრჩები და მაქსიმუმს გავიღებ გუნდისთვის. რაც შეეხება ნეიმარს, ცოტა მოულოდნელია, რომ ამ ტიპის პრობლემა (ყბაყურა შეხვდა – ავტ.) აქვს. იგი დაგვაკლდება, მაგრამ გვაქვს საკმარისი ძალა იმისთვის, რომ მის გარეშეც დავამარცხოთ მეტოქე.
— რამდენად არის იმის შანსი, რომ პედრო “ბარსელონაში დარჩეს?
— (ალვესი) პირადი გადაწყვეტილების მიღება რთულია, როცა საკითხში ბევრი ადამიანია ჩართული. როგორი გადაწყვეტილებაც არ უნდა მიიღოს პედრომ, ჩვენ გაგებით უნდა შევხვდეთ მას და მხარდაჭერა გამოვუცხადოთ. იმედია, იგი გუნდში დარჩება.
— მესის ფაქტორიდან გამომდინარე, იქნებით დაუმარცხებელი ამ სეზონში?
— (ინიესტა) გუნდში მესის ყოფნა წარმატების გარანტიაა. მისი წყალობით მივაღწიეთ დიდ გამარჯვებებს და იმედია, ახალ სეზონსაც ისე დავიწყებთ, როგორც წინა დავამთავრეთ.
— დანი ალვესი ერთ-ერთი ფეხბურთელია, რომელმაც 2006 წელს “სევილიას” რიგებში უეფას სუპერთასი მოიგო. რას გამოიყენებთ ამ გამოცდილებიდან?
— (ალვესი) მე წამიგია კიდეც და აქედანაც ბევრი რამ მისწავლია. ფავორიტები ვართ, მაგრამ უნდა ვიცოდეთ, რომ ყველა გუნდს აქვს ძლიერი მხარეები. დღესდღეობით ფაქტია, რომ ფავორიტები თითქმის აღარ არსებობენ. არაპროფესიონალურად თუ მივუდგებით საქმეს, ქაღალდზე ფავორიტობა არ გვიშველის. გამარჯვება კარგია, მით უფრო ლამაზი თამაშით მიღწეული.
— (ინიესტა) მაშინ “სევილიამ” დაიმსახურა ის გამარჯვება. ბევრს ჰგონია, რომ ხვალ ადვილად გავიმარჯვებთ, თუმცა ეს ასე არ არის. ფინალში წარმატების მისაღწევად 100-პროცენტიანი მობილიზებაა საჭირო.
— გასული სეზონი ცოტა მძიმედ დაიწყეთ, თუმცა შემდეგ სიტუაცია გამოასწორეთ და ყველაფერი კარგად დაამთავრეთ. რა შედარებას გააკეთებდით ახალ სეზონთან?
— (ინიესტა) როცა გუნდში ახალი ფეხბურთელები მოდიან, ეს გარკვეულ დროსა და ადაპტაციას საჭიროებს, თუმცა მთელი სეზონის განმავლობაში პროგრესი სახეზე იყო. შედარებებს რაც შეეხება, რთულია სეზონების ერთმანეთთან შედარება, მით უფრო მაშინ, როცა ეს განსხვავებულ შემადგენლობებს ეხება. ვეცდებით, რომ ახალ სეზონში ეს წინსვლა გავაგრძელოთ.
— რას ფიქრობთ არდა თურანზე?
— (ალვესი) არდა ძალზედ მხიარული ადამიანია, ბევრს გვართობს და დიდი პოპულარობით სარგებლობს გუნდში. სამწუხაროა, რომ იგი ხვალ ვერ დაგვეხმარება, თუმცა მისი საფეხბურთო ინტელექტი და ტექნიკური მონაცემები სამომავლოდ აუცილებლად დაგვეხმარება. ყველა გუნდს სჭირდება ასეთი არასტანდარტული ტიპის ფეხბურთელი.
— “ბარსელონას” საქართველოში ბევრი გულშემატკივარი ჰყავს. რას ურჩევდით დამწყებ ქართველ ფეხბურთელებს?
— (ინიესტა) რთულია ამის თქმა. ყველას ჩვენი მეთოდები გვაქვს. საერთოა მონდომება, წარმატების სურვილი, მიზნების მიღევა, რაც არ უნდა რთული იყოს, თავდაჯერება. მთავარია ოცნება გქონდეს.
— დანი ალვესი “სევილიაში” თამაშობდა, ახლა “ბარსელონას” ღირსებას იცავს. იქნება ხვალინდელი თამაში ამ ხმრივ განსაკუთრებული?
— (ალვესი) არა, ეს უკვე ნორმალური მოვლენაა. ესპანური ფეხბურთის ეს ორი გრანდი შიდა ჩემპიონატში ხშირად ხვდება ერთმანეთს. სევილია ის ქალაქსია, სადაც გავიზარდე, ვთამაშობდი და ბევრი მეგობარი მყავს როგორც მოედანზე, ასევე მოედანს მიღმა. მიუხედავად ამისა, მე მხოლოდ ჩემს ამჟამინდელ გუნდზე ვფიქრობ.
სამშაბათს, “დინამო არენაზე” “ბარსელონასა” და “სევილიას” შორის უეფას სუპერთასის შეხვედრა გაიმართება. მატჩის ელჩი გიორგი ქინქლაძე გახლავთ, რომელთანაც უეფას ოფიციალური ვებგვერდის კორესპონდენტმა საინტერესო ინტერვიუ ჩაწერა.
— რას ნიშნავს ქართული ფეხბურთისთვის უეფას სუპერთასის მასპინძლობა?
— ეს მთელი ქვეყნისთვის დიდი პატივია. მადლობას ვუხდი უეფას, ჩვენს მთავრობასა და საქართველოს ფეხბურთის ფედერაციას ასეთი მატჩის ჩვენს ქალაქში ჩატარებისთვის. ეს ჩვენი ქვეყნისთვის ბევრს ნიშნავს.
— რამდენად არის თბილისი საფეხბურთო კერა?
— თბილისი საფეხბურთო ქალაქია, განსაკუთრებული ქომაგებით. მათ მხოლოდ 10-15 წუთი სჭირდებათ და უმალ გეტყვიან, ვის აქვს დიდი ფეხბურთის თამაშის პოტენციალი. მათ ისეთი მატჩებისთვის და ფეხბურთელებისთვის აქვთ ნაცქერი, რომ ფეხბურთი საკმაოდ ღრმად შეისწავლეს. დღესდღეობით ამ გულშემატკივრებს ნაკლებად აქვთ ინგლისში, ჰოლანდიასა თუ გერმანიაში თავიანთი ემოციების ყოველკვირეულად გამოხატვის საშუალება, ეს მხოლოდ ეროვნული ნაკრების მატჩებზე ხდება, თუმცა ადრე სხვაგვარად იყო. ჩვენ საკმაოდ ემოციური ფანები გვყავს, ფეხბურთი კი ყოველთვის იქნება ჩვენს ქვეყანაში სპორტის ნომერ პირველი სახეობა.
— თქვენი ბავშვობიდან რომელ ფეხბურთელს გამოარჩევდით?
— თბილისის “დინამოს” თითქმის ყველა მოთამაშეს, რომლებიც ჩვენთვის გმირები იყვნენ. განსაკუთრებით კი დავით ყიფიანს ვბაძავდი. ფეხბურთელობის პერიოდში ეროვნულ ნაკრებში მასთან ერთად მუშაობის შესაძლებლობა მქონდა. ყიფიანი არამხოლოდ დიდი ფეხბურთელი და მწვრთნელი, არამედ ზუსტად 10 ნომერი იყო, რაც მასში ყველაზე მეტად მომწონდა. მისი ტექნიკა და სათამო სტილი არამხოლოდ მე, არამედ მთელ ქვეყანას აღაფრთოვანებდა. იშვიათია ასეთი ფეხბურთელი.
— კარიერის განმავლობაში ცნობილი იყავით ჰიპნოზის მომგვრელი დრიბლინგების შესრულებით. რას ფიქრობთ ლიონელ მესიზე, რისი გაკეთება შეუძლია მას ბურთით?
— სერ ალექს ფერგიუსონი ერთ-ერთ ინტერვიუში მას ყველა დროის საუკეთესო მოთამაშედ მოიხსენიებს. დიეგო მარადონა ძალიან მიყვარს, მაგრამ მესი ნამდვილი მოვლენაა. იგი საკლუბო დონეზე წარმოუდგენლად ასპარეზობს. ასე შეიძლება ერთი ან ორი სეზონის განმავლობაში ითამაშო, მაგრამ არა – მთელი ამ წლების მანძილზე. მან ეს თამასა თავიდანვე ძალიან მაღლა ასწია.
— რას ფიქრობთ “ბარსელონასა” და “სევილიაზე”?
— ასეთი დიდი კლუბებისთვის მთავარი ტიტულების მოპოვებაა. ძალიან მომწონს “ბარსელონას” სათამაშო სტილი, დიდ სიამოვნებას ვიღებ მათი თამაშის ცქერით. “სევილიაც” კარგი გუნდია. მათ ევროპის ლიგა მეოთხედ მოიგეს. საინტერესო მატჩის მოლოდინში ვარ.
— რას ნიშნავს ბორის პაიჭაძის სახელობის “დინამო არენაზე” თამაში?
— ეს ის ადგილია, სადაც ყველაზე მეტად მიყვარდა თამაში. მენატრება ის დრო, როდესაც მატვეი ბლანტერის “ფეხბურთის მარშის” თანხლებით გუნდები მოედანზე გამოდიოდნენ. ვერ გადმოგცემთ, რას ნიშნავდა ეს ჩემთვის.
— თქვენი კარიერიდან ყველაზე სასიამოვნოდ გასახსენებელი მომენტი რომელია?
— ალბათ, დღე, როდესაც თბილისის “მრეტებიდან” თბილისის “დინამოში” გადავედი და ასევე, “მანჩესტერ სიტიში” გადასვლა.
— თქვენ ახლა “ცხინვალის” სპორტული დირექტორი ხართ, რომელმაც ამ სეზონში ევროპის ლიგის პირველ საკვალიფიკაციო ეტაპზე ითამაშა…
— ჩვენ ახალგაზრდული გუნდი გვყავს და ბევრს არაფერს მოველოდით, თუმცა პირველი საკვალიფიკაციო ეტაპის დაძლევა მაინც შეგვეძლო. ბიჭებმა ყველაფერი გააკეთეს, მაგრამ, სამწუხაროდ, ისეთი ფეხბურთელები არ გყავს, როგორებსაც ვართ მიჩვეულნი. ვწუხვარ, როდესაც ქართულ ფეხბურთს მძიმე მდგომარეობაში ვხედავ, თუმცა იმედი მაქვს, რომ სიტუაცია გამოსწორდება, რაც გარკვეულ დროს მოითხოვს.
— რას ურჩევდეით ახალგაზრდა ქართველ ფეხბურთელებს, რომლებიც დღეს იწყებენ თამაშს?
— უნდა გიყვარდეს საქმე, რომელსაც აკეთებ. ფეხბურთელი ვარჯიშისა და თამაშის გარდა სხვა რამეზე არ უნდა ფიქრობდეს. რა თქმა უნდა, საჭირო კონდიციებშიც უნდა იყო. საქართველოში ტალანტები იბადებიან და მათ მხოლოდ თავიანთი უნარები უნდა განავითარონ, რათა უმაღლეს დონეზე თამაში შეძლონ.
უეფას სუპერთასის მატჩამდე ზუსტად ერთი კვირა რჩება. 11 აგვისტოს, “დინამო არენაზე” ჩემპიონთა ლიგის გამარჯვებული “ბარსელონა” და ევროპის ლიგის პირველადგილოსანი “სევილია” ერთმანეთს სუპერთასისთვის შეეცილებიან.
მანამდე გთავაზობთ უეფას სუპერთასის ისტორიიდან ქვიზს.
