გაგამარუ – გვერდი 2 – Fanebi.Com – ფეხბურთი, კალათბურთი, რაგბი, სხვა

სუმოისტების რეიტინგი განახლდა

Posted on ოქტომბერი 30, 2013 by ამირან

იაპონური სუმოს ასოციაციამ მოახოლებული ნოემბრის ბაშოს წინ სუმოისტთა განახლებული რეიტინგ-სია, იგივე ბანძუკე გამოაქვეყნა. წლის დასკვნით სუპერტურნირს 10-დან 24 ნოემბრის ჩათვლით ქალაქ ფუკუოკას საერთაშორისო ცენტრი უმასპინძლებს, კუნძულ კიუშუზე (საბჭოთა პერიოდში ამ კუნძულს დამახინჯებულად კიუსიუს ეძახდნენ). იაპონელები ამ ტურნირს კიუშუ ბაშოს უწოდებენ და ჩვენც ამგვარად მოვიხსენიოთ.

კიუშუ ბაშოზე დასავლეთის მე-13 მაეგაშირას სტატუსით იასპარეზებს გაგა ჯუღელი. გაგამარუდ წოდებულმა ქართველმა გოლიათმა სექტემბრის ბაშო -3 ქულიანი უარყოფითი ბალანსით (6-9) დაასრულა და ბანძუკეში 4-საფეხურიანი ვარდნა განიცადა.

სეკიტორის სტატუსი შეუნარჩუნეს ჯურიოს დივიზიონში დატოვებით მეორე ჩვენებურს, ლევან გორგაძეს, რომელსაც ჯურიოს მე-14 (უკანასკნელი) ნომრის სტატუსი მიანიჭეს სუმოს მამებმა. ტოჩინოშინმა, როგორც გახსოვთ, ივლისში ძალიან მძიმე ტრავმა მიიღო და ექიმებმა ოპერაციის შემდეგ დაახლოებით 6-თვიანი სარეაბილიტაციო პერიოდი უწინასწარმეტყველეს. აქედან გამომდინარე, ლევანი სავარაუდოდ ვერც კიუშუ ბაშოზე ვერ შეძლებს გამოსვლას. სუმოს წესებით კი ბაშოს ჩაგდება ფაქტიურად დამარცხების ტოლფასია (არა აქვს მნიშვნელობა ტრავმით არის გამოწვეული ეს ჩავარდნა, თუ სხვა მიზეზით) და ისევე აქვეითებენ ბაშო-ჩაგდებულ სუმოისტს, როგორც -15 ქულიანი უარყოფითი ბალანსის მქონე სუმოისტს დააქვეითებდნენ.

მიუხედავად სუმოდან წასვლაზე გაკეთებული ოფიციალური განცხადებისა, რუსი სეკიტორი არანი განახლებულ ბანძუკეში მაინც ფიგურირებს, მე-16 მაეგაშირას სტატუსით. თუმცა, ესეც ერთგვარი წესია და იგი მხოლოდ სიმბოლურად იქნება ახალ რეიტინგში – დოჰიოზე კი მას უკვე ვეღარ ვიხილავთ.

მაკუუჩიში დებიუტი ექნება ეგვიპტელ სუმოისტს, აბდელრაჰმან შარანს, რომელიც ოსუნაარაშის შიკონას ატარებს. ამბიციურ ეგიპტელს მხოლოდ 11 ბაშო დასჭირდა უმაღლეს დივიზიონამდე მოსაღწევად, რაც ერთ-ერთი საუკეთესო მაჩვენებელია სუმოს ისტორიაში. ოსუნაარაში კიუშუ ბაშოზე მე-15 მაეგაშირად იქნება განთესილი.

გაგას ჩაგდებული ბაშო და ჰაკუჰოს მორიგი ტრიუმფი

Posted on სექტემბერი 30, 2013 by ამირან

მონღოლი იოკოძუნა ჰაკუჰოს 27-ე ტრიუმფით დასრულდა ტოკიოს რიოგოკუ კოკუგიკანში აკი ბაშოდ წოდებული წლის რიგით მე-5 სუპერტურნირი სუმოში. “თეთრმა ფენიქსმა” ჯერ კიდევ ბოლოსწინა (მე-14) ტურში გაიფორმა ოფიციალურად ჩემპიონობა, თუმცა ბაშოს ბოლო დღეს მაინც მოტივირებული გამოვიდა დოჰიოზე, თანამემამულე იოკოძუნა ჰარუმაფუჯის წინააღმდეგ და 14 მოგებით დაასრულა სექტემბრის ტურნირი.

ჰაკუჰო “მზიურ ცხენს” თავიდანვე მთელი ძალით ეკვეთა, კარგად დაიჭირა კორპუსით და კოტენაგეს მოხდენილი გდებით დოჰიოზე დასცა. შედეგად, ჰარუმაფუჯიმ მე-5 მარცხი მიითვალა ბაშოზე, ბოლო 4 ტურნირზე კი საერთო ჯამში 20 წაგება მოუგროვდა, რაც იოკოძუნას ტიტულის მფლობელისათვის ზედმეტად ბევრია. არაა გამორიცხული, რომ 29 წლის მონღოლმა ძალიან მალე მიიღოს სუმოს მამებისაგან დიდი სუმოდან წასვლის “რეკომენდაცია”, რომელიც ფაქტიურად სავალდებულო მოთხოვნის ტოლფასია და სუმოისტი ვალდებულია უსიტყვოდ დაემორჩილოს მას.

რაც შეეხება “თეთრ ფენიქსს”, მან წლეულს მიჯრით მე-4 ბაშო მოიგო, საერთო ჩემპიონობათა რიცხვი 27-მდე გაზარდა და ნელ-ნელა უახლოვდება ლეგენდარული იოკოძუნა ტაიჰოს აბსოლუტურ რეკორდს, რომელიც 32 საჩემპიონო ტიტულს ითვლის.

დაჯილოდვების ცერემონიალზე ჰაკუჰომ პირველ რიგში იაპონელებს 2020 წლის ოლიმპიადაზე განაცხადებში ტოკიოს გამარჯვება მიულოცა და გამოტყდა, რომ ოცნებობს თავისი კარიერის სწორედ ამ დრომდე გაგრძელებაზე. მან ისიც აღნიშნა, რომ 45 წლის წინ მეხიკოს ოლიმპიურ თამაშებზე მისმა მამამ ვერცხლის მედალი აიღო.

სამწუხაროდ, მარცხით დაასრულა აკი ბაშოზე გამოსვლა ქართველმა გოლიათმა, გაგა ჯუღელმა. გაგამარუმ თავისი ბოლო შერკინება მისთვის ერთ-ერთ ყველაზე უხერხულ მეტოქე, იაპონელ ჰომაშოსთან (დ-მ13) დათმო იორიკირით და საბოლოოდ 9 წაგება მიითვალა ბაშოზე (6 მოგების საპირისპიროდ), რაც მე-9 მაეგაშირას სტატუსის სეკიტორისთვის საკმაოდ ცუდი შედეგია.

აღნიშნული რეზულტატი დაახლოებით 2-დან 4 საფეხურამდე დააქვეითებს გაგას მომდევნო ბაშოსთვის რეიტინგში, რომელიც ოფიციალურად 28 ოქტომბერს გამოქვეყნდება.

რაც შეეხება ჩვენს მეორე სეკიტორს, ლევან გორგაძეს, იგივე ტოჩინოშინს, მან როგორც იცით, ივლისის ბაშოზე მიღებული ტრავმის გამო სექტემბრის ტურნირი, რომელზეც ჯურიოს დივიზიონის პირველ ნომრად იყო განთესილი, სრულად გამოტოვა. მოგეხსენებათ, გამოტოვებული ორთაბრძოლები სუმოში წაგების ტოლფასად ითვლება და შესაბამისად, ლევანს მკვეთრად დააქვეითებენ მომდევნო ბაშოსთვისაც. თუმცა, შესაძლებელია, რომ დივიზიონი მაინც არ დაატოვებინონ და ჯურიოს მე-14 ნომრის სტატუსი მიანიჭონ.

როგორც ჩვენთვის ცნობილია, ტოჩინოშინმა უკვე გაიკეთა ოპერაცია ტრავმირებულ მუხლზე და აღდგენითი პროცესი საკმაოდ ნორმალურად მიდის. სხვათა შორის, ლევანმა იძულებითი პაუზით ისარგებლა და მუხლთან ერთად ოპერაცია ნატკენ იდაყვზეც გაიკეთა, რომელიც ქრონიკულად აწუხებდა ბოლო წლებში. მისი სრულად გამოჯანმრთელების ზუსტი ვადა ჯერ-ჯერობით უცნობია, თუმცა თუ ყველაფერი კარგად იქნა, სავარაუდოდ იანვრის ბაშოსთვის უნდა შეძლოს დოჰიოზე დაბრუნება.

სექტემბრის ბაშოს ვიცე-ჩემპიონები 11-11 მოგებით იაპონელი ოძეკი კისენოსატო და იაპონელი სეკივაკე გოიდო გახდნენ. ამ უკანასკნელმა ერთ-ერთი საუკეთესო ტურნირი ჩაატარა კარიერაში და ვიცე-ჩემპიონობასთან ერთად, ბრწყინვალე ასპარეზობისთვის დაწესებული სპეციალური პრიზი, შუკუნ-შოც დაიმსახურა.

აქვე გეტყვით, რომ მებრძოლი სულის გამოვლენისათვის დაწესებული პრიზი, კანტო-შო იაპონელმა პირველმა მაეგაშირა, შოჰოძანმა მიიღო, რომელმაც ტურნირზე 1 იოკოძუნა, 2 ოძეკი და თითო სეკივაკე-კომუსუბი დაამარცხა.

შოჰოძანი მომდევნო ბაშოზე კომუსუბის ტიტულით მოგვევლინება.

რაც შეეხება მესამე სპეციალურ პრიზს, გინო-შოს, რომელიც ტექნიკური ორთაბრძოლების ჩვენებისათვის გადაეცემათ სუმოისტებს, იგი ამჯერად გაუცემელი დარჩა.

წლის დასკვნითი სუპერტურნირი, რომელიც კიუშუ ბაშოს სახელითაა ცნობილი, ქალაქ ფუკუოკას საერთაშორისო ცენტრში 10-დან 24 ნოემბრის ჩათვლით გაიმართება.

გაგამ მაკე-კოში გაიფორმა, ჰაკუჰომ – ჩემპიონობა

Posted on სექტემბერი 29, 2013 by ამირან

ქართველმა გოლიათმა გაგა ჯუღელმა, სამწუხაროდ, ვერ შეძლო ჩვენი იმედების გამართლება, დადებით ბალანსზე გასვლასთან დაკავშირებით და ბაშოს დასრულებამდე 1 ტურით ადრე მაკე-კოში (უარყოფითი ბალანსი) გაიფორმა, რაც მე-9 მაეგაშირად განთესილ ჩვენებურს რეიტინგში კიდევ უფრო დააქვეითებს მომდევნო ტურნირისთვის.

აკი ბაშოს მე-14 ტურში გაგამარუ იაპონელ ტამაასუკასთან იორიკირით დამარცხდა. ჩვენმა გოლიათმა იაპონელი მე-15 მაეგაშირას მიძალებას ვერაფერი დაუპირისპირა და შერკინებიდან 6 წამში ტავარას (დოჰიოს ხაზი) მიღმა აღმოჩნდა. არადა, ტამაასუკა ნამდვილად არ განეკუთვნებოდა გაგასთვის უძლეველი ან უხერხული მეტოქეების რიცხვს, რაც კიდევ უფრო გულდასაწყვეტია.

თუ დღეს გაგა ბოლო შერკინებას მოგებას მაინც მოახერხებს, რეიტინგში უკუსვლა შედარებით მცირე ექნება. თუმცა, დღეს მას ერთ-ერთ ყველაზე უხერხულ მეტოქე, იაპონელ ჰომაშოსთან მოუწევს დაპირისპირება. დღემდე იაპონელთან გამართული 8 ორთაბრძოლიდან რვავე (!!!) წაგებული აქვს ჩვენებურს.

ამასობაში, იოკოძუნა ჰაკუჰომ ბაშოს დასრულებამდე 1 დღით ადრე ნაადრევად გაიფორმა ჩემპიონობა და დღეს უკვე ოფიციალურად, 27-ედ ჩაიბარებს იმპერატორის თასს! ამ მიღწევით იგი ნელ-ნელა უახლოვდება ლეგენდარული იოკოძუნების, ტაიჰოსა და ჩიონოფუჯის აბსოლუტურ რეკორდებს, რომელთაც შესაბამისად 32 და 31 ბაშო აქვთ კარიერაში მოგებული. მონღოლ იოკოძუნას კი, როგორც ჩანს, მათი რეკორდების დამხობა დაუსახავს მიზნად, რაც მისი ასაკიდან და სპორტული ფორმიდან გამომდინარე სავსებით რეალურად მოჩანს.

დღის ცენტარლურ პაექრობაში “თეთრმა ფენიქსმა” მისი უახლოესი მდევარი და საჩემპიონო რბოლაში უშუალო კონკურენტი, იაპონელი ოძეკი კისენოსატო ჰატაკიკომით დასცა დოჰიოზე და ყველა კითხვას საბოლოოდ გასცა პასუხი.
ჰაკუჰო: 13 მოგება, 1 მარცხი.
კისენოსატო, ჰარუმაფუჯი, გოეიდო: 10 მოგება, 4 მარცხი.

სექტემბრის ბაშო ოფიციალურად დღეს დასრულდება.

გაგა კაჩი-კოშის შანსს ინარჩუნებს, ჰაკუჰო კი ჩემპიონობას მიუახლოვდა

Posted on სექტემბერი 28, 2013სექტემბერი 28, 2013 by ამირან

ქართველი სუმოისტი გაგა ჯუღელი დადებითი ბალანსის მოპოვების შანსს კვლავ ინარჩუნებს. ამისათვის გაგამარუმ ორივე დარჩენილი ბრძოლა უნდა მოიგოს აკი ბაშოზე.

თავისი მე-6 გამარჯვება ჩვენმა გოლიათმა გუშინ იაპონელ მე-12 მაეგაშირა, ტენკაიჰოსთან იზეიმა. გაგამ საკმაოდ ჭკვიანურად წარმართა გუშინდელი ორთაბრძოლა და იაპონელი გოლიათი ჰატაკიკომით დასცა დოჰიოზე.

პასივში ჩვენებურს ისევ 7 მარცხი რჩება და როგორც გითხარით, თუკი კაჩი-კოშის გაფორმება სურს, ორივე ორთაბრძოლის მოგება მართებს.

პირველ მათგანს გაგა იაპონელ მე-15 მაეგაშირა, ტამაასუკასთან გამართავს დღეს, რომელსაც უკვე 8 მარცხი აქვს ბაშოზე და სავარაუდოდ, ჯურიოში დაქვეითებას ვერ აცდება. ჩვენი გოლიათი იაპონელს აქამდე 3-ჯერ შეხვედრია დოჰიოზე და აქედან 2-ჯერ დამარცხებული ყავს. მეორე მეტოქის ვინაობა მოგვიანებით გახდება ცნობილი.

ძალიან მიუახლოვდა თავის 27-ე საჩემპიონო ტიტულს მონღოლი იოოკოძუნა ჰაკუჰო, რომელმაც გუშინ თანამემამულე ოძეკი კაკურიუს სძლია და მე-12 მოგება მიითვალა ბაშოზე (13 შესაძლებლიდან). მისმა უახლოესმა მდევარმა, იაპონელმა ოძეკი კისენოსატომ კი მე-3 მარცხი იწვნია და უკვე 2 მოგებით ჩამორჩება “თეთრ ფენიქსს”. კისენოსატოს დამარცხება ამჯერად მისმა თანამემამულე სეკივაკე გოეიდომ შეძლო, რომელიც საკმაოდ კარგად გამოიყურება მიმდინარე ტურნირზე.

იაპონელი ოძეკი ჰაკუჰოსთან ჩამპიონობაში შეცილებას მხოლოდ იმ შემთხვევაში შეძლებს, თუკი იგი დარჩენილ ორივე ბრძოლას მოიგებს, ხოლო მონღოლი იოკოძუნა ორივეში დამარცხდება. ასეთ შემთხვევაში კისეს და ჰაკუჰოს თანაბარი 12-12 მოგება მოუგროვდებათ და აკი ბაშოს ჩემპიონის ვინაობას მათ შორის დანიშნული დამატებითი ორთაბრძოლა, იგივე კეტტეი-სენი გადაწყვეტს. თუმცა, ჯერ მანამდე კისემ განრიგით დანიშნულ მე-14 ტურის შერკინებაში უნდა დაამარცხოს “თეთრი ფენიქსი”, ხოლო დანარჩენ შესაძლებლობებზე მერე ვისაუბროთ.

მოკლედ, საკმაოდ საინტერესო ფინიში გველის ამ შაბათ-კვირას, ბაშოზე.

გაგა ისევ უარყოფითზე გავიდა

Posted on სექტემბერი 26, 2013სექტემბერი 26, 2013 by ამირან

ტოკიოს რიოგოკუ კოკუგიკანში მიმდინარე აკი ბაშოზე 11 ტური მიილია, ხოლო დაძაბულობა კი დღითი-დღე მატულობს და პიკს აღწევს.

როგორც ჩანს, ნერვიულობა ტურნირის ბოლომდე მოგვიწევს ქართველ გულშემატკივრებასც, რადგან ზედიზედ მოგებული 4 ორთაბრძოლის შემდეგ, მე-2 მარცხი იწვნია მიჯრით ჩვენმა გაგამარუმ და ისევ უარყოფით ბალანსზე გავიდა (5-6).

მართალია, ჩვენმა გოლიათმა მონღოლ მე-16 მაეგაშირა ტამავაშისთან შერკინება საკმაოდ აქტიურად და აგრესიულად დაიწყო, თუმცა ერთ-ერთი მიძალებისას მეტოქემ ჭკუა იხმარა, განზე გადგა, წონასწორობა დააკარგვინა გაგას და ოშიდაშით მარტივად გაიყვანა დოჰიოდან.

გაგამარუს მომდევნო მეტოქე კიდევ ერთი მონღოლი, მე-5 მაეგაშირას სტატუსით მოასპარეზე, ტოკიტენკუ იქნება, რომელთან ურთიერთშეხვედრებშიც (წინამორბედის მსგავსად) ქართველ გოლიათს მკვეთრად უარყოფითი სტატისტიკა აქვს – აქამდე შემდგარი 9 დაპირისპირებიდან 7 მონღოლის სასარგებლოდ დასრულდა და მხოლოდ 2-ში იმარჯვა გაგამ. მოახლოებულ შეხვედრაში ჩვენებურის მდგომარეობას ისიც ართულებს, რომ ტოკიტენკუს მხოლოდ 1 მარცხი აშორებს მაკე-კოშამდე (უარყოფითი ბალანსი) და ყველაფერს გააკეთებს იმისთვის, რომ ეს მარცხი გაგასთან არ იწვნიოს.

ძალიან დაძაბული მდგომარეობაა სატურნირო ცხრილის სათავეშიც. 11 ორთაბრძოლიდან 10 მოგებით ბაშოს ერთპიროვნულად ლიდერობს მონღოლი იოკოძუნა ჰაკუჰო, რომელსაც 9-9 მოგებით კვალში უდგანან მეორე მონღოლი იოკოძუნა, ჰარუმაფუჯი და იაპონელი ოძეკი, კისენოსატო. 8 მოგებითა და 3 მარცხით იქვეა კიდევ ერთი მონღოლი, ოძეკი კაკურიუ.

არ დაგვავიწყდეს, რომ ლიდერებს ერთმანეთთან ორთაბრძოლები ჯერ კიდევ წინა აქვთ, ამიტომ ძალიან დაძაბული და სანახაობრივი ფინიში გველის ბაშოზე.

გაგამარუ დადებით ბალანსზე გავიდა

Posted on სექტემბერი 24, 2013 by ამირან

იაპონიაში მიმდინარე სექტემბრის ბაშოზე ქართველმა გოლიათმა, გაგა ჯუღელმა მიჯრით მეოთხე (ჯამში კი მეხუთე) გამარჯვება იზეიმა და დადებით ბალანსზე გავიდა. აღმოსავლეთის მე-9 მაეგაშირად განთესილმა გაგამარუმ ძალიან კარგი და თან არცთუ იოლი ორთაბრძოლა მოუგო თავის მეგობარ, რუს (წარმოშობით ვლადიკავკაზელ) არანს (იორიკირით), რომელიც მე-7 მაეგაშირას სტატუსით ირჯება.

ორთაბრძოლის სტარტზე გაგას საკმაოდ რთული შეტევის მოგერიება მოუხდა ალან გაბარაევისგან, რის შემდეგაც ჩვენებურმა კარგად დაიჭირა მეტოქე მკლავებით და ეტაპობრივი შეტევა განახორციელა მასზე. როდესაც ჯუღელმა დოჰიოს კიდესთან მიიყვანა არანი, ზედ ტავარაზე (დოჰიოს ხაზი) შემდგარმა რუსმა კიდევ ერთხელ გაიბრძოლა და ბოლომდე სცადა წინააღმდეგობის გაწევა, თუმცა ჩვენი გოლიათის შეუპოვარმა მიძალებამ სასურველი შედეგი გამოიღო და მეტოქეც ტავარას მიღმა აღმოჩნდა.

ამ გამარჯვებით გაგამ მიმდინარე ბაშოზე პირველად მოახერხა დადებით ბალანსზე გასვლა (5-4) და იმედია, ბოლომდე შეინარჩუნებს მას.

ჩვენებურის მომდევნო მეტოქე იაპონელი გოლიათი, მე-12 მაეგაშირა სადანოფუჯი იქნება, რომელსაც ბაშოზე ზუსტად გაგასნაირი ბალანსი აქვს (5-4). ურთიერთშეხვედრებში მცირე უპირატესობას იაპონელი ფლობს – 4:2.

სატურნირო მდგომარეობაში კი დაუმარცხებლად მოასპარეზე მონღოლმა იოკოძუნა ჰაკუჰომ კიდევ უფრო განიმტკიცა ლიდერობა და ახლა უკვე მთელი 2 მოგებით უსწრებს უახლოეს მდევრებს: თანამემამულე იოკოძუნა ჰარუმაფუჯის, იაპონელ ოძეკი კისენოსატოს (რომელიც გუშინ მე-3 მაეგაშირა ჩიოტაირიუსთან დამარცხდა), კიდევ ერთ მონღოლ, მე-6 მაეგაშირა კიოკუტენჰოსა და იაპონელ მე-13 მაეგაშირა ჰომაშოს.

გაგამ ბალანსი გაანულა

Posted on სექტემბერი 23, 2013 by ამირან

ტოკიოში მიმდინარე სექტემბრის ბაშოზე ნაკაბი, ანუ იგივე შუაწელი (მე-8 ტური) მიილია და ორთბძოლებიც ნელ-ნელა დასკვნით ფაზაში გადადის.

ლიდერთა ჯგუფს ორი სუმოისტი გამოეყო, რომლებიც რეალურად ბაშოს მოგების უმთავრესი კანდიდატები იყვნენ თავიდანვე და დღესაც მთავარ პრეტენდენტებად რჩებიან. ესენი არიან: იოკოძუნა ჰაკუჰო, რომელიც კვლავ დაუმარცხებლად მიიწევს 27-ე საჩემპიონო ტიტულისკენ და ოძეკი კისენოსატო, რომელსაც მხოლოდ 1 მარცხი აქვს ჯერ-ჯერობით პასივში.

რაც შეეხება ჩვენს გაგამარუს, მან საკმაოდ რთული და მეტად მნიშვნელოვანი ორთაბრძოლა მოიგო გუშინ. გაგამ იაპონელთა ამომავალი ვარსკვლავი, მე-13 მაეგაშირად განთესილი, 23 წლის ენდო დაამარცხა, ოშიტაოშის ილეთით და ნულოვან ბალანსზე გავიდა.

ქართული სახელის (შოთა) მქონე იაპონელს, ჩვენმა გოლიათმა თავიდანვე აქტიურად შეუტია და აიძულა ნელ-ნელა უკან დაეხია. მალევე გაგამ დოჰიოს კიდესთან მიიმწყვდია მეტოქე და მძლავრად მოქნეული მჯიღით დარბაზში გადაუშვა.

ეს უკვე ზედიზედ მე-3 გამარჯვება იყო გაგასთვის, სულ კი ქართველ გოლიათს 4 მოგება მოუგროვდა ბაშოზე, ამდენივე მარცხის საპირისპიროდ. სასიხარულოა, რომ ცუდად აღებული სტარტის შემდეგ, ჩვენი სეკიტორი ნელ-ნელა იუმჯობესებს მდგომარეობას.

გაგამარუს მომდევნო მეტოქე რუსეთის სახელით მოასპარეზე, წარმოშობით ოსი სუმოისტი, არანი (იგივე ალან გაბარაევი) იქნება, რომელიც მე-7 მაეგაშირად გახლავთ განთესილი. გაგას მასთან საკმაოდ მეგობრული ურთიერთობა აკავშირებს, დოჰიოს მიღმა, თუმცა დოჰიომ მეგობრობა არ იცის და შერკინებისას ყველა მეტოქე მეტოქეა. ამაზე მეტყველებს მათი ურთიერთშეხვედრათა უკომპრომისო დაპირისპირების ისტორიაც, სადაც ჩვენებურს მცირე უპირატესობა აქვს ალანიელთან – 4:3. სათქმელია ისიც, რომ გაბარაევი არცთუ დამაჯერებლად გამოიყურება მიმდინარე ბაშოზე – მის ანგარიშზე ამ დროისათვის 3 მოგება და 5 მარცხია.

გაგამარუ მდგომარეობას ასწორებს

Posted on სექტემბერი 22, 2013სექტემბერი 23, 2013 by ამირან

სუმოს მექად აღიარებულ ტოკიოს რიოგოკუ კოკუგიკანში გრძელდება აკი (სექტემებრის) ბაშოდ წოდებული წლის რიგით მე-5 სუპერტურნირი სუმოში. უკვე ზუსტად 1 კვირა მიილია ბაშოს დაწყებიდან და შეიძლება ითქვას, რომ ასპარეზობებს დღითი-დღე ემატება სანახაობრივი ეშხი.

ჩვენთვის რაც ყველაზე მნიშვნელოვანია, ქართველმა სუმოისტმა გაგა ჯუღელმა ცუდად აღებული სტარტის შემდეგ, შედარებით გამოისწორა მდგომარეობა და ამ მომენტისთვის უკვე 3 მოგება აქტივში, 4 მარცხის წილ.
აღმოსავლეთის მე-9 მაეგაშირას სტატუსით მებრძოლმა ქართველმა გოლიათმა ბოლო ორ ტურში ერთმანეთის მიყოლებით დაამარცხა ორი ყოფილი სეკივაკე, იაპონელი მე-7 მაეგაშირა ტოიონოშიმა და ასევე იაპონელი მე-15 მაეგაშირა, ვაკანოსატო.

ექს-სეკივაკე ტოიონოშიმა გაგამარუსთვის ერთ-ერთი ყველაზე უხერხული მეტოქეა – ამ შერკინებამდე გაგას მასთან ჩატარებული ექვსივე ორთაბრძოლა წაგებული ჰქონდა, ხოლო გუშინ კი, როგორც იქნა, მოახერხა და გატეხა ნავსი.

იაპონელი სეკიტორი მთელი ორთაბრძოლის მანძილზე თავს არიდებდა ჩვენებურთან ხელჩართულ დაპირისპირებაში შესვლას და თავქუდმოგლეჯილი გაურბოდა გაგას მძლავრ ტორებს, დოჰიოს ერთი კიდიდან მეორემდე. საბოლოოდ კი ჩვენმა გოლიათმა, ერთ-ერთი აქტიური მიძალებისას, ოშიდაშით მიაბრძანა დოჰიოდან ტოიონოშიმა.

რაც შეეხება გაგამარუსა და ვაკანოსატოს დაპირისპირებას, აქ კიდევ უფრო იოლად იმარჯვა ჩვენებურმა. გაგამ თავიდანვე აქტიურად შეუტია მობერებულ იაპონელს და დაახლოებით 5 წამი დასჭირდა იმისთვის, რომ მეტოქე დოჰიოდან გაეძევებინა, ოკურიდაშის ილეთით.

ქართველი გოლიათის შემდეგი მოწინააღმდეგე მაკუუჩი დივიზიონის დებიუტანტი, იაპონელთა ახალი იმედი, მე-13 მაეგაშირა, ენდო შოთა იქნება. ეს უკანასკნელი მხოლოდ მე-4 ბაშოს ატარებს პროფესიულ სუმოში და უკვე მოახერხა იაპონელ ქომაგთა გულების დაპყრობა. დებიუტანტობის მიუხედავად, 23 წლის ენდო უმაღლეს დივიზიონში ძალიან ყოჩაღად გამოიყურება – ქართული სახელის მატარებელ იაპონელს 7 ჩატარებული ორთაბრძოლიდან 5 აქვს მოგებული.

მის ქართულ სახელს რაც შეეხება, იგი დიდი ქართველი ძიუდოისტის, შოთა ჩოჩიშვილის საპატივცემულოდ ატარებს მას. სტაჟიან გულშემატკივარს კარგად ემახსოვრება, რომ 80-იან წლებში ლეგენდარულმა ქართველმა ფალავანმა ძიუდოს სამშობლოში გამართულ მსოფლიოს ჩემპიონატზე უდიდესი ფურორი მოახდინა და ადგილობრივ ქომაგებს მეტად შეაყვარა თავი, რის შემდეგაც იაპონიაში დაბადებული ბიჭების საკმაოდ დიდ რაოდენობას მისივე პატივსაცემად, სახელად შოთას არქმევდნენ. სავარაუდოდ, სწორედ ერთ-ერთი იმ თაობის წარმომადგენელი გახლავთ გაგამარუს ხვალინდელი მეტოქე – ენდო შოთა.

რაც შეეხება სატურნირო მდგომარეობას, 7 ტურის თავზე აკი ბაშოს დაუმარხებლად ლიდერობს მონღოლი იოკოძუნა ჰაკუჰო. მას კვალში თითო წაგებით სამი სეკიტორი უდგას: იაპონელი ოძეკი კისენოსატო, მონღოლი ოძეკი კაკურიუ და იაპონელი მე-8 მაეგაშირა იოშიკაძე. მეორე მონღოლ იოკოძუნა ჰარუმაფუჯის კვლავინდებურად 2 წაგება აქვს პასივში. 2 მარცხი აქვს ასევე იაპონელ ოძეკი კოტოშოგიკუსაც, ხოლო ბულგარელმა ოძეკი კოტოოშუმ, რომელიც მისი თანაგუნდელია სადოგატაკეს სკოლიდან, მე-5 ტურში მიღებული ტრავმის გამო ასპარეზობა ნაადრევად შეწყვიტა და ტურნირიდან თავი მოიხსნა. თუმცა, არ არის გამორიცხული, რომ კოტოოშუმ, რომელსაც 4 გამარჯვება აქვს ტურნირზე, ტრავმა მალე მოიშუშოს და ბაშოს დასკვნით დღეებში კვლავ დაბრუნდეს დოჰიოზე.

შეგახსენებთ, რომ აკი ბაშო 29 სექტემბერს დასრულდება.

ჰარუმაფუჯის მეორე და გაგას მესამე მარცხი

Posted on სექტემბერი 19, 2013სექტემბერი 19, 2013 by ამირან

ტოკიოში მიმდინარე სექტემბრის ბაშოზე მოპოვებულ პირველ გამარჯვებას, სამწუხაროდ, ისევ მარცხი მიაყოლა გაგა ჯუღელმა. ქართველი გოლიათი იმ მასუნოიამასთან (ა-მ14) დამარცხდა, რომელსაც აქამდე ფაქტიურად ყველგან უგებდა, სადაც შეხვდებოდა და ამ მარცხის მიზეზი მეტოქის აქტიურობაზე უფრო მეტად, თავად ჩვენებურის პასიურობა გახლდათ.

გაგამარუმ უკვე მე-4 ორთაბრძოლა ჩაატარა ბაშოზე და ჯერ-ჯერობით მისი საფირმო, ერთი ამოსუნთქვით მიძალება ვერ ვიხილეთ. მასუნოიამასთანაც რატომღაც ჩვეულ სტილს არ მიმართა გაგამ, რითაც ბუნებრივია ისარგებლა მეტოქემ და აქტიურად შეუტია ჩვენებურს. თავიდან იაპონელი იორიკირით ცდილობდა ტავარას მიღმა გაგამარუს გაყვანას. თუმცა, შემდეგ უფრო მარტივი გამოსავალი მონახა, ოდნავ უკან დაიხია და უვატენაგეთი დასცა დოჰიოზე ქართველი გოლიათი.

გაგას მომდევნო მეტოქე “პატარა ტანკად” წოდებული, იაპონელი მე-11 მაეგაშირა, ტაკეკაძე იქნება, რომელსაც ურთიერთშეხვედრებში 6:3-ს უგებს ჩვენი ჯილა. თუმცა, თუ გაგამარუმ თავის ბრძოლაში რაღაც არ შეცვალა და ოდნავ არ გააქტიურდა, ძნელია რაიმე წარმატებაზე ფიქრი.

ბაშოს მე-4 დღე მთელი რიგი სენსაციებითა და მოულოდნელი შედეგებით იყო აღნიშნული, თუმცა მთავრი სენსაცია დღის დასკვნით ორთაბრძოლაში ელოდა გულშემატკივარს, სადაც მონღოლმა იოკოძუნა ჰარუმაფუჯიმ კიდევ ერთი შერკინება დათმო, ამჯერად ბულგარელ გოლიათ, აოიამასთან და მეორედ მოიყვანა “ბალიშების წვიმა” კოკუგიკანის დარბაზში. საქმეს ისეთი პირი უჩანს, რომ მონღოლს ალბათ ბაშოს დასრულებისთანავე მისცემენ სუმოს მამები “რეკომენდაციას”, დიდი სუმოდან წასვლაზე, თუკი რა თქმა უნდა დარჩენილ ორთაბრძოლებში ჰარუმაფუჯიმ რაიმე არ შეცვალა და რადიკალურად არ გარდაიქმნა, რაც ფსიქოლოგიური წნეხის ფონზე, კიდევ უფრო რთული იქნება მისთვის.

ჰარუმაფუჯის მარცხამდე თავისი ორთაბრძოლა წააგო აქამდე დაუმარცხებელმა ორმა ოძეკიმ – კოტოშოგიკუმ და კაკურიუმ. იაპონელ ოძეკის თანამემამულე სეკივაკე გოეიდომ სძლია, ხოლო მონღოლ ოძეკის იაპონელმა კომუსუბი ტოჩიოძანმა აჯობა.

ამრიგად, 4 დღის თავზე აკი ბაშოს 4 დაუმარცხებელი სეკიტორი შემორჩა: მონღოლი იოკოძუნა ჰაკუჰო (რომელიც კვლავ შთამბეჭდავ ფორმაშია და თავის 27-ე საჩემპიონო ტიტულს უმიზნებს), ბულგარელი ოძეკი კოტოოშუ, მონღოლი მე-6 მაეგაშირა კიოკუტენჰო და იაპონელი მე-8 მაეგაშირა იოშიკაძე.

პირველი გამარჯვება აკი ბაშოზე

Posted on სექტემბერი 18, 2013 by ამირან

იაპონიის დედაქალაქში მიმდინარე საშემოდგომო ბაშოს მე-3 დღე პირველი გამარჯვების მომტანი აღმოჩნდა თეიმურაზ ჯუღელისათვის. აღმოსავლეთის მე-9 მაეგაშირას სტატუსით მოასპარეზე ქართველმა გოლიათმა აღმოსავლეთის მე-8 მაეგაშირა, იაპონელი გოლიათი, ფუჯიაძუმა მძლავრი მიძალებით დაჯაბნა და ოშიტაოშის ილეთით დასცა დოჰიოზე.

უნდა აღინიშნოს, რომ ეს შერკინება გაგამარუსა და ფუჯიაძუმას შორის რიგით მე-5 იყო და გამარჯვება ხუთივეჯერ ჩვენ სუმოისტს დარჩა.

როგორც გითხარით, გაგასთვის ეს პირველი მოგება იყო მიმდინარე ბაშოზე, პასივში კი ისევ 2 მარცხი რჩება.

ჩვენებურის მომდევნო მეტოქე კიდევ ერთი მძიმეწონოსანი იაპონელი, მე-14 მაეგაშირად განთესილი, მასუნოიამა იქნება, რომელიც სუსტი ფილტვებითა და სუნთქვის უკმარისობით გამოირჩევა. იაპონელს აკი ბაშოზე ქართველის მსგავსი ბალანსი აქვს (1 მოგება, 2 მარცხი). აი ურთიერთშეხვედრებში კი ჩვენი სეკიტორი საგრძნობ უპირატესობას ფლობს – განვლილი 6 შერკინებიდან 5 გაგას სასარგებლოდ დასრულდა.

რაც შეეხება დღის სხვა შეხვედრებს, ბაშოს მე-3 დღესაც ფაქტობრივად ყველა ფავორიტმა გამარჯვება იზეიმა, გარდა იაპონელი ოძეკი კისენოსატოსი. იაპონელთა მთავარ იმედს თანამემამულე მე-2 მაეგაშირა ოკინოუმისთან შეემთხვა მარცხი.

3 დღის თავზე საერთო ჯამში 7 დაუმარცხებელი სუმოისტი ყავს სექტემბრის ბაშოს. ესენი არიან: იოკოძუნა ჰაკუჰო, ოძეკები – კაკურიუ, კოტოშოგიკუ, კოტოოშუ და რიგითი მაეგაშირები – კიოკუტენჰო, იოშიკაძე, ტამავაში.

გაგამარუს მეორე მარცხი და ბალიშების პირველი წვიმა ბაშოზე

Posted on სექტემბერი 16, 2013სექტემბერი 16, 2013 by ამირან

ტოკიოში მიმდინარე აკი ბაშოს მეორე დღეს ბალიშების პირველი “წვიმა” იხილა გულშემატკივარმა. როგორც იცით, ეს არის მოვლენა, როდესაც იოკოძუნა მარცხდება დოჰიოზე, ხოლო დარბაზში მყოფი პუბლიკა დამარცხებულ იოკოძუნას ბალიშების სროლით წასვლისკენ “მოუწოდებს”.

დღევანდელი დღე, გუშინდელის მსგავსად საკმაოდ მშვიდად მიმდინარეობდა – თავისი ორთაბრძოლა მოიგო ოთხივე ოძეკიმ და იოკოძუნა ჰაკუჰომ. და თითქოს არც მეორე იოკოძუნას, ჰარუმაფუჯის უნდა გაჭირვებოდა, დღის დასკვნით შერკინებაში, პირველი მაეგაშირა შოჰოძანის ძლევა… მაგრამ, მოხდა სენსაცია – იაპონელმა სეკიტორმა მონღოლ იოკოძუნას სასტარტო ჯახისთანავე ძალიან აგრესიულად შეუტია და უშეღავათო ბრძოლის შედეგად, ოშიდაშით დაატოვებინა დოჰიო.

სხვათა შორის, მიმდინარე წლის იანვრის ბაშოს შემდეგ “მზიური ცხენი” (ასე ითარგმნება ქართულად ჰარუმაფუჯი) საკმაოდ არადამაჯერებლად გამოიყურება. ბოლო 3 ბაშოზე მან საერთო ჯამში 15 ორთაბრძოლა წააგო, რაც საერთო გამართულ შერკინებათა ერთ მესამედს შეადგენს. ბუნებრივია, “უძლეველ ჩემპიონს” ამდენ წაგებას არავინ პატიობს და შესაბამისად, ჰარუმაფუჯიც ძალიან დიდი წნეხის ქვეშ იმყოფება, როგორც გულშემატკივრების, ასევე სუმოს მამების მხრიდან. არაა გამორიცხული, რომ თუკი “მზიური ცხენი” მიმდინარე ბაშოზეც დიდი რაოდენობის ორთაბრძოლებს დათმობს, იოკოძუნათა არჩევის კომიტეტმა მას აქტიური სპორტიდან წასვლის შესახებ “რეკომენდაციით” მიმართოს. ეს რეკომენდაცია კი პრაქტიკულად მოთხოვნის ტოლფასია და მისი მიღების შემდეგ, იოკოძუნა ვალდებულია დიდი სუმოდან წავიდეს.

ძალიან დასანანი მარცხი იწვნია დღეს ჩვენმა გაგამარუმ, იაპონელ მე-8 მაეგაშირა იოშიკაძესთან. აღმოსავლეთის მე-9 მაეგაშირად განთესილი ქართველი გოლიათი “ეშმაკური” ფანდებით ცნობილ ტანმორჩილ მეტოქეს საკმაოდ ჭკვიანურად უტევდა. თუმცა, ერთ-ერთი მიძალებისას, გაგა ჯუღელს იაპონელის მკერდზე ხელი აუსრიალდა და ინერციით დოჰიოზე დაეცა. ჩვენებურის ვარდნას იმანაც შეუწყო ხელი, რომ მიძალების მომენტში “ცბიერი” იოშიკაძე ოდნავ განზე გადგა, რაც საკმარისი აღმოჩნდა იმისთვის, რომ ჩვენს გოლიათს წონასწორობა დაეკარგა და დოჰიოს ხელით შეხებოდა.

საწყისი ორი მარცხის შემდეგ, გაგა მდგომარეობის გამოსწორებას ხვალ კიდევ ერთ იაპონელ მე-8 მაეგაშირა, ფუჯიაძუმასთან შეეცდება. ამ უკანასკნელს ბაშოზე თითო მოგება-წაგება აქვს ბალანსში. თუმცა, უნდა ითქვას, რომ ქართველი გოლიათი მისთვის უხერხულ მეტოქეთა რიცხვს განეკუთვნება. საქმე იმაშია, რომ ჯუღელი იაპონელს აქამდე 4-ჯერ შეხვდა დოჰიოზე და ოთხივეჯერ მარცხი აგემა. იმედი ვიქონიოთ, რომ ხვალაც შეძლებს ჩვენი გაგა ფუჯიაძუმას “გამწარებას”.

გაგამარუს მარცხიანი და ლიდერთა უდანაკრგო სტარტი

Posted on სექტემბერი 15, 2013 by ამირან

სუმოს მექად აღიარებულ ტოკიოს რიოგოკუ კოკუგიკანში დღეს სტარტი აიღო აკი (სექტემბრის) ბაშოდ წოდებულმა წლის რიგით მე-5 სუპერტურნირმა სუმოში.

სასტარტო დღემ ყოველგვარი სენსაციებისა და მოულოდნელობის გარეშე ჩაიარა. თავისი ორთაბრძოლა ფაქტიურად უკლებლივ ყველა ფავორიტმა მოიგო. გამარჯვება იზეიმა სანიაკუს (პირობითი კატეგორია, რომელიც 4 უმაღლესი ტიტულის – იოკოძუნას, ოძეკის, სეკივაკესა და კომუსუბის მატარებელ სუმოისტებს აერთიანებს) ყველა ბინადარმა, გარდა კომუსუბებისა, რომელთაც თავიანთი ორთაბრძოლები იოკოძუნებთან დათმეს.

ჩვენთვის სამწუხაროდ, სასტარტო დღე უიღბლო გამოდგა აღმოსავლეთის მე-9 მაეგაშირად განთესილი გაგამარუსთვის. ქართველი გოლიათი დასავლეთის მე-9 მაეგაშირა, კოტოიუკისთან დამარცხდა, ოშიდაშის ილეთით. 22 წლის იაპონელმა გაგა ჯუღელს თავიდანვე ძალიან მძლავრად შეუტია და რამდენიმე წამში გაიყვანა ტავარას (დოჰიოს ხაზი) მიღმა.

გაგამარუს შემდეგი მეტოქე იაპონელი მე-8 მაეგაშირა, იოშიკაძე იქნება, რომელთან ურთიერთშეხვედრებში ჩვენ სუმოისტს ჯერ-ჯერობით უარყოფითი ბალანსი აქვს. ჯუღელი ტანმორჩილ იაპონელს აქამდე 8-ჯერ შეხვედრია დოჰიოზე და მხოლოდ 3-ჯერ ყავს დამარცხებული. სხვთა შორის, იოშიკაძემ დღეს თავისი ორთაბრძოლა გამარჯვებით დაასრულა და ქართველ გოლიათს კარგ ხასიათზე ხვდება.

სექტემბრის ბაშო ტრადიციულად 15 დღეს გასტანს და 29 სექტემბერს დასრულდება.